དེ་རིང་ཕྱི་དྲོར་དགེ་འདུན་པ་བློ་བཟང་ཐུབ་བསྟན་ཞུ་བ་ཞིག་གིས་རྔ་བ་རྫོང་གི་ཁྲོམ་གཞུང་དུ་ཞི་རྒོལ་སྐད་འབོད་གནང་སྟེ་ཉེན་རྟོག་པས་བཙན་འཁྲིད་བྱས་ཡོད་འདུག
འདི་གར་བོད་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། དེ་རིང་བོད་ནང་གི་ཕྱི་དྲོའི་ཆུ་ཚོད་ ༣ པའི་ཐོག རྔ་བ་རྫོང་གི་ཁྲོམ་གཞུང་དུ་དགེ་འདུན་པ་བློ་བཟང་ཐུབ་བསྟན་ཞུ་བ་ཞིག་གིས་ལག་ཏུ་༧གོང་ས་མཆོག་གི་སྐུ་པར་བཟུང་སྟེ། སྐད་འབོད་རྒྱག་བཞིན་ཞི་བའི་གོམ་བགྲོད་གནང་ཡོད་པ་དང་། དེ་མ་ཐག་ཉེན་རྟོག་པ་བསླེབས་ཏེ་ཁོང་འཛིན་བཟུང་བཙན་ཁྲིད་བྱས་ཡོད་འདུག
དགེ་འདུན་པ་བློ་བཟང་ཐུབ་བསྟན་ལགས་ནི་རྔ་བ་ཀིརྟི་དགོན་ནས་ཡིན་ཞིང་། རྔ་བ་རྫོང་རྨེ་རུ་མ་ཡུལ་ཚོའི་རུ་ཆེན་དང་པོ་ནས་ཡིན་འདུག ད་ལྟའི་ཆར་ཁོང་གི་གནས་སྟངས་ག་འདྲ་ཆགས་ཡོད་མེད་སོགས་ཅི་ཡང་ཤེས་རྟོགས་ཐུབ་ཀྱི་མེད་སྟབས། ཁོང་གི་ཁྱིམ་མི་སོགས་ཀྱིས་སེམས་ཁྲལ་ཆེན་པོ་བྱེད་བཞིན་ཡོད་འདུག
གསར་འགོད་པ། པདྨ་མཚོ།
དགེ་འདུན་པ་ཁོང་གི་སྙིང་སྟོབས་ལ་གུས་འདུད་ཞུ། རྒྱ་ནག་དམར་པོའི་གཞུང་ལ་ངོ་རྒོལ་ཡོད།
གཞིའི་ལུས་བོད་མིའི་སྙིང་སྟོབས་ལ་ཡིད་རང་ཞུ། མནར་གཅོད་ངན་པ་མི་མྱོང་བར་སྨོན།