བཙན་བྱོལ་བོད་མིའི་ཚོང་པ་ཚོགས་པའི་ཚོགས་ཆེན་ཐེངས་གསུམ་པ་ཚོགས།

རྒྱ་གར་རྒྱལ་ཡོངས་བཙན་བྱོལ་བོད་མིའི་ཚོང་པ་ཚོགས་པའི་སྒྲིག་ཁོངས་སུ་ས་གནས་ཁག་ ༡༤༦ ནས་ཁྱིམ་ཚང་ ༣༣༠༠ ལྷག་འཛུལ་ཞུགས་གནང་ཡོད་འདུག

དེ་རིང་སྔ་དྲོའི་ཆུ་ཚོད་ ༩།༣༠ སྟེང་། དྷ་ས་དབུས་གཙང་ཆོལ་ཁའི་ཚོགས་ཁང་དུ། བཙན་བྱོལ་བོད་མིའི་ཚོང་པ་ཚོགས་པའི་གོ་སྒྲིག་འོག རྒྱ་གར་རྒྱལ་ཡོངས་བཙན་བྱོལ་བོད་མིའི་ཚོང་པ་ཚོགས་པའི་འགན་འཛིན་ལྷན་ཚོགས་ཀྱི་ཚོགས་འདུ་ཐེངས་གསུམ་པ་ཚོགས་སོང་ལ། སྐུ་མགྲོན་གཙོ་བོར་བོད་མིའི་སྒྲིག་འཛུགས་དཔལ་འབྱོར་དྲུང་ཆེ་འཕྲིན་ལས་རྒྱ་མཚོ་མཆོག་དང་བཙན་བྱོལ་བོད་མིའི་ཚོང་པ་ཚོགས་པའི་ཚོགས་གཙོ་ཀརྨ་དགེ་ལེགས་གཉིས་ཀྱི་གཙོས་པའི་གཞུང་འབྲེལ་མ་ཡིན་པའི་ཚོགས་པ་སྐྱིད་སྡུག་ཁག་གི་སྐུ་ཚབ། དེ་བཞིན་བཙན་བྱོལ་བོད་མིའི་ཚོང་པ་ཚོགས་པའི་ཚོགས་གཙོ་གཞོན་དང་རྒྱུན་ལས་རྣམ་པ་བཅས་མི་གྲངས་ ༢༠ འཛོམས་འདུག

མཛད་སྒོ་དབུ་འཛུགས་སྟེང་ཚོགས་གཙོ་ཀརྨ་དགེ་ལེགས་མཆོག་གིས་བཙན་བྱོལ་བོད་མིའི་ཚོང་པ་ཚོགས་པའི་བྱུང་རིམ་ངོ་སྤྲོད་གནང་བ་ལྟར་ན། ༢༠༠༦ ལོའི་ཕྱི་ཟླ་ ༨ ནང་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་གོ་སྒྲིག་འོག་རྒྱ་གར་གྱི་རྒྱལ་ས་ལྡི་ལིའི་ལུ་ཌེ་ཡ་ན་ (Ludhiana) གྲོང་ཁྱེར་དུ་ཚོགས་འདུ་བསྐོངས་པ་རེད། སྐབས་དེར་དཔལ་འབྱོར་ལས་ཁུངས་ཀྱིས་བཀའ་གནང་བ་ལྟར། རྒྱ་གར་ནང་གི་བོད་མི་སུད་ཚོང་བའི་ས་གནས་ཆེ་ཁག་ཡོངས་རྫོགས་ཀྱི་འཐུས་མི་ཕེབས་ཏེ་ཉིན་གཉིས་རིང་ཚོགས་འདུ་ཚོགས་པ་དང་། དེའི་མཐུན་རྐྱེན་ཆ་ཚང་དཔལ་འབྱོར་ལས་ཁུངས་ནས་བཏང་བ་རེད། ཚོགས་འདུའི་མཐའ་མ་དེར་ལོ་གཉིས་རེའི་ནང་འགན་འཛིན་ལྷན་ཚོགས་འཚོགས་དགོས་པའི་གྲོས་ཆོད་བྱུང་བ་དང་། ལོ་གཉིས་ནང་འགན་འཛིན་ལྷན་ཚོགས་ལ་ལས་འགན་ག་རེ་བཞག་ཡོད་པ་རེད་ཟེར་ན། ཚོང་པ་ཚོགས་པ་དེབ་སྐྱེལ་བྱེད་རྒྱུ་དེ་ཡིན་སྟབས་བཙན་བྱོལ་བོད་མིའི་ཚོང་པ་ཚོགས་པ་ (Tibetan Refugee Traders Association) འདི་ལུ་ཌེ་ཡ་ན་རུ་དེབ་སྐྱེལ་བྱས་པ་རེད། ད་ཆར་ང་ཚོ་བཙན་བྱོལ་བོད་མིའི་ཚོང་པ་ཚོགས་པའི་སྐབས་གསུམ་པའི་འགན་འཛིན་ལྷན་ཚོགས་ཆགས་ཡོད་པ་རེད། ཅེས་བརྗོད་སོང་།

ཁོང་གིས་ཚོགས་པའི་དམིགས་ཡུལ་སྐོར་ལ། སྒྲིག་འཛུགས་འདི་མུ་མཐུད་ཡར་རྒྱས་བཏང་བ་ཡིན་ན། བཙན་བྱོལ་བོད་མིའི་ཚོང་ལས་དང་ཚོང་ཁྲལ། ཚོང་རྫས་ཉོ་འཚོང་། ཁྲོམ་ར་གསར་འཛུགས་སོགས་ཕྱོགས་གང་ཐད་ནས་ཚོགས་པ་འདིས་འགན་འཁུར་གྱི་ཡོད་པ་རེད། དེ་བས་རྒྱ་གར་གྲོང་ཁྱེར་ལུ་ཌེ་ཡ་ན་རུ་བཙན་བྱོལ་བོད་མིའི་ཚོང་པ་ཚོགས་པའི་རྒྱབ་གཉེར་མེད་པའི་བོད་མི་སུད་ཚོང་བ་གཅིག་ཀྱང་ཡོད་པ་མ་རེད། འདས་པའི་ལོ་ངོ་གཅིག་དང་ཕྱེད་ཀའི་རིང་ལ་ང་ཚོ་བཙན་བྱོལ་མིའི་ཚོང་པ་ཚོགས་པའི་སྒྲིག་འཛུགས་ནང་རྒྱ་གར་ཡོངས་ཀྱི་བོད་མི་སུད་ཚོང་བའི་ས་གནས་ཁག་ ༡༤༦ གི་ཁྱིམ་ཚང་ ༣༣༠༠ ལྷག་འཛུལ་ཞུགས་གནང་ཡོད་པ་རེད། ཅེས་བརྗོད་བྱུང་།

ཡང་ཁོང་གིས་བཙན་བྱོལ་བོད་མི་སུད་ཚོང་བའི་དཀའ་རྙོག་སྐོར་ལ། ས་གནས་བོད་མི་དང་བོད་མི་མ་ཡིན་པའི་ཚོང་པ་ལ་ལ་ཞིག་གིས་ཕན་ཚུན་ལ་བུ་ལོན་གཡར་སྐྱིལ་བྱས་པ་དང་མཐའ་མ་དེར་བུ་ལོན་མ་སྤྲད་པའི་དཀའ་རྙོག་འབྱུང་གི་ཡོད་སྟབས། ད་ལན་ནས་ང་ཚོ་བཙན་བྱོལ་མིའི་ཚོང་པའི་སྐྱིད་སྡུག་ཚོགས་པ་འདིའི་ནང་ཡོད་བསྡད་པའི་བོད་མི་སུད་ཚོང་བ་ཚང་མར་ངོ་སྤྲོད་ལག་འཁྱེར་བཟོ་འཆར་ཡོད་ལ། ངོ་སྤྲོད་ལག་འཁྱེར་དེ་འདྲ་ཞིག་བཟོ་བར་སྐྱབས་བཅོལ་ལག་དེབ་ཡོད་ན་འགྲིག་གི་རེད་ལ་མེད་ནའང་འགྲིག་གི་རེད། འོན་ཀྱང་རང་བཙན་ལག་དེབ་ངེས་པར་དུ་དགོས་ཀྱི་ཡོད་པ་རེད། ཅེས་སོགས་བརྗོད་སོང་།

དེའི་རྗེས་དཔལ་འབྱོར་དྲུང་ཆེ་འཕྲིན་ལས་རྒྱ་མཚོ་ལགས་ཀྱིས་གསུང་བཤད་གནང་དོན། བཀའ་ཤག་གི་ངོས་ནས་བོད་མིའི་སྤྱི་ཚོགས་ནང་ཚོང་ལས་ཡར་རྒྱས་དང་རང་ཁ་རང་གསོ་དགོས་པའི་གནས་སྟངས་ལ་དགོངས་པ་བཞེས་ཀྱི་ཡོད་པ་རེད། བོད་མི་སུད་ཚོང་བའི་ཚོང་ལས་ཚོགས་པ་འདི་བཙུགས་ཏེ་དེབ་སྐྱེལ་གནང་དགོས་ཀྱི་འདུག་ལབ་པ་ལྟར་དེབ་སྐྱེལ་གནང་ཐུབ་པ་བྱུང་བ་རེད། དེ་བཞིན། ཕན་ཚུན་ལ་འབྲེལ་བ་བྱེད་པར་ལས་ཁུངས་ཤིག་ཀྱང་དགོས་ཀྱི་འདུག་ཅེས་མི་མང་གིས་གནས་ཚུལ་ཞུས་ཏེ། ༢༠༠༦ ལོའི་ཕྱི་ཟླ་ ༨ པའི་ནང་གྲོང་ཁྱེར་ལུ་ཌེ་ཡ་ན་རུ་ལས་ཁུངས་འཛུགས་ཐུབ་པ་བྱུང་བ་རེད། ལས་ཁུངས་ཤིག་བཙུགས་པ་ཡིན་ན་ལས་དོན་བྱེད་པ་དང་རྒྱུན་ལས་སོགས་ལ་འགྲོ་གྲོན་གང་ལ་གང་འཚམ་ཡོད་སྟབས། ཚོགས་པའི་ངོས་ནས་འབོད་སྐུལ་ཞུས་པ་ལྟར་ཐོག་མའི་ཆ་ལ་བཀའ་ཤག་ལྷན་རྒྱས་ནས་ཚོང་པ་ཚོགས་པའི་ལས་ཁུངས་འདིའི་ཆེད་དུ་མཐུན་འགྱུར་གང་ལ་གང་འཚམ་ཞིག་ལ་དགོངས་པ་བཞེས་གནང་འདུག མ་འོངས་པར་བོད་མི་སུད་ཚོང་བའི་ཚོང་ཁྲལ་གྱི་དཀའ་ངལ་དང་རྐྱེན་ངན་ག་རེ་བྱུང་བ་ཡིན་ན། ནང་སྲིད་ལས་ཁུངས་ངོས་ནས་མཐུན་རྐྱེན་གནང་གི་རེད། ཅེས་བརྗོད་སོང་།

ཁོང་གིས་མུ་མཐུད་དུ་གསུངས་དོན། ད་ཆར་ཚོགས་པ་འདིའི་ནང་ཚོགས་མི་ ༡༤༠ ལྷག་འཛུལ་ཞུགས་གནང་ཐུབ་པ་བྱུང་འདུག་ལ། ད་དུང་བོད་མི་སུད་ཚོང་ཚོགས་པའི་ནང་འཛུལ་ཞུགས་གནང་རྒྱུ་ཞེ་དྲགས་གལ་ཆེན་པོ་རེད། དེ་དམིགས་འདུན་གཅིག་རེད། དམིགས་འདུན་དེ་གཅིག་ཕན་གཅིག་གྲོགས་རེད། རྐྱེན་ངན་ག་རེ་བྱུང་བ་ཡིན་ན། ང་ཚོ་བོད་མིའི་སྒྲིག་འཛུགས་ཀྱི་ངོས་ནས་མར་འབྲེལ་བ་གནང་ས་དེ་བོད་མི་སུད་ཚོང་ཚོགས་པའི་ལས་ཁུངས་ཆགས་བསྡད་ཡོད་དུས། ལས་ཁུངས་དེའི་ནང་རྒྱུན་ལས་བཙུགས་ནས་ལས་ཀ་གནང་གི་ཡོད་པ་རེད། དེ་བཞིན་བོད་མི་སུད་ཚོང་བ་སྒེར་སོ་སོའི་ངོས་ནས་དཀའ་ངལ་ག་རེ་འཕྲད་པ་ཡིན་ན། ལམ་སང་ཞུ་གཏུག་བྱེད་ས་དེ་ཚོགས་པའི་ལས་ཁུངས་ཆགས་ཡོད་པ་རེད། ལས་ཁུངས་འདི་བརྒྱུད་ནས་རྒྱ་གར་གཞུང་ལ་ཞུ་དགོས་པ་དང་བོད་མིའི་སྒྲིག་འཛུགས་ལ་ཞུ་དགོས་པའི་གནད་དོན་ག་རེ་ཡིན་ནའང་། དེ་འདྲའི་ཐོག་ལ་ཕན་ཐོག་ཆེན་པོ་ཆགས་བསྡད་ཡོད་སྟབས། བོད་མི་སུད་ཚོང་བ་ཚང་མས་ཚོགས་པ་འདིའི་ནང་ཆ་ཤས་ལེན་རྒྱུ་གལ་ཆེན་པོ་རེད་བསམ་གྱི་འདུག ཅེས་སོགས་གསུང་སོང་།

གསར་འགོད་པ། པདྨ་རྒྱལ།