དམངས་གཙོའི་ལམ་ལུགས་ནི་ཐའེ་ཝན་མཚོ་འགག་གི་འབྱུང་འགྱུར་ཡིན།

ལྕམ་ཚའེ་ཡེན་ཝན་གྱིས་དམངས་གཙོའི་ལམ་ལུགས་ནི་ཐའེ་ཝན་མཚོ་འགག་གི་འབྱུང་འགྱུར་ཡིན་ཕྱིན། ཐའེ་ཝན་མི་མང་གི་མངོན་འདོད་དང་དམངས་གཙོའི་ལམ་ལུགས་ལ་བརྟེན་ནས་ཐའེ་རྒྱ་གཉིས་བར་གྱི་འབྲེལ་ལམ་རྒྱུན་འཁྱོངས་བྱེད་དགོས་ཟེར།

རྒྱ་ནག་ལྷོ་རྒྱུད་ནངས་མོའི་ཚགས་པར་ཁང་ (scmp) གིས་གནས་ཚུལ་སྤེལ་བ་ལྟར་ན། ཁ་སང་རེས་གཟའ་ལྷག་པའི་ཉིན་ཐའེ་ཝན་སྲིད་འཛིན་ལྕམ་ཚའེ་ཡེན་ཝན་གྱིས་དམངས་གཙོའི་ལམ་ལུགས་ནི་ཐའེ་རྒྱ་གཉིས་བར་གྱི་འབྲེལ་ལམ་དང་འབྲེལ་བའི་ཐའེ་ཝན་མཚོ་འགག་གི་འབྱུང་འགྱུར་ཡིན་སྐོར་བརྗོད་ཡོད་པ་དང་། ཁོང་མོའི་གཏམ་བརྗོད་དེ་ཡང་ཕྱི་ཚེས་ ༢༠ ཉིན་ནས་རྒྱ་ནག་གཞུང་གིས་ཐའེ་ཝན་གྱི་ཡུལ་མི་ ༤༥ རྒྱ་ནང་དུ་བཀག་བསྐྱིལ་ཞིབ་བཤེར་བྱེད་བཞིན་པའི་རྩོད་རྙོག་དང་འབྲེལ་བའི་ཐད་ནས་བཤད་པ་ཞིག་ཡིན་འདུག

ལྕམ་ཚའེ་ཡེན་ཝན་གྱིས། ངས་དེ་སྔོན་ཐེངས་འགར་ཐའེ་ཝན་སྲིད་གཞུང་གསར་བས་མ་འོངས་ཐའེ་རྒྱ་གཉིས་ཀྱི་འབྲེལ་ལམ་སྲ་བརྟན་ཡུན་གནས་དང་ཞི་བདེ་བརྟན་ལྷིང་ཡོང་ཐབས་སུ་གང་ནུས་ཅི་འཇོན་ལ་བརྩོན་ངེས་ཡིན་ཞེས་བཤད་ཡོད་ལ། ངས་རང་ཉིད་ཀྱི་ཁག་ཐག་འདི་རྒྱུན་འཁྱོངས་བྱ་ངེས་ཡིན། འདས་པའི་མི་ལོ་ ༨ རྗེས་ཀྱི་འཕོ་འགྱུར་ནི་ཐའེ་ཝན་མི་མང་གི་མངོན་འདོད་དང་དམངས་གཙོའི་ལམ་ལུགས་ལ་བརྟེན་ནས་ཐའེ་རྒྱ་གཉིས་བར་གྱི་འབྲེལ་ལམ་མཐོར་འདེགས་གཏོང་རྒྱུ་དེ་ཡིན། དམངས་གཙོའི་ལམ་ལུགས་ཁོ་ནར་བརྟེན་ནས་ད་གཟོད་ཐའེ་རྒྱ་གཉིས་ཀྱི་འབྲེལ་ལམ་རྒྱུན་འཁྱོངས་དང་། ཕྱོགས་གཉིས་བར་གྱི་དངོས་ཡོད་གནས་སྟངས་ཐད་མིང་དོན་མཚུངས་པའི་གྲུབ་འབྲས་འཐོན་ཐུབ། ཅེས་བརྗོད་འདུག

ཡང་ཁོང་མོས་ཐའེ་ཝན་དམངས་གཙོ་ཡར་ཐོན་ཚོགས་པས་ཐའེ་ཝན་གོ་མན་ཏང་ཚོགས་པ་ནས་སྲིད་དབང་རྩིས་ལེན་བྱས་རྗེས། ཐའེ་ཝན་མཚོ་འགག་གི་སྲིད་ཇུས་བཅོས་བསྒྱུར་གཏང་སྲིད་སྐོར་སོགས་བརྗོད་འདུག

གནས་ཚུལ་ལྟར་ན། ན་ནིང་ཕྱི་ཟླ་དང་པོའི་ནང་ཐའེ་ཝན་མཚོ་འགག་གི་སྲིད་འཛིན་འོས་བསྡུའི་སྔོན་འགྲོའི་སྐབས་སུ། ལྕམ་ཚའེ་ཡེན་ཝན་གྱིས་གོ་མན་ཏང་ཚོགས་པས་གྲོས་ཚོགས་ཀྱི་ལྟ་ཞིབ་མ་བརྒྱུད་པར་ལྐོག་ལྐོག་སུད་སུད་ཀྱི་སྒོ་ནས་རྒྱ་ནག་སྐམ་ས་ཆེན་མོར་འབྲེལ་ལམ་བཟུང་བའི་སྐྱོན་བརྗོད་བྱས་ཡོད་པ་དང་། ཟླ་འདིའི་ཕྱི་ཚེས་ ༢༠ ཉིན་ཁིན་ཡ་ཉེན་རྟོག་ཁང་གིས་དེ་སྔོན་གློག་འཕྲིན་སྐུལ་ལམ་དུ་མྱུལ་ཞིབ་དང་གསང་བ་རྐུ་འཁྱེར་བྱས་པའི་དོགས་ཡོད་མི་སྣ་ ༦༧ འཇུ་བཟུང་བྱས་པ་དེ་སྒེར་གྱི་འབྲེལ་ལམ་བརྒྱུད་ནས་རྒྱ་ནག་གཞུང་ལ་རྩིས་སྤྲོད་བྱས་པ་དང་། པེ་ཅིན་གཞུང་གིས་དོགས་ཡོད་མི་སྣ་དེ་ཚོའི་གྲས་ཀྱི་ཐའེ་ཝན་ཡུལ་མི་ ༤༥ ཕྱིར་ཐའེ་ཝན་ནང་འགྲོ་རུ་མ་བཅུག་པར་ཁོ་ཚོ་རྒྱ་ནག་གི་གློག་འཕྲིན་སྐུད་ལམ་དུ་མྱུལ་ཞིབ་དང་གསང་བ་རྐུ་འཁྱེར་བྱེད་པའི་ཚོགས་པ་ཞིག་དང་འབྲེལ་བ་ཡོད་པའི་དོགས་གཞིའི་འོག་བཀག་བསྐྱིལ་དང་ཞིབ་བཤེར་བྱེད་བཞིན་པར་ཐའེ་པེ་གཞུང་གིས་སྐྱོན་བརྗོད་བྱེད་ཀྱི་ཡོད་པ་དང་། ཉེ་ལམ་མ་ལེ་ཤེ་ཡ་གཞུང་གིས་ཀྱང་གློག་འཕྲིན་སྐུད་ལམ་དུ་མྱུལ་ཞིབ་དང་གསང་བ་རྐུ་འཁྱེར་བྱས་པའི་ཐའེ་ཝན་གྱི་དོགས་ཡོད་མི་སྣ་ ༢༠ འཇུ་བཟུང་བྱས་རྗེས། ཕྱིར་ཐའེ་ཝན་མཚོ་འགག་ལ་རྩིས་སྤྲད་བྱས་པ་དེར་པེ་ཅིན་གཞུང་གིས་དེ་ནི་རྒྱ་ནག་སྐམ་ས་ཆེན་མོར་བཟོས་པའི་ཁྲིམས་འགལ་གྱི་བྱ་སྤྱོད་ཡིན་པའི་སྐྱོན་བརྗོད་བྱེད་ཀྱི་ཡོད་པ་རེད།

ཕྱི་ལོ་ ༡༩༤༩ ལོའི་དུས་ཟིང་སྐབས་སུ་དེང་གི་ཐའེ་ཝན་མཚོ་འགག་འདི་བཞིན་རྒྱ་ནག་སྐམ་ས་ཆེན་མོ་དང་བྲལ་ཏེ་ད་ལྟའི་བར་རང་སྲིད་རང་སྐྱོང་གི་ཚུལ་དུ་འཚོ་ཞིང་གཞིས་ནའང་། པེ་ཅིན་གཞུང་གིས་ད་དུང་ཡང་ཐའེ་ཝན་མཚོ་འགག་ནི་རྒྱ་ནག་སྐམ་ས་ཆེན་མོའི་མངའ་ཁོངས་ཀྱི་ཞིང་ཆེན་ཞིག་ཡིན་ལུགས་ནན་བཤད་བྱེད་ཀྱི་ཡོད་པ་དང་། ཕྱི་ལོ་ ༢༠༠༨ ལོའི་ཐའེ་ཝན་སྲིད་འཛིན་འོས་བསྡུའི་སྐབས་སུ་གོ་མན་ཏང་ཚོགས་པར་རྒྱལ་ཁ་ཐོབ་པ་དང་། སྲིད་འཛིན་མ་ཡེན་ཅོ་ཡིས་ཐའེ་རྒྱ་གཉིས་བར་འགྲོ་འོང་འགྲིམ་འགྲུལ་དང་ཉོ་འཚོང་ཁེ་ལས་ཐད་གསང་བའི་སྒོ་ནས་རྒྱ་ནག་གཞུང་ལ་འབྲེལ་ལམ་བཟུང་བར་བརྟེན་ནས། ཕྱོགས་གཉིས་བར་ད་ལྟའི་བར་རེ་གསལ་རེ་མོག་གི་འབྲེལ་ལམ་ཞིག་རྒྱུན་འཁྱོངས་བྱེད་བཞིན་ཡོད་པ་རེད།

གསར་འགོད་པ། པདྨ་རྒྱལ།