པཎ་ཆེན་རྒྱལ་མཚན་ནོར་བུ་ལགས་ཀྱིས་གཞིས་ཀ་རྩེ་རུ་དུས་འཁོར་དབང་ཆེན་གནང་རྒྱུ་ཡིན་པས་མི་མང་པོ་ཡོང་དགོས་པའི་བཀའ་བཏང་ཡོད་འདུག
རྒྱ་གཞུང་གིས་པཎ་ཆེན་སྐུ་ཕྲེང་བཅུ་པ་ཆོས་ཀྱི་རྒྱལ་མཚན་མཆོག་གི་ཡང་སྲིད་དུ་ངོས་འཛིན་བྱས་པའི་རྒྱལ་མཚན་ནོར་བུ་ལགས་ཀྱིས། ཟླ་འདིའི་ཕྱི་ཚེས་ ༢༡ ནས་ ༢༤ བར་གཞིས་ཀ་རྩེ་བདེ་ཆེན་སྐལ་བཟང་ཕོ་བྲང་དུ་བཅོམ་ལྡན་འདས་དཔལ་དུས་ཀྱི་འཁོར་ལོའི་དབང་གནང་རྒྱུ་ཡིན་སྟབས། ད་ལྟ་གྲ་སྒྲིག་བྱེད་བཞིན་པའི་སྒང་ཡིན་འདུག
འདི་གའི་གསར་འགོད་པས་དྷ་སར་གནས་བཞུགས་བོད་མི་ཞིག་ལ་དེའི་སྐོར་སྐད་ཆ་དྲིས་པར། གཞིས་རྩེར་ཡོད་པའི་ཁོང་གི་སྤུན་མཆེད་ཅིག་གིས་འཕྲིན་ཕྲན་ནང་དུས་འཁོར་དབང་ཆེན་ལ་ཁྱིམ་ཚང་རེ་ནས་མི་གཉིས་རེ་ངེས་པར་དུ་ཡོང་དགོས་པའི་བཀའ་བཏང་ཡོད་སྐོར་དང་། དུས་དབང་ཞུ་རུ་འགྲོ་མཁན་ཚོ་སྤྱི་སྤྱོད་རླངས་འཁོར་གྱིས་ཕར་སྐྱེལ་ཚུར་ལེན་བྱ་རྒྱུ་ཡིན་པའི་སྐད་ཆ་ཞིག་་ཀྱང་མང་ཚོགས་ནང་བཤད་ཀྱི་ཡོད་ལུགས་བརྗོད་སོང་ཡང་། ནང་མིའི་བདེ་འཇགས་ལ་བསམ་ནས་དམིགས་བསལ་སྐད་ཆ་གང་ཡང་དྲིས་མེད་སྐོར་བརྗོད་བྱུང་།
བཀྲ་ཤིས་ལྷུན་པོའི་འབྲེལ་ཡོད་མི་སྣས་གསར་འགོད་པར། རྒྱལ་མཚན་ནོར་བུ་ལགས་ལ་པཎ་ཆེན་སྐུ་ཕྲེང་དགུ་པ་ཐུབ་བསྟན་ཆོས་ཀྱི་ཉི་མ་མཆོག་ནས་རིམ་གནང་བྱུང་བའི་དབང་གི་རྒྱུད་པ་ཡོངས་སུ་མཐུད་ཐུབ་ཡོད་སྟབས། ཁོང་ནི་དབང་ལུང་མན་ངག་ཕུན་སུམ་ཚོགས་ཤོས་སུ་གྱུར་ཡོད་སྐོར་དང་། དབང་གནང་མཁན་གྱི་བླ་མར་དབང་གི་རྒྱུད་པ་ཐོབ་པ་ཙམ་གྱིས་མི་འགྲིག་པར་བླ་མ་མཚན་ཉིད་དང་ལྡན་པ་ཞིག་ཡིན་དགོས་པ་ལྟར། པཎ་ཆེན་རྒྱལ་མཚན་ནོར་བུ་ལགས་ལ་མཚན་ཉིད་ཡོངས་སུ་ཚང་ཡོད་པས། ཁོང་གི་མདུན་ནས་དུས་དབང་ཞུས་ན་ཕན་ཡོན་བསམ་གྱིས་མི་ཁྱབ་པ་ཡོད་སྐོར་བརྗོད་འདུག
གསར་འགོད་པ། པདྨ་མཚོ།
རྒྱ་མིའི་གསང་མྱུལ་བ་དག་གི་བརྒྱུད་ནས་ལྷ་རྒོད་ཀྱིས་ལན་བསྐུར་རྒྱུར། ཀྲུང་གོའི་སྲིད་གཞུང་ནི་ཆོས་ལུགས་དད་པ་རང་མོས་ཡིན་སྟབས་དུས་དབང་ཞུ་མིར་ཁྲལ་གྱིས་དེད་མི་ཆོག་ཟེར་གྱིན་ལོབ།
མཛེ་ཐོག་ཏུ་ཕུར་རྡུང་པ་ལྟར། ལྷ་མེད་སྨྲ་བའི་ཕྲུ་གུ་ཞིག་སྐྱབས་ཡུལ་དུ་བཟུང་དགོས་པ་འདི་གང་གིས་ནོངས་པ་རེད། ལམ་ལུགས་གང་གིས་མ་འགྲིག་པ་རེད། སྔོན་ལས་གང་ཞིག་བསགས་པ་རེད། ཀྱེ་ཧུད་བོད་འདི།
རྒྱལ་མཚན་ནོར་བུ་ལགས་ལ་པཎ་ཆེན་སྐུ་ཕྲེང་དགུ་པ་ཐུབ་བསྟན་ཆོས་ཀྱི་ཉི་མ་མཆོག་ནས་རིམ་གནང་བྱུང་བའི་དབང་གི་རྒྱུད་པ་ཡོངས་སུ་མཐུད་ཐུབ་ཡོད་གསུངས་འདུག།། ཆེན་སྐུ་ཕྲེང་དགུ་པ་ཐུབ་བསྟན་ཆོས་ཀྱི་ཉི་མ་མཆོག་ནས་དུས་དབང་ཞུས་བ་ད་ལྟ་བླ་མ་སུ་བཞུགས་ཡོད་རེད ? དབང་གི་རྒྱུད་པ་ཐོབ་པ་ཙམ་གྱིས་མི་འགྲིག་པར་བླ་མ་མཚན་ཉིད་དང་ལྡན་པ་ཞིག་དགོས་ན་རྒྱལ་མཚན་ནོར་བུ་ལ་བྱང་ཆུབ་སེམས་ཡོད་རེད་མ་རེད ?