ཆུང་ཚེ་རིང་།
༄༅།། བདེ་སྲུང་བཀའ་བློན་འབྲོང་ཆུང་དངོས་གྲུབ་ལགས། བཀའ་བློན་ནས་དགོངས་ཞུ་གནང་བའི་གཞུང་འབྲེལ་གསལ་བསྒྲགས་དེ་མཐོང་བས། སྐབས་ཤིག་རིང་ཡིད་མ་ཆེས་པ་ཞིག་བྱུང་། དེ་ནས་ནོར་ཝེ་བོད་ཀྱི་རླུང་འཕྲིན་ཁང་སོགས་བཞུགས་སྒར་དུ་ཡོད་པའི་གསར་འགྱུར་བརྒྱུད་ལམ་ཁག་གིས་སྐུ་ངོ་མཆོག་གི་གཟིམ་ཤག་ཏུ་བཅར་ནས་ཁོང་སྐུ་ངོ་མར་དགོངས་ཞུ་གནང་དོན་བཅར་འདྲི་གནང་བ་དེ་མཇལ་བས། དགོངས་ཞུ་གནང་དགོས་རྒྱུ་མཚན་རྣམས་ཤེས། རྩོམ་ཡིག་འདི་ནི་སྐུ་ངོ་འབྲོང་ཆུང་དངོས་གྲུབ་ལགས་ཀྱིས། ད་ཕན་བོད་གཞུང་དམངས་དཀའ་ངལ་ཆེ་བའི་དུས་སྐབས་སུ། རང་གི་མི་ཚེའི་ནང་གི་དུས་སྐབས་ཡག་ཤོས་ཆ་ཚང་ཞབས་འདེགས་སུ་ཕུལ་བར། བསྔགས་བརྗོད་དང་ཡི་རང་ཞུ་ཆེད་བྲིས་པ་ལས་དེ་མིན་གྱི་དམིགས་ཡུལ་གང་ཡང་མེད།
ངས་འབྲོང་ཆུང་དངོས་གྲུབ་ལགས་ཀྱི་སྐོར་ཐོག་མར་ཐོས་ས་ནི། བོད་ནང་དུ་ཡིན། ང་དང་སྤུན་གྲོགས་བློ་བཟང་ལུང་རྟོགས་གཉིས་བཙན་བྱོལ་དུ་ཡོང་ཁར། བོད་ནང་བོད་དོན་ཆེད་ཕྱག་ལས་གནང་མཁན་གནད་ཡོད་ཅིག་ཡོད་པ་མཇལ་བར་སོང་། ཁོང་ལ་ངེད་གཉིས་རིང་མིན་རྒྱ་གར་ལ་སྐྱབས་བཅོལ་དུ་འགྲོ་རྩིས་ཡོད་ཅེས་ཞུས། ཁོང་གིས་དེ་མུར་བདེ་སྲུང་བཀའ་བློན་འབྲོང་ཆུང་དངོས་གྲུབ་ལ་ཞུ་རོགས་ཞེས་གསང་བའི་གནས་ཚུལ་འགའ་ཞིག་གསུངས་གནང་བྱུང་། རྒྱ་གར་དུ་སླེབས་རྗེས་གནས་ཚུལ་དེ་ཞུ་བར་བདེ་སྲུང་ལས་ཁུངས་སུ་བཅར་བ་ཡིན། སྐབས་དེ་དུས་ཕྱི་ལོ་ ༡༩༩༡ ལོའི་ལོ་མཇུག་ལ་རེད། འབྲོང་ཆུང་དངོས་གྲུབ་ལགས་དེ་དུས་བདེ་སྲུང་ལས་ཁུངས་ཀྱི་དྲུང་ཆེའི་ཡིག་ཚང་ནང་བཞུགས་འདུག་ཅིང་། ཁོང་གི་ཡིག་ཚང་ནང་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་དང་། བོད་ཀྱི་རྒྱལ་དར་ཆེན་པོ་ཞིག དེ་བཞིན་བོད་ཀྱི་ས་བཀྲ་བཅས་བཤམས་འདུག་པས། ཁོར་ཡུག་དེ་འདྲ་ཞིག་གི་ནང་བཙན་བྱོལ་བོད་གཞུང་གི་གནད་ཡོད་མི་སྣ་ཞིག་མཇལ་བ་མི་ཚེའི་ནང་ཐེངས་དང་པོ་ཡིན་པས་སེམས་པ་དགའ་ལྷང་ལྷང་བྱུང་། ཁོང་གིས་ངེད་གཉིས་རྐུབ་སྟེགས་ཐོག་སྡོད་བཅུག་པ་དང་སྦྲགས། ངེད་གཉིས་ཀྱི་སྐད་ཆར་ཐུགས་སྣང་ཧ་ཅང་ཆེན་པོས་གསན་གནང་སོང་། ལྷག་པར་དུ་བོད་ནང་གི་གནད་ཡོད་མི་སྣ་དེས་བསྐུར་བའི་གསང་འཕྲིན་རྣམས་ལ་དོ་དོ་ཏན་ཏན་གནང་སྟེ་གསན་པ་མ་ཟད་བརྗེད་ཐོ་ཡང་བསྐྱོན་སོང་བས་སེམས་ལ་བག་ཆགས་ཆེན་པོ་བྱུང་།
༡༩༩༥ ལོར་ང་རང་སློབ་གྲྭ་ཐོན་རྗེས་གངས་སྐྱིད་དུ་བོད་གཞུང་གི་ལས་བྱེད་པའི་ཁོངས་སུ་འཛུལ་ཞུགས་ཀྱིས་ཕྱི་ལོ་ ༢༠༡༤ བར་གཞུང་ཞབས་ཁོངས་སུ་བསྡད། དུས་ཡུན་དེའི་རིང་གངས་སྐྱིད་ལས་བྱེད་པ་ཀུན་དང་འདྲ་བར་སྐུ་ངོ་འབྲོང་ཆུང་དངོས་གྲུབ་ལགས་ལ་ཆ་རྒྱུས་བྱུང་ལ། ཆ་རྒྱུས་ཇི་ཙམ་བྱུང་བ་དེ་ཙམ་གྱིས་ཁོང་ལ་ཡིད་ཆེས་དང་གུས་བཀུར་གྱི་བསམ་བློ་ཆེ་རུ་སོང་། མ་གཞི་ང་རང་བདེ་སྲུང་ལས་བྱེད་མིན་པས། སྐུ་ངོ་འབྲོང་ཆུང་དངོས་གྲུབ་དང་ལས་དོན་ནང་དངོས་སུ་ཉིན་ནས་ཉིན་བསྟུད་དེ་གཤིབས་རྒྱུ་མ་བྱུང་ལ། སྒེར་གྱི་གྲོགས་འབྲེལ་ཟབ་མོ་ཆགས་ཏེ་རྟག་པར་མཇལ་མོལ་ཞུ་བའི་གནས་སྟངས་དེ་འདྲ་མ་བྱུང་ཡང་། ལོ་ངོ་བཅུ་གྲངས་རིང་གངས་སྐྱིད་ཀྱི་དཀྱིལ་འཁོར་གཅིག་ནང་མཉམ་དུ་གནས་པ་དང་། གལ་ཆེའི་གཞུང་འབྲེལ་འདུ་འཛོམས་དང་ཚོགས་འདུ་མང་པོར་ཕེབས་ཏེ་འགན་ཁུར་བཞེས་སྟངས། གནད་འགག་གི་སྐབས་སུ་གདོང་ལེན་གནང་སྟངས་རྣམས་ལོ་ནས་ལོ་བསྟུད་དེ་དངོས་སུ་མཐོང་མྱོང་ལ། གངས་སྐྱིད་ཀྱི་ལས་བྱེད་དོ་སྣང་ཅན་གཞན་ཚོས་ཀྱང་ང་བཞིན་དུ་གཟིགས་ཡོད་རེད།
སྐུ་ངོ་འབྲོང་ཆུང་དངོས་གྲུབ་ལགས་ལ་མི་ཚོས་གུས་བཀུར་ཆེན་པོ་ཞུ་དོན་གཙོ་བོ་ནི། ཁོང་གི་ལྟ་བ་དང་ལངས་ཕྱོགས། གཤིས་སྤྱོད་བཅས་གང་ཐད་ནས་ཧ་ཅང་བརྟན་པོ་རྡོ་རྗེའི་བྲག་དང་འདྲ་བ་ཞིག་ཡིན་པ་དེ་རེད། ཁོང་གི་ལངས་ཕྱོགས་ནི། ༸གོང་ས་༸སྐྱབས་མགོན་ཆེན་པོ་མཆོག་གི་ལམ་སྟོན་ཁག་ལ་ཤེས་ནས་ཡིད་ཆེས་ཐོབ་སྟེ། དེའི་འོག་ཐེ་ཚོམ་དང་ནེམ་ནུར་རྩ་བ་ནས་མེད་པར་ཕེབས་མཁན་ཞིག་རེད། ཁོང་གི་རང་བཞིན་ནི་རང་ཚུགས་ཟིན་པོ་དང་། སྨྲ་བ་ཉུང་ཉུང་། དོན་གནད་ཚང་མར་ཐུགས་སྣང་ཆེན་པོ། མི་མཐོ་དམན་ཀུན་ལ་མཐོང་ཆེན་དང་འབྲེལ་བ་འཛིན་མཁས་པོ་རེད། ལྷག་པར་དུ་བདེ་སྲུང་ལས་ཁུངས་ཀྱི་ཕྱི་ནང་གསང་བའི་ལས་དོན་ཁག་ཕྱི་གྱར་རྩ་བ་ནས་མེད་པར་དམ་འཛིན་གནང་ཐུབ་མཁན་ཞིག་ཡིན་སྟབས། བཙན་བྱོལ་ནང་ཙམ་མ་ཟད། བོད་ནང་གི་བོད་མི་ཚོས་ཀྱང་ཁོང་ལ་ཡིད་ཆེས་དང་གུས་བཀུར་ཆེན་པོ་ཞུ་གི་ཡོད།
བཙན་བྱོལ་ནང་སྡིངས་ཆའི་སྒང་ནས་སྐད་ཆ་སྙན་པོ་ཤོད་མཁན་མང་པོ་རེད་དེ། དོན་དངོས་གདོང་ལེན་བྱེད་དགོས་སར་ཐུག་དུས་མདུན་དུ་ཐོན་མཁན་ཉུང་ཉུང་རེད། འོན་ཀྱང་འབྲོང་ཆུང་དངོས་གྲུབ་ལགས་ནི་གདོང་ལེན་བྱེད་དགོས་པའི་གནད་དོན་གང་ལའང་རང་ཟོན་དང་འཇིགས་ཞུམ་མེད་པར་ཐད་ཀར་གདོང་ལེན་མཐའ་གཅིག་ཏུ་གནང་མཁན་ཞིག་ཡིན་པ་དཔེར་ན། བར་ལམ་ཞིག་ནས་བོད་གཞུང་ལ་ངོ་ལོག་རྒྱབ་གཏོད་བྱེད་མཁན་དང་། དོལ་རྒྱལ་ཚོགས་པས་༸གོང་ས་མཆོག་དང་བོད་གཞུང་ལ་གཞི་མེད་སྐྱོན་འཛུགས་རིམ་པར་བྱས་པ་དེ་དག་ལ་རང་ཟོན་སྤངས་ཏེ་སྙིང་སྟོབས་ཆེན་པོས་མདུན་དུ་ཐོན་ཏེ་གདོང་ལེན་གནང་བ་ཚང་མས་མཐོང་གསལ་རེད།
དེའི་ཐོག་ཏུ་ཁོང་ནི་ཕྱི་ལོ་ ༡༩༧༧ ལོ་ནས་ ༢༠༠༧ བར་བོད་གཞུང་གི་གཞུང་ཞབས་དམའ་རིམ་རྒན་དྲུང་ནས་མགོ་བཙུགས་ཏེ། ཐེག་པ་རིམ་འཛེགས་ཀྱིས་དྲུང་ཡིག་ཆེ་མོ་བར་ལོ་ ༣༠ ཙམ་རིང་ཕྱག་ལས་གནང་བ་དང་། ༢༠༠༧ ནས་ད་ལྟ་བར་ལོ་བཅུ་ཙམ་རིང་བཀའ་བློན་གྱི་མཛད་འགན་བཞེས་པ་བཅས་བོད་གཞུང་མང་སྐུ་ངལ་ཆེ་བའི་དུས་སུ་ཁྱོན་བསྡོམས་མི་ལོ་ ༤༠ ཙམ་རིང་ཞབས་འདེགས་གནང་བའི་ཉམས་མྱོང་ཧ་ཅང་ཟབ་མོ་ཡོད་པ་དང་། བོད་ནང་དུའང་ཕྱི་ལོ་ ༡༩༨༠ གྱ་གྲངས་ནང་གསང་སྟབས་ཀྱིས་ཆེད་དུ་ཕེབས་ནས་མྱངས་ཞིབ་དང་། འབྲེལ་ཟམ་བཙུགས་པ། རྒྱུན་དུ་བོད་ནང་གི་གནས་སྟངས་ལ་ཐུགས་སྣང་ཆེ་བ་བཅས། མདོར་ན་གཞིས་བྱེས་གཉིས་ཀའི་གནས་སྟངས་ཐད་མཁྱེན་རྟོགས་དང་ཉམས་མྱོང་གཏིང་ཟབ་ཡོད་མཁན་ཞིག་རེད།
ཁོང་ལ་མཁྱེན་ཡོན་དང་རང་ཚུགས། ཉམས་མྱོང་བཅས་ཡོད་པ་ཙམ་མ་ཡིན་པར། རང་འཁྲིའི་ལས་དོན་ཡོངས་དང་ལྷག་པར་དུ་༸གོང་ས་མཆོག་གི་སྐུ་ཕྱྭའི་སྲུང་སྐྱོབས་ཀྱི་ཐད་ཕྱག་ལས་ཧ་ཅང་གིས་ཞིབ་ཚགས་དང་། རྒྱུན་བསྲིངས། ནན་པོ་གནང་མཁན་ཞིག་རེད། ཁོང་བདེ་སྲུང་དྲུང་ཆེ་དང་བཀའ་བློན་གནང་བའི་དུས་ཡུན་ནང་། ༸གོང་ས་མཆོག་གི་ཆིབས་བསྒྱུར་གནང་ཐེངས་མང་ཤོས་དང་། མཛད་འཕྲིན་རྒྱས་ཆེ་ཤོས་ཀྱི་དུས་སྐབས་ཤིག་འཁེལ་ཡོད་པ་མ་ཟད། སྐུ་ཕྱྭར་བདོ་བའི་བསམ་སྦྱོར་ངན་པ་ཡང་འཕེལ་ཆེ་བའི་དུས་ཤིག་ཡིན་མོད། ལས་རྒྱུན་རིང་པོ་དེའི་ནང་༸གོང་ས་མཆོག་གི་སྐུ་ཕྱྭའི་སྲུང་སྐྱོབ་ཐད་འཐུས་ཤོར་བཏང་རིགས་གཅིག་སྣེ་གཅིག་ཀྱང་བྱུང་མེད་ལ། ༸གོང་ས་མཆོག་དང་བོད་མི་མང་བློ་ཕམ་དགོས་པའི་ཕྱག་ལས་གནང་བ་སྣེ་གཅིག་ཀྱང་མེད།
གཞན་ཡང་ཆོལ་ཁ་དང་ཆོས་ལུགས་མི་གཅིག་པའི་མི་ཚང་མར་དབྱེ་འབྱེད་མེད་པར་གཟིགས་མཁན་ཞིག་ཡིན་པ་མ་ཟད། མང་ཚོགས་ཀྱི་ཞུ་དོན་ལ་ཞིབ་ཚགས་ཀྱིས་གསན་པ་ལས། གཞན་གྱི་ཤོད་མཚམས་གཅོད་པ་དང་། རང་གིས་མང་པོ་བཤད་དེ་གཞན་གྱི་ཞུ་རྩར་མི་གསན་པ་ལྟ་བུ་རྩ་བ་ནས་མི་གནང་། ལྷག་པར་སྤྱི་ཚོགས་ནང་རྙོག་གྲ་ཆེ་ཆུང་ཅི་འདྲ་ཞིག་བྱུང་རུང་། འཚབ་འཚུབ་དང་ཧ་རེ་ཧུ་རེ་མེད་པར་འཕྲལ་དུ་དགོངས་བཞེས་གནང་ཐུབ་མཁན་ཞིག་དང་། ལམ་སྟོན་གནད་སྨིན་དུས་ཐོག་གནང་ཐུབ་མཁན་ཞིག་རེད།
ཉེ་ལམ་༸གོང་ས་༸སྐྱབས་མགོན་ཆེན་པོ་མཆོག་དང་གཞུང་བསྟེན་ཆོས་སྐྱོང་རྣམ་པས། གཞུང་གི་ལས་དོན་དང་༸གོང་ས་མཆོག་གི་སྐུ་ཕྱྭ། མཐུན་ལམ་དམ་ཚིག་བཅས་ཀྱི་ཐད་བཀའ་ནན་ཤིན་ཏུ་ལྕི་བ་ཕེབས་པ་ལྟར། དེའི་ཐད་སྐུ་ངོ་འབྲོང་ཆུང་དངོས་གྲུབ་མཆོག་གིས་འགན་ཁུར་བཞེས་ཏེ། བཟང་སྤྱོད་ཀྱི་ཐོག་ནས་བཀའ་བློན་གྱི་གོ་གནས་ནས་དགོངས་ཞུ་གནང་བ་རེད། གནང་སྟངས་འདི་ཡང་བོད་སྤྱི་པའི་ཆེད་དུ་རེད་མ་གཏོགས་སྒེར་དོན་གྱི་ཆེད་དུ་མིན་པ་ནི། དགོངས་ཞུ་གནང་བའི་དུས་ཚོད་དེ་སྲིད་སྤྱིའི་འོས་བསྡུ་དང་། གྲོས་ཚོགས་ལས་རིམ་ཡོངས་སུ་མཇུག་བསྒྲིལ་བའི་རྗེས་སུ་གནང་བ་དེས་ཤེས་ཐུབ། མཇུག་ཏུ་སྐུ་ངོ་མཆོག་གང་དུ་ཕེབས་ཀྱང་སྐུ་ཁམས་བཟང་ཞིང་བོད་སྤྱི་པར་ཕན་པའི་མཛད་འཕྲིན་མུ་མཐུད་སྐྱོང་བ་དང་རྒྱས་པའི་སྨོན་འདུན་ཞུ།། །།
དགེན་ཆུང་ཚེ་རིང་ནས་བཀའ་ཟུར་འབྲོང་ཆུང་དངོས་གྲུབ་ལགས་ཀྱི་མཛད་རྗེས་ཁ་གསལ་གསུངས་བར་བཀའ་དྲིན། འདི་ལྟར་ལྟོས་ཡོངས་ན་བཀའ་ཟུར་འབྲོང་ཆུང་ནི་གནད་འགག་སྐབས་སུ་མ་འཁྲུལ་མ་ནོར་རང་ཐག་རང་གཅོད་ཕོད་མཁན་ཞིག་དང་། བསམ་གཞིག་རྣམ་དག་གིས་རང་གི་ལངས་ཕྱོགས་དང་བསམ་ཚུལ་བརྗོད་ཐུབ་མཁན་ཡིན་པ་གསལ་བོ་རེད་འདུག དེར་བརྟེན། ཕྱི་ནང་གི་གནས་ཚུལ་བཟང་ངན་གང་ཡང་ཐམས་ཅད་རང་རང་སོ་སོའི་ངོས་ནས་མ་འཁྲུལ་མ་ནོར་བ་ཞིག་རྟོགས་དགོས་པ་ཧ་ཅང་གི་གལ་གནད་ཆེན་པོ་རེད་བསམ། ༧ གོང་ས་རྒྱལ་བོའི་དབང་བོ་མཆོག་གི་ཐུགས་ཕམ་གྱི་གསུང་བཤད་དང་། ལྷ་ཆོས་སྐྱོང་སྲུང་མའི་བཀའ་ལུང་དྲག་པོ་ཕེབས་པ་དང་། མིའི་ཡང་རྩེ་རུ་གྱུར་བའི་བཀའ་བློན་གཉིས་ཀྱིས་བསྟུན་མར་གཅིག་འཕྲོ་གཅིག་ལ་དགོངས་པ་ཞུ་སོགས་ཀྱི་གནས་ཚུལ་ལ་ཞིབ་ཏུ་ལྟོས་ན། ཕྱི་ཕྱོགས་ནས་ཡར་རྒྱས་དང་ཚགས་ཚུལ་སོགས་འདྲ་ཆགས་ཆགས་བཤད་ནས་མི་མང་ལ་མགོ་སྐོར་ག་ཚོད་བཏང་བ་ཡིན་ན་ཡང་། དོན་དངོས་སུ་ནང་སྙིང་རུལ་བསྡད་ཡོད་བ་གསལ་བོ་རེད།
བདེན་གཏམ་ཞིག་བསྒྲགས་པ་ལ་ཐུགས་ཆེ་གནང་། ཆུང་ཚེ་རིང་ལགས་ནི་གཟུར་གནས་བློ་ལྡན་ཞིག་ཡིན་པར་འདོད་ལ་ཁོང་གིས་སྤེལ་བའི་རྩོམ་ཡིག་དེ་ཚོས་ང་ཚོ་ལ་འདས་སོང་གི་བདེན་གཏམ་དང་མ་འོངས་ཕུག་བསམ་གྱི་བསམ་བློའི་རྒྱགས་ཕྱེ་ཡང་སྟེར་གྱི་་་སྐུ་ཉིད་ལ་སླར་ཡང་ཐུགས་ཆེ་ཞུ་འདོད།།
སྐུ་ངོ་མཆོག་ལྟ་བུའི་བྱས་རྗེས་དང་ཉམས་མྱོང་ཕུན་སུམ་ཚོགས་པ་ཡོད་པའི་མི་སྣ་གངས་སྐྱིད་དུ་ཉུང་ཤས་ཤིག་ལས་ལྷག་མེད། ཁོང་རྩ་དགོངས་སུ་ཕེབས་པ་ང་ཚོའི་གྱོང་རེད་མོད་འོན་ཀྱང་ཁོང་གི་མཐའ་མ་ཐག་གཅོད་དེ་འདྲ་གནང་དགོས་པའི་རྒྱུ་རྐྱེན་དངོས་ལ་བརྟག་དཔྱོད་བྱས་ཏེ་ངོ་ཚ་ཁྲེལ་མེད་དང་མགོ་གཡོག་རྫུན་སྐོར་བྱེད་མཁན་གྱི་མཐོ་རིམ་ལས་ཀྱི་སྣེ་མོ་བ་དག་ལ་མི་མང་གིས་དུས་རྟག་ཏུ་མིག་གཅེར་ནས་ལྟ་དགོས། མ་འགྲིག་པ་དང་མ་འཐུས་པ་ཅུང་ཙམ་རེ་བྱུང་ཡང་རྒྱ་ཡན་དུ་གཏོང་མི་རུང་། གསར་འགྱུར་ལས་རིགས་གཉེར་མཁན་དག་གིས་གཙོ་འགན་བླངས་ཏེ་དུས་རྟག་ཏུ་གླེང་དགོས། དེ་འདྲ་བྱས་ན་ད་གཟོད་ཁོང་ཚོས་རང་སྣང་གང་དྲན་བྱེད་ས་མི་འགྲོ། དེ་མིན་བཟང་སྤྱོད་ལྡན་པ་དག་གི་དགོངས་པ་ཞུས་ཤུལ་དུ་གོ་སྐབས་རང་ལུགས་དག་ལྷག་པ་ཡིན་ན་གྱོང་དེ་བོད་སྤྱི་ལ་རག་གི་རེད། དེར་བརྟེན་ད་ནས་བཟུང་ང་ཚོས་གཟབ་གཟབ་བྱེད་དགོས།
སྐུ་ོ་ཁོང་འདྲ་བའི་ལས་བྱེད་དམ་ཡང་ན་ཆབ་སྲིད་འགན་འཁུར་གནང་མཁན་གངས་སྐྱིད་རྭ་བའི་ནང་དེང་སང་ཧ་ཅང་དཀོན་པོ་རེད་འདག།
སྐུ་ངོ་ལགས། བཟང་སྤྱོད་ལ་བརྩི་བཀུར་གནང་བར་བཀའ་དྲིན་ཆེ། འདི་ནི་མིག་དཔེ་ཞིག འདི་ནི་ལམ་སྟོན་ཞིག་ཡིན བཟང་སྤྱོད་ནི་ལག་ལེན་གནང་རྒྱུ་ཞིག་ལས་ཁ་ནས་བཤད་བསྡད་ན་འགྲིག་པ་ཞིག་མིན། དངོས་སུ་བཟང་སྤྱོད་ལག་བསྟར་གནང་ཐུབ་མཁན་གྱི་སྐྱེས་བུ་སུ་དང་སུ་ཡོད་དམ། བདེན་པ་ཉིད་རྒྱལ་གྱུར་ཅིག
ཁོང་རང་གི་ནོར་བ་ལ་མནོང་ཡོད་ན་མ་གཏོགས་ཡ་རབས་བཚང་སྤྱོད་ཐོག་ནས་རྩ་དགོངས་ཞུས་གསུངས་པ་ལ་གོ་རྒྱུ་མིན་འདུག
ཆུང་ཚེ་རིང་ལགས་ནས་འདིར་སྐུ་ངོ་དངོས་གྲུབ་ལགས་ཀྱི་སྐོར་གང་གསུངས་པ་རྣམས་ངོ་མ་བདེན་གཏམ་རང་རེད། བཀའ་དྲིན་ཆེ།
བཀའ་བློན་གཉིས་ནས་རྩ་དགོངས་ཞུས་པ་དེས་སྲིད་སྐྱོང་ཕྱག་ལས་གནང་སྟངས་ལ་སྐྱོན་དང་། མཐུད་ཤོར་ཞིག་འགྲོ་བཞིན་པ་གསལ་པོ་རེད། དེ་དག་སྲིད་སྐྱོང་གིས་ངོས་ལེན་གནང་དགོས་པ་ཤིན་ཏུ་གལ་འགངས་ཆེན་པོ་ཞིག་མཐོང་། ལོ་ལྔ་མ་བཟིན་སྔོན་ལ་སྒྲིག་འཛུགས་དང་། སྤྱི་ཚོགས་ནང་མི་མཐུན་དེ་འདྲ་ཡོང་བའི་རྒྱུ་གང་ལ་ཐུག་ཡོད། དེ་དག་གི་འགན་རྣམས་འཛིན་སྐྱོང་ལ་ཡོད་པ་དེ་མཁྱེན་པ་གནང་རོགས།
དངོས་གནས་རྒྱ་གར་ཉེན་རྟོག་པར་རྩིས་སྤྲོད་གནང་ཐུབ་ན་སྲུང་མའི་ལུང་བསྟན་རྫུན་བཟོ་བྱེད་མཁན་དེ་དག་གནང་དང་། རྗེས་སུ་ཡིད་རངས་ཡོད་།
འོས་བསྡུའི་སྐབས་སུ་༧གོང་ས་མཆོག་གིས་བསྟོད་བསྔགས་གནང་ལུགས་མང་པོ་གསུངས་སོང་། ད་ལྟ་ཐུགས་ཕམ་དང་། སྐྱོན་བརྗོད་གནང་དེ་ཚོ་ཡང་མི་མང་ལ་གསུང་ན་འབུམས་རམ་པའི་མཚན་ཉིད་ཚང་ས་རེད།
༧གོང་ས་མཆོག་ནས་དམིགས་སུ་བཀར་ནས་འཕྲོད་བསྟེན་ལས་ཁུངས་ལ་གསུངས་སོང་། དེའི་ཐོག་འཛིན་སྐྱོང་ནས་ལག་བསྟར་གང་གནང་རྩིས་ཡོད་དམ།
བདེ་སྲུང་བཀའ་བློན་དགོངས་ཞུ་ལ་རྒྱུ་མཚན་དེ་གཅིག་པུ་ཡིན་གྱི་མ་རེད་སྙམ་མོ།
སྐུ་ངོ་འབྲོང་ཆུང་ལགས་བཀའ་བློན་ལས་གནས་དགོངས་པ་ཞུས་པ་འགྲིག་མིན་གང་ཡང་བཤད་རྒྱུ་མེད། ཡིན་ནའང་། སྐུ་ངོ་ལགས་ཐེངས་འགར་མཇལ་བའི་བརྒྱུད་རིམ་ནང་སྐུ་ངོ་མཆོག་ངོ་མ་ཐུགས་གཤིས་བཟང་པོ་དང་མཐོ་དམན་ཀུན་ལ་བརྩི་མཐོང་མཁན། སྐད་ཆ་ཡག་སྡུག་གཉིས་ཀར་ཉན་ཐུབ་མཁན་གྱི་མཐོང་སོང་པས། སྐུ་ངོ་མཆོག་ལ་ནམ་ཡང་གུས་བརྩི་ཡོད།
གང་ལྟར་ལས་མཐའ་མ་འཁྱོལ་བ་དགོངས་ཞུ་བྱས་པ་དེར་རང་ངོས་ནས་བལྟས་ན་དེ་ཙམ་གླེང་རིན་ཡོད་པ་ཞིག་ཏུ་མི་སེམས། ཁོང་ལ་བྱས་རྗེས་ཡོད་བདེན་པ་ཡིན་ཡང་། བྱས་སྟངས་ཁ་ཤས་ཀྱིས་སྟེང་ནས་མ་འགྲིག་པ་དང་མ་འཐུས་པའི་དབང་རྒྱ་ཆེའི་མང་ཚོགས་ལ་ཏན་ཏན་བློ་ཕམ་བྱུང་ཡོད། རེད་དེ་གནས་ཚུལ་ཁ་ཤས་ཤིག་རང་ངོས་ནས་བཤད་དཀའ་བས་དེ་ལས་གནས་སྐབས་རིང་ལྷོད་པོར་བྱས་ན་དགའ་རྒྱུ་རེད།