ཆོས་རིག་བཀའ་བློན་མཆོག་གིས་ཐེངས་འདིའི་སྐབས་བཞི་བའི་དགེ་བཤེས་མའི་རྒྱུགས་སྤྲོད་དང་མཚན་གནས་གནང་རྒྱུ་དེ་ནི་བོད་པའི་རྒྱལ་རབས་ལོ་རྒྱུས་ཐོག་ནས་ཧ་ཅང་གལ་ཆེན་པོར་བརྩི་ཡི་ཡོད་སྐོར་གསུངས་སོང་།
དེ་རིང་སྔོ་དྲོའི་ཆུ་ཚོད་ ༡༠ སྟེང་དྷ་ས་བཙུན་དགོན་དགེ་ལྡན་ཆོས་གླིང་གི་འདུ་ཁང་དུ། བོད་ཀྱི་བཙུན་མའི་ལས་འཆར་ཁང་དང་ཆོས་རིག་ལས་ཁུངས་གཉིས་ཐུན་མོང་གི་གཙོ་གོ་སྒྲིག་འོག སྐབས་བཞི་བའི་དགེ་བཤེས་མའི་རྒྱུགས་སྤྲོད་ཆེན་མོ་དབུ་འཛུགས་གནང་སོང་ལ། མཛད་སྒོའི་སྐུ་མགྲོན་གཙོ་བོར་ཆོས་རིག་བཀའ་བློན་པདྨ་ཆོས་འབྱོར་མཆོག་གི་དབུས་སྐབས་བཞི་བའི་དགེ་བཤེས་མའི་རྒྱུགས་སྤྲོད་ཞིབ་འཇུག་གནང་མཁན་སེ་ར་བྱེས་སྨད་གཉིས་དང་དགའ་ལྡན་ཤར་རྩེ། འབྲས་སྤུངས་སྒོ་མང་གྲྭ་ཚང་བཅས་སྐུ་ཚབ་བཞི་དང་། བཙན་བྱོལ་བོད་མིའི་སྒྲིག་འཛུགས་ཆོས་རིག་ལས་ཁུངས་ནས་ལས་བྱེད་གཉིས། རྒྱ་གར་ནང་གི་བཙུན་དགོན་ཁག་ ༥ ཡི་འཛིན་རིམ་བཞི་ནས་དགེ་བཤེས་མར་རྒྱུགས་སྤྲོད་གནང་མཁན་བཙུན་མ་ ༤༤ བཅས་འཛོམས་འདུག
མཛད་སྒོའི་ཐོག་ཆོས་རིག་བཀའ་བློན་པདྨ་ཆོས་འབྱོར་མཆོག་གིས་དགེ་བཤེས་མའི་རྒྱུགས་སྤྲོད་ལས་རིམ་སྐོར་ངོ་སྤྲོད་གནང་དོན། དེ་རིང་གི་དགེ་བཤེས་མའི་རྒྱུགས་སྤྲོད་འདི་ལོ་རིམ་བཞི་བ་དེ་ཡིན་སྟབས། སྤྱིར་བཏང་ ༡༩༩༥ ནས་༧སྐྱབས་མགོན་རིན་པོ་ཆེ་མཆོག་གིས་དགེ་བཤེས་མ་གཏོང་དགོས་ཀྱི་འདུག དེ་གལ་ཆེན་པོ་ཞེ་དྲགས་འདུག་ཅེས་བཀའ་བསླབ་རབ་དང་རིམ་པར་གསུངས་ཡོད་པ་རེད། ཡིན་ནའང་དགེ་ལུགས་ནང་ལ་དཀའ་ངལ་ཅུང་ཕྲད་ཡོད་པ་རེད། ཕྱི་ལོ་ ༢༠༡༡ ལོའི་ཕྱི་ཟླ་ ༩ བའི་ནང་ཆོས་བརྒྱུད་ཁག་གི་ཚོགས་འདུ་ཚོགས་སྐབས་སུ་བཀའ་མོལ་བྱུང་བ་རེད། སྐབས་དེར་དགེ་ལུགས་ནང་ལ་དགེ་བཤེས་མ་གཏང་ཡ་དེ་ཆོས་འདུ་བའི་རིགས་ཤིག་ནས་དཀའ་ངལ་ཞིག་འཕྲད་ཀྱི་ཡོད་པ་རེད། དེ་མིན་གཞན་རྙིང་མ་དང་ས་སྐྱ་བཀའ་བརྒྱུད་སོགས་ཆོས་བརྒྱུད་གཞན་ཁག་ལ་དཀའ་ངལ་གང་ཡང་ཡོད་པ་མ་རེད། ཁོ་ཚོར་སློབ་དཔོན་མ་དང་རབ་འབྱམས་མ་སོགས་བྱུང་འདུག དགེ་ལུགས་ནང་བྱུང་ཐུབ་ཡོད་པ་མ་རེད། ཡིན་ནའང་སྐབས་དེ་དུས་ང་ཆོས་རིགས་བཀའ་བློན་ཡིན་པའི་ཆ་ནས་ངས་གསལ་བཤད་ཅིག་བྱས་པ་ཡིན། སྤྱིར་བཏང་ང་ཚོ་བོད་ནང་ལ་ཕོ་མོ་དབྱེ་འབྱེད་ཞེ་དྲགས་བྱུང་འདུག་ཅེས་དེ་ལ་ངས་རྩོད་གླེང་བྱས་མྱོང་། ང་ཚོ་བོད་ནང་དུ་དེ་རིགས་དམིགས་སུ་འགོག་པ་དེ་འདྲ་གང་ཡང་ཡོད་པ་མ་རེད་དེ། གོམ་གཤིས་ཀྱི་ཐོག་ནས་དགེ་བཤེས་མ་མེད་པ་དེ་འདྲ་ཆགས་པ་རེད། ཡིན་ན་ཡང་རྒྱ་གར་དུ་བསླེབས་ནས་སློབ་སྦྱོང་བྱས་པ་དེ་འདྲ་རེད། ང་ཚོས་༧སྐྱབས་མགོན་རིན་པོ་ཆེ་མཆོག་གིས་བཀའ་ཕེབས་པ་གཞིར་བཞག་སྟེ་ཕྱི་ལོ་ ༢༠༡༢ ལོའི་ཕྱི་ཟླ་ ༥ བའི་ནང་ཚོགས་འདུ་ཚོགས་ནས་གཏན་འབེབས་བྱས་ཏེ་ལག་བསྟར་བྱས་བསྡད་པ་རེད། དེ་བས་དེ་རིང་འདིར་མི་ལོ་ ༡༧ རིང་གཞིས་བྱེས་གཉིས་ནས་དགེ་སློང་མ་བཟོས་ནས་བསླབ་པ་སློར་གཉེར་བྱས་ཏེ་ཆ་སྙོམ་གྱི་ཐོག་ནས་བརྒྱ་ཆ་ ༦༥ ལོན་པ་ཡིན་ན། ལོ་ ༤ རིང་དགེ་བཤེས་མར་རྒྱུགས་སྤྲོད་ཆོག་པར་གཏན་འབེབས་བྱས་ཏེ་ལས་དོན་རབ་དང་རིམ་པར་སྤེལ་བསྡད་ཡོད་པ་རེད། ང་ཚོའི་རྒྱལ་རབས་ལོ་རྒྱུས་ཐོག་ནས་འདི་ཞེ་དྲགས་གལ་ཆེན་པོར་བརྩི་ཡི་ཡོད། ཅེས་གསུངས་སོང་།
ཡང་ཁོང་གིས་སྤྱིར་བཏང་ང་ཚོ་དུས་རེབས་ཉེར་གཅིག་པའི་ནང་ཡོད་པ་དང་དུས་རེབས་ཉེར་གཅིག་པའི་ནང་ང་ཚོ་ཚང་མ་ཆ་སྙོམ་གྱི་ཐོག་ནས་རྐང་པ་བརྒྱབ་ནས་འགྲོ་དགོས་ཡོད་དུས། རིགས་གཅིག་རྐང་འཛིན་རེད། དགེ་སློང་མ་རེད། འགྲོ་གླེང་ཆེན་མོ་རེད། དེ་ཚང་མའི་ཐོག་དཀའ་སྤྱི་ཚང་མ་འཛོམས་ནས་གཏན་འབེབས་དང་བཀའ་བསྡུར་མང་པོ་བྱས་ཡོད་པ་རེད། དེའི་ནང་ནས་འདི་གལ་ཆེ་ཤོས་ཤིག་རེད། དགེ་བཤེས་མའི་ཕྱག་ཁྱེར་གནང་རྒྱུ་དེ་༧སྐྱབས་མགོན་རིན་པོ་ཆེ་མཆོག་ནས་གནོང་རོགས་ཞེས་ཁ་སང་སྔོན་མར་ང་ལ་ཞུས་པ་ལྟར། བར་སྐབས་དེར་ངས་༧སྐྱབས་མགོན་རིན་པོ་ཆེ་མཆོག་ལ་ཞུས་དུས། ཁོང་གིས་ཡིན་དང་ཡིན་གསུང་གི་འདུག ཅེས་བརྗོད་བྱུང་།
ཁོང་གིས་ད་ལྟའི་བར་དགེ་བཤེས་མ་ག་ཚོད་ཅིག་ཐོན་ཡོད་མེད་སྐོར་ལ། སྔོན་ཆད་མཚན་ཉིད་སློབ་གྲྭའི་ནང་བསླབ་པ་སློབ་གཉེར་གྱི་ཐོག་ནས་འཇར་མན་གྱི་བཙུན་མ་ཞིག་ལ་གནང་འདུག དེ་མ་གཏོགས་ངས་གོང་དུ་ཞུས་ཟིན་པ་ལྟར། ཆོས་བརྒྱུད་གཞན་ལ་དཀའ་ངལ་ཡོད་པ་མ་རེད། ཡིན་ནའང་དགེ་ལུགས་ནང་གཏན་འབེབས་བྱས་ཏེ་ཡིག་རྒྱུགས་བཏང་ནས་དགེ་བཤེས་མ་བཏང་བཞག་ཡ་དེ་འདྲ་ཡོད་པ་མ་རེད། དེ་བས་དགེ་ལུགས་ནང་དགེ་བཤེས་མ་ངོས་ལེན་བྱས་པ་དེ་ད་ལན་འདི་ཐོག་དང་པོ་ཆགས་ཡོད་པ་རེད། ད་ལན་འདིར་དགེ་བཤེས་མར་རྒྱུགས་སྤྲོད་མཁན་ལོ་རིམ་བཞི་བའི་བཙུན་མ་ ༢༠ ཡོད་པ་རེད། དགེ་བཤེས་མའི་སྐབས་བཞི་བའི་རྒྱུགས་སྤྲོད་ནང་རྒྱུགས་འཕྲོད་མཁན་ཚོར། འདི་ལོའི་ཕྱི་ཟླ་ ༡༠ བའི་ནང་འཇང་དགུན་ཆོས་འཚོགས་རྒྱུ་དང་། དེའི་རྗེས་ཀྱི་སྨོན་ལམ་ཆེན་མོའི་ཐོག་༧སྐྱབས་མགོན་རིན་པོ་ཆེ་མཆོག་ནས་མཚན་གནས་གནང་རྒྱུ་རེད། ཅེས་གསུངས་སོང་།
གསར་འགོད་པ། པདྨ་རྒྱལ།
ཆོས་རིག་བཀའ་བློན་ཆོས་ཤེས་མཁན་ཞིག་བསྐོ་ན་ལེགས། ཆོས་མི་ཤེས་མཁན་གཡག་འདྲ་བོ་ཞིག་གིས་ཆོས་དོན་ལས་དགོས་ན་འཐུས་མ་ཚང་བ་མང་པོ་ཡོང་རྒྱུ་རེད།
ཆོས་རིག་བཀའ་བློན་མཆོག་ནས་དགེ་བཤེས་མའི་རྒྱུགས་སྤྲོད་དེ་ཉིད་བློ་སེང་གི་གསར་གཏོད་རེད་ཅེས་ཧམ་བཤད་བྱེད་ཀྱི་རེད་བསམ་ནས་བློ་འཚབ་སྐྱེད་བྱུང་། ཡིན་ཡང་ཁོང་གིས་བདེན་པ་དེ་ཕན་ཆེར་རྟོགས་ཡོད་པ་འདྲ་གང་ཡིན་བརྗོད་ན་དེང་སང་སྤྱི་ཚོགས་ནང་ཧམ་པས་མི་བཟའ་ཡི་འདུག