བོད་རང་བཙན་སློབ་ཕྲུག་ཚོགས་པས་གནམ་བདེ་སྒོ་མོ་ཆེའི་ཐང་ཆེན་དུ་རྒྱ་ནག་གི་སློབ་ཕྲུག་ཚོས་དམངས་གཙོ་དང་རང་དབང་ཐོབ་ཐང་གི་ལས་འགུལ་སྤེལ་བ་དེ་བློ་སྤོབས་ཤིག་དང་ནུས་སྟོབས་ཤིག བསླབ་བྱ་ཞིག་ཏུ་ངོས་བཟུང་སྟེ་དྲུག་བཞིའི་དོན་རྐྱེན་ལ་རྗེས་དྲན་ཞུ་བཞིན་ཡོད་ཟེར།
དེ་རིང་སྔ་དྲོའི་ཆུ་ཚོད་ ༡༠ བའི་སྟེང་དྷ་ས་མེག་གྷན་གྱི་བཞི་མདོ་རུ་བོད་རང་བཙན་སློབ་ཕྲུག་ཚོགས་པས་གནམ་བདེ་སྒོ་མོ་ཆེའི་ཐང་ཆེན་དུ་དྲག་ཆས་དམག་དཔུང་གིས་དམངས་གཙོའི་ལས་འགུལ་ལ་ཁྲག་དྲི་བྲོ་བའི་དྲག་གནོན་བྱས་ཏེ་མི་ལོ་ ༢༧ འཁོར་བའི་ཉིན་མོ་རྗེས་དྲན་བྱས་སོང་། དུས་དྲན་སྲུང་གཙིའི་ཐོག་བོད་རང་བཙན་སློབ་ཕྲུག་ཚོགས་པའི་ཧིན་བོད་སློབ་ཕྲུག་སྡེ་ཚན་ནས་འགྲོ་བ་མིའི་རང་དབང་དམངས་གཙོ་དང་འབྲེལ་བའི་སྐྱོ་གཞས་དང་། དྲུག་བཞིའི་དོན་རྐྱེན་སྐོར་གྱི་འདྲ་པར་དང་བསྒྲགས་ཡིག་སོགས་བཀྲམས་རྗེས། ཧིན་བོད་སློབ་ཕྲུག་ཚན་པའི་འགན་འཛིན་བསྟན་འཛིན་ཚེ་ལྷ་ལགས་ཀྱིས། རྒྱ་ནག་དམར་ཤོག་ཚོགས་པའི་དབང་སྒྱུར་འོག གནམ་བདེ་སྒོ་མོ་ཆེའི་ཐང་ཆེན་དུ་བྱུང་བའི་དོན་རྐྱེན་དེ་ནི་འཛམ་གླིང་སྒང་འདིར་འཚེ་མེད་ཞི་བའི་ལས་འགུལ་གྱི་ངོ་བོ་ཞིག་ཆགས་ཡོད། ང་ཚོ་བོད་མི་ལས་འགུལ་བ་ཞིག་ཡིན་པའི་ཆ་ནས། ང་ཚོས་དྲུག་བཞིའི་དམངས་གཙོའི་ལས་འགུལ་ནང་མཉམ་ཞུགས་གནང་མཁན་རྒྱ་ནག་གི་སློབ་ཕྲུག་ཚོར་གདུང་སེམས་མཉམ་སྐྱེད་དང་། དུས་ནམ་ཡང་རྒྱ་རིགས་རང་དབང་དམངས་གཙོ་དོན་གཉེར་བ་ཚོའི་རྒྱབ་དཔུང་དུ་ལངས་ཡོད། རྒྱུ་མཚན། འཚེ་མེད་ཞི་བའི་ལམ་ནས་རང་དབང་དམངས་གཙོའི་ཕུགས་འདུན་མངོན་འགྱུར་ཡོང་བར་ཡིད་ཆེས་བྱེད་ཀྱིན་ཡོད་སྐོར་བརྗོད་སོང་།
བོད་རང་བཙན་སློབ་ཕྲུག་ཚོགས་པའི་གཞི་རིམ་མང་ཚོགས་ཀྱི་འགན་འཛིན་རིན་འཛིན་ཆོས་སྒྲོན་ལགས་ཀྱིས། ང་ཚོས་དྲུག་བཞིའི་དོན་རྐྱེན་ཁྲོད་དམར་དམག་གིས་དམར་གསོད་བྱས་པའི་རྒྱ་རིགས་སློབ་ཕྲུག་ཚོར་གདུང་སེམས་མཉམ་སྐྱེད་གནང་རྒྱུ་མ་ཟད། ང་ཚོས་འཛམ་གླིང་ཁྱོན་ཡོངས་ལ་རྒྱ་ནག་དམར་ཤོག་ཚོགས་པས་དྲུག་བཞིའི་དམངས་གཙོའི་ལས་འགུལ་ལ་ཁྲག་དྲི་བྲོ་བའི་དྲག་གནོན་བྱས་པ་རྗེས་དྲན་ཞུ་བཞིན་ཡོད་སྐོར་ བརྗོད་སོང་།
དྲི་བ་དྲིས་ལན་སྐབས་སུ། བསྟན་འཛིན་ཚེ་ལྷ་ལགས་ཀྱིས་གསར་འགོད་པར་བརྗོད་དོན། བོད་དོན་འཐབ་རྩོད་པ་ཞིག་ཡིན་པའི་ཆ་ནས་ཕྱི་ལོ་ ༡༩༨༩ ལོའི་ཕྱི་ཟླ་ ༦ ཚེས་ ༤ ཉིན་གནམ་བདེ་སྒོ་མོ་ཆེའི་ཐང་ཆེན་དུ་རྒྱ་རིགས་སློབ་ཕྲུག་ཚོས་རྒྱ་ནག་དམངས་གཙོ་དང་རང་དབང་ཐོབ་ཐང་གི་ལས་འགུལ་སྤེལ་བ་དེ་བློ་སྤོབས་ཤིག་དང་ནུས་སྟོབས་ཤིག བསླབ་བྱ་ཞིག་ཏུ་ངོས་བཟུང་སྟེ། སྐབས་དེའི་དྲུག་བཞིའི་དོན་རྐྱེན་ལ་རྗེས་དྲན་ཞུ་བཞིན་ཡོད་སྐོར་དང་། དམིགས་སུ་དྲུག་བཞིའི་དོན་རྐྱེན་སྐབས་སུ་དམར་དམག་གི་འཁྲབ་ལྡན་འཁོར་ལོའི་མདུན་དུ་རང་སྲོག་འབེན་དུ་འཛུགས་མཁན་རྒྱ་རིགས་ཤིག་གི་ངོ་རྒོལ་ལས་འགུལ་དེས་འཛམ་བུ་གླིང་ཧ་ལས་སུ་བཅུག་ཡོད་པ་དང་། རྒྱ་རིགས་མི་སྒེར་ཞིག་གིས་དེ་ལྟར་རང་སྲོག་འབེན་དུ་བཙུགས་པ་དེས་རྒྱ་ནང་དུ་དོན་དངོས་སུ་རང་དབང་དམངས་གཙོ་གང་ཡང་མེད་པ་གསལ་བསྟོན་བྱས་ཡོད་པ་དང་། དུས་ད་ལྟ་ད་དུང་ཡང་རྒྱ་ནག་གི་རང་དབང་དམངས་གཙོའི་ཆེད་དུ་རང་སྲོག་འབེན་དུ་འཇོག་མཁན་རྒྱ་རིགས་དེ་དོན་དམ་སུ་ཞིག་ཡིན་མིན་ཧ་གོ་གི་མེད་སྐོར་སོགས་བརྗོད་ སོང་།
ཁོ་མོས་མུ་མཐུད་དུ་དྲུག་བཞིའི་དམངས་གཙོའི་ལས་འགུལ་ལ་བརྟེན་ནས་རྒྱ་ནག་དམར་ཤོག་ཚོགས་པའི་དབང་བསྒྱུར་སྲིད་ཇུས་ལ་འགྱུར་བ་གང་ཡང་ཐེབས་མེད་པ་མངོན་གསལ་ཡིན་ནའང་། ལོ་བཞིན་རྒྱ་ནག་གཞུང་གིས་དྲུག་བཞིའི་དོན་རྐྱེན་སྐོར་གླེང་སློང་དང་རྗེས་དྲན་སོགས་ལ་དམ་དྲག་ཤུགས་ཆེན་བྱེད་བཞིན་ཡོད་པ་ལྟར། དྲུག་བཞིའི་དོན་རྐྱེན་དེས་རྒྱ་ནག་དམར་ཤོག་ཚོགས་པར་སྲིད་དབང་སྒེར་གཅོད་མི་རུང་བའི་འཇིག་ཉེན་ཆེན་པོ་ཞིག་ངང་ངམ་ཤུགས་ཀྱིས་བསླངས་ཡོད་སྐོར་བརྗོད་སོང་།
རྒྱ་གར་སློབ་ཕྲུག་ཚོགས་པའི་ཚོགས་མི་ན་བིན་ཨེ་རྫ་ར་པུ་ (Naveen Isarapu) ལགས་ཀྱིས་གསར་འགོད་པར་ཁོ་བོ་རང་དབང་དམངས་གཙོའི་ཆེད་དུ་དེ་རིང་གི་དྲུག་བཞིའི་དོན་རྐྱེན་རྗེས་དྲན་ལས་འགུལ་ནང་མཉམ་ཞུགས་བྱས་པ་ཡིན་ཞིང་། རྒྱ་ནག་གཞུང་གིས་དྲུག་བཞིའི་དོན་རྐྱེན་སྐོར་ལ་དམ་དྲག་ཤུགས་ཆེན་བྱེད་ཀྱིན་ཡོད་སྟབས། ང་ཚོས་ཧིན་བོད་དབྱིན་གསུམ་གྱི་མི་མང་ལ་དྲུག་བཞིའི་དོན་རྐྱེན་གྱི་དངོས་ཡོད་ གནས་ཚུལ་སྐོར་ལ་གོ་རྟོགས་སྤེལ་ཐབས་དང་། འཚེ་མེད་ཞུ་བའི་འཐབ་རྩོད་ལ་བརྟེན་ནས་བོད་རྒྱ་མི་མང་གི་རང་དབང་དམངས་གཙོའི་ཕུགས་འདུན་མངོན་འགྱུར་ཡོང་ཐབས་སུ། ང་ཚོ་རྒྱ་གར་སློབ་ཕྲུག་ཚོས་ཀྱང་བོད་རྒྱ་མི་མང་གི་ཞི་བའི་འཐད་རྩོད་ལ་གདུང་སེམས་སྐྱེད་དང་ཕྱར་བ་གྲུ་འདེགས་བྱེད་ཀྱིན་ཡོད་སྐོར་བརྗོད་སོང་།
གསར་འགོད་པ། པདྨ་རྒྱལ།
