བདེ་སྡུག་ཟེར་བ་དེ་ཕྱི་ལ་མཛུབ་མོ་འཛུགས་ས་མེད་སོ་སོའི་སེམས་ལ་མཛུབ་མོ་འཛུགས་དགོས།

ཟླ་འདིའི་ཚེས་ ༡༣ དང་ ༡༤ བཅས་ཉིན་གཉིས་རིང་༧གོང་ས་མཆོག་མཚོ་པདྨར་ཆིབས་བསྒྱུར་བསྐྱངས་ཏེ་མི་མང་ལ་གསུང་བཤད་དང་བྱང་གཏེར་རིག་འཛིན་གདུང་སྒྲུབ་ཀྱི་བཀའ་དབང་བསྩལ་ཡོད་འདུག

ཟླ་འདིའི་ཚེས་ ༡༣ ཉིན་གྱི་སྔ་དྲོར་༧གོང་ས་མཆོག་མཚོ་པདྨར་ཆིབས་བསྒྱུར་བསྐྱངས་ཡོད་པ་དང་། ཉིན་དེའི་ཆུ་ཚོད་ ༡༢ ཙམ་ལ་ཟ་ཧོར་མཚོ་པདྨའི་འགྲམ་གྱི་གསུང་ཆོས་ར་བར་ཞབས་སོར་བཀོད་དེ། རྒྱ་གར་བྱང་ཕྱོགས་ཁུལ་ནས་ཕེབས་པའི་བོད་མི་དང་། གྭར་ཞ་དང་སྤྱི་ཏི། ཁུ་ནུ། མ་ནཱ་ལི་བཅས་ཀྱི་ཆོས་ཞུ་བ་མང་པོར། ༧གོང་ས་མཆོག་གིས་དེ་རིང་སྤྲེལ་ལོ་སྤྲེལ་ཟླའི་ཚེས་བཅུ་གནས་དུས་དམིགས་བསལ་ཅན་འདིར་མཚོ་པདྨར་བཅར་ཐུབ་པར་དགའ་བོ་བྱུང་། ལྷག་པར་སྔ་འགྱུར་རྙིང་མའི་དགོན་པ་རེད། སྔ་མོ་ནས་ངོས་ཀྱི་རྒྱུས་ཡོད་རེད། བདུད་འཛོམས་རིན་པོ་ཆེས་ཐུགས་འཁུར་ཧ་ཅང་བཞེས་པ་རེད། ཁྱེད་རང་ཚོས་གཟིམ་ཆུང་བཟོ་བཅོས་བརྒྱབ་སྟེ་ཧ་ཅང་ཡག་པོ་བཟོས་འདུག ཐུགས་རྗེ་ཆེ་ཞེས་ཞུ་རྒྱུ་ཡིན། ངོས་རང་གནས་ཆེན་འདིར་ཐེངས་མང་པོ་སླེབས་ཡོད། དེ་རིང་སླར་ཡང་སླེབས་ཐུབ་པར་དགའ་པོ་བྱུང་། ཞེས་སོགས་གསུངས་འདུག

ཚེས་ ༡༤ ཉིན་གྱི་ཞོགས་པར་གནས་ཆུང་གྲྭ་ཚང་གིས་གསོལ་འདེབས་ཞུས་དོན་ལྟར། མཚོ་པདྨའི་ཨོ་རྒྱན་ཧེ་རུ་ཀའི་ཕོ་བྲང་དུ་༧གོང་ས་མཆོག་དབུ་བཞུགས་ཐོག སྤྲེལ་ལོའི་སྤྲེལ་ཟླའི་ཚེས་བཅུའི་མཛད་སྒོ་ཚོགས་ཡོད་པ་དང་། སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག ཨོ་རྒྱུན་ཧེ་རུ་ཀ་དགོན་པའི་སྤྲུལ་སྐུ། གནས་ཆུང་སྐུ་རྟེན་དང་སྐུ་རྟེན་གཞན་རྣམས་བཅས་ཞུགས་ཡོད་འདུག སྐབས་དེར་གནས་ཆུང་ཆོས་རྒྱལ་ཆེན་པོ་གཙོ་བྱས་ཏེ་ཆོས་སྐྱོང་གཞན་རྣམས་སྦྱན་འདྲེན་ཞུས་ཡོད་པ་དང་། གུ་རུའི་སྐུ་བརྙན་ཆེན་པོ་ཞིག་ལ་རྒྱལ་མཚན་རུ་དར་གྱིས་བརྒྱན་ཏེ་མཚོ་སྐོར་དུ་གདན་དྲངས་ཡོད་འདུག

ཉིན་རྒྱབ་༧གོང་ས་མཆོག་གསུང་ཆོས་ར་བར་ཞབས་སོར་བཀོད་དེ། མི་མང་ལ་བྱང་གཏེར་རིག་འཛིན་གདུང་སྒྲུབ་ཀྱི་བཀའ་དབང་བསྩལ་ཡོད་འདུག བཀའ་ཆོས་དབུ་འཛུགས་སྟེང་༧གོང་ས་མཆོག་གིས་གསུངས་དོན། ཐུགས་རྗེ་ཆེན་པོས་བསྐལ་པ་ནས་བསྐལ་པ་ལན་གྲངས་དུ་མར་བསྒོམས་པའི་ལག་རྗེས་སངས་རྒྱས་ཀྱི་གོ་འཕང་སྔོན་དུ་མཛད་པའི་དགོས་དོན་ནི་གཞན་དོན་བསྒྲུབ་རྒྱུ་རེད། གཞན་དོན་བསྒྲུབ་རྒྱུ་ནི་སངས་རྒྱས་པའི་ལྟ་གྲུབ་ཐོག་ནས་འཇིག་རྟེན་བཀོད་པ་པོ་མི་འདོད་པ་རེད། སེམས་ཅན་རང་གིས་ལུས་ངག་ཡིད་གསུམ་གྱི་སྤྱོད་པ་བཟང་ངན་ལ་བརྟེན་ནས་བདེ་སྡུག་ཡོང་བཞིན་པ་འདི་གསུང་གི་ཡོད། དེ་ལྟ་བུའི་བདེ་སྡུག་ཡོང་རྒྱུའི་རྒྱུ་ལུས་ངག་ཡིད་གསུམ་གྱི་སྤྱོད་ལམ་ཡོང་རྒྱུའི་གཞི་མ་ལྟ་བུ་ལུས་ངག་ཡིད་གསུམ་ཟེར་རྒྱུ་ནི་ལུས་རགས་པ། ཕྲ་བ། ཤིན་ཏུ་ཕྲ་བ། ངག་རགས་པ། ཕྲ་བ། ཤིན་ཏུ་ཕྲ་བ། ཡིད་ལའང་ཡིད་རགས་པ། ཕྲ་བ། ཤིན་ཏུ་ཕྲ་བ་བཅས་གསུང་རྒྱུ་འདུག ལུས་རགས་པའི་སྒོ་ནས་བཤད་པ་ཡིན་ན། ཐོག་མ་དང་མཐའ་མ་ཞེས་བཤད་རྒྱུ་ཡོད། ལུས་སེམས་ཕྲ་མོའི་སྒོ་ནས་བཤད་པ་ཡིན་ན། ཐོག་མ་དང་མཐའ་མེད་ཟེར་རྒྱུ་རེད། ལུས་ངག་ཡིད་གསུམ་གྱི་བྱ་སྤྱོད་ཐོག་ནས་བདེ་སྡུག་ཡོང་རྒྱུ་ཡིན་པ་རེད། དེར་བརྟེན་ལུས་ངག་ཡིད་གསུམ་གྱི་བྱ་སྤྱོད་གང་འདྲ་ཡོང་དང་མི་ཡོང་ཟེར་རྒྱུའི་རྩ་བ་ཡིད་ཀྱི་ཀུན་སློང་ཐོག་ནས་ཁྱད་པར་ཡོང་གི་ཡོད་སྟབས། སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པ་ཡིན། གསུང་གི་འདུག གང་ལྟར་སེམས་དུལ་ན། ལུས་ངག་གི་སྤྱོད་པ་དེ་དག་ཕན་པའི་རང་བཞིན་ལས། གནོད་པའི་རང་བཞིན་ནི་ཡོང་གི་མེད།

དེར་བརྟེན་སེམས་དུལ་མ་དུལ་གྱི་ཐོག་ནས་ལུས་ངག་གི་སྤྱོད་པ་དུལ་མ་དུལ་ཟེར་ན་འདྲ། ཕན་པའི་རང་བཞིན་གྱི་སྤྱོད་པ་ཡོང་གི་ཡོད་དང་གནོད་པའི་རང་བཞིན་གྱི་སྤྱོད་པ་ཡོང་གི་ཡོད་ཟེར་རྒྱུ་འདི་གཙོ་བོ་གཞན་ལ་ཕན་པའི་རང་བཞིན་ཅན་གྱིས་ལུས་དང་ངག་གི་སྤྱོད་པ་དེ་དག་དགེ་བའི་ལས་ཆགས་ཀྱི་ཡོད། གཞན་ལ་གནོད་པའི་རང་བཞིན་གྱིས་ལུས་ངག་གི་སྤྱོད་པ་དེ་དག་སྡིག་པའི་རང་བཞིན་ཆགས་ཀྱི་ཡོད། དེར་བརྟེན་བདེ་སྡུག་ཟེར་རྒྱུ་ནི་ཕྱི་ལ་མཛུབ་མོ་འཛུགས་རྒྱུ་ཞིག་མེད། དཔེར་ན། ང་རང་ཚོར་གློ་བུར་དུ་རྒྱུ་དངོས་པོ་ཡག་པོ་ཡོད་པ་ཡིན་ན། བདེ་སྐྱིད་ཡོང་གི་རེད་བསམ་པ་དྲན་བཞིན་ཡོད། ལུས་པ་བདེ་པོ་ཡོད་ན། བདེ་སྐྱིད་ཡོང་གི་རེད་དྲན་བཞིན་ཡོད། གཙོ་བོ་ཡིད་ལུས་ཀྱི་སྒང་ནས་སྐྱིད་མ་སྐྱིད་ཀྱི་ཧ་ཅང་ཁྱད་པར་འདུག གང་ལྟར་སེམས་དུལ་མ་དུལ་གྱི་ཐོག་ནས་བདེ་སྡུག་ཡོང་གི་ཡོད་སྟབས་སེམས་དུལ་ཐབས་བྱེད་རྒྱུ་འདི་སངས་རྒྱས་ཀྱིས་གསུང་གི་ཡོད། ཅེས་སོགས་གསུངས་ཡོད་པ་བོད་མིའི་སྒྲིག་འཛུགས་ཀྱི་དྲ་ཚིགས་ལས་བསྡུས།