ཟླ་འདིའི་ཨ་རིའི་སྲིད་འཛིན་འོས་བསྡུའི་འོས་ཤོག་གྲངས་བཤེར་ལྟར་ན། དམངས་གཙོ་ཚོགས་པའི་སྲིད་འཛིན་འོས་མི་ལྕམ་ཧེ་ལ་རེ་ལ་འོས་གྲངས་བརྒྱ་ཆ་ ༤༡ དང་སྤྱི་མཐུན་ཚོགས་པའི་འོས་གཞི་སྐུ་ཞབས་ཊི་རུམ་ཕི་ལ་འོས་གྲངས་བརྒྱ་ཆ་ ༣༤ ཐོབ་ཡོད་འདུག
དེང་སྐབས་ཨ་རིའི་སྲིད་འཛིན་འོས་བསྡུའི་ལས་རིམ་ཚ་ཚ་འུར་འུར་གྱིས་འགྲོ་བཞིན་པའི་སྐབས་འདིར། ཁ་སང་རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། ཟླ་འདིའི་ཚེས་ ༡༤ ནས་ ༡༨ བར་གྱི་འོས་ཤོག་གྲངས་བཤེར་ནང་། དམངས་གཙོ་ཚོགས་པའི་འོས་གཞི་ལྕམ་ཧེ་ལ་རེ་ཁི་ལེན་ཊོན་ (Hillary Clinton) མཆོག་ལ་བརྒྱ་ཆ་ ༤༢ དང་སྤྱི་མཐུན་ཚོགས་པའི་འོས་གཞི་སྐུ་ཞབས་ཌོ་ནལ་ཌི་ཊི་རུམ་ཕི་ (Donald Trump) མཆོག་ལ་བརྒྱ་ ༣༤། ངལ་རྩོལ་ཚོགས་པའི་འོས་གཞི་སྐུ་ཞབས་གྷ་རེ་རྗོན་སོན་ (Gary Johnson) མཆོག་ལ་བརྒྱ་ཆ་ ༧ དང་། ལྗང་ཁུ་ཚོགས་པའི་སྲིད་འཛིན་འོས་གཞི་ལྕམ་རྗེལ་སི་ཊེན་ (Jill Stein) མཆོག་ལ་བརྒྱ་ཆ་ ༢ བཅས་ཐོབ་ཡོད་པ་དང་། གཞན། མི་མང་བརྒྱ་ཆ་ ༢༣ གྱིས་དམངས་གཙོ་ཚོགས་པ་དང་སྤྱི་མཐུན་ཚོགས་པའི་འོས་གཞི་གཉིས་ཀྱི་སུ་ལའང་འོས་ཤོག་བླུག་མེད་འདུག
ཟླ་སྔོན་མའི་ཟླ་མཇུག་ནས་བཟུང་དམངས་གཙོ་ཚོགས་པའི་སྲིད་འཛིན་འོས་གཞི་ལྕམ་ཧེ་ལ་རེ་མཆོག་ལ་རྒྱབ་སྐྱོར་བྱེད་མཁན་བརྒྱ་ཆ་ ༤༡ ནས་ ༤༤ བར་དང་། སྤྱི་མཐུན་ཚོགས་པའི་སྲིད་འཛིན་འོས་གཞི་སྐུ་ཞབས་ཊི་རུམ་ཕི་མཆོག་ལ་བརྒྱ་ཆ་ ༣༣ ནས་ ༣༩ ཟིན་གྱི་ཡོད་པ་དང་། ད་ལོའི་ཨ་རིའི་སྲིད་འཛིན་འོས་འདེམས་ཁྲོད་འགྲན་རྩོད་ཤུགས་ཆེ་ཤོས་ལྕམ་ཧེ་ལ་རེ་དང་སྐུ་ཞབས་ཊི་རུམ་ཕི་རྣམ་པ་གཉིས་ཆགས་ཡོད་པ་མ་ཟད། ཨ་རིའི་མི་མང་ཕལ་ཆེ་བས་ཁོང་རྣམ་གཉིས་ལ་རྒྱབ་སྐྱོར་བྱེད་ཀྱིན་ཡོད་ནའང་། ཨ་རིའི་གཞོན་སྐྱེས་སུམ་ཆ་གཅིག་གིས་ད་ལོར་ཨ་རིའི་རྒྱལ་ཁབ་ཀྱི་སྲིད་དོན་ཁ་ཕྱོགས་དེ་ལོག་ལམ་དུ་འགྲོ་བཞིན་པར་ཡིད་ཆེས་བྱེད་བཞིན་ཡོད་པ་རེད།
ཨ་རིའི་སྤྱི་མཐུན་ཚོགས་པ་དང་གྲོས་ཚོགས་འོག་མའི་དཔོན་རིགས་གསར་རྙིང་ཚོས་སྤྱི་མཐུན་ཚོགས་པའི་རྒྱལ་ཡོངས་ཚོགས་ཆུང་ (GOP) གི་ངོས་ནས་སྐུ་ཞབས་ཊི་རུམ་ཕི་ལ་ཐད་ཀར་རམ་འདེགས་བྱེད་རྒྱུ་དེ་གཙོ་བོ་མིན་པར། སྤྱི་མཐུན་ཚོགས་པའི་འོས་གཞི་འདོན་མཁན་གྲོས་ཚོགས་གོང་འོག་གི་འཐུས་མི་ཚོར་དོ་སྣང་ཤུགས་བྱེད་གལ་ཆེ་སྐོར་རྗོད་བཞིན་ཡོད་འདུག
གཟའ་པ་སངས་ཉིན་སྤྱི་མཐུན་ཚོགས་པའི་འོས་གཞི་སྐུ་ཞབས་ཊི་རུམ་ཕིའི་རྒྱབ་སྐྱོར་ཚོགས་པའི་ཚོགས་གཙོ་མ་ན་ཧྥོར་ཊི་ (Manafort) ལགས་གློ་བུར་དགོངས་ཞུ་བྱས་ཡོད་པ་དང་། ཁོང་དགོངས་པ་ཞུས་པའི་རྒྱུ་མཚན་གཙོ་བོ། ཨུ་རུ་སུའི་སྲིད་གཞུང་ལ་རྒྱབ་སྐྱོར་བྱེད་མཁན་ཡུ་ཁུ་རན་རྒྱལ་ནང་གི་ཆབ་སྲིད་ཚོགས་པ་ཁག་དང་འབྲེལ་བའི་གནད་དོན་དང་དེའི་གནོན་ཤུགས་སོགས་ཡིན་འདུག
གཞན། ད་ཆར་དམངས་གཙོ་ཚོགས་པའི་སྲིད་འཛིན་འོས་མི་ལྕམ་ཧེ་ལ་རེར་འཕྲད་བཞིན་པའི་དཀའ་རྙོག་ཁག་ལས་གཙོ་བོ་གཅིག་ནི། མོ་དེ་སྔོན་ཨ་རིའི་རྒྱལ་དོན་དྲུང་ཆེ་ཡིན་སྐབས། མོས་ཨ་རིའི་གཞུང་གི་གསང་བའི་ཡིག་ཆ་མང་པོ་ཞིག་ཨ་རིའི་གཞུང་གི་དྲ་ལམ་ནས་མ་བཏང་བར་མོ་རང་སྒེར་གྱི་དྲ་ལམ་ནས་བཏང་བའི་གནད་དོན་དེ་ཆགས་ཡོད་འདུག
གསར་འགོད་པ། པདྨ་རྒྱལ།
