རྒྱ་ནག་གི་སྲིད་འཛིན་ཟུར་བ་ཅང་ཙི་མེན་བཙོན་འཇུག

རྒྱ་ནག་དམར་ཤོག་ཚོགས་པའི་སྲིད་འཛིན་ཟུར་བ་ཅང་ཙི་མེན་རང་ཁྱིམ་ནས་བཙན་ཁྲིད་བྱས་ཏེ་པེ་ཅིན་གྲོང་གྱི་དམག་མིའི་བཙོན་ཁང་དུ་བཅུག་སྐོར་འཁོད་ཡོད་དང་ཁོའི་བུ་ཆེ་བའི་འགྲོ་འདུག་ལའང་བཀག་སྡོམ་བྱས་འདུག་ཟེར།

དུས་ཐོག་གསར་གནས་(Epoch Times) ཞེས་པས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༡༠ ཉིན་གྱི་རྒྱ་ནག་པེ་ཅིན་གྱི་ཆུ་ཚོད་ ༤ བའི་སྟེང་། རྒྱ་ནག་དབུས་དྲག་ཆས་དམག་དོན་ལྷག་ཁང་གི་བཀའ་བཀོད་འོག རྒྱ་ནག་མི་དམངས་དྲག་ཆས་ཉེན་རྟོག་ཚན་པས་གསང་བའི་ཐོག་ནས་རྒྱ་ནག་གི་སྲིད་འཛིན་ཟུར་བ་ཅང་ཙི་མེན་རང་ཁྱིམ་ནས་བཙན་ཁྲིད་བྱས་ཏེ། རྒྱ་ནག་མི་དམངས་བཅིངས་འགྲོལ་དམག་གི་དམག་སྤྱི་གཞོན་པར་རྩིས་སྤྲོད་བྱས་ཡོད་སྐོར་འཁོད་འདུག

ཀྲུང་ཨན་ཁྲང་ཟེར་བ་ཞིག་གིས་བརྗོད་པ་ལྟར་ན། ཅང་ཙེ་མེན་དང་ཁོའི་བུ་གཉིས་ཀྱི་འགྲོ་འདུག་ལ་དམ་དྲག་ཤུགས་ཆེན་བྱེད་ཀྱིན་ཡོད་པ་མ་ཟད། རྒྱ་ནག་མི་དམངས་དྲག་ཆས་ཉེན་རྟོག་ཚན་པས་ཅང་ཙེ་མེན་དང་ཁོའི་བུ་གཉིས་བཟང་བཙོན་བྱས་པར། རྒྱ་ནག་གི་དཔོན་རིགས་ཁག་ཅིག་གིས་དགའ་མགུའི་སྤྲོ་སྐྱིད་གཏོང་གི་ཡོད། ཅེས་སོགས་འཁོད་འདུག

གསར་གནས་དེར་མུ་མཐུད་དུ། ཧྲང་ཧེ་གྲོང་ཁྱེར་དུ་རྟེན་གཞི་བྱེད་པའི་རྒྱ་ནག་དམར་ཤོག་ཁྲིམས་སྒྲིག་ཞིབ་བཤེར་ཁང་གི་འབྲེལ་ཡོད་གནས་ཚུལ་ཞིག་གི་ནང་། ཟླ་འདིའི་ཟླ་མགོ་ནས་བཟུང་ཅང་ཙེ་མེན་གྱི་བུ་ཆེ་བ་ཅང་མེན་ཧིང་ཡང་བཀག་སྡོམ་བྱས་ཏེ་ཧྲང་ཧེ་གྲོང་ཁྱེར་ཕྱི་རོལ་དུ་འབྲེལ་གཏུག་མི་ཐུབ་པ་བྱས་ཡོད་པ་དང་། ཅང་མེན་ཧིང་ནི་རྒྱ་ནག་ཧྥ་ལུང་ཀོང་སྒོམ་སྒྲུབ་ཚོགས་པར་སྡང་འཛིན་སུན་བཙིར་གཏོང་མཁན་ཞིག་ཡིན་སྟབས། ཆབ་སྲིད་ཞིབ་འཇུག་པ་ཚོས་ཅང་མེན་ཧིང་གི་སྡུག་སྦྱོང་མནར་གཅོད་འོག་ཧྥ་ལུང་ཀོང་སྒོམ་སྒྲུབ་ཚོགས་པའི་ཚོགས་མི་སྟོང་ཕྲག་མང་པོ་ལྐོག་གསོད་ཐེབས་ཡོད་པར་ཡིད་ཆེས་བྱེད་ཀྱིན་འདུག

གོང་གི་གནས་ཚུལ་དེ་རྒྱ་ནག་ཆོས་འཁོར་རྩ་རླུང་སྒོམ་སྒྲུབ་པ་ཚོས་བསྒྲགས་པ་ཞིག་ཡིན་པ་དང་། སྲིད་དོན་དབྱེ་ཞིབ་པ་ཁག་ཅིག་གིས་གལ་ཏེ་ཐེངས་འདིར་ཅང་ཙེ་མེན་འཛིན་བཟུང་བཙོན་འཇུག་བྱས་པའི་གནས་ཚུལ་དེ་བདེན་པ་ཡིན་ཚེ། དེ་ནི་རྒྱ་ནག་དམར་ཤོག་ཚོགས་པའི་སྲིད་འཛིན་ཞི་ཅིན་ཕིན་དང་ཅང་ཙེ་མེན་གཉིས་བར་གྱི་སྲིད་དབང་འཐབ་རྩོད་ཅིག་ཆགས་ཡོད་ཅེས་སོགས་བརྗོད་འདུག

གནས་ཚུལ་ལྟར་ན། ཕྱི་ལོ་ ༢༠༡༥ ལོའི་ ༨ པའི་ཚེས་ ༢༤ ཉིན་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་ཐོག་དང་པོར་རྒྱ་ནག་དམར་ཤོག་པའི་ཚོགས་པའི་གཙོ་འཛིན་ཟུར་བ་ཅང་ཙེ་མེན་དང་ཁོང་གི་བུ་གཉིས་བཟང་བཙོན་བྱས་ཏེ། ཁོ་ཚོའི་འགྲོ་འདུག་རང་དབང་ལ་དམ་དྲག་བྱེད་མགོ་བརྩམས་ཡོད་འདུག

ཞི་ཅིན་ཕིན་གྱིས་རྒྱ་ནག་དམར་ཤོག་ཚོགས་པའི་སྲིད་དབང་བཟུང་བ་ནས་སྟག་དང་སྦྲང་མ་མཉམ་རྡུང་ཞེས་རྒྱ་ནག་དམར་ཤོག་ཚོགས་པའི་མཐོ་རིམ་དཔོན་རིགས་དང་གཞི་རིམ་དཔོན་རིགས་ཚོར་དམ་དྲག་བྱེད་མགོ་བརྩམས་ཏེ། ཁོ་ཚོར་ལྐོག་ཟ་རུལ་སུངས་དང་སྲིད་དབང་གཏོར་བཤིག་གི་མིང་ཐོག་ནས་ཞིབ་བཤེར་དང་ཕྱིར་འཕུད་གཏོང་མུས་ཡིན་ཞིང་། ཕྱི་ལོ་ ༢༠༡༦ ལོའི་བར་མཐོ་རིམ་དཔོན་རིགས་ ༡༢༠ དང་གཞི་རིམ་དཔོན་རིགས་ ༡༠༠༠༠༠ ལྷག་ལ་ཞིབ་བཤེར་དང་བཙོན་འཇུག་བྱས་ཡོད་འདུག

གསར་འགོད་པ། པདྨ་རྒྱལ་གྱིས་བསྒྱུར་སྒྲིག་བྱས།