ཝིལི་ལམཝོ་ལེབ་ (Willy Lamwo-Lap) ཀྱིས་སྤེལ།
འཕྲིན་ལས་དབང་འདུས་ཀྱིས་བསྒྱུར།
རྒྱ་ནག་གི་སྲིད་འཛིན་ཞི་ཅིན་ཕིན་གྱིས་ཨུ་རུ་སུའི་སྲིད་འཛིན་སཱི་ཛར་པུ་ཏྲིན་(Czar Putin) དམིགས་དཔེར་བཟུང་སྟེ་རྒྱ་ནག་ནང་ཁོང་རང་ཉིད་ཀྱི་ཆབ་སྲིད་ཀྱི་དཔོན་རྒྱུད་འཛུགས་འདོད་ཡོད་སྐོར་རྗོད་བཞིན་ཡོད་འདུག
སྲིད་འཛིན་ཞི་ཅིན་ཕིན་གྱིས་སྲིད་འགན་བཞེས་པའི་ལས་ཡུན་ལོ་གསུམ་འདིའི་ནང་རྒྱ་ནག་གི་ཕྱི་འབྲེལ་སྲིད་བྱུས་དང་དཔལ་འབྱོར། ཁྲིམས་ལུགས་བཅས་ཀྱི་སྟངས་འཛིན། དེ་བཞིན། དྲག་པོའི་དམག་སྡེ་དང་སྲིད་གཞུང་། མདོར་ན། རྒྱ་ནག་དམར་ཤོག་ཡོངས་རྫོགས་ཁ་ལོ་བསྒྱུར་བར་གཞིགས་ན། ཞི་ཡི་དབང་ཆའི་རེ་ལྟོས་འདིར་མུ་མཐའ་མེད་པ་མཚོན་ནུས།
ད་ལོའི་ལོ་མགོ་ནས་བཟུང་གལ་གནད་ཆེ་བའི་ཞིང་ཆེན་བཅུ་གཉིས་དང་རང་ལྗོངས་ཁུལ་ཁག་སྟེ། དཔེར་ན། ཨན་ཧུའི་དང་ཟི་ཁྲོན། ཧཡེ་སྦི། ཧྲན་ཤི གྷོན་ཤི ནང་སོག་དང་ཐན་ཅིན་སོགས་ཀྱི་གཙོ་འཛིན་རྣམ་པས་གཅིག་རྗེས་གཉིས་མཐུད་དུ། ཧ་ཅང་མངོན་གསལ་དོད་པོས་སྲིད་འཛིན་ཞི་ཅིན་ཕིན་རྒྱ་ནག་དམར་ཤོག་ཚོགས་པའི་སྲོག་ཤིང་དང་གཉིས་སུ་མ་མཆིས་པའི་དབུ་ཁྲིད་ཅིག་ཡིན་པའི་མོས་གུས་ཞུས་ཡོད།
ཕྱི་ལོ་ ༡༩༧༨ ལོར་རྒྱ་ནག་གི་དཔལ་འབྱོར་ལམ་ལུགས་ལ་ལེགས་བཅོས་བྱས་པ་ནས་བཟུང་སྟེ། ད་བར་རྒྱ་ནག་གི་གནད་འགག་ཆེ་བའི་དབུ་ཁྲིད་ཞིང་གཤེགས་པ་ཏིན་ཞའོ་ཕིན་དང་། ཁོང་རང་ཉིད་ཀྱིས་ལག་བསྒྲིལ་བརྒྱབ་པའི་རྗེས་འཛིན་པ་ཧུ་ཡོའོ་པང་དང་ཀྲའོ་ཙི་ཡཱང་། དེ་བཞིན། སྲིད་འཛིན་ཟུར་པ་ཧུའུ་ཅིན་ཐའོ་གཙོས་པའི་སྲིད་འཛིན་ཞི་ཡི་ལས་འཛིན་སྔོན་མ་སུ་ཞིག་ལའང་དམར་ཤོག་ཚོགས་པའི་སྲོག་ཤིང་ལྟ་བུའི་འདུ་ཤེས་དང་གུས་བཀུར་ཐོབ་མྱོང་མེད། དེ་ལྟ་བུའི་ངོ་བསྟོད་དེ་ཚོར་ཞི་ཧ་ཅང་དགའ་སྣང་ཡོད་པར་སེམས།
ཕྱི་ལོ་ ༢༠༡༢ ལོར་ཞི་ཅིན་ཕིན་གྱིས་ཆབ་སྲིད་དབང་ཆ་བདག་བཟུང་བྱས་ཏེ་ཡུན་རིང་མ་འགོར་བར་ཁོས་རང་ཉིད་ཀྱི་སློབ་སྟོན་པ་གཙོ་བོ་དང་དམར་ཤོག་ཚོགས་པའི་གོ་མཉམ་ཚང་མར་ཁོང་རང་ཉིད་ཨུ་རུ་སུའི་སྲིད་འཛིན་སི་ཙར་པུ་ཏྲིན་(Czar Putin) ལྟར་བྱ་འདུན་ཡོད་པ་དང་། ཕྱི་ལོ་ ༢༠༢༧ ལོར་རྒྱ་ནག་མི་དམངས་འཐུས་མི་ཚོགས་ཆེན་ཐེངས་ ༢༢ པ་ཚོགས་གཏན་འཁེལ་བ་བཞིན་དུས་ཡུན་དེ་བར་ཆབ་སྲིད་ཀྱི་དབང་ཆ་བདག་བཟུང་གིས་རྣམ་ཀུན་˂˂མི་རབས་དྲུག་པ་˃˃ ཞེས་བཤད་བཞིན་པ་ལྟར། རང་ཉིད་ཀྱི་རྗེས་སུ་བློ་མཐུན་དབང་འཛིན་མི་སྣ་གསོ་སྐྱོང་བྱ་རྒྱུའི་ཆེད་དུ་དུས་ཚོད་མང་ཙམ་དགོས་སྐོར་རྗོད་བཞིན་ཡོད་འདུག དོན་དངོས་ཐོག་ཞི་ཡིས་དབང་ཆ་ཡོངས་རྫོགས་གཅིག་སྡུད་བྱས་རྗེས། དམར་ཤོག་ཚོགས་མི་རྒན་གྲས་ཚོའི་ཁྲོད་དུ་ ˂˂མི་རབས་དྲུག་པའི་˃˃ དབང་ཆའི་གར་སྟེགས་གི་འགྲན་རྩོད་སྔ་ས་ནས་དངོས་སུ་ཚ་ཚ་འུར་འུར་གྱིས་མགོ་བཙུགས་ཟིན་པ་རེད།
དེ་ལྟར་ངར་ཤུགས་ཆེན་པོས་འགྲན་རྩོད་བྱེད་བཞིན་པའི་ཁྲོད་ནས་ད་བར་མདུན་དུ་སྐྱོད་མཁན་གྲས་ནི། ད་ལྟ་རང་ལོ་ ༥༤ ལ་སོན་ཞིང་རྒྱ་ནག་དབུས་དམར་ཤོག་ཚོགས་པའི་ལས་ཁུངས་ཀྱི་འགན་འཛིན་གཞོན་པ་ཏིན་ཞོའི་ཤང་(Ding Xuexiang) དང་། རང་ལོ་ ༤༨ ལ་སོན་ཞིང་རྒྱ་ནག་དམར་ཤོག་ཚོགས་པའི་དབུས་དམག་སྲིད་ཨུ་ཡོན་ལྷན་ཁང་གི་འགན་འཛིན་གཞོན་པ་ཀྲོང་ཞའོ་ཅུན། (Zhong Shaojun) དེ་བཞིན། ད་ཆ་རང་ལོ་ ༥༢ ལ་སོན་ཞིང་རྒྱ་ནག་དམར་ཤོག་གི་པེ་ཅིན་གྲོང་སྡེ་ལས་ཁུངས་ཀྱི་སྒྲིག་ཁྲིམས་རྟོག་ཞིབ་ལྷན་ཚོགས་ཀྱི་དྲུང་ཆེ་ལི་ཞུའུ་ལེ་ (Li Shulei)བཅས་ཡིན།
ཏིང་(Ding) ནི་ ༢༠༠༧ ལོར་ཞི་ཅིན་ཕིན་ཧྲང་ཧེ་ནང་རྒྱ་ནག་དམར་ཤོག་ཚོགས་པའི་དྲུང་ཆེར་བསྐོ་གཞག་སྐབས་སྲི་ཞུ་སྒྲུབ་མཁན་གྱི་ལས་བྱེད་གཙོ་གྲས་དང་སྲིད་འཛིན་ཁོང་རང་ཉིད་ཀྱི་གཤམ་འོག་ལས་བྱེད་ཡིད་ཆེས་འཕེར་བ་དང་། བློ་དཀར་གཞུང་དྲང་ཞིག་ཡིན་པ་ཡོངས་གྲགས་ཡིན། སྲིད་དོན་པ་མང་པོ་ཞིག་གིས་ལོ་རྗེས་མར་ཨ་རིའི་ཕོ་བྲང་དཀར་པོའི་གཙོ་འཛིན་གྱི་གོ་བབ་དང་གཉིས་སུ་མ་མཆིས་པའི་རྒྱ་ནག་དབུས་དམར་ཤོག་ཚོགས་པའི་ལས་ཁུངས་ཀྱི་འགན་འཛིན་ལཱི་ཌན་ཞུ་ཡི་རྗེས་འཛིན་པ་དེ་ཧ་ལམ་ཏིང་(Ding) ཆགས་རྒྱུ་ཡིན་པར་ཚོད་དཔག་བྱེད་བཞིན་ཡོད།
ཀྲོང་ (Zhong)ནི་ཞི་ཅིན་ཕིན་གྱིས་ ༢༠༠༢ ནས་ ༢༠༠༧ ལོའི་བར་ཀྲེ་ཅཱང་ཞིང་ཆེན་དམར་ཤོག་ཚོགས་པའི་དྲུང་ཆེའི་ཕྱག་ལས་གནང་སྐབས་ཁོ་རང་གི་ལག་པ་གཡས་བ་ལྟ་བུ་ཡིན། ཕྱི་ལོ་ ༢༠༡༣ ལོར་ཀྲོང་ (Zhong)ད་ལྟའི་གོ་གནས་དེར་བསྐོ་གཞག་བྱས་ཡོད་པ་དང་། ལོ་རྗེས་མ་དེར་སྤྱི་ཁྱབ་ཞལ་ངོ་༼དམག་དཔོན་གྱི་གོ་གནས།༽ལ་གནས་སྤར་བཏང་ཡོད། དེ་ཡང་ཀྲོང་ (Zhong)ལ་ལས་གནས་དེ་རྩིས་སྤྲོད་གནང་དགོས་པའི་རྒྱུ་མཚན་གཙོ་བོ་ནི། ཞི་ཅིན་ཕིན་གྱིས་མི་དམངས་ཅིང་གྲོལ་དམག་སྡེའི་སྒྲོམ་གཞིར་འགྱུར་བ་ཤུགས་ཆེན་བཏང་ཡོད་ཅིང་། དབང་ཤུགས་ཆེ་ལ་གསར་འཛུགས་ཞུས་པའི་དབུས་དམག་དོན་ལྷན་ཁང་དེའི་ཉིན་རེའི་ཕྱོགས་ཡོངས་ཀྱི་འཕེལ་རིམ་ལ་གཟིགས་རྟོགས་བྱ་མཁན་བློས་གདེང་འཁེལ་བའི་མི་སྣ་ཞིག་དགོས་པས་ཡིན།
སྐབས་དེར་ཆེས་ཕུལ་བྱུང་གི་གང་ཟག་ཅིག་ལ་ངོས་འཛིན་བྱེད་བཞིན་པའི་ལཱི་ཞོའོ་ལེ་((Li Shulei)ནི་རང་ལོ་ ༤༤ ཐོག་དབུས་དམར་ཤོག་ཚོགས་པའི་སློབ་གྲྭའི་གཙོ་འཛིན་དུ་བསྐོ་གཞག་བྱས་ཡོད་ཅིང་། དེ་ནི་ད་བར་གལ་གནད་ཅན་གྱི་གོ་གནས་དེར་བསྐོ་གཞག་བྱས་པའི་ཁོངས་ནས་ལོ་ན་ཆུང་ཤོས་དེ་ཆགས་ཡོད་པ་དང་། ཁོང་ནི་ཞི་ཡི་འབྲི་བཀོད་པ་ཨང་པོ་དང་དགའ་མོས་ཆེ་ཤོས་གྲས་ཀྱི་མི་སྣ་ཞིག་ཆགས་ཡོད།
དེ་མིན་ ˂˂མི་རབས་དྲུག་པའི་˃˃མགོ་ཁྲིད་ཀྱི་ཁྲི་འཕངས་ལ་རེ་བ་ཕྲན་བུ་ཡོད་པ་གཞན་འགའ་ཡོད་པ་དག་ནི། ད་ཆ་རང་ལོ་ ༥༦ ལ་སོན་ཞིང་ཡུན་རིང་ཞི་དང་འགྲོག་འདྲིས་ཆེ་བའི་གྷོན་ཀྲུའུ་ཞིང་ཆེན་གྱི་དྲུང་ཆེ་ཁྲན་མཱི་ནར་ (Chen Miner)དང་ཀྲེ་ཅང་ཞིང་ཆེན་གྱི་སྤྱི་ཁྱབ་ལཱིའི་ཆང་ (Li Qiang)བཅས་རེད།
གོང་སྨྲོས་མི་སྣ་དེ་ཚོ་ཞི་ཡི་དབུ་འཁྲིད་པའི་དམར་ཤོག་ཚོགས་པའི་བློ་ཐག་ཉེ་བའི་དཔུང་ཤོག་གི་རྒྱབ་རྟེན་གཙོ་བོ་དག་ཆགས་ཡོད་ཅིང་། ཁོང་ཚོས་ཞི་ཅིན་ཕིན་ལ་བཅངས་པའི་ལྷག་བསམ་ལ་དོགས་པ་ཟ་མི་དགོས་ཀྱང་། མི་སྣ་དེ་ཚོ་སྲིད་འཛིན་ཞི་ལ་ཧ་ཅང་བློ་ཐག་ཉེ་བ་ཙམ་ལས། རྒྱ་ནག་བཅོས་བསྒྱུར་རམ་དཔལ་འབྱོར་འཕེལ་རྒྱས་ཐད་ཞབས་འདེགས་ཐུབ་པར་རེ་བ་དེ་ཙམ་མེད་པ་ནི་དཀའ་ངལ་མངོན་གསལ་དོད་པོ་ཞིག་ཆགས་ཡོད། དེར་བརྟེན། མཐོ་རིམ་དཔོན་རིགས་ཚོའི་ཁྲོད་དུ་ད་དུང་སྲིད་དབང་རྗེས་འཛིན་ཐུབ་པའི་དབུ་ཁྲིད་ཡང་དག་ཅིག་རེག་གི་མེད་པ་དེ་ནི། རྒྱ་ནག་གི་ཆབ་སྲིད་ལམ་ལུགས་ཁྲོད་ཀྱི་ཞན་ཆའམ་སྟོང་ཆ་ཆེ་ཤོས་དེ་ཆགས་ཡོད།
ཡ་མཚན་དགོས་པ་ཞིག་ནི། རྒྱལ་འཚོང་པར་ངོས་འཛིན་བྱེད་བཞིན་པའི་ཐེ་ཝན་མཚོ་གླིང་ཆུང་ཆུང་དེས། ཉེ་ལམ་རང་དབང་ལྡན་པའི་ཐོག་ནས་ཡང་དག་པའི་འོས་བསྡུ་བྱས་ཏེ་སླར་ཡང་ཆབ་སྲིད་ཀྱི་དབུ་ཁྲིད་འཕོ་འགྱུར་བཏང་ཡོད། འོན་ཀྱང་། ཆེས་མངོན་པར་འཕགས་པར་རློམས་པའི་རྒྱ་ནག་སྐམ་ས་ཆེན་མོ་འདི་ད་རུང་དུས་རབས་ཉེར་གཅིག་འདིའི་ནང་སི་ཏཱ་ལིན་རིང་ལུགས་ཀྱི་གཞུང་གི་སྒྲོམ་གཞིར་ཡིད་རྟོན་བྱེད་བཞིན་པ་དེ་ཡིན། དེར་བརྟེན། མི་ལོ་ལྔ་སྟོང་གི་ལོ་རྒྱུས་ལྡན་པའི་རྒྱ་ནག་གི་སྤྱི་ཚོགས་དཔལ་ཡོན་འཕེལ་རིམ་ནང་གོམ་པ་ཕྱིར་ཤིག་རྒྱབ་པ་མི་མཚོན་ནམ།
མ་རྩོམས་ཀྱི་འབྲེལ་ཐག http://www.ejinsight.com/20160215-who-will-succeed-president-xi-jinping/
