མཛངས་མ་ཚེ་རིང་ཆུང་བདག་འདས་གྲོངས་སུ་ཕྱིན།

བོད་ཀྱི་མཛངས་མ་ཚེ་རིང་ཆུང་བདག་ལགས་ལྡི་ལི་བསམ་ཡས་གླིང་གི་མགྲོན་ཁང་ཞིག་ཏུ་གློ་བུར་འདས་གྲོངས་སུ་ཕྱིན་ཡོད་འདུག

ཟླ་འདིའི་ཕྱི་ཚེས་ ༢༡ ཉིན་གྱི་ཕྱི་དྲོར་ཕྱི་ལོ་ ༢༠༠༦ ལོའི་བོད་ཀྱི་མཛངས་མ་ཚེ་རིང་ཆུང་བདག་ལགས་ཀྱི་སྙིང་རྩ་འགག་སྟེ། ལྡི་ལི་བསམ་ཡས་གླིང་གི་མགྲོན་ཁང་ཞིག་ཏུ་གློ་བར་འདས་གྲོངས་སུ་ཕྱིན་ཡོད་པ་དང་། བོད་ཀྱི་མཛངས་མའི་འགྲན་སྡུར་ཕྱི་ལོ་ ༢༠༠༢ ལོར་མགོ་འཛུགས་བྱས་པ་ནས་ད་ལྟའི་བར་རྒྱལ་ཁ་ཐོབ་པའི་བོད་ཀྱི་མཛངས་མ་འདས་གྲོངས་སུ་ཕྱིན་པ་གཉིས་པ་དེ་ཆགས་ཡོད་པ་རེད།

བོད་ཀྱི་མཛངས་མ་འགྲན་སྡུར་གོ་སྒྲིག་པ་བློ་བཟང་དབང་རྒྱལ་ལགས་སུ་ཁ་པར་བརྒྱུད་སྐད་ཆ་འདྲི་སྐབས་ཁོང་གིས། གནས་ཚུལ་དེ་གོ་ཐོས་བྱུང་སྐབས་ཧང་སང་བ་དང་བློ་ཕམ་ཆེན་པོ་བྱུང་། གང་ཡིན་ཟེར་ན། མཛངས་མ་ཚེ་རིང་ཆུང་བདག་ལགས་ལོ་ཆུང་ཞིང་ཤེས་ཡོན་ཡོད་པ། བྱས་རྗེས་ཆེན་པོ་འཇོག་མཁན་ཞིག་རེད། མོ་གློ་བུར་དུ་འདས་གྲོངས་སུ་ཕྱིན་པ་དེས་བོད་པའི་སྤྱི་ཚོགས་སྤྱི་ཡོངས་ལ་གྱོང་ཆེན་པོ་ཕོག་པ་རེད། ངའི་ངོས་ནས་མོའི་ནང་མི་འབྲེལ་ཡོད་རྣམས་ལ་གདུང་སེམས་མཉམ་སྐྱེད་དང་སྦྲགས། སྡུག་བསྔལ་ཆེ་བའི་སྐབས་འདིར་བཟོད་སྒོམ་གང་ལེགས་གནང་ཐུབ་པའི་སྨོན་ལམ་དང་རེ་བ་ཞུ་ཡི་ཡོད། ཅེས་བརྗོད་བྱུང་།

བོད་ཀྱི་མཛངས་མའི་དྲ་བར་གནས་ཚུལ་སྤེལ་བ་ལྟར་ན། ཚེ་རིང་ཆུང་བདག་ལགས་ཀྱིས་དེ་སྔོན་ནེ་རོ་གཙུག་ལག་སློབ་ཆེན་ཏུ་འབུམ་རམས་པའི་སློབ་གཉེར་གནང་ཡོད་ཀྱང་། སྐུ་གཟུགས་བདེ་མིན་གྱིས་སློབ་གཉེར་མཚམས་འཇོག་དགོས་ཁེལ་ཡོད་པ་དང་། སློབ་མཚམས་བཞག་རྗེས་སློབ་གྲྭ་ཁག་གི་ནང་སྐོར་སྐྱོད་ཀྱིས་ཆོས་དང་མ་འབྲེལ་བའི་བཟང་སྤྱོད་གཏོང་སྤེལ་གཏོང་བའི་ཚོགས་པ་ཞིག་གི་ནང་ཉམས་ཞིབ་པའི་ལས་ཀ་བྱས་ཡོད་འདུག

ཚེ་རིང་ཆུང་བདག་ལགས་ལ་ཕྱི་ལོ་ ༢༠༠༦ ལོའི་བོད་ཀྱི་མཛངས་མའི་རྒྱལ་ཁ་ཐོབ་རྗེས། བོད་ཀྱི་མཛངས་མའི་མཚན་ཐོག་ནས་ཧྥི་ལི་པིན་(Philippine)གྱི་ནང་བསྡུས་པའི་ཕྱི་ལོ་ ༢༠༠༦ ལོའི་སའི་གོ་ལའི་མཛངས་མ་འགྲན་སྡུར་ནང་མཉམ་ཞུགས་གནང་ཡོད་པ་དང་། དེ་བཞིན། ཕྱི་ལོ་ ༢༠༠༧ ལོར་མཱ་ལེ་ཞི་ཡ་ནང་ཚོགས་པའི་(Miss Tourism Queen International)ཞེས་པའི་རྒྱལ་སྤྱི་རང་བཞིན་གྱི་མཛངས་མའི་འགྲན་སྡུར་ནང་ཞུགས་རྩིས་གནང་ཡོད་ཀྱང་། རྒྱ་གཞུང་གི་གནོན་ཤུགས་འོག་རྒྱ་ནག་བོད་ཀྱི་མཛངས་མ་ཞེས་པའི་མཚན་ཐོག་ནས་མཉམ་ཞུགས་དགོས་སྐོར་བརྗོད་ཡོད་པར་བརྟེན། མོས་རྒྱ་ནག་ཞེས་པའི་མིང་དེ་དང་ལེན་མ་གནང་བར་ཕྱིར་ལོག་ཡོད་པ་མ་ཟད། གསར་འགོད་གསལ་བསྒྲགས་སྤེལ་ཏེ་རྒྱ་གཞུང་གི་གནོན་ཤུགས་འོག་མཛངས་མ་འགྲན་སྡུར་གོ་སྒྲིག་པས་མོའི་མཚན་གནས་བརྗེ་བསྒྱུར་བྱེད་ཐབས་ལ་སྐྱོན་བརྗོད་གནང་ཡོད་པ་རེད།

གསར་འགོད་པ། པདྨ་མཚོ།