རྒྱ་ནག་གཞུང་གིས་ཕྱི་ལོ ༢༠༢༠ ལོར་རྒྱའི་སྐད་ཡིག་རྒྱལ་ཡོངས་སུ་ཁྱབ་ཐུབ་པའི་དམིགས་ཚད་བཟུང་སྟེ་མ་འོངས་ལོ་ ༥ ཡི་ནང་རྒྱ་སྐད་ཁྱབ་བརྡལ་གཏོང་བར་ལས་འགན་ཆེན་པོ་ ༥ སྤྲད་ཡོད་འདུག
དེ་རིང་ཀྲུང་གོ་བོད་ཀྱི་དྲ་བ་ཟེར་བའི་ཐོག་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༨ ནས་ཚེས་ ༡༤ བར་ནི་རྒྱལ་ཡོངས་སྤྱི་སྐད་ཁྱབ་བརྡལ་དྲིལ་བསྒྲགས་གཟའ་འཁོར་ཞེས་པར་གཏན་འབེབས་བྱས་ཡོད་པ་ལྟར། ཉིན་ཤས་གོང་དུ་རྒྱ་ནག་སློབ་གསོ་ཁང་དང་རྒྱལ་ཁབ་སྐད་ཡིག་ལས་དོན་ཨུ་ལྷན་གཉིས་ཀྱིས། <<རྒྱལ་ཁབ་ཀྱི་སྐད་ཡིག་བྱ་གཞག་གི“ལོ་ལྔ་ཚན་བཅུ་གསུམ་པའི”འཕེལ་རྒྱས་འཆར་འགོད་>>ཟེར་བ་ཞིག་ཁྱབ་བསྒྲགས་བྱས་ཡོད་པ་དང་། འཆར་འགོད་དེའི་ནང་དུ་གསར་གཏོད་དང་མཐུན་སྦྱོར། ལྗང་མདོག སྒོ་དབྱེ། མཉམ་སྤྱོད་བཅས་ཀྱི་འཕེལ་རྒྱས་འདུ་ཤེས་ཆེན་པོ་ལྔ་ཟེར་བ་གཞི་རྩར་བཞག་སྟེ། རྒྱལ་ཁབ་ཀྱི་འཐབ་ཇུས་ལ་དམིགས་པ་དང་། གྲོང་གསེབ་དང་མི་རིགས་ས་ཁུལ་དུ་འགག་སྒྲོལ་བྱེད་པ། སྤྱི་ཚོགས་ཀྱིས་བཀོལ་སྤྱོད་བྱ་རྒྱུར་སྐུལ་འདེད་བཏང་སྟེ། སྐད་བརྡའི་ནུས་པ་ཆེ་རུ་གཏོང་བ་དང་ཞི་མཐུན་སྐྱོན་བྲལ་གྱི་སྐད་བརྡའི་འཚོ་བ་གཏོད་དགོས་སྐོར་སོགས་མ་འོངས་ལོ་ ༥ ཡི་རིང་གི་རྒྱ་སྐད་ཁྱབ་བརྡར་གཏོང་བའི་བསམ་བློ་དང་དམིགས་ཚད། ལས་འགན་གཙོ་བོ་བཅས་གསལ་སྟོན་ནན་བརྗོད་བྱས་ཡོད་འདུག
དེ་ཡང་འཆར་འགོད་དེའི་ནང་དུ་མ་འོངས་ལོ་ ༥ རིང་གི་ལས་འགན་ཆེན་པོ་ ༥ དང་བྱ་ཐབས་ཁག་ ༡༨ བཏོན་པའི་གཅིག་ནི་རྒྱལ་ཁབ་ཀྱི་སྤྱི་སྤྱོད་སྐད་ཡིག་ཁྱབ་གདལ་གཏོང་རྒྱུ་ཡིན་ཞིང་། དེའི་ནང་གྲོང་གསེབ་ས་ཁུལ་གྱི་སྤྱི་སྐད་ཆུ་ཚད་མཐོ་རུ་ཧུར་ཐག་གཏོང་བ་དང་། མི་རིགས་ས་ཁུལ་གྱི་རྒྱལ་ཁབ་སྤྱི་སྤྱོད་སྐད་ཡིག་ཁྱབ་བརྡལ་མགྱོགས་པོ་གཏོང་བ། སློབ་གྲྭའི་སྐད་ཡིག་སློབ་གསོར་ཤུགས་སྣོན་རྒྱག་པ། སྐད་ཡིག་ཚད་ལྡན་ཅན་འཛུགས་སྐྱོང་ལ་ཤུགས་སྣོན་རྒྱག་པ་བཅས་ཚུད་ཡོད།
གཉིས་ནི་སྐད་ཡིག་ཆ་འཕྲིན་ཅན་འཛུགས་སྐྱོང་ལ་སྐུལ་འདེད་བཏང་སྟེ་སྐད་ཡིག་ཆ་འཕྲིན་ཅན་གྱི་ལག་རྩལ་གསར་གཏོད་འཕེལ་རྒྱས་ལ་སྐུལ་འདེད་ཧུར་ཐག་གཏོང་བ་དང་། སྐད་བརྡའི་ཐོན་ཁུངས་འཛུགས་སྐྱོང་ལ་ཤུགས་སྣོན་རྒྱག་པ། སྐད་ཡིག་ཆ་འཕྲིན་ཅན་གྱི་ལས་སྟེགས་བསྐྲུན་པ་བཅས་བྱ་རྒྱུ་ཡིན་པ།
གསུམ་ནི་རྒྱལ་ཁབ་ཀྱི་སྐད་ཡིག་ཞབས་ཞུའི་ནུས་པ་ཆེ་རུ་བཏང་སྟེ་རྒྱལ་ཁབ་ཀྱི་འཐབ་ཇུས་དང་བདེ་འཇགས་འགན་ལེན་བྱེད་པའི་སྐད་ཡིག་གི་ཞབས་ཞུའི་ནུས་པ་གཙོ་གནད་ཐོག་ཆེ་རུ་གཏོང་བ་དང་། སྐད་ཡིག་གི་ཞབས་ཞུ་བྱེད་སྟངས་གསར་གཏོད་བྱེད་པ། དམིགས་བསལ་མི་ཚོགས་ཀྱི་སྐད་ཡིག་དགོས་མཁོར་ཞབས་འདེགས་ཞུ་བ་བཅས་བྱ་རྒྱུ་ཡིན་པ།
བཞི་ནི་ཀྲུང་ཧྭའི་ཕུལ་བྱུང་གི་སྐད་བརྡའི་རིག་གནས་དར་སྤེལ་དང་བརྒྱུད་སྤེལ་བྱ་རྒྱུ་ཡིན་ཞིང་། དེའི་ནང་ཀྲུང་ཧྭའི་ཕུལ་བྱུང་གི་སྐད་ཡིག་རིག་གནས་རྒྱུན་འཛིན་དང་འཕེལ་རྒྱས་ལ་སྐུལ་འདེད་གཏོང་བ་དང་། མི་རིགས་ཁག་གི་སྐད་ཡིག་ལ་ཚན་རིག་དང་མཐུན་པའི་ངང་སྲུང་སྐྱོབ་བྱས་ཏེ་ནང་ས་དང་། ཤང་ཀང་། ཨའོ་མོན། སྐམ་ས་ཆེན་མོ། ཐའེ་ཝན་བཅས་ས་ཁུལ་གྱི་སྐད་ཡིག་སྤེལ་རེས་མཉམ་ལས་ཟབ་ཏུ་བཏང་ནས་རྒྱལ་སྤྱིའི་ཐོག་སྐད་ཡིག་སྤེལ་རེས་དང་བརྒྱུད་སྤེལ་ལ་ཤུགས་སྣོན་རྒྱག་རྒྱུ་ཡིན་པ།
ལྔ་ནི་སྐད་ཡིག་ལས་དོན་བཅོས་སྒྲིག་མ་ལག་འཐུས་སྒོ་ཚང་དུ་བཏང་སྟེ་སྐད་ཡིག་ཁྲིམས་སྐྱོང་འཛུགས་སྐྱོང་ལ་ཤུགས་སྣོན་རྒྱག་པ་དང་། སྐད་ཡིག་གི་ཚད་ལྡན་ཚད་གཞི་འཐུས་སྒོ་ཚང་དུ་གཏོང་བ། སྐད་ཡིག་ཚོད་དཔྱད་མ་ལག་འཐུས་སྒོ་ཚང་དུ་གཏོང་བ། གཙོ་གནད་ཁྱབ་ཁོངས་ཀྱི་སྐད་ཡིག་ལྟ་སྐུལ་ཞིབ་བཤེར་ལ་ཤུགས་སྣོན་རྒྱག་རྒྱུ་ཡིན་པ་བཅས་རེད།
ཡང་གནས་ཚུལ་དེའི་ནང་། འདི་ལོར་རྒྱ་ནག་གཞུང་གིས་<<སྤྱི་སྐད་ཁྱབ་བརྡལ་གཏོང་རྒྱུའི་སྐོར་གྱི་མཛུབ་སྟོན>>ཞེས་པ་ཁྱབ་བསྒྲགས་བྱས་ནས་ལོ་ ༦༠ འཁོར་བ་དང་། <<རྒྱལ་ཁབ་ཀྱི་སྤྱི་སྤྱོད་སྐད་ཡིག་བཅའ་ཁྲིམས>>ཟེར་བ་ལག་བསྟར་བྱས་ནས་ལོ་ ༡༥ འཁོར་ཡོད་ལ། ཕྱི་ལོ་ ༢༠༢༠ ལོར་བསླེབ་སྐབས་རྒྱལ་ཡོངས་ཀྱི་ཁྱབ་ཁོངས་སུ་རྒྱའི་སྐད་ཡིག་གཞི་རྩའི་ཆ་ནས་ཁྱབ་པ་བྱ་རྒྱུ་ཡིན་སྐོར་བསྒྲགས་འདུག
གསར་འགོད་པ། པདྨ་མཚོ།
