ལྷོ་ཨ་ཧྥི་རི་ཁའི་གསར་ལམ་ཁག་ཅིག་ནང་རྒྱ་ནག་ནས་དབོར་འདྲེན་བྱས་པའི་ལྕགས་སྣོད་ནང་གི་སྙལ་ཤའི་ཟས་རིགས་དེ་དག་གི་རྒྱུ་ཆ་མི་ཤ་ཡིན་པའི་གནས་ཚུལ་ཞིག་ཐོན་པ་དེར་རྒྱ་ནག་ཕྱི་སྲིད་ལྷན་ཁང་གི་མི་སྣས་གསལ་བཤད་བྱས།
ཨ་ཧྥི་རི་ཁའི་གསར་ཁང་ (africanews) གིས་གནས་ཚུལ་སྤེལ་བ་ལྟར་ན། ཉེ་ལམ་རྒྱལ་སྤྱིའི་གསར་ལམ་ཁག་རེ་ཟུང་དང་། ལྷག་པར་དུ་ལྷོ་ཨ་ཧྥི་རི་ཁའི་གསར་ལམ་ཁག་ཅིག་ནང་། རྒྱ་ནག་ནས་དབོར་འདྲེན་བྱས་པའི་ལྕགས་སྣོད་ནང་གི་སྙལ་ཤའི་ཟས་རིགས་ཀྱི་རྒྱུ་ཆ་མི་ཤ་ཡིན་སྐོར་དང་། ལྷོ་ཨ་ཧྥི་རི་ཁའི་ནང་རྒྱ་ནག་ནས་ཐོན་པའི་སྙལ་ཤས་ཟས་རིགས་བེད་སྤྱོད་གཏོང་མཁན་ཚོས་ཡིད་གཟབ་བྱེད་དགོས་སྐོར་སོགས། རྒྱ་ནག་ནང་མི་ཤ་ལས་སྣོན་བྱེད་བཞིན་པའི་པར་དང་བཅས་ཐོན་ཡོད་སྟབས། རེས་གཟའ་སྤེན་པའི་ཉིན་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཧོང་ལུའུ་ (Hong Lei) ཡིས་རྒྱ་ནག་གཞུང་འབྲེལ་བརྒྱུད་ལམ་ཁག་ཏུ། ལྷོ་ཨ་ཧྥི་རི་ཁའི་ཛམ་བྷེ་ཡ་གཞུང་དམངས་གཉིས་ནས་འཆལ་གཏམ་དེ་རིགས་ལ་ཆ་འཇོག་བྱེད་མི་རུང་སྐོར་དང་། དངོས་ཡོད་གནས་ཚུལ་ལ་རྟོགས་ཞིབ་བྱས་པ་བརྒྱུད་དེ། གནས་ཚུལ་དེ་སྤེལ་མཁན་བརྒྱུད་ལམ་ཁག་ནས་གསུབ་ཏུ་འཇུག་དགོས་སྐོར་སོགས་བརྗོད་ཡོད་འདུག
གནས་ཚུལ་དེ་ཐོག་མ་རྒྱ་ནག་ཏུ་སྡོད་པའི་མིང་བརྗོད་འདོད་མེད་པའི་ལྷོ་ཨ་ཧྥི་རི་ཁའི་བུད་མེད་ཅིག་གིས་གསར་ལམ་ཐོག་བརྗོད་ཡོད་པ་དང་། ཁོང་མོས་རྒྱ་ནག་ནས་ཐོན་སྐྱེད་བྱས་ཏེ་ལྷོ་ཨ་ཧྥི་རི་ཁའི་རྒྱལ་ཁབ་ཛམ་བྷེ་ཡ་ (Zambia) ནང་ཕྱི་འདྲེན་བྱས་པའི་སྙལ་ཤའི་ཟས་རིགས་ཀྱི་རྒྱུ་ཆ་མི་ཤ་ལས་བཟོས་པ་ཡིན་སྐོར་དང་། ལྷོ་ཨ་ཧྥི་རི་ཁའི་ནང་རྒྱ་ནག་གི་ཤ་རིགས་བེད་སྤྱོད་གཏོང་མཁན་ཚོས་ཟབ་དགོས་སྐོར་སོགས་བརྗོད་ཡོད་སྟབས། རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་འདིའི་སྐོར་ལ་དོགས་གཞི་དང་གླེང་སློང་ཆེ་རུ་ཕྱིན་ཡོད།
བྷེ་བྷེ་སེ་གསར་ཁང་ (BBC News) གིས་སྤེལ་བའི་གནས་ཚུལ་ནང་། རྒྱ་ནག་གཞུང་འབྲེལ་ཞིན་ཧྭ་གསར་ཁང་གིས་རྒྱ་ནག་ཏུ་ལྷོ་ཨ་ཧྥི་རི་ཁའི་བུད་མེད་དེ་འདྲ་ཞིག་མེད་ལུགས་འཁོད་ཡོད་འདུག་ལ། ལྷོ་ཨ་ཧྥི་རི་ཁའི་རྒྱ་ནག་གཞུང་ཚབ་པ་ཡང་ཡོ་མེན་ (Yang Youming) ཟེར་བ་ཞིག་གིས། རྒྱ་ནག་གིས་སྐམ་ཤའི་ཚབ་ཏུ་མི་ཤ་སྙལ་མ་ལྷོ་ཨ་ཧྥི་རི་ཁའི་ནང་དབོར་འདྲེན་བྱེད་ཀྱི་འདུག་ཟེར་དེ་འཆལ་གཏམ་ཁོ་ན་ཡིན་པ་དང་། གནས་ཚུལ་དེ་རྒྱལ་ཁབ་གཉིས་ཀྱི་དུས་ཡུན་རིང་བོའི་འབྲེལ་ལམ་ལ་གཏོར་བརླག་གཏོང་བར་ཆེད་དུ་དམིགས་པ་ཞིག་ཡིན་ལུགས། དཀྲོག་གཏམ་དེས་རྒྱ་ནག་ལ་སྡང་ཟུག་དང་དོ་ཕོག་ཆེན་པོ་བཟོས་ཡོད་སྐོར་སོགས་བཤད་ཡོད་འདུག ཛམ་བྷེ་ཡ་རྒྱལ་སྲུང་ལྷན་ཁང་གི་བློན་ཆེན་གཞོན་པ་མུ་ལིན་གྷ་ (Mulenga) ཟེར་བ་ཞིག་གིས། གནས་ཚུལ་དེས་རྒྱལ་ཁབ་གཉིས་ཀྱི་འབྲེལ་ལམ་ལ་དོ་ཕོག་བཟོས་པར་བློ་འཚབ་ཡོད་ལུགས་དང་། ཛམ་བྷེ་ཡའི་གཞུང་གིས་གནས་ཚུལ་དེར་རྟོགས་ཞིབ་ནན་མོ་བྱས་པ་བརྒྱུད་དེ་རྒྱ་ནག་གཞུང་ལ་བརྡ་ལན་གསལ་བོ་སྤྲོད་རྒྱུ་ཡིན་ལུགས་སོགས་བཤད་འདུག
གསར་ལམ་ཁག་རེ་ཟུང་ནང་ཐེངས་འདིའི་གནས་ཚུལ་དེ་དང་འབྲེལ་ཏེ། མི་ཤ་ལས་སྣོན་དང་བེད་སྤྱོད་གཏོང་བཞིན་པའི་པར་འགའ་སྤྱི་ཚོགས་དྲ་ལམ་ཐོག་ཁྱབ་བཞིན་པ་དེ་ནི། ༢༠༡༢ ལོར་ཕབ་སྐྲུན་བྱས་པའི་གདོན་འདྲེའི་སྐོར་གྱི་གློག་བརྙན་ (Resident Evil 6) ཟེས་པ་དེ་ཕབ་སྐྲུན་བྱེད་སྐབས་ཀྱི་འདྲ་པར་ཡིན་ཚུལ་དང་། མི་ཤ་འཚོང་མཁན་གྱི་འདྲ་པར་དེའང་ལོན་ཌོན་དབུས་ཁྲོམ་རར་ (London’s Smithfield)ནས་ཐོན་པའི་དཔར་དག་ཉེ་ཆར་ལྷོ་ཨ་ཧྥི་རི་ཁའི་ཁྲོམ་རར་ཐོན་པ་ཞིག་ཡིན་ལུགས་སོགས་འཁོད་འདུག
གསར་འགོད་པ། པདྨ་རྒྱལ།
