རྒྱ་ནག་གིས་ཐའེ་ཝན་འཛམ་གླིང་འཕྲོད་བསྟེན་སྒྲིག་འཛུགས་ཀྱི་ལོ་འཁོར་ཚོགས་འདུར་ཞུགས་མི་ཆོག་ཟེར་བ་དེ་ནི་ཐའེ་ཝན་མཚོ་འགག་གི་ནང་སྲིད་ལ་ཐེ་གཏོགས་བྱས་པ་ཞིག་ཡིན་སྐོར་ཐའེ་ཝན་དམངས་གཙོ་ཚོགས་པས་བརྗོད་འདུག
རྒྱ་ནག་ལྷོ་རྒྱུད་ནངས་མོའི་ཚགས་པར་ (scmp) ཞེས་པའི་བརྒྱུད་ལམ་དུ་གནས་ཚུལ་སྤེལ་བ་ལྟར་ན། རྒྱ་ནག་གི་ཆེས་མཐོའི་དཔོན་རིགས་ཚོས་དེང་གི་ཐའེ་རྒྱ་གཉིས་བར་གྱི་འབྲེལ་ལམ་ཇེ་སྡུག་ཏུ་འགྲོ་བཞིན་པའི་གནས་བབ་ལ་གཞིག་སྟེ། ཐའེ་ཝན་མཚོ་འགག་མཉམ་འབྲེལ་རྒྱལ་ཚོགས་འོག་གི་འཛམ་གླིང་འཕྲོད་བསྟེན་སྒྲིག་འཛུགས་ཀྱི་ཚོགས་ཆེན་སྟེང་མཉམ་ཞུགས་མི་ཆོག་ཚུལ་བཤད་ཅིང་། ཐའེ་ཝན་དམངས་གཙོ་ཡར་ཐོན་ཚོགས་པའི་སྲིད་གཞུང་གསར་བས་དེ་ནི་རྒྱ་ནག་གཞུང་གིས་ཐའེ་ཝན་མཚོ་འགག་གི་ནང་སྲིད་ལ་ཐེ་གཏོགས་བྱས་པའི་སྐྱོན་བརྗོད་བྱས་ཡོད་འདུག
རྒྱ་ནག་སྐམ་ས་ཆེན་མོའི་ཐའེ་ཝན་ལས་དོན་ཁང་གི་མགྲིན་ཚབ་པ་མ་ཞོ་ཀུང་ (Ma Xiaoguang) ཟེར་བ་ཞིག་གིས་རེས་གཟའ་པ་སངས་ཉིན་ཐའེ་ཝན་མཚོ་འགག་འཛམ་གླིང་འཕྲོད་བསྟེན་སྒྲིག་འཛུགས་ཀྱི་ཚོགས་ཆེན་སྟེང་མཉམ་ཞུགས་བྱེད་པའི་ལས་དོན་དེ་དང་ཐོག“རྒྱ་ནག་གཅིག”གི་རྩ་འཛིན་གཞིར་བཟུང་ཐོག་གོ་སྒྲིག་ཞུས་པ་ཞིག་ཡིན་སྟབས། ཐའེ་ཝན་མཚོ་འགག་གིས་རྩ་འཛིན་དེ་སྣང་མེད་བཏང་ཚེ། དེས་ཐའེ་རྒྱ་གཉིས་བར་གྱི་མ་འོངས་འབྲེལ་ལམ་ཐད་ཀྱི་གཞི་རྩའི་སྲིད་ཇུས་ལ་འགོག་རྐྱེན་བཟོ་སྲིད་ལུགས་བཤད་འདུག
ཐའེ་ཝན་དམངས་གཙོ་ཡར་ཐོན་ཚོགས་པའི་མགྲིན་ཚབ་པ་ཐང་ཁྲིན་ཡཱན་ (Tung Chen-yuan) ཟེར་བ་ཞིག་གིས་རྒྱ་ནག་སྐམ་ས་ཆེན་མོའི་ཐའེ་ཝན་ལས་དོན་ཁང་གི་འགྲེལ་བརྗོད་དེ་ནི་ངོས་ལེན་ཞུ་ཐུབ་མེད་པ་ཞིག་རེད། ང་ཚོ་འཛམ་གླིང་འཕྲོད་བསྟེན་སྒྲིག་འཛུགས་ཀྱི་ཚོགས་ཆེན་སྟེང་ཞུགས་མི་ཆོག་ཟེར་བ་དེ་ནི་ཆབ་སྲིད་ཀྱི་སྐད་ཆ་རེད། ང་ཚོས་གླེང་གཞི་དེ་ལ་ངོ་རྒོལ་མ་གཏོགས་ངོས་ལེན་ཞུ་ཐབས་མི་འདུག ཐའེ་ཝན་མི་མང་རྒྱལ་སྤྱིའི་སྤྱི་ཚོགས་ཀྱི་འཕྲོད་བསྟེན་སྒྲིག་འཛུགས་ནང་མཉམ་ཞུགས་བྱ་བའི་ཐོབ་ཐང་དེ་ཆབ་སྲིད་སྒྲོམ་གཞི་གང་གིས་ཀྱང་བཙན་འགོག་བྱས་ཆོག་གི་མ་རེད། ཅེས་སོགས་བརྗོད་འདུག
གནས་ཚུལ་ལྟར་ན། ད་ལོའི་ཕྱི་ཟླ་ ༡ པོའི་ནང་ཐའེ་ཝན་མཚོ་འགག་གི་སྲིད་སྤྱི་གཉིས་ཀྱི་འོས་བསྡུ་མཇུག་གྲུབ་རྗེས། ལྕམ་ཚའེ་ཡེན་ཝན་གྱིས་ཐའེ་རྒྱ་གཉིས་ཀྱི་འབྲེལ་ལམ་རྒྱུ་འཁྱོངས་བྱ་རྒྱུ་ཁས་ལེན་བྱས་ཡོད་ནའང་། ཁོང་མོས“རྒྱ་ནག་གཅིག”གི་རྩ་འཛིན་ཞེས་པའི་གྲོས་ཆོད་དེ་ལ་ངོས་ལེན་བྱེད་ཀྱི་མེད་པ་དང་། སྤྱིར་ན་ཐའེ་རྒྱ་གཉིས་སོ་སོའི་རང་སྲིད་རང་སྐྱོང་གི་ཚུལ་དུ་ཚུགས་ཡོད་ནའང་། དེ་སྔོན་ཐའེ་ཝན་གོ་མན་ཏང་སྲིད་གཞུང་དང་ལྷན་དུ“རྒྱ་ནག་གཅིག”ཅེས་པའི་གྲོས་ཆོད་ཅིག་བཞག་ཡོད་པའི་ནང་། ཐའེ་རྒྱ་གཉིས“རྒྱ་ནག་གཅིག”ཏུ་ངོས་ལེན་བྱས་ཡོད་འདུག
ཕྱི་ལོ་ ༢༠༠༩ ལོ་ནས་ཐའེ་ཝན་མཚོ་འགག་ལོ་བཞིན་འཛམ་གླིང་འཕྲོད་བསྟེན་སྒྲིག་འཛུགས་ཀྱི་ཚོགས་ཆེན་སྟེང་མཉམ་ཞུགས་བྱེད་མུས་ཡིན་པ་དེ་ནི་འཛམ་གླིང་འཕྲོད་བསྟེན་སྒྲིག་འཛུགས་ཀྱི་ངོས་ནས་ཆོག་མཆན་སྤྲད་པ་ཞིག་ཡིན་པ་མ་ཟད། དེང་སྐབས་ཐའེ་ཝན་མཚོ་འགག་འདི་བཞིན་འཛམ་གླིང་ཤར་ནུབ་ཀྱི་གྲངས་ཉུང་མི་རིགས་ཀྱིས་གྲུབ་པའི་རྒྱལ་ཁབ་དང་སྒྲིག་འཛུགས་ཁག་ ༢༢ ཙམ་ལ་ཕྱི་འབྲེལ་ཡོད་ནའང་། མཉམ་འབྲེལ་རྒྱལ་ཚོགས་འོག་གི་འཛམ་གླིང་འཕྲོད་བསྟེན་སྒྲིག་འཛུགས་ལྟ་བའི་ཚོགས་པ་ཁག་ཅིག་གིས་ཐའེ་ཝན་མཚོ་འགག་ནི་རྒྱ་ནག་རྒྱལ་ཁབ་ཏུ་ངོས་འཛིན་གྱི་ཡོད་པ་དང་། ཟླ་འདིའི་ཕྱི་ཚེས་ ༦ ཉིན་འཛམ་གླིང་འཕྲོད་བསྟེན་སྒྲིག་འཛུགས་ཀྱི་ངོས་ནས་ཐའེ་ཝན་མཚོ་འགག་ཕྱི་ཟླ་ ༥ བའི་ཚེས་ ༢༣ ནས་ ༢༨ བར་སུད་སིའི་གྲོང་ཁྱེར་ཇི་ནི་ཝ་ནང་འཚོགས་འཆར་ཡོད་པའི་འཛམ་གླིང་འཕྲོད་བསྟེན་སྒྲིག་འཛུགས་ཀྱི་ལོ་འཁོར་ཚོགས་ཆེན་སྟེང་མགྲོན་འབོད་བྱས་ཡོད་ནའང་། ལས་དོན་དེ་ཐའེ་ཝན་མཚོ་འགག་རྒྱ་ནག་ཏུ་ངོས་འཛིན་པའི་མཉམ་འབྲེལ་རྒྱལ་ཚོགས་ལ་སྙན་སེང་ཞུ་དགོས་བྱུང་ཡོད་འདུག
གསར་འགོད་པ། པདྨ་རྒྱལ།
