ཨ་རིའི་སྤྱི་མཐུན་ཚོགས་པའི་སྲིད་འཛིན་འོས་གཞི་སྐུ་ཞབས་ཊི་རུམ་ཕུ་ (Trump) མཆོག་གིས། ཨ་རིའི་མི་དཀར་དང་མི་ནག་འདྲེས་མའི་མི་སེར་ཚོས་ཤེས་ཡོན་སློབ་གསོའི་གོ་སྐབས་དང་འཚོ་བའི་གནས་བབ། ལྷག་པར་དུ་ལས་གནས་དང་འཕྲོད་བསྟེན་བཅས་ཀྱི་དཀའ་ཁག་ལས་མྱུར་དུ་འཐར་འདོད་ན། ཁོ་རང་ལ་འོས་ཤོག་ལྡུག་དགོས་པའི་རེ་སྐུལ་ཞུས་ཡོད་འདུག
ཊི་རུམ་ཕུ་ཡིས། སྲིད་འཛིན་ལས་ཡུན་ལོ་ ༤ རིང་ཁོང་གིས་མང་ཚོགས་ཀྱི་རེ་འབྲས་མངོན་འགྱུར་བྱེད་པར་ཁག་ཐེག་ཡོད་སྐོར་དང་། དེ་སྔ་ཨ་རིའི་ནང་གི་མི་རིགས་ནག་པོ་ཚོར་ཤེས་ཡོན་སློབ་གསོ་དང་འཕྲོད་བསྟེན་ལྟ་སྐྱོང་གི་གོ་སྐབས་ཡག་པོ་ཐོབ་མེད་སྟབས་ཁོ་ཚོའི་འཚོ་གནས་ཉེན་ཁར་ཐུག་ཡོད་པ་དང་། གལ་ཏེ་ཁོ་རང་ལ་སྲིད་འཛིན་རྒྱལ་ཁ་ཐོབ་ན། ཁོས་ཨ་རིའི་མི་འབོར་གྱི་བརྒྱ་ཆ་ ༥༨ ཙམ་ཟིན་ཡོད་པའི་ལས་མེད་མི་མང་གི་གནས་སྟངས་དང་འཕྲོད་བསྟེན་ལྟ་སྐྱོང་། ཤེས་ཡོན་སློབ་གསོ། དབུལ་ཕོངས་ཀྱི་གནས་སྟངས་མགྱོགས་མྱུར་ངང་འཕོ་འགྱུར་གཏོང་རྒྱུ་ཡིན་པ་མ་ཟད། ཨ་རིའི་མི་དཀར་དང་མི་ནག་དྲེས་མའི་མང་ཚོགས་ལ་འཚོ་གནས་ལ་རེ་བ་དང་སྤོབས་པ་གསར་བ་ཞིག་བསྐྲུན་རྒྱུ་ཡིན་སྐོར་ཡང་བརྗོད་ཡོད་འདུག
དམངས་གཙོ་ཚོགས་པའི་སྲིད་འཛིན་འོས་མི་ལྕམ་ཧེ་ལ་རེ་ (Hillary) ལ་རྒྱབ་སྐྱོར་གནང་མཁན་ཚོས། ཐེངས་འདིའི་སྐུ་ཞབས་ཊི་རུམ་ཕེ་ཡི་གཏམ་བཤད་དེ་དག་ལ་དོན་སྙིང་གང་ཡང་མེད་པར། དེ་ནི་ཁོས་ཨ་རིའི་མི་མང་ལ་འཕྲོད་བསྟེན་ལྟ་སྐྱོང་དང་ལས་གནས་ཡོད་པ། ལྷག་པར་དུ་དཔལ་འབྱོར་འགྲན་རྩོད་ཤུགས་ཆེ་བའི་དུས་སྐབས་འདིར། ཨ་རིའི་མི་མང་གི་འཚོ་གནས་ཡར་རྒྱས་འགྲོ་བཞིན་པའི་གནས་བབ་ལ་ངོས་འཛིན་གསལ་བོ་མེད་པའི་སྐད་ཆ་ཞིག་ཡིན་ལུགས་བརྗོད་འདུག
སྐུ་ཞབས་ཊི་རུམ་ཕི་ལ་རྒྱབ་སྐྱོར་བྱེད་མཁན་ནེ་ཆོལ་ (Nichols) ཞུ་བ་ཞིག་གིས། ཁོ་རང་ཌི་ཊོ་རི་ (Detroit) གྲོང་ཁྱེར་ནས་ཡིན་པ་དང་། འདས་པའི་མི་ལོ་ ༥༠ རིང་དམངས་གཙོ་ཚོགས་པས་ཨ་རིའི་གཞུང་འཛིན་སྐྱོང་བྱས་ཏེ། ཁོ་རང་གི་གྲོང་ཁྱེར་དེ་ཟིང་འཁྲུག་གི་གཡུལ་ས་ལྟ་བུ་ཞིག་ཏུ་བསྒྱུར་ཡོད་སྟབས། ད་ནི་སྤྱི་མཐུན་ཚོགས་པའི་སྲིད་འཛིན་འོས་མིར་གོ་སྐབས་སྤྲོད་གལ་ཆེ་སྐོར་དང་། ཨ་རིའི་མི་མང་རྨོངས་གཉིད་ལས་སད་པའི་དུས་ལ་བསླེབས་ཡོད་སྐོར། ཐེངས་འདིར་ཨ་རིའི་མི་མང་གིས་སྐུ་ཞབས་ཊི་རུམ་ཕི་ལ་གོ་སྐབས་སྤྲད་པ་ཡིན་ན། གྲོང་ཁྱེར་དེའི་ད་ལྟའི་གནས་སྟངས་ལ་འཕོ་འགྱུར་ཆེན་པོ་འགྲོ་བར་ཡིད་ཆེས་བྱེད་ཆོག་སྐོར། དེ་བཞིན། ཨ་རིའི་མི་མང་གིས་ཕྱོགས་སུ་ལྷུང་བའི་སེ་ཨན་ཨན་ (CNN) གཙོས་པའི་གསར་འགྱུར་བརྒྱུད་ལམ་ཁག་ལ་མི་ཉན་པར། དངོས་ཡོད་གནས་སྟངས་གཞི་ལ་བཞག་པའི་ཐོག་ནས་སྐུ་ཞབས་ཊི་རུམ་ཕི་ལ་རྒྱབ་སྐྱོར་བྱས་པ་ཡིན་ན། ད་ལྟའི་དཀག་རྙོག་མང་པོ་ཞིག་གང་མགྱོགས་སེལ་ཐུབ་པར་ཡིད་ཆེས་བྱེད་ཆོག་སྐོར་བརྗོད་འདུག
ཡང་གནས་ཚུལ་གཞན་ཞིག་གི་ནང་། ཉེ་ཆར་སྐུ་ཞབས་ཊི་རུམ་ཕི་ཡིས་གལ་ཏེ་ཁོང་ལ་སྲིད་འཛིན་རྒྱལ་ཁ་ཐོབ་ན། སྲིད་འཛིན་ལས་ཡུན་གྱི་ལོ་གཉིས་ནང་ཁོས་ཨ་རིའི་རྒྱལ་ནང་གི་ཁྲིམས་མཐུན་མིན་པའི་ཡུལ་གྱར་བ་ས་ཡ་ ༡༡ ཡོད་པ་ཚང་མ་ཕྱིར་འཕུད་གཏང་རྒྱུ་ཡིན་སྐོར་བརྗོད་ཡོད་པ་དེ་ནི་འགན་འཁུར་མེད་པའི་སྐད་ཆ་ཞིག་ཡིན་སྟབས། ཨ་རིའི་མི་མང་དང་རང་དབང་ཚོགས་སྡེ་ཁག་གིས་གླེང་སློང་ཤུགས་ཆེན་བྱེད་བཞིན་སྐོར་སོགས་བཀོད་འདུག
གསར་འགོད་པ། པདྨ་རྒྱལ།
