རྒྱ་གཞུང་གིས་འདས་པའི་ལོ་ངོ་བཅུ་གྲངས་ནང་ཀན་ལྷོ་ཁུལ་བསང་ཆུ་རྫོང་ཁོངས་ཀྱི་གཉན་ཆེན་གོང་སྔོན་བླ་རིར་གཏེར་ཁ་སྔོག་འདོན་བྱས་སྟེ། ཁོར་ཡུག་ལ་གནོད་སྐྱོན་ཚབས་ཆེན་བཟོས་ཡོད་པ་དང་། ད་ལྟའང་ལས་མི་ཧ་ཅང་མང་པོས་ས་སྔོག་འཕྲུལ་ཆས་མང་པོ་ཡུལ་དངོས་སུ་བཏང་ནས་ས་རྐོ་རྡོ་སློག་མུ་མཐུདདུ་བྱེད་བཞིན་ཡོད་སྟབས། དེ་རིང་བསང་ཆུ་རྫོང་ཨ་མཆོག་ཡུལ་ཚོའི་བོད་མི་ཚོས་གོང་སྔོན་བླ་རིར་གཏེར་ཁ་སྔོན་འགོག་ཅེས་པ་སོགས་ཀྱི་འཕྲེད་དར་བཟུང་སྟེ་ཞི་བའི་ངོ་རྒོལ་བྱེད་བཞིན་ཡོད་པ་དང་། ཕྱི་ཕྱོགས་སུ་བསླེབས་པའི་བརྙན་ཐུང་ནང་ཡུལ་དངོས་སུ་ཉེན་རྟོག་པ་མང་པོ་བསླེབས་ཏེ་འཛིན་བཟུང་གི་ཉེན་ཁ་བཏང་ནས་བཙན་གནོན་བྱེད་པར་གྲ་སྒྲིག་བྱེད་ཀྱི་འདུག
འབྲེལ་ཡོད་བོད་མི་ཞིག་གིས་འདི་གར་བརྗོད་པ་ལྟར་ན། དེ་སྔོན་ས་གནས་བོད་མི་ཚོས་གོང་རིམ་ལ་གནས་དེའི་གཏེར་ཁ་སྔོན་འདོན་འཕྲལ་དུ་མཚམས་འཇོག་མ་བྱས་ན། ཁོར་ཡུག་ལ་གནོད་སྐྱོན་ཆེན་པོ་ཐེབས་པ་དང་སེམས་ཅན་མང་པོར་འཆི་སྐྱོན་བྱུང་གི་ཡོད་སྐོར་ཡར་ཞུ་བྱས་ཡོད་ཀྱང་། མང་ཚོགས་ཀྱི་རེ་སྐུལ་ལ་ཉན་འཇོག་ཁྱོན་ནས་མ་བྱས་པར་མུ་མཐུད་དུ་གཏེར་ཁ་སྔོག་འདོན་བྱེད་བཞིན་ཡོད་སྐོར་བརྗོད་བྱུང་།
གསར་འགོད་པ། པདྨ་མཚོ།
