དེ་རིང་རྒྱལ་སྤྱིའི་འགྲེམས་སྟོན་ཉིན་མོ་དང་བསྟུན་ཕ་ཡུལ་ཕྱོགས་ལ་རྒྱང་ལྟ་ཞེས་པའི་བརྗོད་གཞིའི་འོག་བོད་ཀྱི་འགྲེམས་སྟོན་ཁང་དུ་བོད་དོན་ངོ་སྤྲོད་དང་དྲིལ་བསྒྲགས་ཀྱི་བྱེད་སྒོ་ཁག་ཅིག་མགོ་འཛུགས་གནང་སོང་།
དེ་རིང་སྔ་དྲོའི་ཆུ་ཚོད་ ༡༠ པ་ཐོག ཕྱི་དྲིལ་འགྲེམས་སྟོན་ཚན་པའི་གོ་སྒྲིག་འོག བོད་ཀྱི་འགྲེམས་སྟོན་ཁང་གི་ཡང་སྟེང་དུ་རྒྱལ་སྤྱིའི་འགྲེམས་སྟོན་ཉིན་མོ་སྲུང་གཙི་ཡི་དབུ་འབྱེད་མཛད་སྒོ་སྟབས་བདེ་ཞིག་ཚོགས་སོང་བ་དང་། མཛད་སྒོའི་ཐོག་སྐུ་མགྲོན་གཙོ་བོ་སྲིད་སྐྱོང་བློ་བཟང་སེང་གེ་མཆོག་གི་དབུས་ཕྱི་དྲིལ་གྱི་དྲུང་ཆེ་རྣམ་གཉིས་དང་དྷ་ས་རིག་ལམ་སློབ་གཉེར་ཁང་གི་འགན་འཛིན་དགེ་བཤེས་སྐལ་བཟང་དགྲ་འདུལ་ལགས་དང་། བཞུགས་སྒར་ཁུལ་གྱི་གཞུང་འབྲེལ་མ་ཡིན་པའི་ཚོགས་སྡེ་ཁག་གི་སྐུ་ཚབ་རྣམ་པ། དེ་བཞིན། དཔེ་སྟོན་སློབ་གྲྭ་དང་སྨན་རྩིས་ཁང་། ཤེས་རབ་དགའ་ཚལ་སློབ་གླིང་སོགས་ཉེ་ཁུལ་སློབ་གྲྭ་ཁག་ལྔ་ཡི་དབུ་འཛིན་སོགས་དང་སློབ་ཕྲུག གཞན་ཡང་། ཕྱི་དྲིལ་འགྲེམས་སྟོན་པའི་འགན་འཛིན་ལས་བྱེད་བཅས་མི་གྲངས་ ༥༠ ཡས་མས་འཛོམས་འདུག་ལ། མཛད་སྒོའི་ཐོག་བོད་ཀྱི་འགྲེམས་སྟོན་ཁང་གིས་པར་སྐྲུན་གནང་བའི་༼ཕ་ཡུལ་ཕྱོགས་ལ་རྒྱང་ལྟ༽ཞེས་པའི་ལོ་རྒྱུས་ཀྱི་པར་རིས་དབྱིན་དེབ་ཅིག་དང་། བོད་ཀྱི་འགྲེམས་སྟོན་ཁང་ངོ་སྤྲོད་ཀྱི་གློག་བརྙན་ཞིག་བཅས་དབུ་འབྱེད་གནང་སོང་།
ཕྱི་དྲིལ་འགྲེམས་སྟོན་ཚན་པའི་འགན་འཛིན་བཀྲ་ཤིས་ཕུན་ཚོགས་ལགས་ནས་འགྲེམས་སྟོན་ཁང་གི་བྱེད་སྒོ་རྣམས་ངོ་སྤྲོད་གནང་སྐབས། བོད་མིའི་སྒྲིག་འཛུགས་ནས་ཕྱི་ལོ་ ༡༩༩༨ ལོར་བོད་ཀྱི་འགྲེམས་སྟོན་ཁང་ཆེད་འཛུགས་གནང་ཞིང་། ཕྱི་ལོ་ ༢༠༠༠ ཟླ་ ༤་ཚེས་ ༣༠ ཉིན་༧གོང་ས་མཆོག་ནས་ཐོག་མར་དབུ་འབྱེད་མཛད་ཡོད་པ་དང་། འདས་པའི་ལོ་ངོ་ ༡༦ རིང་འགྲེམས་སྟོན་ཁང་ནས་པར་རིགས་དང་གློག་བརྙན་སོགས་བརྒྱུད་དེ་བོད་ཀྱི་ལོ་རྒྱུས་དང་རིག་གཞུང་། ད་ལྟའི་བོད་ནང་གི་གནས་སྟངས་སོགས་ཀྱི་སྐོར་ནས་ལོ་ལྟར་གོ་རྟོགས་སྤེལ་ཡོད་ལ། ལོ་རེར་དོན་གཉེར་བ་བོད་མི་དང་རྒྱ་གར་བ། ཕྱི་རྒྱལ་གྱི་ཡུལ་སྐོར་སྤྲོ་འཆམ་པ་བཅས་མི་གྲངས་ཁྲི་ ༧ ལྷག་རེས་འགྲེམས་སྟོན་ཁང་དུ་ལྟ་སྐོར་བྱས་ཏེ། བོད་ཀྱི་གནད་དོན་ངོ་སྤྲོད་དང་ཁྱབ་བསྒྲགས་བྱེད་ཐུབ་ཡོད་སྐོར་དང་། དེ་སྔོན་གྷོའུ་གྷིལ་ཐོག་ནས་བོད་ཀྱི་འགྲེམས་སྟོན་ཁང་ཞེས་པ་འཚོལ་བཤེར་བྱེད་སྐབས་རྒྱ་ནག་གཞུང་གིས་བཙུགས་པའི་བོད་ཀྱི་འགྲེམས་སྟོན་ཁང་མ་གཏོགས་རྙེད་ཐུབ་ཀྱི་མེད་ཀྱང་། ད་ལྟ་གྷོའུ་གྷིལ་ནང་འཚོལ་བཤེར་བྱེད་སྐབས་བོད་མིའི་སྒྲིག་འཛུགས་ཀྱི་འགྲེམས་སྟོན་ཁང་ཐོག་དང་པོར་འཆར་གྱི་ཡོད་པ་དང་། དྲ་རྒྱའི་ཐོག་འགྲེམས་སྟོན་གྱི་ལས་གཞི་ཚང་མར་ལྟ་ཐུབ་པའི་མཐུན་རྐྱེན་བསྐྲུན་ཡོད་སྐོར་སོགས་བརྗོད་སོང་།
མཇུག་ཏུ་ཁོང་གིས་དྷ་རམ་ས་ལ་ཁུལ་དུ་ཡུལ་སྐོར་སྤྲོ་འཆམ་པ་དང་སྐུ་མགྲོན་མང་པོ་ཕེབས་ཀྱི་ཡོད་པ་དང་། གཞུང་འབྲེལ་གྱི་སྐུ་མགྲོན་ཡིན་ན་དྷ་ས་ཁུལ་གྱི་ལྟ་སྐོར་ལས་རིམ་ནང་བོད་ཀྱི་འགྲེམས་སྟོན་ཁང་དུ་གཟིགས་སྐོར་གྱི་ལས་རིམ་རྟག་ཏུ་བཀོད་སྒྲིག་བྱེད་བཞིན་ཡོད་པ་ལྟར། གཞུང་འབྲེལ་མ་ཡིན་པའི་ཚོགས་པ་ཁག་ནས་ཀྱང་སོ་སོའི་སྐུ་མགྲོན་ཚོར་བོད་ཀྱི་འགྲེམས་སྟོན་ཁང་ལ་ལྟ་སྐོར་གྱི་ལས་རིམ་བཀོད་སྒྲིག་བྱེད་ཐུབ་ན་ཕན་ཐོགས་ཆེན་པོ་ཡོད་པ་དང་། དེ་བཞིན་རྒྱ་གར་དང་ཕྱི་རྒྱལ་ཡུལ་གྲུ་ཁག་ལྟ་བུ་ཡིན་ན། སློབ་གྲྭ་དག་གི་སློབ་ཕྲུག་ཚོ་འགྲེམས་སྟོན་ཁང་དུ་ལྟ་སྐོར་ལ་འཁྲིད་པའི་ལས་རིམ་མང་པོ་ཞིག་གོ་སྒྲིག་བྱེད་བཞིན་ཡོད་སྟབས། བོད་མིའི་སློབ་གྲྭ་ཁག་ནས་ཀྱང་སློབ་ཕྲུག་ཚོ་བོད་ཀྱི་འགྲེམས་སྟོན་ཁང་ནང་ལྟ་སྐོར་དུ་འཁྲིད་ཐུབ་པ་ཡིན་ན། རྒྱུན་དུ་སློབ་གྲྭའི་ནང་བོད་ཀྱི་ལོ་རྒྱུས་དང་རིག་གཞུང་ངོ་སྤྲོད་གནང་བཞིན་ཡོད་ཀྱང་། འགྲེམས་སྟོན་ཁང་དུ་དངོས་སུ་བསླེབས་པ་ཡིན་ན་ཚོར་བ་མ་འདྲ་བ་ཞིག་དང་སློབ་སྦྱོང་མ་འདྲ་བ་ཞིག་རག་པར་ཕན་ཐོགས་ཆེན་པོ་ཡོད་སྟབས། ཆེས་མ་མཐའ་ཡང་སློབ་ཕྲུག་ཚོ་ལོ་རེར་འགྲེམས་སྟོན་ཁང་ནང་ལྟ་སྐོར་དུ་ཐེངས་གཅིག་འཁྲིད་ཐུབ་པ་གནང་དགོས་པའི་འབོད་སྐུལ་གནང་སོང་།
དེའི་རྗེས་དྲིལ་བསྒྲགས་དྲུང་ཆེ་བཀྲ་ཤིས་ཕུན་ཚོགས་ལགས་ནས་བོད་ཀྱི་འགྲེམས་སྟོན་ཁང་བཙུགས་པའི་དགོས་དམིགས་ ༣ གྱི་སྐོར་ནས་གསུང་བཤད་གནང་སྐབས། བོད་ཀྱི་འགྲེམས་སྟོན་ཁང་བཙུགས་པའི་གལ་ཆེའི་དམིགས་ཡུལ་གཙོ་བོ་དེ། ང་ཚོ་བོད་ཀྱི་གནད་དོན་ད་ལྟ་ཉག་ཕྲ་བ་འདི་ལས་ཐར་ཐབས་ཀྱི་ཆེད་དུ་བོད་མི་ཚོས་སྐྱིད་སྡུག་ག་འདྲ་མྱངས་བ་ཡིན་ནའང་དེ་རྒྱལ་སྤྱིའི་ཐོག་ལ་ངོ་སྤྲོད་དང་། དེའི་ཐོག་ནས་བོད་ཀྱི་རྒྱལ་རབས་ཡིན་ན་རེད། བོད་མི་རིགས་ཀྱི་ཐུན་མོང་མ་ཡིན་པའི་ངོ་བོ་ཡིན་ནའང་རེད། དེ་བཞིན་མ་འོངས་པར་འདུན་པ་ག་རེ་ཡོད་པ་དེ་ཚོ་ཚང་མ་གསལ་པོ་ཞིག་ལྟེ་གནས་གཅིག་གི་ནང་ནས་སྟོན་ཐུབ་པ་ཞིག་བཟོས་པ་ཡིན་ན། ཁ་འཐོར་མེད་པའི་ཐོག་ནས་གནད་ཐུག་པོས་རྒྱལ་སྤྱིའི་ཐོག་ལ་བོད་དོན་ངོ་སྤྲོད་བྱེད་ཐུབ་པ་ཞིག་ཆགས་ཀྱི་རེད་དགོངས་པ་དེ་གཅིག་རེད། དམིགས་ཡུལ་གསུམ་པ་དེ་ང་ཚོ་བོད་མིའི་མི་རབས་ཡིན་ནའང་སྔ་རྗེས་སུ་འགྱུར་བ་འགྲོ་ཡི་ཡོད་པ་དང་བརྗེ་བོ་ཐེབས་ཀྱི་ཡོད་སྟབས། རྒྱལ་རབས་ལོ་རྒྱུས་དེ་ཚོ་གཅིག་གིས་གཅིག་ལ་ངག་རྒྱུན་གྱི་ལམ་ནས་ངོ་སྤྲོད་དང་དེབ་གཟུགས་བརྒྱུད་ནས་ངོ་སྤྲོད། འགྲེམས་སྟོན་པར་རིས་ཀྱི་ཐོག་ནས་ངོ་སྤྲོད་བཅས་མེད་པ་ཡིན་ན། མི་རབས་ནས་མི་རབས་སུ་བརྒྱུད་རིམ་དེ་རྩིས་སྤྲོད་ཐུབ་ཀྱི་ཡོད་པ་མ་རེད། དེར་བརྟེན་བརྒྱུད་རིམ་དེ་རྩིས་སྤྲོད་ཐུབ་པར་བོད་ཀྱི་འགྲེམས་སྟོན་ཁང་གིས་བོད་ཀྱི་མྱོང་ཚོར་ཆ་ཚང་བསྡུ་རུབ་བྱེད་སའི་བང་མཛོད་ལྟ་བུའི་ཐོག་ནས་པར་རིགས་དང་བོད་ཀྱི་རྒྱལ་རབས་ལོ་རྒྱུས་ཀྱི་དཔེ་དེབ། དེ་བཞིན་བཙོན་པ་ཚོས་སྡུག་སྦྱོང་མྱངས་བའི་གོས་ཆས། བོད་སྔ་མོའི་དངུལ་སོགས་འགྲེམས་སྟོན་གྱི་ལས་རིམ་མང་པོ་སྤེལ་བཞིན་ཡོད་པ་དེ། མ་འོངས་པའི་བོད་རིགས་ཚོར་སྔ་མོའི་བོད་ཀྱི་གནས་སྟངས་དེ་ཚོ་མིག་མཐོང་ལག་ཟིན་ཡོང་ཆེད་དུ་རེད། ཅེས་དང་། རྨང་གཞིའི་དམིགས་ཡུལ་དེ་ཚོ་འགྲུབ་པའི་རྗེས་སུ་བོད་པ་རང་གི་སྤྱི་ཚོགས་ནང་བོད་དོན་ངོ་སྤྲོད་བྱས་ནས་རིམ་བཞིན་རྒྱལ་སྤྱིའི་ཐོག་ངོ་སྤྲོད་བྱེད་པ་དང་། དེ་ནས་རིམ་གྱིས་འགྲེམས་སྟོན་ཁང་འདི་རྒྱལ་སྤྱིའི་གདེང་འཇོག་ལྡན་པའི་སྡིངས་ཆའི་ནང་མཉམ་ཞུགས་བྱེད་ཐུབ་པའི་དམིགས་ཡུལ་བཟུང་ཡོད་སྐོར་བརྗོད་སོང་།
མཇུག་ཏུ་སྲིད་སྐྱོང་བློ་བཟང་སེང་གེ་མཆོག་ནས་འགྲེམས་སྟོན་ཁང་གལ་ཆེན་པོ་ཞེ་དྲགས་གཟིགས་ཀྱི་ཡོད་སྐོར་གསུངས་དོན། ངས་འགྲེམས་སྟོན་ཁང་དེ་གལ་ཆེན་པོ་ཞེ་དྲགས་མཐོང་བར་རྒྱུ་མཚན་གཉིས་ཡོད། ཕྱོགས་གཅིག་ནས་འགྲེམས་སྟོན་ཁང་བརྒྱུད་དེ་ང་ཚོའི་དམིགས་ཡུལ་གཞིར་བཟུང་བོད་ཀྱི་རྒྱལ་རབས་ལོ་རྒྱུས་ག་རེ་རེད། བོད་ཀྱི་རིག་གཞུང་ག་འདྲ་ཡོད་པ་རེད། བོད་མིའི་གོམ་གཤིས་ག་འདྲ་ཡོད་པ་རེད། བོད་ཆོལ་ཁ་གསུམ་གྱི་ཆས་གོས་ག་འདྲ་ཡོད་པ་རེད། ད་ལྟ་འདིར་དཔེ་སྟོན་སློབ་གྲྭའི་འཛིན་གྲྭ་བཅུ་པའི་ཕྲུ་གུ་དྲུག་གིས་བོད་ཆས་གྱོན་ནས་བསླེབས་འདུག་ལ། ཁོང་ཚོས་ཆོལ་ཁ་གསུམ་གྱི་ཆས་གོས་གྱོན་ཡོད་ཟེར་གྱི་ཡོད་པས་ཆས་གྱོན་བསྡད་ནས་པར་ཞིག་རྒྱག་ལབ་པ་ཡིན། གང་ཡིན་ཟེར་ན། ཁོང་རང་ཚོར་དངོས་གནས་ཆོལ་ཁ་རེ་རེའི་ཚོར་བ་དེ་ཡོད་དང་མེད་ཟེར་བ་ཞིག་ཡོད་པ་རེད། གོང་དུ་ངས་ཞུས་པ་ལྟར་ང་ཚོ་མི་རབས་གསར་པ་མང་ཆེ་བར་མི་རབས་རྒན་པའི་ཚོར་བ་དེ་ཞེ་དྲགས་སླེབ་ཀྱི་ཡོད་པ་མ་རེད། ཆས་གྱོན་བཞག་པ་རེད་མ་གཏོགས་ཕུད་པ་ཡིན་ན་རང་འཇགས་ཆགས་པ་རེད། དེར་བརྟེན་འགྲེམས་སྟོན་ཁང་འདི་ཞེ་དྲགས་གལ་ཆེན་པོ་རེད། འདི་བརྒྱུད་དེ་རྒྱལ་སྤྱིའི་ཐོག་ལ་ང་ཚོའི་བདེན་པ་དེ་བཤད་ཐུབ་དགོས་པ་རེད་ལ། རྒྱ་གར་ནང་ལ་ཡིན་ནའང་བདེན་པ་དེ་བཤད་ཐུབ་དགོས་པ་རེད། གཙོ་ཆེ་ཤོས་ང་རང་ཚོ་ནང་ཁུལ་ལ་བོད་མི་དང་བོད་མིའི་རྩ་དོན་ག་རེ་ཡིན་པ་མི་བརྗེད་པ་དང་། མ་བརྗེད་པ་གཅིག་པུ་མིན་པར་དྲན་གསོ་སློང་བ། དྲན་གསོ་བསླངས་བ་གཅིག་པུ་མ་རེད་ཚོར་བ་སླེབ་ཐུབ་པ། སེམས་ནང་དཀའ་སྡུག་ཅིག་ཡོད་པ་དེ་སླེབ་ཐུབ་པའི་ཆེད་དུ་འགྲེམས་སྟོན་ཁང་འདི་གལ་ཆེན་པོ་ཞེ་དྲགས་རེད། ཡིན་ནའང་། ང་ཚོར་ཉེན་ཁ་གཅིག་ཡོད་པ་རེད། ག་བར་ཕྱིན་ནའང་ངས་དེ་བཤད་བསྡད་ཀྱི་ཡོད། བོད་དང་བོད་མི་ཟེར་བ་འདི་འགྲེམས་སྟོན་ཁང་ནང་འགྲེམས་སྤེལ་བྱེད་པ་ཞིག་མ་ཆགས་པ་ཤོག་ཅེས་སྨོན་ལམ་རྒྱག་བཞིན་ཡོད་ཅེས་ལབ་ཀྱི་ཡོད། ད་ལྟ་ང་ཚོར་བོད་ཀྱི་འགྲེམས་སྟོན་ཁང་ཞིག་ཡོད་པ་རེད། ལོ་ ༡༠༠ ཡི་རྗེས་སུ་བོད་པ་ག་འདྲ་ཡོད་པ་རེད། བོད་དང་བོད་པའི་རིག་གཞུང་ག་འདྲ་ཡོད་པ་རེད་ཟེར་དུས། འགྲེམས་སྟོན་ཁང་ལ་ལྟ་རུ་རྒྱུག་ཅེས་ལབ་པའི་ཉིན་མོ་ཞིག་ཤར་བ་ཡིན་ན། ང་ཚོའི་རྩ་དོན་དེ་བརླགས་པ་རེད། དེར་བརྟེན་འགྲེམས་སྟོན་ཁང་བརྒྱུད་དེ་གོ་རྟོགས་རྒྱུ་གལ་ཆེན་པོ་ཞེ་དྲགས་རེད། ཅེས་སོགས་གསུངས་སོང་།
ད་ལན་བོད་ཀྱི་འགྲེམས་སྟོན་ཁང་ནས་རྒྱལ་སྤྱིའི་འགྲེམས་སྟོན་ཉིན་མོ་སྲུང་གཙི་གནང་བ་ཐེངས་གཉིས་པ་དེ་ཆགས་ཡོད་ལ། ཕ་ཡུལ་ཕྱོགས་ལ་རྒྱང་ལྟ་ཞེས་པའི་བརྗོད་གཞིའི་འོག་ཉིན་གྲངས་གསུམ་རིང་དྷ་སའི་ཉེ་འཁོར་གྱི་སློབ་གྲྭ་ཁག་གི་སློབ་ཕྲུག་དང་དགོན་སྡེ་གྲྭ་ཚང་ཁག་ནས་དགེ་འདུན་པ་བཅས་ཆེད་དུ་སྐད་བཏང་སྟེ། འགྲེམས་སྟོན་ཁང་ངོ་སྤྲོད་གནང་བ་དང་འབྲེལ། བོད་ཆོལ་ཁ་གསུམ་གྱི་ཆས་གོས་དང་སྐུ་ཐང་འགྲེམས་སྟོན། དེ་བཞིན་བོད་དོན་སྐོར་གྱི་གློག་བརྙན་གཟིགས་འབུལ་དང་། མཁས་དབང་ཆེད་དུ་གདན་འདྲེན་ཞུས་ཏེ་བོད་དོན་ཐོག་གཏམ་བཤད་གནང་རྒྱུ་དང་། ཉིན་མཐའ་མར་བོད་ཀྱི་གཞས་སྣ་འཁྲབ་སྟོན་བཅས་གནང་རྒྱུ་ཡིན་འདུག
གསར་འགོད་པ། པདྨ་མཚོ།
