བཀའ་དྲིན་རྗེས་དྲན་ཁ་ནས་མི་ཞུ་བར་ལག་ལེན་དངོས་ཀྱི་ཐོག་ནས་ཞུ་རོགས།

༧གོང་ས་མཆོག་དགུང་གྲངས་གྱ་གཅིག་བཞེས་པའི་དུས་དྲན་མཛད་སྒོའི་བཀའ་ཤག་གི་གསུང་འཕྲིན་ནང་། ྋགོང་ས་མཆོག་ལ་སེམས་ཚོར་ཆེན་པོས་བཀའ་དྲིན་རྗེས་དྲན་ཞུ་རྒྱུ་ཞེས་ཁ་ནས་བཤད་པ་ཙམ་མིན་པར། བོད་མིའི་ཆིག་སྒྲིལ་གྱི་སྲོག་རྩ་སྐད་ཡིག་རིག་གཞུང་དང༌བཟང་པོའི་སྤྱོད་པ་སོགས་ལག་ལེན་དངོས་ཀྱི་ཐོག་ནས་དར་སྤེལ་གནང་རོགས་གསུངས།

དེ་རིང་བཞུགས་སྒར་དྷ་རམ་ས་ལར་བོད་མིའི་སྒྲིག་འཛུགས་ཀྱིས་གཞུང་འབྲེལ་ཐོག་༧གོང་ས་མཆོག་ཕྱི་ལུགས་ལྟར་དགུང་གྲངས་ ༨༡ བཞེས་པའི་སྐུའི་འཁྲུངས་སྐུར་སྲུང་གཙི་ཞུས་ཡོད་པ་དང་། ད་ནངས་ཞོགས་པའི་ཆུ་ཚོད་ ༨ པའི་སྟེང་། བོད་མི་མང་སྤྱི་འཐུས་རྒྱུན་ལས་རྣམ་པ་དང་། ལྷན་ཁང་ཁག་གི་དྲུང་ཆེ་རྣམ་པ་བཅས་ཀྱིས་མི་མང་དང་ལྷན་དུ་ལྷ་རྒྱལ་རིར་བསང་གསོལ་དར་འཛུགས་གནང་ཡོད་པ་དང་། དེའི་རྗེས་ཆུ་ཚོད་ ༡༠ པའི་སྟེང་། བཞུགས་སྒར་གཙུག་ལག་ཁང་གི་གསུང་ཆོས་ར་བར། བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་གིས་དབུས་ཁྲིམས་ཞིབ་པ་གཞན་གཉིས་དང་། སྲིད་ཚབ་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་གིས་གཙོས་བཀའ་བློན་རྣམ་པ། བོད་མི་མང་སྤྱི་འཐུས་ཚོགས་གཞོན་ཨཅཱརྱ་ཡེ་ཤེས་ཕུན་ཚོགས་མཆོག་གིས་གཙོས་སྤྱི་འཐུས་རྒྱུན་ལས་རྣམ་པ་དང་གཞུང་ཞབས་ལས་བྱེད། གཞན། གཞུང་འབྲེལ་མིན་པའི་ཚོགས་པ་ཁག་གི་འགན་འཛིན་དང་སྐུ་མགྲོན། བཞུགས་སྒར་ཉེ་ཁུལ་གྱི་སློབ་གྲྭ་ཁག་གི་སློབ་ཕྲུག་དང་སེར་སྐྱ་མི་མང་ ༤༠༠༠ ལ་ཉེ་བ་བཅས་འཛོམས་སོང་།

སྐབས་དེར་བོད་མིའི་སྒྲུག་འཛུགས་ཀྱི་གཞུང་ཞབས་ཟུང་འབྲེལ་དྲུང་ཆེ་ཟུར་བ་སྒྲོལ་མ་ལགས་དང་། ལྡི་ལི་བསམ་ཡས་གླིང་ས་གནས་མགོ་འཛིན་ལས་ཁུངས་ཀྱི་དྲུང་གཞོན་ལེགས་སྐྱེས་རྡོ་རྗེ་ལགས། ཕྱི་དྲུལ་ལས་ཁུངས་ཀྱི་དྲུང་གཞོན་ལས་རོགས་སྐལ་བཟང་ལྷུན་གྲུབ་ལགས་གསུམ་ལ་ཞབས་ལོ་ཧྲིལ་བོ་ ༢༥ འཁོར་བའི་ལེགས་སྐྱེས་ཕྱག་རྟགས་དང་། གཞུང་ཞབས་འགན་འཛིན་སྡེ་ཚན་གྱི་ཟུང་དྲུང་ཚེ་རིང་བསམ་གྲུབ་ལགས་དང་། ལས་བྱའི་སྡེ་ཚན་ནས་ཕྱི་དྲིལ་སྣར་ཐང་པར་ཁང་འགན་འཛིན་རྡོ་རྗེ་ཚེ་རིང་ལགས་གཉིས་ལ་གཟེངས་ཐོན་བྱ་དགའ་བྱ་དགའ་བསྩལ་སོང་།

དྷ་ས་ཟློས་གར་དང་ཚོགས་པ་སྐྱིད་སྡུག་ཁག་གི་འཁྲབ་གཞས་དང་སྦྲགས་ཏེ། ཁྲིམས་ཞིབ་པ་ཆེ་བ་མཆོག་གིས་བོད་ལྗོངས་སློབ་གྲྭ་ཆེན་མོའི་སློབ་ཟུར་བློ་བཟང་བསྟན་འཛིན་ལགས་ཀྱི་མི་ཚེའི་ལོ་རྒྱུས་ ༼བཙན་གནོན་ལ་རྒོལ་བའི་སྙིང་སྟོབས་བློ་བཟང་བསྟན་འཛིན།༽ཞེས་པ་སྤྱི་ཟུར་གངས་ལྷ་མོ་ལགས་ཀྱིས་རྒྱ་ཡིག་ཏུ་བསྒྱུར་བའི་དཔེ་དེབ་དང་། རྒྱ་གར་བ་སྐུ་ཞབས་ཝེ་ཇེ་ཀ་རེན་ཊི་ལགས་ཀྱིས་རྩོམ་སྒྲིག་གནང་བའི་དཔེ་དེབ་༼The Dalai Lama : The Soldier of Peace ༽ཞེས་པ་ཧིན་རྡུའི་སྐད་ཡིག་ནང་བསྒྱུར་བའི་དཔེ་དེབ་གཉིས་དབུ་འབྱེད་དང་། སྤྱི་འཐུས་ཚོགས་གཞོན་མཆོག་གིས་ཤེས་རིག་ལས་ཁུངས་ཀྱི་ཨང་རྩིས་སྐོར་གྱི་༼འཛིན་རིམ་ཁག་ལྔའི་ཨང་རྩིས་སློབ་ཁྲིད་བརྙན་སྡེར།༽ཞེས་པའི་བརྙན་སྡེར་དབུ་འབྱེད་གནང་སོང་།

ཐེངས་འདིའི་འཁྲུངས་སྐར་ཉིན་གྱི་བཀའ་ཤག་གི་གསུང་འཕྲིན་ནང་། “མགོན་པོ་མཆོག་གིས་ཕྱི་ལོ་ ༡༩༥༩ ནས་བཟུང་ཆོལ་གསུམ་མི་མང་ཡོངས་ལ་ཆིག་སྒྲིལ་གྱི་ལག་གདང་མ་ཞིག་པའི་སྒོ་ནས་བོད་ཀྱི་རྩ་དོན་བསྒྲུབ་རྒྱུར་འབད་བརྩོན་གནང་དགོས་པའི་བཀའ་སློབ་རིམ་སྩལ་མཛད་པའི་བཀའ་དྲིན་ལ་བརྟེན་ནས་འདས་པའི་ལོ་ངོ་བཅུ་ཕྲག་མང་པོའི་རིང་ཆོལ་གསུམ་བོད་མིའི་ཆིག་སྒྲིལ་གྱི་ནུས་སྟོབས་དེ་སྔ་རང་ཡུལ་རང་དབང་ཡོད་པའི་གནས་སྐབས་ལས་ལྷག་གོང་མཐོར་སྤེལ་ཐུབ་པ་བྱུང་བ་དང་། ཕྱི་ལོ་ ༢༠༡༦ ལོའི་སྲིད་སྐྱོང་དང་སྤྱི་འཐུས་ཀྱི་སྔོན་འགྲོའི་འོས་བསྡུའི་བར་དུ་སྤྱི་ཚོགས་ནང་ཆོལ་ཁ་དང་ཆོས་བརྒྱུད་ཀྱི་འཐེན་འཁྱེར་མེད་པར་གནས་ཡོད། འོན་ཀྱང་ཚང་མས་མཁྱེན་གསལ་ལྟར་དངོས་གཞིའི་འོས་བསྡུའི་སྐབས་བཙན་བྱོལ་བོད་མིའི་གནས་ཡུལ་ཕྱི་རྒྱལ་ཡུལ་གྲུ་ཁག་དང༌། གཞིས་སྒར། སློབ་གྲྭ དགོན་སྡེ་བཅས་སུ་ཆོལ་ཁའི་འཐེན་འཁྱེར་གྱི་རླུང་འཚུབ་བྱུང་བ་དེས་ྋགོང་ས་ྋསྐྱབས་མགོན་ཆེན་པོ་མཆོག་གི་ཐུགས་དམ་སད་རྐྱེན་བྱུང་ཡོད།

ཉེ་སྔོན་སྲིད་སྐྱོང་གི་ལས་ཁུར་དམ་འབུལ་ཞུས་པའི་མཛད་སྒོའི་སྐབས་ྋགོང་ས་མཆོག་གི་བཀའ་སློབ་ཕེབས་སྙིང་དུ་ “འཕྲལ་སེལ་དགོས་པ་ཆུང་ངུ་ཞིག་ལ་དམིགས་ནས་ཆོས་ལུགས་འཐེན་འཁྱེར་ལྟ་བུ་དང༌། ལུང་ཚན་གྱི་འཐེན་འཁྱེར་ལྟ་བུ་བྱས་ན་ཡག་པོ་རྩ་བ་ནས་མེད། ང་ཚོ་ཆོལ་ཁ་གསུམ་པོ་འདི་སྐྱིད་ན་སྐྱིད་གཅིག་དང༌། སྡུག་ན་སྡུག་གཅིག་བྱས་ནས་ང་ཚོ་སྐྱིད་སྡུག་མཉམ་མྱོང་བྱས་ནས་ཡིན་མ་གཏོགས། ཆོལ་ཁའི་དབྱེ་བ་ཕྱེས་ནས་དེ་འདྲ་ནམ་ཡང་མི་ཡོང་བ་ཞིག་བྱེད་དགོས་པ་ཁྱེད་རང་ཚོ་ཚང་མས་སེམས་ནང་ཞོག་དགོས། འགོ་འཁྲིད་མཁན་ཚོས་འདི་སེམས་ནང་ཞོག་དགོས། ལས་ཀ་བྱེད་མཁན་ཚོས་ཀྱང་འདི་སེམས་ནང་ཞོག་དགོས། མི་མང་ཚོས་ཀྱང་འདི་སེམས་ནང་ཞོག་དགོས། “ཞེས་དང༌། ཡང་”ཆོས་བརྒྱུད་དང་ཆོལ་ཁའི་འཐེན་འཁྱེར་སོགས་ནམ་ཡང་མ་བྱེད་ལ། གལ་ཏེ་ང་ལ་གྲོགས་པོའི་འདུ་ཤེས་ཕྲན་བུ་ཞིག་ཡོད་ན་དེ་ཁ་ལ་ཉན་དགོས། “ཞེས་སེམས་འགུལ་ཐེབས་དགོས་པའི་བཀའ་སློབ་ནན་པོ་ཕེབས་ཡོད། དེ་མཚུངས་ཉེ་ཆར་ྋགོང་ས་མཆོག་ནས་ཨ་རི་ཁུལ་དུ་གནས་སྡོད་བོད་མི་རྣམས་ལ་བཀའ་སློབ་སྩལ་སྐབས་ “བར་སྐབས་ང་ཚོས་འོས་བསྡུའི་ལས་རིམ་སྐབས་ཨ་རི་དང་རྒྱ་གར་གྱི་ཆབ་སྲིད་པ་ཚོའི་ལས་ཟློས་ཕྲན་བུ་བྱས་ཡོད། ཁ་ཐུག་དེར་ཐལ་འཚུབ་ཕྲན་བུ་ལངས་སོང་ཡང༌། ད་ཆ་ཐལ་འཚུབ་ཚང་མ་འཇགས་བསྡད་ཡོད། ནམ་མཁའ་གཡའ་དག་དང་ས་གཞི་རྡུལ་དག་ཡིན། ཁྱེད་རང་ཚོ་ཚང་མ་བློ་བདེ་པོ་བྱོས། ངོས་རང་ཆ་བཞག་ན་ཁ་སང་སྨན་བཅོས་ལ་ཕྱིན་རྗེས་སྨན་པས་གཟུགས་པོའི་མ་རྩ་ཧ་ཅང་ཡག་པོ་འདུག་ཟེར་བྱུང༌། སྨན་བཅོས་བྱེད་རྒྱུ་ལས་སླ་པོ་བྱུང༌། ངོས་རང་བདེ་ཐག་ཆོད་ཡོད་”ཅེས་དང་། “ཆོལ་གསུམ་མཐུན་བསྒྲིལ་ནི་མེད་དུ་མི་རུང་བ་ཡིན་པས་མཐུན་བསྒྲིལ་བྱེད་དགོས།” ཞེས་བཀའ་སློབ་གཟབ་ནན་བསྩལ་ཡོད།

རྒྱ་གར་གྱི་མེས་པོ་དམ་པ་གྷན་རྡི་མཆོག་གིས་མི་ཚེའི་ནང་ལས་བཟང་ངན་གང་འདྲ་ཞིག་བྱེད་རུང་དེའི་བརྒྱུད་རིམ་ནང་གང་བསམ་པ་བཤད་པ་དང༌། གང་བཤད་པ་ལག་བསྟར་བྱེད་པ། གང་ལག་བསྟར་བྱེད་པ་གོམས་གཤིས་སུ་འགྱུར་བ། མཐར་གོམས་གཤིས་དེ་མི་ཚེའི་སྙིང་པོར་འགྱུར་བ་ཞེས་གསུངས་པ་བཞིན། བར་སྐབས་རང་ཅག་ཆོལ་གསུམ་བོད་མི་རྣམས་ཀྱིས་ཆོལ་ཁའི་འཐེན་འཁྱེར་བསམ་པ་དང༌། བཤད་པ། ལག་ལེན་དུ་བསྟར་བ་བྱུང་ཡོད། ད་ཆ་རང་ཅག་རྣམས་ནས་ནོར་འཁྲུལ་གྱི་བྱ་སྤྱོད་འདི་དག་སྒོ་ཀུན་ནས་དོར་ཏེ་བོད་མིའི་རྩ་དོན་འཐོར་བཤིག་ཏུ་མི་འགྲོ་བའི་བྱ་བ་བསྒྲུབ་རྒྱུའི་ལས་འགན་ཡོད་པར་བརྟེན། ད་ནས་བཟུང་ཆོལ་ཁའི་འཐེན་འཁྱེར་སྐོར་བསམ་པ་དང་། བཤད་པ། བྱེད་པ་སོགས་མཐའ་གཅིག་ཏུ་མཚམས་འཇོག་གནང་དགོས། དེ་རིང་སྐུའི་འཁྲུངས་སྐར་དུས་ཆེན་སྲུང་བརྩི་ཞུ་བའི་ཉིན་མོར་བཀའ་ཤག་ནས་ྋགོང་ས་མཆོག་ཐུགས་ཕམ་འགྱུར་གཞིའི་རིགས་གཏན་ནས་མི་ཡོང་བ་དང༌། རང་ཅག་བོད་མི་ནང་ཁུལ་མཐུན་ལམ་རྡོག་རྩ་ཆིག་སྒྲིལ་གནས་ཐབས་སུ་འབད་བརྩོན་བྱ་རྒྱུ་ཡིན་པར་མ་ཟད། མང་ཚོགས་ནས་ཀྱང་ཆིག་སྒྲིལ་གྱི་གོང་བུའི་ནུས་སྟོབས་དང་བོད་མིའི་སྤྱི་མཐུན་བསོད་ནམས་གོང་ནས་གོང་དུ་འཕེལ་ཆེད་འགན་འཁུར་ཆེ་བཞེས་ཡོང་བའི་འབོད་སྐུལ་ཤུགས་དྲག་ཞུ་རྒྱུ་ཡིན།

ཉེ་ཆར་ཕྱི་ལོ་ ༢༠༡༦ ཟླ་ ༦ ཚེས་ ༡༥ ཉིན་ྋགོང་ས་ྋསྐྱབས་མགོན་ཆེན་པོ་མཆོག་དང་ཨ་རིའི་སྲིད་འཛིན་ཨོ་བྷ་མ་རྣམ་གཉིས་མཇལ་འཕྲད་མཛད་སྐབས་སྲིད་འཛིན་མཆོག་གིས་བོད་མིའི་ཐུན་མོང་མ་ཡིན་པའི་ཆོས་དང་རིག་གཞུང༌། སྐད་ཡིག བོད་ནང་འགྲོ་བ་མིའི་ཐོབ་ཐང་བཅས་པ་སྲུང་སྐྱོབ་བྱ་རྒྱུར་རྒྱབ་སྐྱོར་ཡོད་པ་དང༌། མགོན་པོ་མཆོག་གིས་འདོན་གནང་མཛད་པའི་དབུ་མའི་ལམ་གྱི་སྲིད་བྱུས་ལ་བསྔགས་བརྗོད་རྒྱབ་སྐྱོར། འཚེ་མེད་ཞི་བའི་བཞེངས་ཕྱོགས་ལ་གུས་བཀུར་ཆེ་བསྟོད། དེ་བཞིན་ྋགོང་ས་ྋསྐྱབས་མགོན་ཆེན་པོ་མཆོག་ནས་གོ་ལའི་གནམ་གཤིས་འགྱུར་ལྡོག་ལ་ཐུགས་འཁུར། ཧི་མ་ལ་ཡའི་རི་རྒྱུད་ཀྱི་ཁྱགས་རོམ་དང་བོད་མཐོ་སྒང་གི་གནམ་གཤིས་སྲུང་སྐྱོབ་དགོས་པ་བཅས་ལམ་སྟོན་མཛད་པ་ལ་ཡང་རྒྱབ་སྐྱོར་ཤུགས་ཆེ་ཡོད་ཅེས་གསུངས་འདུག་པར་བཀའ་ཤག་ནས་ཨ་རིའི་སྲིད་འཛིན་དང་སྲིད་གཞུང་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། དེ་བཞིན་བོད་དོན་དཀའ་རྙོག་སེལ་ཐབས་སུ་གཉིས་སྨན་དབུ་མའི་ལམ་གྱི་ཐབས་བྱུས་ལ་བརྟེན་ཏེ་ྋགོང་ས་ྋསྐྱབས་མགོན་ཆེན་པོའི་སྐུ་ཚབ་དང་རྒྱ་ནག་གཞུང་གི་སྐུ་ཚབ་དབར་གྲོས་མོལ་ཡོང་ཐབས་བཀའ་ཤག་ནས་འབད་བརྩོན་སྔར་ལྷག་ཞུ་རྒྱུ་ཡིན།

དེ་རིང་རང་ཅག་བོད་མི་ཡོངས་ཀྱིས་ྋགོང་ས་ྋསྐྱབས་མགོན་ཆེན་པོ་མཆོག་ལ་སེམས་ཚོར་ཆེན་པོའི་སྒོ་ནས་བཀའ་དྲིན་རྗེས་དྲན་ཞུ་རྒྱུ་ཞེས་ཁ་ནས་བཤད་པ་ཙམ་མིན་པར་དངོས་སུ་ལག་བསྟར་ཐུབ་པ་གཅིག་ནི། བོད་མིའི་ཆིག་སྒྲིལ་གྱི་སྲོག་རྩ་རང་གི་གཅེས་ནོར་སྐད་ཡིག་དང༌། རྩ་ཆེའི་ཆོས་དང་རིག་གཞུང་། བཟང་པོའི་སྤྱོད་པ་བཅས་ཕ་མེས་ནས་བརྒྱུད་སྤྲོད་བྱུང་བ་རྣམས་བདག་སྲུང་དར་སྤེལ་ཡོང་བ་ལ་དགོན་སྡེ་གྲྭ་ཚང་དང༌། ཤེས་ཡོན་གྱི་བསྟི་གནས། རྒྱ་ཆེའི་མང་ཚོགས་བཅས་ནས་རྒྱུན་དུ་ཐུགས་སྣང་དང་འགན་ཁུར་དགོས་རྒྱུ་གལ་ཆེ་ཡིན་པ་ད་ལན་གོ་སྐབས་འདི་བརྒྱུད་འབོད་སྐུལ་ཞུ་རྒྱུ་ཡིན།

ཉེ་དུས་སྲིད་སྐྱོང་གི་ལས་ཁུར་དམ་འབུལ་མཛད་སྒོའི་སྐབས་ཞུས་ཟིན་པ་ལྟར་རང་རེའི་སྤྱི་ཚོགས་ནང་དོལ་རྒྱལ་རྗེས་འབྲང་པ་ཉུང་ཤས་ཤིག་གིས་ཆོས་དད་རང་དབང་ཁ་ལ་འཁྱེར་ནས་དོན་དུ་དགྲ་བོའི་གཡོ་བྱུས་འོག་ཚུད་དེ་གཞིས་བྱེས་བོད་མིའི་བླ་ན་མེད་པའི་དབུ་ཁྲིད་ྋགོང་ས་མཆོག་ལ་གཞི་མེད་སྒྲོ་སྐུར་གྱི་མཚན་སྨད་གང་བྱུང་ཞུ་བཞིན་པ་དང༌། བོད་མི་ནང་ཁུལ་དང་བོད་བརྒྱུད་ནང་བསྟན་གྱི་ཆོས་བརྒྱུད་ནང་ཕན་ཚུན་མི་མཐུན་པ་བཟོ་བཞིན་པ་བཅས་ལ་གདོང་ལེན་ཡན་པོར་མ་སོང་བ་བྱ་རྒྱུ་ནན་བརྗོད་ཞུ་རྒྱུ་ཡིན། དེ་བཞིན། བོད་མི་ནང་ཁུལ་ཆིག་སྒྲིལ་གྱི་ནུས་པ་ཉམས་ཆག་གཏོང་རྒྱུ་དང༌། ྋགོང་ས་མཆོག་ལ་མཛད་དཀའ། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པར་མཚན་ཤས་འགྲོ་གཞིའི་དཀྲོག་གཏམ་རིགས་དྲ་རྒྱའི་བརྒྱུད་ལམ་འདྲ་མིན་བརྒྱུད་སྤེལ་བཞིན་འདུག་པ་དེ་དག་ལ་བོད་མི་ཚང་མས་དོགས་ཟོན་དང་སྤྱང་གྲུང་སྦི་གསང་གནང་གལ་མ་ཟད། དེ་རིགས་ཕན་ཚུན་འགྲེམས་གཏོང་བྱེད་མཁན་རྣམས་ནས་ཀྱང་ངེས་པར་དུ་མཚམས་འཇོག་དགོས་པའི་འབོད་སྐུལ་ཤུགས་ཆེ་ཞུ་རྒྱུ་ཡིན།” ཞེས་འཁོད་འདུག

བོད་མི་མང་སྤྱི་འཐུས་ལྷན་ཚོགས་ཀྱི་གསུང་འཕྲིན་ནང་། “མགོན་པོ་གང་ཉིད་ཀྱིས་འཛམ་གླིང་ཁོར་ཡུག་སྤྱི་དང་། ལྷག་པར་བོད་ཀྱི་ཁོར་ཡུག་ཐོག་ཐུགས་འཁུར་བཞེས་དང་བཞེས་བཞིན་པ་ལྟར། བོད་ཀྱི་ཁོར་ཡུག་ནི་རྒྱ་གར་དང་། རྒྱ་ནག་གཙོ་བོར་གྱུར་པའི་ཨེ་ཤི་ཡ་གླིང་ཆེན་ཡོངས་ཀྱི་ཁེ་ཕན་དང་འབྲེལ་བ་ཡོད་པའི་གནད་དོན་ཞིག་ཡིན་ལ། མི་ལོ་སྟོང་ཕྲག་མང་པོའི་རིང་བོད་མི་ཚོས་སོ་སོའི་སྲོལ་རྒྱུན་རིག་གཞུང་གི་ཐོག་ནས་བོད་ཀྱི་རང་བྱུང་ཁོར་ཡུག་ལ་གནོད་འཚེ་མེད་པར་གཅེས་སྐྱོང་བྱས་ཡོད་ཀྱང་། རྒྱ་ནག་དམར་གཞུང་གིས་ཧམ་བཟུང་བྱས་པ་ནས་བཟུང་བོད་ཀྱི་ཁོར་ཡུག་ཁྱོན་ཡོངས་ལ་ཉེན་འགན་མི་བཟོད་པའི་གཏོར་བཤིག་ཚོད་མེད་བཏང་དང་གཏོང་བཞིན་ཡོད། ཉེ་སྔོན་མདོ་སྨད་བསང་ཆུ་རྫོང་ཨ་མཆོག་གོང་སྔོན་བླ་རིར་གཏེར་ཁ་སྔོག་འདོན་བྱས་པར། ས་གནས་མི་མང་གིས་ཞི་རྒོལ་སྐད་འབོད་ཀྱི་ལས་འགུལ་སྤེལ་བར་རྒྱ་ནག་གཞུང་གིས་དམག་མི་ཕོན་ཆེ་གཏེར་ཁ་སྔོག་ཡུལ་དུ་བཏང་སྟེ་དྲག་གནོན་རྡུང་རྡེག་གིས་ཡུལ་མི་མང་པོོར་རྨས་སྐྱོན་ཚབས་ཆེན་དང། སྨན་ཁང་དུ་ཉེན་སྐྱོབ་བྱེད་དགོས་པའི་གནས་སྟངས་ཛ་དྲག་ཅན་དུ་གྱུར་ཡོད། ཉེ་ཆར་མཚོ་ལྷོ་བོད་རིགས་རང་སྐྱོང་ཁུལ་ཟེར་བའི་ས་གནས་སྲིད་གཞུང་གིས་མི་རིགས་དབྱེ་འབྱེད་ཀྱིས་མཚོ་སྔོན་པོའི་མཐའ་སྐོར་གྱི་བོད་རིགས་ཡུལ་མི་ཚོས་ཡུལ་སྐོར་བར་སྣེ་ལེན་བྱེད་སའི་གུར་ཕུབ་མི་ཆོག་པའི་བཙན་བཀའ་བཏང་སྟེ་དམག་མི་དང་། ཉེན་རྟོག་པས་གང་བྱུང་རྡུང་བརྡེག་བཏང་སྟེ་རྨས་སྐྱོན་ཚབས་ཆེན་བཟོས་ཡོད། དེ་བཞིན་སྡེ་དགེ་སྨན་ཤོད་དུ་རྒྱ་རིགས་ཚོང་པ་ཚོས་ཤིང་ནགས་རི་ངོས་སུ་ལྕགས་རྙི་བཙུགས་ཏེ་རི་དྭགས་གླ་བ་ལྐོག་གསོད་བྱེད་བཞིན་པ་ཤེས་རྟོགས་བྱུང་འཕྲལ་ས་གནས་གཞུང་ལ་ཞུ་གཏུགས་བྱས་ཡོད་ཀྱང་ཡ་ལན་ཇི་བཞིན་བྱས་མེད་པའི་གནས་ཚུལ་བྱུང་འདུག རྒྱ་གཞུང་གིས་བོད་ནང་གི་བོད་མི་ཁོར་ཡུག་སྲུང་སྐྱོབ་པ་དང་། རིག་གཞུང་རྒྱུན་འཛིན་གནང་མཁན་སོགས་རྒྱུ་མཚན་ཁ་གསལ་ཡོད་མེད་ལ་མ་ལྟོས་པར་རང་སྣང་གང་འདོད་ཀྱིས་འཛིན་བཟུང་བཀག་ཉར་གྱིས་དམ་དྲག་བྱས་དང་བྱེད་བཞིན་པ་ལྟར། ཉེ་ཆར་ཕྱི་ཟླ་ ༦ ཚེས་ ༢༥ ཉིན་ཟི་ལིང་གནམ་གྲུ་བབ་ཐང་དུ་རྒྱུ་མཚན་ཁ་གསལ་གང་ཡང་མེད་པར་བོད་ཀྱི་གློག་བརྙན་འཁྲབ་འཁྲིད་པ་གྲགས་ཅན་དང་། རྩོམ་པ་པོ་ཡིན་པའི་སྐུ་ཞབས་པདྨ་ཚེ་བརྟན་ལགས་འཛིན་བཟུང་བཀག་ཉར་གྱིས་རྡུང་རྡེག་བཏང་སྟེ་ཁོང་གི་སྐུ་གཟུགས་གནས་སྟངས་ཛ་དྲག་ཆགས་ཏེ་སྨན་ཁང་དུ་སྐྱེལ་དགོས་ཆགས་ཡོད་པ་ལྟ་བུ་ཡིན། མདོར་ན་བོད་ནང་རྒྱ་ནག་གཞུང་གིས་ཡར་རྒྱས་ལ་བསྙད་པའི་ལས་གཞི་ཇི་སྙེད་ཅིག་སྤེལ་དང་སྤེལ་བཞིན་པའི་མཇུག་འབྲས་སུ་འཛམ་གླིང་སྤྱི་དང་། ཁྱད་པར་ལྷོ་ཤར་ཨེ་ཤི་ཡ་དང་བྱེ་བྲག་ཏུ་བོད་ཀྱི་སྣོད་བཅུད་ལ་གནོད་སྐྱོན་ཚབས་ཆེ་འབྱུང་ངེས་པས་ཚང་མས་ཐུགས་སྣང་མི་ཆུང་བ་གནང་གལ་ཤིན་ཏུ་ཆེ་བའི་༸རྒྱལ་བའི་འཁྲུངས་སྐར་སྲུང་བརྩི་ཞུ་བའི་དུས་སྐབས་དང་བསྟུན་ནས་འབོད་སྐུལ་ནན་ཏན་ཞུ་རྒྱུ་ཡིན།

བར་ལམ་བཙན་བྱོལ་བོད་མིའི་སྒྲིག་འཛུགས་ཀྱི་སྲིད་སྤྱི་གཉིས་ཀྱི་འོས་བསྡུ་ཆེན་མོའི་ལས་རིམ་ནང། བོད་མིའི་ཡ་རབས་བཟང་སྤྱོད་དང་འགལ་བའི་ནང་ཁུལ་འཐེན་རྩོད་རིགས་གང་ཙམ་བྱ་ཐལ་བྱུང་ཡོད་ནའང། ད་ཆ་སྲིད་སྤྱི་གཉིས་ཀྱི་འོས་བསྡུ་ཟིན་ཏེ་རང་རང་ལས་དོན་ཐོག་དངོས་སུ་ཞུགས་བཞིན་པ་དང་། མང་ཚོགས་ངོས་ནས་ཀྱང་མང་གཙོའི་ལྟ་གྲུབ་ཀྱི་ལམ་སྲོལ་བཞིན་ཕྱར་གྲུ་མཉམ་འདེགས་ཞུ་བཞིན་པ། གཞི་རྩའི་བོད་མི་ཚང་མས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་དགོངས་དོན་མཐུན་ལམ་གཟོང་ཁ་གཅིག་བསྒྲིལ་གྱི་རྣམ་པ་མངོན་གསལ་ལ་བརྟེན་ཉེ་སྔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རི་ལྷོ་ཁེ་ལི་ཧྥོར་ནི་ཡའི་ཁུལ་གནས་སྡོད་བོད་མི་ཚོར་བཀའ་སློབ་སྩལ་སྐབས། ད་ཆ་འོས་བསྡུའི་སྐབས་དང་འབྲེལ་བའི་གནས་ཚུལ་ཚང་མ་འཇགས་ཡོད་པས་ནམ་མཁའ་གཡའ་དག་དང་། ས་གཞི་རྡུལ་དག་ཡིན། བློ་བདེ་པོ་བྱས་ནས་སྡོད་ཅེས། བཀའ་བཟང་འཐོབ་ཡོད་པར་དགའ་སྤྲོ་དཔག་མེད་དང་བཅས་སླད་ད་དུང་བོད་མི་སྤྱི་བོ་གནམ་བསྟན་ཡོངས་ཀྱིས་བོད་མིའི་ཡ་རབས་བཟང་སྤྱོད་མི་ཉམས་གཅེས་འཛིན་དགོས་རྒྱུ་དང་། མཐུན་ལམ་རྡོག་རྩ་གཅིག་སྒྲིལ་ངང་མགོན་པོ་གང་གི་རླབས་ཆེན་གྱི་དགོངས་གཞི་ལྟར་ཤར་བསྐྱོད་ཐུབ་པའི་དམ་བཅའ་བརྟན་བཟུང་ཞུ་རྒྱུ་ནི་བོད་ཀྱི་དུས་སྐབས་གཉན་འཕྲང་ཅན་འདིར་ཚང་མས་དམ་འཛིན་གནང་དགོས་པ་དོན་གྱི་སྙིང་པོ་ཞིག་ཡིན་པས་ཀུན་གྱིས་ཡིད་གཟབ་གནང་གལ་ཆེ་བའི་འབོད་སྐུལ་ནན་ཏན་ཞུ་རྒྱུ་ཡིན།”ཞེས་འཁོད་འདུག