འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གིས་མྱོས་རྫས་སྤྱོད་མཁན་ཁྱོན་ ༣༤ ཡོད་པའི་ནང་ནས་དྷ་སར་མི་ཉི་ཤུ་རྩ་གྲངས་ཤིག་ཡོད་ཀྱང་། ཁོང་ཚོའི་གནས་སྟངས་ཇེ་བཟང་དུ་ཕྱིན་ཡོད་སྐོར་གསུངས་སོང་།
དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༢ པའི་ཉིན་གསུམ་པའི་སྔ་དྲོར། སྤྱི་འཐུས་ཤིག་གིས་སྨན་བཅོས་ལྟ་སྐྱོང་གི་ལས་གཞི་དེ་བཙན་བྱོལ་བོད་མིའི་འཕྲོད་བསྟེན་གྱི་ལས་གཞི་ཆེ་ཤོས་ཡིན་མིན་དང་། ནད་རིགས་སྔོན་འགོག་གི་སྐོར་ལ་ལས་རིམ་དང་ལས་འཆར་གང་དང་གང་ཡོད་སྐོར་སྐར་རྟགས་ཅན་གྱི་དྲི་བ་ཕུལ་བར་འཕྲོད་བསྟེན་བཀའ་བློན་མཆོག་གིས། ཕྱི་ལོ་ ༢༠༡༥ ནས་ ༢༠༡༦ བར་སྨན་བཅོས་ལྟ་སྐྱོང་གི་ལས་གཞིར་ཁྱོན་ཧིན་སྒོར་འབུམ་ ༢༠༦,༨༢༨༥༥ དང་ནད་རིགས་སྔོན་འགོག་གི་ལས་གཞིར་ཧིན་སྒོར་འབུམ་ ༤༣༠,༧༥༤༢༢ བཏང་ཡོད་པ་ལྟར། འཕྲོད་བསྟེན་ལས་ཁུངས་ཀྱི་ལས་གཞི་ཆེ་ཤོས་དེ་སྨན་བཅོས་ལྟ་སྐྱོང་གི་ལས་གཞི་མིན་སྐོར་དང་། ནད་རིགས་སྔོན་འགོག་གི་ལས་རིམ་སྐོར་ནས་འཕྲོད་བསྟེན་གྲངས་ཐོ་ཕྱོགས་བསྡུས་དང་ལོ་ལྔ་མན་གྱི་བྱིས་པར་ནད་རིགས་སྔོན་འགོག་གི་སྨན་ཁབ་རིན་མེད། བྱིས་པར་བློ་འཕེལ་དང་གསོ་རིག་བཅུད་སྨན་རིལ་བུ་རིན་མེད་དུ་སྤྲོད་པ། དེ་བཞིན་གསར་སྐྱེས་བྱིས་པར་ཊི་བི་སྔོན་འགོག་གི་ཁབ་རྒྱག་པ་དང་། ཊི་བི་རིམ་པ་གཉིས་པ་དང་གསུམ་པར་སྨན་རིན་གྱི་རོགས་རམ་ཡོད་པ། འགོས་ནད་ཅན་གྱི་ཊི་བི་ནད་པ་ཟུར་འཇོག་རྣམས་ལ་ཟས་བཅུད་ཀྱི་མཐུན་རྐྱེན་སྦྱོར་བ། ཊི་བི་ནད་པ་དང་ནད་པའི་ནང་མི། སྡོད་རོགས་བཅས་ཊི་བི་ནད་རྟགས་ཐོན་པ་རྣམས་ལ་སྨན་བཅོས་མཐུན་འགྱུར་ཡོད་པ། གཞན། བུད་མེད་སྦྲུམ་མར་ནད་གཞི་སྔོན་འགོག་གི་ཁབ་དང་བརྟག་དཔྱད། ཟུངས་ཁྲག་གསོ་བཅུད་ཀྱི་སྨན་རིན་མེད་སྤྲོད་པ། བུད་མེད་ཀྱི་བུ་སྣོད་འབྲས་ནད་ལ་རིན་མེད་བརྟག་དཔྱད་དང་གོ་རྟོགས་སྤེལ་བ། སྔོན་འགོག་ཁབ་ཀྱི་འགྲོ་གྲོན་ལས་བརྒྱ་ཆ་ ༧༥ མཐུན་འགྱུར་ཡོད་པ། དེ་བཞིན། གཉན་ནད་རེག་དུག་བརྟག་དཔྱད་དང་སྨན་གྲོན། ལམ་གྲོན། ཟུར་ཕོགས་བཅས་ཀྱི་མཐུན་འགྱུར་ཡོད་པ་དང་། མཆིན་པའི་གཉན་ཚད་བརྟག་དཔྱད་དང་སྔོན་འགོག་གི་ཁབ་ལ་རོགས་རམ་ཡོད་པ། མཆིན་པའི་གཉན་ཚད་ཡོད་རིགས་ཀྱི་ཕྲུ་གུ་གསར་སྐྱེས་རྣམས་ལ་རིན་གོང་ཆེ་བའི་དམིགས་བསལ་སྔོན་ཁབ་ (Hepatitis B Immunoglobulin) རིན་མེད་དང་། བོད་མིའི་གཞིས་སྒར་དང་སློབ་གྲྭ་ཁག་ཏུ་རིན་མེད་བརྟག་དཔྱད་དང་འབྲེལ། མཆིན་པའི་གཉན་ཚད་ཀྱི་གོ་རྟོགས་སྤེལ་བ་དང་། རྒྱལ་སྤྱིའི་འཕྲོད་བསྟེན་ཉིན་མོ་སྲུང་གཙི་དང་མང་ཚོགས་ལ་བརྙན་འཕྲིན་དང་འདྲ་པར་བརྒྱུད་ནད་རིགས་སྔོན་འགོག་གི་གོ་རྟོགས་སྤེལ་རྒྱུ་དང་། ནད་རིགས་སྔོན་འགོག་གི་ཡིག་ཆ་དང་ན་གཞོན་འཚར་ལོངས་སྐོར་ལ་སྒྲུང་དེབ་པར་འགྲེམས་བྱེད་པ་སོགས་ལས་རིམ་ཁག་ ༢༤ ཡོད་པ་དང་། དེ་བཞིན་འཕྲོད་བསྟེན་གྲངས་ཐོའི་ལས་གཞི་གསར་པ་ (Health Information System Program) དེ་ས་གནས་བཞིའི་ནང་ཚོད་བལྟ་གནང་རྒྱུ་དང་། དགོན་སྡེ་དང་སློབ་གྲྭ་ཁག་ནང་ནད་རིགས་སྔོན་འགོག་གི་ལས་དོན་ཚགས་ཚུད་ཡོང་སླད་ཆོས་ཤེས་འཕྲོད་གསུམ་གྱི་ལས་སྒྲུབ་པའི་ཚོགས་ཆུང་གཏན་འབེབས་གནང་རྒྱུ་དང་། ས་གནས་སོ་སོའི་དུད་ཚང་རེ་རེར་འཕྲོད་ལས་ནས་སྐོར་སྐྱོད་ཀྱིས་བརྟག་དཔྱད་དང་གྲངས་ཐོ་བསྡུ་ལེན། སྔོན་འགོག་སློབ་གསོ་གཏོང་རྒྱུ། གཞིས་ཆགས་དང་དགོན་སྡེ། སློབ་གྲྭ་བཅས་སུ་ཊི་བི་ནད་བཅོས་དུས་ཐོག་ཏུ་ཡོང་སླད་ཐད་ཀར་ལྟ་སྲུང་ (DOTS) མཐུན་རྐྱེན་རྒྱ་ཆེ་རུ་གཏོང་རྒྱུ་སོགས་གསོ་རིག་རྒྱུན་འཛིན་སྨན་པ་དང་ཕྱི་ལུཊ་སྨན་པ་གཉིས་ཐོག་ནས་ནད་རིགས་སྔོན་འགོག་གི་ལས་འཆར་སྤེལ་རྒྱུ་ཡིན་ལ། ནད་རིགས་སྔོན་འགོག་གི་ལས་འཆར་ཁོ་ནར་འཕྲོད་བསྟེན་གྱི་ལས་འཆར་སྤྱིའི་འགྲོ་གྲོན་གྱི་བརྒྱ་ཆ་ ༤༠ ཙམ་བཏང་ཡོད་ལ། མ་འོངས་པར་འདི་ལས་མང་བ་གཏོང་འཆར་ཡོད་པ་སོགས་ལས་འཆར་ཁག་ ༡༣ ཡོད་སྐོར་གསུངས་སོང་།
འཕྲོས་དོན་དྲི་བའི་སྐབས་སུ་སྤྱི་འཐུས་ཤིག་གིས་འཚམས་གཟིགས་སུ་ཕེབས་དུས་བོད་མི་གང་འཚམ་མང་པོ་གནས་སྡོད་བྱས་ཡོད་པའི་ས་ཁུལ་ཁག་ཅིག་ཏུ་སྨན་པ་མེད་པའི་དཀའ་ངལ་ཆེན་པོ་འཕྲད་ཀྱི་ཡོད་པ་དེ་སེལ་ཐབས་ཀྱི་ལས་འཆར་ཅི་ཡོད་དང་། རྒྱུ་རྐྱེན་ཅི་ཞིག་གིས་དཀའ་ངལ་དེ་འཕྲད་ཀྱི་ཡོད་པའི་སྐོར་བཀའ་འདྲི་ཞུས་པར་འཕྲོད་བསྟེན་བཀའ་བློན་མཆོག་གིས། སྨན་པ་མེད་པའི་དཀའ་ངལ་དེ་མུ་མཐུད་ནས་གནས་ཡོད་པ་དང་། དཀའ་ངལ་དེ་གཅིག་བྱས་ན་ཡ་རབས་བཟང་སྤྱོད་ཞན་པོ་ཆགས་འགྲོ་གི་ཡོད་པ་ཞིག་དང་། ཕྱོགས་གཞན་ཞིག་ནས་དཀའ་ངལ་དེ་སྨན་པ་ཚོའི་གླ་ཕོགས་དང་ས་གནས་ས་ཐོག་གི་མཐུན་རྐྱེན་སོགས་ཀྱི་གནད་དོན་དེ་འདྲ་ཡང་ཡིན་སྲིད་པ་དང་། དེ་འདྲའི་གནད་དོན་མང་པོ་ཞིག་གི་ཐོག་ནས་ས་གནས་ཁག་ཏུ་སྨན་པ་མེད་པའི་གནས་སྟངས་དེ་འདྲ་ཞིག་ཆགས་བསྡད་ཡོད་པ་དང་། གནས་སྟངས་དེ་ལ་གཞིགས་ཏེ་ཉེ་ཆར་རང་ལ་བོད་མིའི་སྒྲིག་འཛུགས་ཀྱི་ངོས་ནས་འཕྲོད་བསྟེན་ལས་ཁུངས་ཀྱི་ཁྱབ་ཁོངས་སྨན་ཁང་ཁག་གི་ལས་བྱེད་དང་སྨན་པ། སྨན་ཞབས་ཚང་མའི་གླ་ཕོགས་སྤར་ཡོད་པ་དང་། གླ་ཕོགས་སྤར་བ་དེས་ཚང་མ་སྙོམ་པོ་ཡོང་ཐུབ་པ་ཞིག་ཏུ་བསམ་སྡོད་ཀྱི་ཡོད་ནའང་། དཀའ་ངལ་དེ་སེལ་ཐབས་སུ་རྩ་བའི་འཕྲོད་བསྟེན་ལས་ཁུངས་ཙམ་མ་ཟད། སྤྱི་ཚོགས་རང་གི་ཐོག་ནས་དཀའ་ངལ་དེའི་ཐོག་ལ་ཐུགས་ཉམས་བཞེས་ཏེ་ནུས་པ་འདོན་དགོས་པ་དང་། ད་ཆར་འཕྲོད་བསྟེན་ལས་ཁུངས་ཀྱི་ངོས་ནས་རྒྱ་གར་ལྷོ་ཕྱོགས་ཀྱི་མངའ་སྡེ་གཞུང་ལ་ཡིག་འབྲེལ་བྱས་ཏེ་ལོ་གཅིག་གི་ཆོད་གན་གྱི་ཐོག་ནས་སྨན་པ་གཉིས་གསུམ་གཏོང་གནང་ཡོང་བ་ཞུས་ཏེ། དེའི་ཐད་འབད་བརྩོན་གནང་བཞིན་ཡོད་སྐོར་སོགས་གསུངས་སོང་།
གཞན་ཡང་སྤྱི་འཐུས་ཤིག་གིས། བཙན་བྱོལ་བོད་མིའི་སྤྱི་ཚོགས་ཁྲོད་དུ་མྱོས་རྫས་སྤྱོད་མཁན་ག་ཚོད་ཡོད་པ་དང་། ཁོ་ཚོའི་འཕྲོད་བསྟེན་དང་འཚོ་བའི་གནས་སྟངས་ག་འདྲ་ཆགས་ཡོད་མེད་དོགས་འདྲི་ཞུས་པར་འཕྲོད་བསྟེན་བཀའ་བློན་མཆོག་གིས། ཉེ་བའི་ཆར་ཕུང་པོ་སྲེག་སའི་ཁང་པའི་སྟེང་དུ་མྱོས་རྫས་སྤྱོད་མཁན་མི་རེ་གཉིས་ཉལ་འདུག་པ་མཐོང་སོང་ལ། ཁོ་རང་གཉིས་ཀྱི་སྡོད་སྟངས་དང་གནས་སྟངས་ངན་པ་ཞེ་དྲགས་དེ་འདྲ་གང་ཡང་རེད་མི་འདུག རྩ་བའི་མྱོས་རྫས་སྤྱོད་མཁན་ཚོའི་འཚོ་བའི་གནས་སྟངས་ལ་ལྟ་དུས། ཁོ་རང་ཚོའི་འཚོ་གནས་ཀྱི་གནས་སྟངས་ཞེ་དྲགས་སྐྱོ་བོ་དང་ཧ་ཅང་ཛ་དྲག་པོ་དེ་འདྲ་མཐོང་མ་བྱུང་ལ། ལྷག་པར་དུ་ཉེ་ཆར་ནས་དྷ་ས་ས་གནས་མགོ་འཛིན་གྱི་ངོས་ནས། མྱོས་རྫས་སྤྱོད་མཁན་ཚོར་ཉལ་ཆས་དང་གདན་ཁེབས། སྙེས་འབོལ་ལ་སོགས་པའི་མཐུན་རྐྱེན་སྦྱར་ཡོད་པ་དང་། ཁོ་རང་ཚོའི་སྡོད་ཁང་གི་ཐབ་ཚང་ནང་ལའང་ཐབ་ཆས་དང་སྣོད་ཆས། ཟས་རིགས་དང་འབྲུ་རིགས་དེ་འདྲ་ཡང་ཅུང་ཡོད་པའི་གནས་སྟངས་ཤིག་མཐོང་སོང་ལ། སྔོན་གྱི་མྱོས་རྫས་སྤྱོད་མཁན་ཚོའི་དཀའ་ངལ་དང་ད་ལྟའི་གནས་བབ་གཉིས་བསྡུར་བ་ཡིན་ན། ད་ལྟ་མྱོས་རྫས་སྤྱོད་མཁན་ཚོའི་གནས་སྟངས་བཟང་དུ་ཕྱིན་ཡོད་པ་དང་། མྱོས་རྫས་ངན་གོམས་ཀྱི་གྲངས་ཐོའི་ནང་མྱོས་རྫས་སྤྱོད་མཁན་ཁྱོན་ ༣༤ ཡོད་པའི་གྲས་ནས་དྷ་ས་རང་དུ་མྱོས་རྫས་སྤྱོད་མཁན་མི་ཉི་ཤུ་རྩ་གྲངས་ཤིག་ཡོད་སྐོར་སོགས་གསུངས་སོང་།
གསར་འགོད་པ། པདྨ་རྒྱལ།
