རྒྱ་ནག་གཞུང་གིས་ཕྱི་ལོ་ ༢༠༣༠ བར་ལྷ་ས་གཞིས་ཀ་རྩེ་གྲོང་ཁྱེར་ནས་བལ་བོད་ས་མཚམས་སྐྱིད་གྲོང་བརྒྱུད་ཧི་མ་ལ་ཡའི་རི་རྒྱུད་བར་མེ་འཁོར་ལྕགས་ལམ་གསར་འཛུགས་བྱ་འཆར་ཡོད་འདུག
ཁ་སང་ཧྲང་ཧེ་གསར་འགྱུར་ལས་ཁང་གིས་གནས་ཚུལ་སྤེལ་བ་ལྟར་ན། ད་ལོའི་རྒྱ་ནག་གཞུང་གི་ལོ་ལྔའི་འཛུགས་སྐྲུན་འཆར་གཞིའི་ནང་ཕྱི་ལོ་ ༢༠༣༠ བར་གཞིས་ཀ་རྩེ་གྲོང་ཁྱེར་ནས་བོད་བལ་མཐའ་མཚམས་སྐྱིད་གྲོང་བརྒྱུད་ཧི་མ་ལ་ཡའི་རི་རྒྱུད་བར་མེ་འཁོར་ལྕགས་ལམ་བཟོ་འཆར་ཡོད་འདུག
བོད་རང་སྐྱོང་ལྗོངས་ཀྱི་མགོ་ཁྲིད་བློ་བཟང་རྒྱལ་མཚན་ཞུ་བ་ཞིག་གིས། ཐེངས་འདིའི་མེ་འཁོར་ལྕགས་ལམ་གསར་འཛུགས་ལས་གཞི་དེ་ནི་བོད་ནས་ལྷོ་ཨེ་ཤ་ཡ་རྒྱལ་ཁབ་ཁག་དང་། དམིགས་བསལ་རྒྱ་གར་གྱི་ཁྲོམ་ར་ཆེ་ཁག་བར་ཉོ་འཚོང་གི་འབྲེལ་ལམ་ཡག་ཤོས་ཤིག་ཡིན་ལུགས་བཤད་འདུག
པེ་ཅིན་ཅོ་ཐོང་སློབ་ཆེན་ (Beijing Jiaotong University) གྱི་དགེ་རྒན་ཆེན་མོ་ཀྲུའུ་ཡོ་ཧྭེ་ (Zhou Yuhui) ཞུ་བ་ཉེ་ལམ་སྐྱིད་གྲོང་ས་ཁུལ་དུ་གཟིགས་སྐོར་སྐབས་སུ་ཁོས། བལ་བོད་མཐའ་མཚམས་སུ་འཁེལ་བའི་སྐྱིད་གྲོང་ས་ཁུལ་ནི་རང་བྱུང་ནགས་ཚལ་དང་རི་ལུང་གི་མཛེས་ལྗོངས་སོགས་ལོ་རྒྱུས་ཀྱི་དོན་སྙིང་ལྡན་པའི་ཡུལ་སྐོར་སྤྲོ་འཆམ་གྱི་གནས་ཕུན་སུམ་ཚོགས་པ་ཞིག་ཡིན་ནའང་། ད་ལྟའི་བར་དཔལ་འབྱོར་འདུ་འགོད་དང་ཁོར་ཡུག་འཛུགས་སྐྲུན་སོགས་གོང་སྤེལ་གཏོང་ཐུབ་མེད་པ་དང་། ས་ཁུལ་དེར་དཔལ་འབྱོར་འདུ་འགོད་དང་ཡུལ་སྐོར་སྤྲོ་འཆམ་གྱི་འགྲིམ་འགྲུལ་ལས་རིགས་གསར་འཛུགས་ཐུབ་ཚེ། དེས་ས་གནས་མང་ཚོགས་ཀྱི་དབུལ་ཕོངས་སེལ་ཐུབ་པ་མ་ཟད། བལ་བོད་བར་གྱི་མེ་འཁོར་ལྕགས་ལམ་ལ་བརྟེན་ནས་ས་གནས་མང་ཚོགས་ཀྱི་འཚོ་གནས་དེང་རབས་ཅན་དུ་བསྒྱུར་ཐུབ་ལུགས་བཤད་འདུག
རྒྱ་ནག་གཞུང་གི་ལོ་ལྔའི་འཛུགས་སྐྲུན་ལས་གཞི་གཞན་ཞིག་གི་ནང་། བོད་ནས་ཕྱིའི་རྒྱལ་ཁབ་ཁག་བར་མེ་འཁོར་ལྕགས་ལམ་འཛུགས་རྒྱུ་དང་། མཚོ་བོད་ལྕགས་ལམ་འཛུགས་སྐྲུན་ལས་གཞི་དེ་ཕྱི་ལོ་ ༢༠༠༦ ལོར་ཡོངས་སུ་གྲུབ་སྟེ། ད་ཆར་བོད་ཁུལ་གྱི་ནགས་ཚལ་དང་རི་ལུང་བརྒྱུད་སྤྱི་ལེ་ ༢༠༠༠ གི་རིང་ཚད་ལ་འགྲིམ་འགྲུལ་བྱེད་བཞིན་ཡོད་ནའང་། བོད་ནས་ཧི་མ་ལ་ཡའི་རི་རྒྱུད་བར་འཛུགས་འཆར་གྱི་ལྕགས་ལམ་དེའི་སྤྱིའི་རིང་ཚད་ལ་སྤྱི་ལེ་ ༡༦༣༠ ཡོད་པ་དང་འགྲིམ་འགྲུལ་གྱི་ཆུ་ཚོད་ ༡༥ ཡིན་ཚུལ་བཤད་འདུག
ད་ལོའི་བོད་རིག་པའི་དཔྱད་གླེང་ཚོགས་འདུ་སྐབས་ ༦ པའི་སྟེང་། བོད་རིག་པའི་ཆེད་མཁས་པ་རྒྱ་རིགས་ཁ་ཅིག་གིས། ཕྱི་ལོ་ ༢༠༣༠ བར་མེ་འཁོར་ལྕགས་ལམ་དེ་ལེགས་འགྲུབ་བྱུང་ཚེ། སྐབས་དེར་བལ་བོད་གཉིས་བར་འགྲོ་འོང་བྱ་བར། ཆུ་ཚོད་གཅིག་ནང་སྤྱི་ལེ་ ༡༠༠ ཡི་རིང་ཚད་ལ་འབྱོར་ཐུབ་པ་དང་། མེ་འཁོར་ལྕགས་ལམ་འཛུགས་སྐྲུན་ལས་གཞི་དེ་གཞིས་ཀ་རྩེ་གྲོང་ཁྱེར་ནས་མགོ་བཙུགས་ཏེ་བལ་བོད་མཐའ་མཚམས་སྐྱིད་གྲོང་བརྒྱུད་ཧི་མ་ལ་ཡའི་རི་བརྒྱུད་བར་བཟོ་རྒྱུ་ཡིན་ཞིང་། དེ་ཡང་ཕྱི་ལོ་ ༢༠༢༠ བར་གཞིས་རྩེ་ནས་སྐྱིད་གྲོང་བར་དང་། ཕྱི་ལོ་ ༢༠༣༠ བར་སྐྱིད་གྲོང་ནས་ཧི་མ་ལ་ཡའི་རི་རྒྱུད་བར་རྒྱ་སྐྱེད་གཏོང་འཆར་ཡོད་པའི་སྐོར་ལ་དཔྱད་གླེང་བྱས་ཡོད་པ་རེད།
གསར་འགོད་པ། པདྨ་རྒྱལ།
