ཁ་སང་ཨེ་ཊ་ལེའི་ (Italy) མཚོ་ཁའི་སྐོར་སྲུང་བ་ ༤༠ ལྷག་གིས་ལེ་བྷ་ཡའི་ (Libya) མཚོ་ཐོག་ནས་སྐྱབས་བཅོལ་བ་མི་གྲངས་ ༦༥༠༠ བསྐྱབས་ཡོད་པ་དང་། ཕྱི་ཚེས་ ༢༨ ཉིན་མཚོ་ཐོག་དེ་རང་དུ་སྐྱབས་བཅོལ་བ་ ༡༡༠༠ བསྐྱབས་ཡོད་པ་མ་ཟད། སྐྱབས་བཅོལ་བ་ ༧༠༠ ཙམ་ཡོད་པའི་ཉ་འཛིན་གྲུ་གཟིངས་གཞན་ཞིག་རྒྱ་མཚོར་ནུབ་པའི་ཁྲོད་ཀྱི་མི་མང་ཆེ་བ་ཆུ་བསྐྱལ་ནས་མཚོ་མཐར་བསླེབས་ཐུབ་ཡོད་འདུག
མཉམ་འབྲེལ་རྒྱལ་ཚོགས་སྐྱབས་བཅོལ་ལས་ཁུངས་ཀྱིས། ལེ་བྷ་ཡའི་མཚོ་ཐོག་བརྒྱུད་ནས་ཡོང་མཁན་ཡུལ་གྱར་བ་མང་ཆེ་བ་ནུབ་ཨ་ཧྥི་རི་ཁ་ (West Africa) དང་ཧོ་རན་ཨ་ཧྥི་རེ་ཁ་ (Horn of Africa) རྒྱལ་ཁབ་གཉིས་ནས་ཡིན་པ་དང་། ད་ལོར་ཨེ་ཊ་ལིར་འབྱོར་བའི་ཡུལ་གྱར་བ་ ༡༡༢༥༠༠ ཡོད་ཅིང་། ཕྱི་ལོ་ ༢༠༡༥ ལོར་འབྱོར་བའི་ཡུལ་གྱར་བ་ ༡༡༦༠༠༠ ཡོད་པ་དང་། ཡུ་རོབ་ཀྱི་མཐའ་མཚམས་མཚོ་ཁུལ་ཁག་ཏུ་ད་ལོའི་ཕྱི་ཟླ་ ༥ བའི་ཟླ་མཇུག་ཏུ་སྐྱབས་བཅོལ་བ་ ༡༣༠༠ དང་ཕྱི་ཟླ་ ༨ པའི་ཟླ་སྟོད་དུ་ཡུལ་གྱར་བ་ ༨༣༠༠ ལྷག་བསྐྱབས་ཡོད་སྐོར་བརྗོད་འདུག
གནས་ཚུལ་གཞན་ཞིག་གི་ནང་། ད་ལོར་གྷི་རེ་སི་དང་ཨི་ཊ་ལིར་སྐྱབས་བཅོལ་དུ་ཡོང་མཁན་ ༣༠༠༠ ལྷག་མཚོ་ཐོག་ནས་འདས་གྲོངས་ཕྱིན་ཡོད་པ་དང་། གྲངས་འབོར་དེ་ཕྱི་ལོ་ ༢༠༡༥ ལོ་དང་བསྡུར་ན་བརྒྱ་ཆ་ ༥༠ འཕར་ཡོད་པ་དང་། འདས་པའི་ཟླ་བ་ ༦ ནང་རྒྱ་མཚོ་བརྒྱུད་ཡུ་རོབ་ནང་སྐྱབས་བཅོལ་དུ་ཡོང་མཁན་ ༢༠༤༠༠༠ ཟིན་གྱི་ཡོད་པ་དང་། དེ་ནི་འཛམ་གླིང་དམག་ཆེན་གཉིས་པའི་སྐབས་ཀྱི་ཡུལ་གྱར་བའི་གནས་སྟངས་ལས་ཀྱང་ཛ་དྲགས་ཆགས་ཡོད་པ་མ་ཟད། ན་ནིང་གཅིག་པུར་དཀྱིལ་ཤར་ཡུལ་གྲུ་ཁག་དང་སི་རི་ཡའི་ཟིང་འཁྲུག་ཁྲོད་ནས་ཡུ་རོབ་ནང་སྐྱབས་བཅོལ་དུ་ཡོང་མཁན་མི་གྲངས་ས་ཡ་གཅིག་ལྷག་ཟིན་གྱི་ཡོད་སྐོར་སོགས་འཁོད་འདུག
གསར་འགོད་པ། པདྨ་རྒྱལ།
