དབྱིན་ཇིའི་ངལ་རྩོལ་ཚོགས་པའི་གྲོས་ཚོགས་འཐུས་མི་ལྕམ་རྗོ་ཁོ་ཁི་སི་ལགས་ཚོགས་ཐོག་ནས་ཕྱིར་ལོག་པའི་ལམ་བར་ནས་ལྐོག་གསོད་བྱས་ཡོད་འདུག
ཁ་སང་ཧྥ་རན་སིའི་གསར་ཁང་ (AFP) གིས་གནས་ཚུལ་སྤེལ་བ་ལྟར་ན། རེས་གཟའ་ཕུར་བའི་ཉིན་དབྱིན་ཇིའི་ངལ་རྩོལ་ཚོགས་པའི་གྲོས་ཚོགས་འཐུས་མི་ལྕམ་རྗོ་ཁོ་ཁི་སི་ (Jo Cox) ལགས་ཨན་གྷི་ལན་ཌིའི་ (England) ནུབ་རྒྱུད་གྲོང་ཚོ་བྷེར་སི་ཊལ་ (Birstall) ནང་ཡོད་པའི་དཔེ་མཛོད་ཁང་དུ་ཚོགས་འདུ་ཚོགས་ཏེ་ཕྱིར་ལོག་པའི་སྲང་ལམ་ནས་ལྐོག་གསོད་བྱས་ཡོད་པ་དང་། དེ་ནི་ཕྱི་ལོ་ ༡༩༩༠ ལོ་ནས་ད་ལྟའི་བར་དབྱིན་ཇིའི་གྲོས་ཚོགས་འཐུས་མི་ལྐོག་གསོད་ཐེབས་པ་ཐོག་དང་པོ་དེ་ཆགས་ཀྱི་ཡོད་ཅིང་། ནུབ་གླིང་གི་སྤྱི་ཚོགས་བརྒྱུད་ལམ་ཁག་ཏུ་དོན་རྐྱེན་དེའི་ཐད་གླེང་སློང་ཤུགས་ཆེན་བྱེད་བཞིན་འདུག
དབྱིན་ཇིའི་ཉེན་རྟོག་ཁང་གིས་རེས་གཟའ་ཕུར་བའི་ཉིན་གུང་ཆུ་ཚོད་ ༡༢ ཙམ་ལ་ཁོང་ཚོར་ཁ་པར་ཞིག་འབྱོར་ཏེ་དོན་རྐྱེན་དེའི་སྐོར་སྙན་སེང་ཞུས་སོང་། ཁོང་མོར་གྲི་དང་མེ་མདས་བརྒྱབ་འདུག ང་ཚོས་ཁོང་མོ་ལྐོག་གསོད་གཏོང་སའི་ས་ཆ་དེ་གར་གྲི་དང་མེ་མདའ་རྙེད་སོན་བྱུང་ཡོད། ཅེས་སོགས་བརྗོད་འདུག
དབྱིན་ཇིའི་ཉེན་རྟོག་ཁང་གིས་དོགས་གཞིའི་མི་སྣ་ཞིག་འཛིན་བཟུང་བྱས་ཡོད་པ་དང་། དོགས་ཡོད་མི་སྣ་དེའི་མིང་ལ་ཐོ་མེ་མ་ཡེར་ (Tommy Mair) ཟེར་ཞིང་ད་ལྟ་ལོ་ ༥༢ ཡིན་འདུག
གནས་ཚུལ་ལྟར་ན། ད་ཆར་ལོ་ ༤༡ ཡིན་པའི་ལྕམ་ཁོ་ཁི་སི་ལགས་ནི་ཕྱི་ལོ་ ༢༠༡༥ ཟླ་ ༥ བར་དབྱིན་ཇིའི་ངལ་རྩོལ་གྲོས་ཚོགས་ནང་མ་ཞུགས་སྔོན་ལ་ཨོ་ཁི་སི་ཧྥམ་ (Oxfam) དབུལ་སྐྱོབ་ཚོགས་པའི་འཛིན་སྐྱོང་འགན་འཛིན་ཡིན་པ་དང་། སྔ་རྗེས་སུ་ཁོང་མོས་འཛམ་གླིང་ཕྱོགས་མཐའི་ཡུལ་གྱར་བའི་ཐོབ་ཐང་དང་འབྲེལ་བའི་བྱ་འགུལ་མང་པོ་སྤེལ་བ་མ་ཟད། དབྱིན་ཇིའི་གྲོས་ཚོགས་ནང་ཡུལ་བྱོལ་བའི་དཀའ་རྙོག་སྐོར་གྱི་གཏམ་བཤད་གནང་ཡོད་པ་དང་། དེ་བཞིན་སི་རི་ཡའི་རྒྱལ་ནང་གི་ཟིང་འཁྲུག་དང་དབྱིན་ཇིའི་གཞུང་ཡུ་རོབ་མཐུན་ཚོགས་ཀྱི་སྒྲིག་ཁོངས་སུ་སྡོད་དགོས་པའི་སྐོར་ལའང་བྱ་འགུལ་དང་གཏམ་གླེང་མང་པོ་བྱས་ཡོད་འདུག
འཛམ་གླིང་དམག་ཆེན་གཉིས་པའི་རྗེས་ནས་ད་ལྟའི་བར་དབྱིན་ཇིའི་གྲོས་ཚོགས་འཐུས་མི་ ༥ ལྷག་ལྐོག་ཐེབས་ཡོད་འདུག
གསར་འགོད་པ། པདྨ་རྒྱལ།
