ང་ལ་གྲོཊ་པོ་ཞིག་གི་འདུ་ཤེས་ཡོད་ན་ཆོལ་ཁ་དང་ཆོལ་ལུཊ་ཀྱི་འཐེན་འཁྱེར་མ་བྱེད་ཨ།

དེ་རིང་སྔ་དྲོ་དྷ་ས་ཐེག་ཆེན་གཙུག་ལག་ཁང་དུ་སྲིད་སྐྱོང་བློ་བཟང་སེང་གེ་མཆོག་གིས་བཀའ་ཤག་སྐབས་ ༡༥ པའི་སྲིད་སྐྱོང་གི་ལས་འཁུར་དམ་བཅའ་ཕུལ་སོང་།

 དེ་རིང་སྔ་དྲོའི་ཆུ་ཚོད་ ༩།༣༠ ཐོག་དྷ་ས་ཐེག་ཆེན་གཙུག་ལག་ཁང་དུ་༸གོང་ས་མཆོག་དབུ་བཞུགས་ཐོག དབུས་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བའི་མདུན་དུ། སྲིད་སྐྱོང་བློ་བཟང་སེང་གེ་མཆོག་ནས་བཀའ་ཤག་སྐབས་ ༡༥ པའི་སྲིད་སྐྱོང་གི་ལས་འཁུར་དམ་བཅའ་ཕུལ་སོང་བ་དང་། མཛད་སྒོའི་ཐོག་བོད་མིའི་སྒྲིག་འཛུགས་ཀྱི་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་སྲི་ཞུ་ལས་བྱེད། དེ་བཞིན་རྒྱ་གར་གྱི་བོད་དོན་རྒྱབ་སྐྱོར་བ་དང་། གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་སྐུ་ཚབ། གཞན་ཡང་། དྷ་ས་ཁུལ་གྱི་ཆོས་སྡེ་ཁག་གི་གྲྭ་བཙུན་དང་སེར་སྐྱ་མི་མང་བཅས་མི་གྲངས་ ༥༠༠༠ ཡས་མས་འཛོམས་འདུག

མཛད་སྒོའི་ཐོག་སྲིད་སྐྱོང་མཆོག་ནས་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་གི་མདུན་དུ། བཙན་བྱོལ་བོད་མིའི་ཁྲིམས་ལུགས་ནང་གཏན་འབེབས་གནང་བའི་ཚིག་གཞི་ལྟར་སྲིད་སྐྱོང་གི་ལས་འཁུར་དང་གསང་རྒྱའི་དམ་བཅའ་ཕུལ་རྗེས། ཁྲིམས་ཞིབ་པ་ཆེ་བ་མཆོག་ནས་སྲིད་སྐྱོང་མཆོག་ལ་མཇལ་དར་བསྒྲོན་པ་དང་དམ་འབུལ་མ་དེབ་ཐོག་མཚན་རྟགས་བཀོད། དེ་ནས་ཁྲིམས་ཞིབ་པ་ཆེ་བ་མཆོག་དང་སྲིད་སྐྱོང་མཆོག་རྣམ་གཉིས་ཀྱིས་དབུས་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པས་༧གོང་ས་མཆོག་ལ་གུས་ཕྱག་དང་བཅས་མཇལ་དར་ཕུལ་རྗེས། ཁྲིམས་ཞིབ་པ་གཞན་གཉིས་དང་བོད་མི་མང་སྤྱི་འཐུས་སྦྲེལ་པོས་སྲིད་སྐྱོང་མཆོག་ལ་འཚམས་འདྲིའི་མཇལ་དར་བསྒྲོན་ཏེ། བོད་ཀྱི་ཟློས་གར་ཚོགས་པས་དགའ་བསུའི་གླུ་གཞས་ཕུལ་སོང་།

སྲིད་སྐྱོང་བློ་བཟང་སེང་གེ་མཆོག་ནས་བོད་དབྱིན་གཉིས་ཀྱི་ཐོག་ནས་སྲིད་སྐྱོང་གི་ལས་ཡུན་གསར་པ་དབུ་འཛུགས་ཀྱི་གསུང་བཤད་ཟབ་རྒྱས་གནང་གྲུབ་རྗེས། ༧གོང་ས་མཆོག་ནས་བོད་ཆོལ་ཁ་གསུམ་སྐྱིད་ན་མཉམ་སྐྱིད་དང་སྡུག་ན་མཉམ་སྡུག་གིས་རྡོག་རྩ་གཅིག་ཏུ་བསྒྲིལ་དགོས་པའི་བླངས་འདོར་གྱི་བཀའ་སློབ་གནང་དོན། བཟང་པོ་ཡོད་ན་ངན་པའང་ཡོད་དགོས་པ་རེད། བཟང་པོ་རྐྱང་རྐྱང་ཡིན་ན་བཟང་པོའི་ངོ་སོ་འཐོན་རྒྱུ་ཅི་མི་འདུག་གཱ། ངན་པའི་ཆ་ནས་བཤད་པ་ཡིན་ན། བར་སྐབས་འོས་བསྡུ་ཆེན་མོའི་སྐབས་སུ་ཡ་རབས་བཟང་སྤྱོད་ཀྱི་མཚམས་ནས་ཏོག་ཙམ་མར་བབས་བསྡད་པ་འདྲ་པོ་ཞིག་ཡོང་སོང་། ལྷག་པར་དུ་རེ་ཟུང་གི་བྱེད་ལས་ཀྱི་རྐྱེན་པས་ཆོལ་ཁའི་འཐེན་འཁྱེར་གྱི་རྣམ་པ་འདྲ་པོ་དེ་ཕྲན་བུ་ཕྲན་བུ་ཐོན་ཡོང་གི་འདུག དཔེ་མི་སྲིད་པའི་བློ་ཕམ་བྱུང་། ང་ཚོས་སྤོབས་པ་བྱེད་པ་དང་དངོས་གནས་འཛམ་བུ་གླིང་སྤྱི་ལ་མིག་དཔེ་སྟོན་ཐུབ་པ་ཞིག་ཡོད་པ་དེ་ཉམས་དམས་སུ་སོ་སོས་གཏོང་གི་ཡོད་པ་རེད་བཱ། དངོས་གནས་དྲང་གནས་ཡ་རབས་སྤྱོད་བཟང་དང་དྲང་བདེན། རྒྱབ་མདུན་མངོན་ལྐོག་མེད་པ། ཕྱི་གསལ་ནང་གསལ་གྱིས་ང་ཚོས་སྤོབས་པ་བྱས་ནས་འཛམ་བུ་གླིང་འདིའི་སྒང་ལ་གདོང་སྟོན་ཐུབ་པའི་ཆ་རྐྱེན་གཙོ་བོ་དེ། ང་ཚོའི་ཡ་རབས་དྲང་བདེན་དང་སྤྱོད་བཟང་དེ་ཚོ་ཆགས་ཀྱི་ཡོད་པ་རེད། དེ་ཚོ་ཏོག་ཙམ་བསྟན་པ་མགོ་ནས་བཤིག་པ་འདྲ་པོ་ཞིག་ཆགས་ཡོང་དུས་དགའ་རབ་བློ་ཕམ་ཡོང་གི་འདུག

མང་ཆེ་བར་ཁག་ཅི་ཡོད་པ་མ་རེད། ཡིན་ནའང་། རེ་ཟུང་གིས་མགོ་བདེ་པོ་འདྲ་པོ་དང་མིག་རྒྱང་ཐུང་ཐུང་། འཕྲལ་སེལ་ངོ་གདོང་རང་མ་གཏོགས་ཆེ་ས་ལ་བསམ་བློ་མ་འཁོར་མཁན་དེ་འདྲས་ཆོལ་ཁའི་འཐེན་འཁྱེར་དང་ཆོས་ལུགས་འཐེན་འཁྱེར་འདྲ་པོ་ཡོང་གྲབས་ཡོང་གྲབས་བྱེད་ཀྱི་འདུག་གཱ། དེ་ཚོའི་གྲས་དེ་སྐྱོན་ཡིན་པར་ངོས་འཛིན་བྱས་ཏེ་དེ་འདྲ་མ་ཡོང་བ་ཞིག་བྱེད་དགོས་པ་རེད། ཆོལ་ཁ་གསུམ་གཅིག་སྒྲིལ་ཟེར་བ་དེ་སྔར་དུས་རབས་བདུན་པ་བརྒྱད་པ། དགུ་པའི་སྐབས་སུ་ཆོས་རྒྱལ་བཀའ་དྲིན་ཅན་དེ་ཚོའི་འོག་ལ་གང་ལྟར་ཆོལ་ཁ་གསུམ་ཧ་ལམ་གཅིག་སྒྲིལ་ཞིག་ཆགས་བསྡད་ཡོད་པ་རེད། ཆོས་རྒྱལ་སྲོང་བཙན་སྒམ་པོའི་སྐབས་སུ་དེ་སྔ་ཞང་ཞུང་སྨར་ཡིག་ཟེར་བ་ཞིག་ཡོད་ན་འདྲ་མེད་ནའང་འདྲ། གང་ལྟར་བོད་ཡིག་དེ་ཐོན་མི་སམ་བྷོ་ཊས་གཏན་འབེབས་གནང་སྟེ་བཟོས་བཞག་པ་དང་། ང་ཚོའི་བཀའ་འགྱུར་བསྟན་འགྱུར་དེ་ཚོའང་ཡི་གེ་འདིའི་ནང་དུ་ཡོད་པ་རེད། སྐད་ཀྱི་གདངས་འདྲ་མི་འདྲ་ཡོད་ཀྱང་། བོད་ཆོལ་ཁ་གསུམ་ཡོངས་རྫོགས་དང་མདོར་ན་ཧི་མ་ཡ་ལའི་རི་རྒྱུད་དང་བཅས་པའི་བཀའ་འགྱུར་བསྟན་འགྱུར་གང་དུ་ཡོད་ས་དེར་བཀའ་འགྱུར་བསྟན་འགྱུར་གྱི་ཡི་གེ་དེ་ཚང་མས་བེད་སྤྱོད་བྱེད་ཀྱི་ཡོད་པ་རེད་ལ། བོད་པ་གཅིག་སྒྲིལ་དེས་བཟོ་ཡོང་གི་འདུག་གཱ།

ང་ཚོར་དངོས་གནས་དུས་ཚོད་དཀའ་ངལ་ཅན་དང་ཆབ་སྲིད་ཀྱི་འཕོ་འགྱུར་ག་འདྲ་ཞིག་བྱུང་ཡོད་པ་ཡིན་ནའང་། དེ་ལ་ལྟོས་པ་མེད་པར་ང་རང་ཚོའི་ཆོས་དང་རིག་གཞུང་དེ་བོད་ཆོལ་ཁ་གསུམ་གཅིག་སྒྲིལ་གྱི་འོག་ནས་འདས་པའི་ལོ་སྟོང་ཕྲག་ལྷག་རིང་ལ་ང་ཚོས་ཉར་ཚགས་བྱས་པ་རེད། མ་འོངས་པ་ལའང་བོད་ཆོལ་ཁ་གསུམ་གཅིག་ཏུ་སྒྲིལ་བའི་ཐུན་མོང་གི་ནུས་པའི་ཐོག་ནས་བོད་ཀྱི་ཆོས་དང་རིག་གཞུང་ཉམས་པ་སོར་ཆུད་དང་མི་ཉམས་གོང་སྤེལ་ཡོང་ཐུབ་པ་ཞིག་རེད། དེ་འདྲ་ཡིན་དུས་འཕྲལ་སེལ་གྱི་དགོས་པ་ཆུང་ཆུང་ཞིག་ལ་དམིགས་ཏེ་ཆོས་ལུགས་འཐེན་འཁྱེར་དང་ལུང་ཚན་གྱི་འཐེན་འཁྱེར་འདྲ་པོ་བྱས་པ་ཡིན་ན། དངོས་གནས་དྲང་གནས་བློ་ཆུང་ཐན་བལྟས་ཟེར་བ་དེ་ཆགས་ཀྱི་ཡོད་པ་རེད། ཁྱོན་ནས་ཡག་པོ་ཡོད་པ་མ་རེད་ཤེས་སོང་ང་། ང་ཚོ་ཆོལ་ཁ་གསུམ་དེ་སྐྱིད་པོ་བྱུང་ན་སྐྱིད་གཅིག་དང་སྡུག་པོ་བྱུང་ན་སྡུག་གཅིག་བྱས་ཏེ་ང་ཚོ་སྐྱིད་སྡུག་མཉམ་མྱོང་བྱེད་མཁན་ཞིག་ཡིན་མ་གཏོགས་ང་ཚོ་འདིར་ཆོལ་ཁའི་དབྱེ་བ་བྱས་ནས་འགྲོ་བ་དེ་འདྲ་ནམ་ཡང་མི་ཡོང་བ་ཞིག་ཁྱེད་རང་ཚོ་ཚང་མས་སེམས་ལ་འཇོག་དགོས་པ་རེད་ཤེས་སོང་ང་། མགོ་འཁྲིད་མཁན་ཚོས་དེ་སེམས་ལ་ཞོག ལས་ཀ་བྱེད་མཁན་ཚོས་ཀྱང་དེ་སེམས་ལ་ཞོག མི་མང་གིས་ཡིན་ནའང་དེ་སེམས་ལ་ཞོག དེ་རིང་འདིར་བླ་མ་དགེ་བཤེས་དེ་འདྲ་ཁ་ཤས་ཡོད་པ་དང་། འདིར་སྐད་ཆ་བཤད་པ་དེ་ཚོ་གསན་འགྲོ་ཡི་རེད། ཆོས་ཕྱོགས་ཀྱི་དབུ་འཁྲིད་བླ་མ་དགེ་བཤེས་ཚོས་ཡིན་ནའང་དེ་སེམས་ལ་ཞོག ང་ཚོ་སྟོན་པ་བཅོམ་ལྡན་འདས་གཅིག་གི་རྗེས་འབྲང་བ་རེད། ལྷག་པར་དུ་དཔལ་ནལེནྜའི་མགོན་པོ་ཀླུ་སྒྲུབ་དང་ཐོགས་མེད་ཀྱི་རྗེས་སུ་འབྲང་མཁན་གཅིག་གྱུར་རེད། དེ་འདྲ་ཞིག་ཡིན་ནའང་སོ་སོའི་ཞྭ་མོའི་ཚོན་མདོག་འདྲ་དང་མི་འདྲ་ཞིག་དང་ཏོག་ཙམ་ནས་ང་དང་ཁྱེད་ཅེས་བཤད་བསྡད་ན་བྱབ་ཆུང་བ་རེད་བཱ། དེ་རིང་ཁ་སང་ཨ་རིའི་ལུང་པའི་ནང་ལྟོས་དང་། ཡེ་ཤུའི་ཆོས་ལུགས་དང་ཁ་ཆེའི་ཆོས་ལུགས་བར་རྒྱག་རེས་རྒྱག་གི་འདུག་གཱ། བྱང་ཨེ་རི་ལན་ཌི་(Northern Ireland) ལ་ཆ་བཞག་ན། Catholic དང་ protestant རྒྱག་རེས་རྒྱག་གི་འདུག་གཱ། དེ་བཞིན་ཁ་ཆེའི་ཡུལ་གྲུ་གཅིག་དང་ཁ་ཆེའི་ཆོས་ལུགས་གཅིག་གྱུར་གྱི་ནང་དུའང་ Sunnis དང་ Shias བར་རྒྱག་རེས་རྒྱག་གི་འདུག་གཱ། ང་ཚོ་བོད་པའི་འདས་པའི་ལོ་རྒྱུས་ནང་བསམ་བློ་ཐོངས་དང་། ཞྭ་དམར་སེར་བར་རྒྱག་རེས་བརྒྱབ་པ་དང་། ས་སྐྱ་དང་དགེ་ལུཊ་བར་རྒྱག་རེས་བརྒྱབ་པ་དེ་འདྲ་བྱུང་མྱོང་ཡོད་པ་རེད། དེ་ཚོ་ངོ་ཚ་དགོས་པ་རེད། ད་ལྟ་མི་རབས་གསར་པ་བསླེབས་བསྡད་ཡོད་པ་རེད། དུས་རབས་གཉན་འཕྲེང་ཅན་གྱི་སྒང་བསླེབས་བསྡད་ཡོད་པ་རེད། འཛམ་བུ་གླིང་སྤྱི་ལ་ཕར་ང་ཚོས་ཧ་ལམ་འབོར་ཤོབ་དང་སྦྲགས་ནས་བཤད་ཀྱི་ཡོད་པ་རེད། དེ་འདྲའི་གནས་ཚུལ་སྒང་ལ་ཞབས་འདྲེན་ང་རང་ཚོ་ནང་ནས་ཞུས་བསྡད་པ་ཡིན་ན་ཐབས་སྐྱོ་བོ་རེད། ངོ་ཚ་དགོས་པ་རེད། ང་ཚོ་སྟོན་པ་བཅོམ་ལྡན་འདས་ཀྱི་རྗེས་འབྲང་བ་རེད། བཅོམ་ལྡན་འདས་ཀྱིས་ག་རེ་དགོངས་ཀྱི་རེད། ཀླུ་སྒྲུབ་ཡབ་སྲས་ཀྱིས་ག་རེ་དགོངས་ཀྱི་རེད། ང་རང་ཚོ་བོད་གངས་ཅན་ལྗོངས་ཀྱི་སྔ་མའི་ས་དགེ་བཀའ་རྙིང་བོན་ཇོ་ནང་དང་བཅས་པ་རིས་སུ་མ་ཆད་པའི་དངོས་གནས་དྲང་གནས་ཀྱི་མཁས་གྲུབ་དམ་པ་ཚོས་ག་རེ་དགོངས་ཀྱི་རེད། དད་པ་མེད་ན་གནས་ཚུལ་ཁ་ཁ་རེད། ཆོས་བྱེད་ཀྱི་ཡོད་ན་བྱེད་སྟངས་དེ་འདྲ་མ་རེད། ཚང་མས་དངོས་གནས་དྲང་གནས་ཀྱིས་བྱམས་སྙིང་རྗེ་དང་བྱང་ཆུབ་སེམས་དཔའི་སྟོང་ཉིད་ཀྱི་ལྟ་བ་དེ་ཚོའི་གྲས་ཉམས་ལེན་ཡག་པོ་བྱེད་དགོས་པ་རེད། ཁ་ནས་བཤད་པ་གཅིག་པུས་འགྲིག་གི་ཡོད་པ་མ་རེད། སོ་སོའི་ལག་ལེན་དུ་འཁེལ་ཏེ་ངོ་འཕྲོད་པ་ཞིག་བྱུང་ན་སྤྲོ་བ་འཕེལ་ངེས་རེད། གཞན་ཁ་ནས་བརྒྱ་བཤད་སྟོང་བཤད་པ་ཡིན་ནའང་དོ་སྣང་མ་བྱས་པ་དང་ལག་ལེན་མ་བྱས་ན་སྤྲོ་བ་འཕེལ་གྱི་མ་རེད། མཁས་པའི་ཚིག་བཤད་ཙམ་མ་གཏོགས་དགོས་པ་ཅི་ཡོད་པ་མ་རེད། དེ་འདྲ་ཡིན་དུས་སོ་སོས་ཐོས་བསམ་སྒོམ་གསུམ་ཡ་མ་བྲལ་བ་ཞིག་བྱས་ཏེ་སློབ་སྦྱོང་ཡག་པོ་བྱོས། ཉམས་ལེན་ཡག་པོ་བྱོས། ཆོས་ལུགས་དང་ཆོལ་ཁའི་འཐེན་འཁྱེར་ནམ་ཡང་མ་བྱེད་ཨ། ཤེས་སོང་ང་། ང་ལ་ཏོག་ཙམ་གྲོགས་པོའི་འདུ་ཤེས་ཤིག་ཡོད་ན་ཁ་ལ་ཉན་དགོས་པ་རེད། ༧རྒྱལ་བ་རིན་པོ་ཆེ་ཞེས་མདུན་དུ་ཐུག་པའི་སྐབས་ལ་དགའ་རབ་ཡིན་མདོག་མདོག་བྱས། རྒྱབ་ལོགས་ལ་ཆོས་ལུགས་འཐེན་འཁྱེར་དང་ཆོལ་ཁའི་འཐེན་འཁྱེར་བྱས། སྐྱག་རྫུན་དང་ཧམ་པ་ཏོག་ཙམ་ཏོག་ཙམ་བཤད་བསྡད་པ་ཡིན་ན་ཡག་པོ་ཡོད་པ་མ་རེད། ཤེས་སོང་ང་། ཞེས་གསུངས་སོང་།

མཛད་སྒོ་གྲོལ་རྗེས་གསར་འགོད་པས་ཁྲི་ཟུར་ཟམ་གདོང་རིན་པོ་ཆེ་མཆོག་ལ་མ་འོངས་ལོ་ ༥ ཡི་སྲིད་སྐྱོང་མཆོག་ནས་ངེས་པར་དུ་ག་རེ་གནང་དགོས་པར་ཐུགས་རེ་གནང་གི་ཡོད་སྐོར་བཀའ་འདྲི་ཞུས་ཁོང་གིས། དེ་ཞུ་ཐུབ་རྒྱུ་ཁག་པོ་རེད། གཙོ་བོ་༧གོང་ས་སྐྱབས་མགོན་ཆེན་པོ་མཆོག་གིས་བར་ལམ་ཞིག་ལ་གནས་ཚུལ་ཁ་ཤས་ཀྱི་ཐོག་ཕྲན་བུ་ཞན་ཆ་ཡོད་པ་དང་ནར་འགྱངས་ཕྱིན་པའི་བཀའ་གནང་ཡོད་པ་རེད། དེ་ཚོ་ཞིབ་ཚགས་པོ་བྱས་ཏེ་གང་མགྱོགས་མགྱོགས་ཀྱིས་ཉམས་ཆག་བསྐོང་ཐུབ་པ་དང་ཞན་ཆ་སངས་ཐུབ་པ་གནང་གི་རེད་བསམ་པའི་ཡིད་ཆེས་བྱེད་ཀྱི་ཡོད། རྩ་བའི་བོད་ཀྱི་རྩ་དོན་རེད། བོད་ཀྱི་རྩ་དོན་ནི་རྒྱ་ནག་མཉམ་དུ་བཀའ་མོལ་གནང་རྒྱུ་དེ་རེད། དེ་ནི་གཞན་དབང་སྟབས་བསྟུན་རེད། དབུ་མའི་ལམ་གྱི་སྲིད་བྱུས་ཐོག་ལ་ཕྱི་བཤོལ་མེད་པའི་ཐོག་ནས་ཕེབས་རྒྱུ་རེད་ལ། དེར་ཕེབས་ཀྱི་ཡིན་ཞེས་བཀའ་གནང་སོང་བས་དམིགས་བསལ་ཞུ་རྒྱུ་གང་ཡང་མེད། ཅེས་གསུངས་སོང་།

གསར་འགོད་པ། པདྨ་མཚོ།