མཚོ་ལྷོ་ཁུལ་བོད་ཡིག་ཆ་འཕྲིན་ལག་རྩལ་ཞིབ་འཇུག་ལྟེ་གནས་ཁང་གིས་ཡོངས་འཛིན་ཞེས་པའི་བོད་ཡིག་གི་ཚིག་དོན་འཚོལ་བཤེར་མ་ལག་ཅིག་གསར་བཟོ་བྱས་ཡོད་པ་དེ་གློག་རྡུལ་དཔེ་མཛོད་ཁང་ཆེ་ཤོས་ཆགས་རྒྱུ་ཡིན་པའི་ཚོད་དཔག
ཁ་སང་བོད་ནང་གི་དྲ་ཚིགས་འགར་གནས་ཚུལ་ཐོན་པ་ལྟར་ན། ཟླ་འདིའི་ཕྱི་ཚེས་ ༢༢ ཉིན་ཡོངས་འཛིན་ཞེས་པའི་བོད་ཡིག་གི་ཚིག་དོན་འཚོལ་བཤེར་མ་ལག་བཟོ་སྐྲུན་ཐེངས་གསུམ་པ་དེ་ཤར་གཏོང་བྱ་རྒྱུ་ཡིན་འདུག
མཚོ་ལྷོ་ཁུལ་བོད་ཡིག་ཆ་འཕྲིན་ལག་རྩལ་ཞིབ་འཇུག་ལྟེ་གནས་ཁང་གིས། ཡོངས་འཛིན་བོད་ཡིག་འཚོལ་བཤེར་མ་ལག་དེ་ནི་བོད་ཡིག་གི་ཚིག་དོན་འཚོལ་བཤེར་མ་ལག་དང་རིག་མཛོད། དྲི་བ་དྲིས་ལན་སོགས་གཞི་གཅིག་ཏུ་འདུས་པ་ཞིག་ཡིན་ཞིང་། དེའི་ནང་གསར་འགྱུར་དང་དྲ་ངོས། པར་རིས་དང་བརྙན་རིས། གླུ་དབྱངས་དང་རིག་མཛོད། ཡིག་ཚང་དང་དྲིས་ལན་སོགས་ཁྱོན་པར་ངོས་ ༨ ཀྱིས་གྲུབ་ཡོད་པ་དང་། ད་ལྟའི་བར་རིག་མཛོད་ཀྱི་ཐ་སྙད་ ༡༢༦༧༡ དང་། ཡིག་མཛོད་ཀྱི་ཐ་སྙད་ ༣༢༦༦། དྲི་བ་དྲིས་ལན་གྱི་ཐ་སྙད་ ༡༥༢༠༠ ལྷག་ནང་འཇུག་བྱས་ཡོད་སྟབས། འཛམ་གླིང་སྟེང་གི་བོད་ཡིག་གློག་རྡུལ་དཔེ་མཛོད་ཁང་ཆེ་ཤོས་དེ་ཆགས་རྒྱུ་ཡིན་པའི་ཚོད་དཔྱག་བྱེད་བཞིན་ཡོད་འདུག
ཕྱི་ཟླ་ ༨ ཚེས་ ༢ ཉིན་ཡོངས་འཛིན་ཞེས་པའི་བོད་ཡིག་གི་ཚིག་དོན་འཚོལ་བཤེར་མ་ལག་བཟོ་སྐྲུན་དང་པོ་དེ་ཚོད་ལྟའི་ཚུལ་དུ་དྲ་ཐོག་ཏུ་བཏང་ཡོད་པ་དང་། ཟླ་འདིའི་ཚེས་ ༢༢ བར་ཡོངས་འཛིན་བོད་ཡིག་འཚོལ་བཤེར་མ་ལག་བཟོ་སྐྲུན་ཐེངས་གཉིས་པ་དང་གསུམ་པ་ལེགས་འགྲུབ་ཀྱིས་དྲ་ཐོག་ཏུ་གཏོང་འཆར་ཡོད་འདུག
མཚོ་ལྷོ་ཁུལ་བོད་ཡིག་ཆ་འཕྲིན་ལག་རྩལ་ཞིབ་འཇུག་ལྟེ་གནས་ཁང་གི་ཚོད་དཔག་ལྟར་ན། ཡོངས་འཛིན་བོད་ཡིག་འཚོལ་བཤེར་མ་ལག་བཟོ་སྐྲུན་དང་པོ་ཚོད་ལྟའི་འཁོར་སྐྱོད་ཁྲོད། བོད་ཁུལ་དུ་ཡོངས་འཛིན་བོད་ཡིག་འཚོལ་བཤེར་མ་ལག་ཁྱབ་གདལ་དང་དྲིལ་བསྒྲགས་ལ་བརྟེན་ནས་ཡོངས་འཛིན་བོད་ཡིག་འཚོལ་བཤེར་མ་ལག་བཀོལ་སྤྱོད་བྱེད་མཁན་མི་གྲངས་ཁྲི་ ༢༠༠ ཟིན་ཡོད་པ་མ་ཟད། འཛམ་གླིང་རྒྱལ་ཁབ་ ༢༦ གི་དྲ་དམངས་ཀྱིས་ཡོངས་འཛིན་བོད་ཡིག་འཚོལ་བཤེར་སྟེགས་བུ་བཀོལ་སྤྱོད་དང་དོ་སྣང་བྱེད་མཁན་མི་གྲངས་ཁྲི་ ༢༥༧ ལྷག་ཟིན་ཡོད་འདུག
ཡོངས་འཛིན་བོད་ཡིག་འཚོལ་བཤེར་མ་ལག་བཟོ་སྐྲུན་ལས་གཞི་དེ་ནི་མཚོ་སྔོན་ཞིང་ཆེན་གྱི་མཚོ་ལྷོ་བོད་རིགས་རང་སྐྱོང་ལྗོངས་ཁུལ་གྱི་བོད་ཡིག་ཞིབ་འཇུག་ལྟེ་གནས་ཁང་གི་ལས་བྱེད་ ༡༥༠ ཙམ་གྱིས་གཙོ་གཉེར་འོག་ཕྱི་ལོ་ ༢༠༡༣ ལོའི་ཕྱི་ཟླ་ ༤ བ་ནས་མགོ་བཙུགས་པ་ཞིག་ཡིན་འདུག
གསར་འགོད་པ། པདྨ་རྒྱལ།
འདིར་ཡོངས་འཛིན་བོད་ཡིག་མ་ལག་གི་དྲ་སྣེ་བཀོད་ན་བཟང་།