བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་གིས་ “ནོངས་པ་དང་འཁྲུལ་པ་བྱེད་མཁན་གང་ཟག་དེ་དག་གི་བྱེད་སྟངས་ལ་འགལ་ཟླ་བྱེད་དགོས་ཀྱང་བྱེད་མཁན་གང་ཟག་དེར་ཉེས་རིང་མེད་པ་བྱེད་དགོས། བྱེད་མཁན་གང་ཟག་དེར་ཁོང་ཁྲོ་མ་བྱས་པར་སྙིང་རྗེའི་ཡུལ་དུ་འཇོག་དགོས།” ཞེས་གསུངས།
ཟླ་འདིའི་ཚེས་ ༡༢ ཉིན། བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་གིས། དྷ་སའི་ཉེ་འཁྲིས་རྒྱུད་སྟོད་གྲྭ་ཚང་དུ། ཨ་ཁུ་ཤེས་རབ་རྒྱ་མཚོས་མཛད་པའི་འཇམ་དཔལ་དུས་དགྲའི་དབང་པོ་མ་ཧེའི་གདོང་ཅན་བཅུ་གསུམ་ལྷའི་འཁོར་ལོའི་རིམ་གཉིས་ཀྱི་ཟབ་ཁྲིད་ཟིན་བྲིས་འཇིགས་མཛད་རྡོ་རྗེའི་ཞལ་ལུང་གི་བཀའ་ཁྲིད་སྐབས་སྔོན་འགྲོའི་ཀུན་སློང་བཅོས་ཚུལ་གསུངས་དོན། ད་རེས་ང་ཚོས་འཆད་ཉན་བྱ་རྒྱུའི་དུས་ཚོད་འདི་གཞིས་བྱེས་བོད་མི་ཚང་མར་སེམས་འཚབ་ཡོད་པའི་དུས་ཚོད་གཉན་འཕྲང་ཅན་གྱི་སྐབས་ལ་འཁེལ་ཡོད། མང་ཆེ་བས་མཁྱེན་གསལ་རེད། ཕྱི་ཟླ་ ༤ ཚེས་ ༡ ཉིན་བོད་མིའི་སྒྲིག་འཛུགས་ཀྱི་འཛིན་སྐྱོང་བཀའ་ཤག་དང་སྤྱི་འཐུས་གྲོས་ཚོགས་ལྷན་རྒྱས་ཀྱི་ཐོག་ནས་སྤྱི་འཐུས་གྲོས་ཚོགས་གྲོལ་བའི་ཉིན་མོར་གནས་ཆུང་ཆོས་རྒྱལ་ཆེན་མོ་དང་ཚེ་རིང་མཆེད་ལྔ་གཞུང་བསྟེན་དགྲ་ལྷའི་གཙོ་བོ་ལྟ་བུ་ཆགས་ཡོད། ཁོང་གཉིས་སྐུ་གསོལ་ཞུས་ནས་བཀའ་ལུང་ཞུས་གནང་འདུག སྐབས་དེར་བར་ལམ་ཕྱི་ནང་གི་གནས་ཚུལ་མང་པོ་ཞིག་གི་ཐོག་ནས་༸གོང་ས་མཆོག་ཐུགས་ཕམ་བྱུང་ཡོད་པ་དང་། དེའི་དབང་གིས་ཆོས་སྐྱོང་ཚོས་༸གོང་ས་ཆེན་པོའི་སྐུ་ཕྱྭའི་ཐུགས་འགན་བཟོད་མིན་གྱི་གནས་སྟངས་སྐོར་བཀའ་ལུང་ཧ་ཅང་གཞི་ལྗིད་པོ་དེ་འདྲ་ཕེབས་ཡོད། དེས་དབང་གིས་མི་ཚང་མར་སེམས་འཚབ་སྐྱེས་ཡོད། སེམས་འཚབ་ཡོང་རྒྱུ་ཡིན་པ་དངོས་ཡོད་གནས་སྟངས་ཤིག་རེད། ༸གོང་ས་མཆོག་ཐུགས་ཕམ་འགྱུར་གཞི་དང་ཐུགས་བབ་མེད་པའི་གནས་ཚུལ་དེ་དག་ང་རང་ཚོ་བོད་མིའི་སྤྱི་མཐུན་བསོད་ནམས་ཀྱི་མ་ལྕོགས་པའི་དབང་གིས་ང་ཚོ་ཚང་མས་དེའི་ནང་འགན་འཁྲི་དང་ཐེ་གཏོགས་ཡོད་དགོས་པའི་གནས་སྟངས་ཤིག་ཆགས་ཡོད། འདིའི་ཐོག་ལ་གཅིག་གིས་གཅིག་ལ་ཁག་དཀྲི་རེས་བྱ་རྒྱུའི་གནས་སྟངས་ཤིག་རྩ་བ་ནས་མ་རེད། སུས་ནོར་བ་རེད། ག་རེ་ནོར་བ་རེད་ཅེས་སྙོན་དཀྲི་བསླངས་ནས་ཕན་ཐོགས་ཡོད་པ་ཞིག་རྩ་བ་ནས་མ་རེད། ཐུབ་པས་ཉོན་མོངས་དགྲར་ཟིན་གྱིས། །ཉོན་མོངས་དང་ལྡན་གང་ཟག་མིན། ཞེས་གསུངས་པ་ལྟར་ཉོན་མོངས་མ་སྤང་པའི་གང་ཟག་གཅིག་ཡིན་ཕྱིན་ནོར་འཁྲུལ་སུ་ལའང་ཡོང་སྲིད་པ་ཞིག་རེད། དེར་བརྟེན་སུས་ནོར་བ་རེད། སུས་མ་ནོར་བ་རེད། གང་དུ་འགྲིག་པ་རེད། གང་དུ་མ་འགྲིག་པ་རེད། ཅེས་པ་འདིའི་གནས་ཚུལ་དེ་བཞག་ནས་གང་ནས་མ་འགྲིག་པ་བྱུང་བ་དང་གང་ནས་འཐུས་ཤོར་བ་དེ་དག་མ་འོངས་པར་མི་ཡོང་བ་ཞིག་དང་། ང་ཚོས་སྤྱི་མཐུན་གྱི་བསོད་ནམས་གོང་མཐོར་གཏོང་རྒྱུར་འབད་བརྩོན་གནང་དགོས་པ་འདི་ཐུགས་གལ་ཆེན་པོ་རེད། དེར་བརྟེན་གསུང་ཆོས་སྐབས་འདིར་ཉིན་ལྟར་གསོལ་ཇ་ཡོད། གསོལ་ཇའི་སྐབས་ལ་མ་ཎི་ཕྲེང་སྐོར་རེ་རེ་འདོན་རྒྱུ་འདི་༸གོང་ས་༸སྐྱབས་མགོན་ཆེན་པོའི་སྐུ་ཚེའི་ཚེ་སྒྲུབ་དང་བོད་མིའི་སྤྱི་མཐུན་གྱི་བསོད་ནམས་གོང་མཐོར་གཏོང་རྒྱུ་དང་། ཕྱོགས་མཚུངས་བར་ལམ་ཞིག་ལ་ཐུགས་ཕམ་གྱི་རྣམ་པ་འདོན་གནང་མཛད་དགོས་པའི་རྒྱུ་མཚན་གང་ལས་བྱུང་མིན་དེ་དག་བཤགས་བྱང་གི་ཆེད་དུ་དམིགས་ནས་ཡིན། ཆོས་སྐྱོང་གི་བཀའ་ལུང་ནང་དུའང་བོད་མི་ཚང་མས་མ་ཎི་འབུམ་གཉིས་རེ་འདོན་དགོས་པའི་བཀའ་ལུང་ཕེབས་ཡོད། མ་ཎི་འབུམ་གཉིས་རེ་འདོན་ཐུབ་མཁན་དང་མི་ཐུབ་མཁན་གཉིས་ཀ་ཡོད་མདོག་ཁ་པོ་རེད། འབུམ་གཉིས་ཆ་ཚང་མ་ལོང་པ་ཡིན་ནའང་ཚང་མས་ཉིན་ལྟར་ཕྲེང་སྐོར་འགའ་ཤས་བགྲང་གནང་ཐུབ་པ་ཡིན་ན་ཡག་པོ་ཡོད་རེད་བསམ་གྱི་འདུག འདིར་ཉིན་གུང་ཚོགས་ཚུགས་སྐབས་གསོལ་ཇའི་སྐབས་མ་ཎི་ཕྲེང་སྐོར་རེ་འདོན་པ་ཡིན་ནའང་ཚོགས་ཆེན་པོ་ཡིན་སྟབས་དེས་༸སྐྱབས་མགོན་རིན་པོ་ཆེའི་སྐུ་ཚེའི་ཚེ་སྒྲུབ་དང་བོད་མི་སྤྱི་མཐུན་གྱི་བསོད་ནམས་གོང་མཐོར་གཏོང་རྒྱུའི་ཆེད་དུ་དམིགས་པ་ཞིག་ཡིན་ན་ཕན་ཐོགས་ཡོད།
ཚང་མས་ནམ་རྒྱུན་དུ་༸གོང་ས་མཆོག་ལ་ཁ་ཞེ་གཉིས་མེད་ཀྱིས་གསོལ་བ་ཕུར་ཚུགས་སུ་འདེབས་ནས་སྐུ་ཚེ་ཞབས་པད་བརྟན་པ་དང་བོད་མི་མང་ཚོགས་ཐུགས་རྗེའི་སྐྱབས་འོག་ནས་མི་འདོར་བའི་གསོལ་བ་ཡང་ཡང་འདེབས་དགོས་པ་འདི་གལ་ཆེན་པོ་རེད། ཐུགས་རྗེའི་ལྕགས་ཀྱུ་དང་དད་པའི་ཨ་ལོང་ཟུང་དུ་འབྲེལ་དགོས། ཟེར་བའི་བོད་པའི་གཏམ་དཔེར་ཡོད། སངས་རྒྱས་ལ་ཐུགས་རྗེ་ཡོད་པ་ཡིན་ནའང་སེམས་ཅན་ལ་ཐུགས་རྗེ་དེ་འཇུག་པའི་སྣོད་དུ་མ་གྱུར་བ་ཡིན་ན་སངས་རྒྱས་ཉག་གཅིག་གིས་བརྩེ་བ་སྙིང་རྗེ་ཆེན་པོ་ཡོད་པ་ཡིན་ནའང་སེམས་ཅན་བཟུང་ནུས་ཀྱི་མེད། དེར་བརྟེན་སངས་རྒྱས་ཀྱི་འཕྲིན་ལས་ཀྱི་འཇུག་པའི་སྣོད་ལྟ་བུ་དེ་ང་ཚོས་བསྐྲུན་དགོས་པ་ཡིན་སྟབས་༸གོང་ས་༸སྐྱབས་མགོན་ཆེན་པོ་མཆོག་ཕྱོགས་བཅུ་སངས་རྒྱས་ཐམས་ཅད་ཀྱི་སྙིང་རྗེའི་རང་གཟུགས་ཡིན་སྟབས་སུ་གང་ལའང་དགོངས་པ་འགལ་བ་དང་ཐུགས་རྗེ་མེད་པ་ཡོང་རྒྱུ་མ་རེད། འོན་ཀྱང་ང་ཚོའི་ངོས་ནས་ཐུགས་རྗེ་དེ་འཇུག་རྒྱུར་སྣོད་ཡག་པོ་ཞིག་སྨིན་མ་ཐུབ་པ་ཡིན་ན། གྱོང་ང་རང་ཚོར་རག་རྒྱུའི་ཉེན་ཁ་ཡོད་པ་ཞིག་རེད། དེ་འདྲ་ཡིན་སྟབས་གཙོ་བོ་བོད་རིགས་ནང་ཁུལ་དམ་ཚིག་ཟོང་ཁ་ཆིག་སྒྲིལ་ཡོང་བ་བྱ་རྒྱུ་འདི་གལ་ཆེན་པོ་རེད།
བོད་རིགས་ནང་ཁུལ་དམ་ཚིག་ཟོང་ཁ་ཆིག་སྒྲིལ་ཡོང་རྒྱུའི་རྒྱུ་རྐྱེན་གཙོ་བོ་ནི་གཅིག་གིས་གཅིག་ལ་བྱམས་བརྩེ་བྱེད་རྒྱུ་དང་གུས་བཀུར་ཞུ་རྒྱུ། ཕན་ཚུན་སྐྱོན་བརྗོད་དང་ཁག་དཀྲི་བྱ་རྒྱུ་མིན་པར་མཐུན་འགྱུར་དང་ཡོན་ཏན་གྱི་ངོས་ནས་བལྟ་དགོས་པ་གལ་ཆེ་ཡིན་སྟབས། ད་ལྟའི་གནས་སྐབས་འདི་ལ་ང་ཚོ་ཚང་མས་བོད་རིགས་སྤྱི་བོ་གནམ་བསྟན་ཡོངས་སུ་རྫོགས་པས་༸སྐྱབས་མགོན་རིན་པོ་ཆེར་གསོལ་བ་ཕུར་ཚུགས་སུ་འདེབས་རྒྱུ་དང་། རང་གིས་སྤྱི་མཐུན་གྱི་བསོད་ནམས་གསོག་རྒྱུ། ཚུལ་བསྟན་དགོངས་པར་མ་བབ་པའི་གནས་ཚུལ་ཡོད་ཚེ་མ་འོངས་པར་བསྐྱར་ལྡབ་མི་ཡོང་ཆེད་ང་ཚོས་གང་གནང་དགོས་པ་འདུག་དེར་གཟིགས་རྒྱུ་དང་། ནོངས་པ་དང་འཁྲུལ་པ་བྱེད་མཁན་གང་ཟག་དེ་དག་གི་བྱེད་སྟངས་ལ་འགལ་ཟླ་བྱེད་དགོས་ཀྱང་བྱེད་མཁན་གང་ཟག་དེར་ཉེས་རིང་མེད་པ་བྱེད་དགོས། བྱེད་མཁན་གང་ཟག་དེར་ཁོང་ཁྲོ་མ་བྱས་པར་སྙིང་རྗེའི་ཡུལ་དུ་འཇོག་དགོས། དེའི་ཐོག་ནས་ང་ཚོ་ཚང་མས་དམ་ཚིགས་འོ་ཆུ་ཆིག་སྒྲིལ་ཡོང་རྒྱུའི་རེ་བ་ཡོད་པ་ཞིག་རེད། དེར་བརྟེན་ཚང་མས་དེ་ལྟར་དགོངས་པར་འཇོག་རོགས་གནང་། ཞེས་གསུངས།
སུས་ལན་མིན་དབྱེ་འབྱེད་མེད་པར་རྒྱུག་པ་ལེབ་བརྡུང་བྱས་ན། ངན་པ་ལང་ལ་ཤོར། བཟང་བོ་ཡིད་ཐང་ཆད་རྒྱུ་མ་་ཡིན་ནམ
ཐུབ་པས་ཉོན་མོངས་དགྲར་གཟིགས་ཀྱིས། ཉོན་མོངས་དང་འབྲེལ་གང་ཟག་མིན། ཞེས་གསུངས་པ་ལྟར་འདོད་ཆགས་དང་ཞེ་སྡང་ལ་སོགས་པའི་ཉོན་མོངས་དང་ཉོན་མོངས་དེ་རྣམས་རྒྱུད་ལ་ལྡན་པའི་སེམས་ཅན་གཉིས་སོ་སོར་དབྱེར་བ་འབྱེད་ནས། སེམས་ཅན་སུ་ལ་ཡང་མི་སྡང་བ་དེ་ཡི་རྒྱུད་ཀྱི་ཉོན་མོངས་པའི་དགྲ་དེས་ལན་སྙམ་པའི་སྙིང་ཁུག་རུས་པའི་གཏིང་ནས་བསམ་ཤེས་པ་ཞིག་བྱུང་ན་ཅི་མ་རུང་སྙམ།
བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་གིས་བཀའ་སློབ་ལམ་སྟོན།《 ༸གོང་ས་༸སྐྱབས་མགོན་ཆེན་པོ་མཆོག་ཕྱོགས་བཅུ་སངས་རྒྱས་ཐམས་ཅད་ཀྱི་སྙིང་རྗེའི་རང་གཟུགས་ཡིན་སྟབས་སུ་གང་ལའང་དགོངས་པ་འགལ་བ་དང་ཐུགས་རྗེ་མེད་པ་ཡོང་རྒྱུ་མ་རེད། འོན་ཀྱང་ང་ཚོའི་ངོས་ནས་ཐུགས་རྗེ་དེ་འཇུག་རྒྱུར་སྣོད་ཡག་པོ་ཞིག་སྨིན་མ་ཐུབ་པ་ཡིན་ན། གྱོང་ང་རང་ཚོར་རག་རྒྱུའི་ཉེན་ཁ་ཡོད་པ་ཞིག་རེད། དེ་འདྲ་ཡིན་སྟབས་གཙོ་བོ་བོད་རིགས་ནང་ཁུལ་དམ་ཚིག་ཟོང་ཁ་ཆིག་སྒྲིལ་ཡོང་བ་བྱ་རྒྱུ་འདི་གལ་ཆེན་པོ་རེད། 》《 ཚུལ་བསྟན་དགོངས་པར་མ་བབ་པའི་གནས་ཚུལ་ཡོད་ཚེ་མ་འོངས་པར་བསྐྱར་ལྡབ་མི་ཡོང་ཆེད་ང་ཚོས་གང་གནང་དགོས་པ་འདུག་དེར་གཟིགས་རྒྱུ་དང་། ནོངས་པ་དང་འཁྲུལ་པ་བྱེད་མཁན་གང་ཟག་དེ་དག་གི་བྱེད་སྟངས་ལ་འགལ་ཟླ་བྱེད་དགོས་ཀྱང་བྱེད་མཁན་གང་ཟག་དེར་ཉེས་རིང་མེད་པ་བྱེད་དགོས། བྱེད་མཁན་གང་ཟག་དེར་ཁོང་ཁྲོ་མ་བྱས་པར་སྙིང་རྗེའི་ཡུལ་དུ་འཇོག་དགོས། དེའི་ཐོག་ནས་ང་ཚོ་ཚང་མས་དམ་ཚིགས་འོ་ཆུ་ཆིག་སྒྲིལ་ཡོང་རྒྱུའི་རེ་བ་ཡོད་པ་ཞིག་རེད། དེར་བརྟེན་ཚང་མས་དེ་ལྟར་དགོངས་པར་འཇོག་རོགས་གནང་།》 ཞེས་གསུངས།