ཉི་ཧོང་ལྷོ་རྒྱུད་གླིང་ཕྲན་ཨོ་ཀེ་ན་ཝར་རྟེན་གཞི་བྱས་པའི་ཨ་རིའི་མཚོ་དམག་གིས་ཉི་ཧོང་གི་བུད་མེད་ཚོར་བཙན་གཡེམ་དང་དམར་གསོད་བྱས་པའི་བྱ་སྤྱོད་ལ་ཉི་ཧོང་སྲིད་བློན་གྱིས་མཐའ་གཅིག་ཏུ་ཨ་རིར་ངོ་རྒོལ་བྱས་འདུག
རོའུ་ཏར་གསར་ཁང་གིས་གནས་ཚུལ་སྤེལ་བ་ལྟར་ན། ཟླ་འདིའི་ཚེས་ ༢༥ ཉིན་ཨ་རིའི་སྲིད་འཛིན་ཨོ་བྷ་མ་ཉི་ཧོང་རྒྱལ་ཁབ་ཏུ་སྐོར་སྐྱོད་སྐབས་སུ་ཉི་ཧོང་གི་སྲིད་བློན་ཤཱིན་ཛོ་ཨ་བྷིས་ཉེ་ལམ་ཨ་རིའི་མཚོ་དམག་གིས་ཉི་ཧོང་གི་བུ་མོ་ཞིག་ལ་བཙན་གཡེམ་གྱིས་དམར་གསོད་བཏང་བར་མཐའ་གཅིག་ཏུ་ངོ་རྒོལ་ཡོད་སྐོར་བརྗོད་ཅིང་། སྲིད་འཛིན་ཨོ་བྷ་མས་དོན་རྐྱེན་དེ་ལ་སེམས་གཏིང་ནས་ནོངས་འགྱོད་དང་བཟོད་གསོལ་ཞུས་ཡོད་འདུག
ཉི་ཧོང་གི་སྲིད་བློན་ཤཱིན་ཛོ་ཨ་བྷིས་ཉི་ཧོང་གྲོང་ཁུལ་ཨ་སི་ཤཱེ་མ་ (Ise-Shima) རུ་འཚོགས་བཞིན་པའི་རྒྱལ་ཁབ་བདུན་གྱི་གྲོས་མོལ་ཚོགས་ཆེན་སྐོར་གྱི་གསར་འགོད་གསལ་བསྒྲགས་ཤིག་སྤེལ་ཏེ། ང་རང་ཉི་ཧོང་སྲིད་བློན་ཡིན་པའི་ཆ་ནས་ཉེ་ལམ་ཨོ་ཀེ་ན་ཝ་ (Okinawa) གླིང་ཕྲན་སྟེང་ཨ་རིའི་མཚོ་དམག་གིས་ཉི་ཧོང་བུ་མོ་ཞིག་ལ་བཙན་གཡེམ་དང་དམར་གསོས་བྱས་པའི་དོན་རྐྱེན་ཐད་ངས་ཨ་རིའི་སྲིད་འཛིན་ཨོ་བྷ་མར་མཐའ་གཅིག་ཏུ་ངོ་རྒོལ་བྱེད་ཀྱི་ཡོད། བསམ་བཞིན་དུ་བྱས་པའི་འདོད་སྲེད་ཀྱི་ནག་ཉེས་དེ་ང་ལ་ཁྲོ་སེམས་ཆེན་པོ་བསླངས་ཡོད། ཅེས་སོགས་བརྗོད་ཅིང་། སྐབས་དེར་ཨ་རིའི་སྲིད་འཛིན་ཨོ་བྷ་མས་དོན་རྐྱེན་དེའི་ཐད་ངས་སེམས་གཏིང་ནས་ནོངས་འགྱོད་དང་བཟོད་གསོལ་ཞུ་རྒྱུ་ཡིན་ལ། ཉི་ཧོང་རྒྱལ་ཁབ་ཀྱི་ཁྲིམས་ལུགས་གཞིར་བཟུང་གིས་ཨ་རིའི་གཞུང་གིས་ཉི་ཧོང་སྲིད་གཞུང་དང་ལྷན་དུ་གནད་དོན་དེའི་ཐད་རྟོགས་ཞིབ་བརྒྱུད་དྲང་བདེན་གྱིས་ཐོག་གཅོད་བྱ་རྒྱུ་ཡིན་སྐོར་བརྫོད་འདུག
ཨ་རིའི་སྲིད་འཛིན་ཨོ་བྷ་མ་ཉོ་ཧོང་ནང་སྐོར་སྐྱོད་བྱེད་དོན་གཙོ་བོ་ཉི་ཧོང་ནང་འཚོགས་བཞིན་པའི་རྒྱལ་ཁབ་བདུན་གྱི་ཚོགས་ཆེན་སྟེང་མཉམ་ཞུགས་བྱེད་པ་དང་དེའི་རྗེས་ཕྱི་ལོ་ ༡༩༤༥ ལོའི་འཛམ་གླིང་དམག་ཆེན་གཉིས་པའི་སྐབས་སུ་ཐོག་དང་པོར་ཨ་རིའི་རྡུལ་ཕྲན་མཚོན་ཆས་གཏོར་བའི་ཉི་ཧོང་གྲོང་ཁྱེར་ཧེ་རོ་ཞེ་མ་ (Hiroshima) རུ་ལྟ་སྐོར་དང་འགལ་གཏོར་ཁྲོད་རྐྱེན་ལམ་དུ་ཤོར་བའི་ཉེས་མེད་མི་མང་ལ་མྱ་ངན་གུས་འདུད་ཞུ་ཆེད་ཡིན་འདུག
གནས་ཚུལ་ལྟར་ན། ཐེངས་འདིའི་རྒྱལ་ཁབ་བདུན་གྱི་ཚོགས་ཆེན་སྟེང་དབྱིན་ཇི་དང་ཁེ་ན་ཊ། ཧྥ་རན་སི་དང་ཨེ་ཊ་ལེ། ཉོ་ཧོང་དང་ཨ་རི་བཅས་ཀྱི་དབུ་ཁྲིད་རྣམས་མཉམ་ཞུགས་ཐོག རྒྱལ་ཁབ་ཕན་ཚུན་བར་འཕྲད་བཞིན་པའི་ཁེ་ལས་དང་སྐྱབས་བཅོལ་བའི་དཀའ་རྙོག གནས་འཕྲིན་བརྒྱུད་ལམ་དང་མཚོ་ཐོག་སྐྱེལ་འདྲེན་གྱི་བདེ་འཇགས། དེ་བཞིན་རྒྱ་ནག་གི་ལྷོ་ཤར་མཚོ་ཁུལ་དུ་འབྱུང་བཞིན་པའི་རྩོད་རྙོག་སོགས་ཀྱི་ཐད་གྲོས་མོལ་བྱེད་བཞིན་ཡོད་འདུག
གསར་འགོད་པ། པདྨ་རྒྱལ།
