པེ་ཅིན་གྲོང་ཁྱེར་འབྲིང་རིམ་མི་མང་ཁྲིམས་ཁང་གིས་རྒྱ་རིགས་སྒྱུ་རྩལ་པ་གྲགས་ཅན་ཨེ་ཝི་ཝི་ཡི་ཁྲིམས་རྩོད་པ་ཞ་ལིན་ལགས་ཀྱིས་གཞན་གྱི་ལག་ནས་རྒྱ་སྒོར་ས་ཡ་ ༤.༨ བླངས་པའི་ཉེས་འཛུགས་འོག་ལོ་བཅུ་གཉིས་ཀྱི་ཁྲིམས་ཐག་བཅད།
རྒྱ་ནག་ལྷོ་རྒྱུད་ཞོགས་པའི་ཚགས་པར་ཁང་གིས་གནས་ཚུལ་སྤེལ་བ་ལྟར་ན། དེ་རིང་པེ་ཅིན་གྲོང་ཁྱེར་འབྲིང་རིམ་མི་མང་ཁྲིམས་ཁང་གཉིས་པས། རྒྱ་རིགས་སྒྱུ་རྩལ་པ་གྲགས་ཅན་ཨེ་ཝི་ཝི་ (Ai Weiwei) ལགས་ཀྱི་ཁྲིམས་རྩོད་པ་ཞ་ལིན་ (Xia Lin) ལགས་ཀྱིས་གཞན་གྱི་ལག་ནས་རྒྱ་སྒོར་ས་ཡ་ ༤.༨ བླངས་པའི་ཉེས་འཛུགས་བྱས་ཏེ་ལོ་ ༡༢ གྱི་ཁྲིམས་ཐག་བཅད་ཡོད་འདུག
པེ་ཅིན་གྲོང་ཁྱེར་འབྲིང་རིམ་མི་མང་ཁྲིམས་ཁང་གཉིས་པའི་ཁྲིམས་ཞིབ་པ་ཏིན་ཞི་ཁའེ (Ding Xikui) ཟེར་བ་ཞིག་གིས། ཞ་ལིན་ལགས་ཀྱིས་ཁོ་རང་ལ་ཁྲིམས་ཐག་གཅོད་རྒྱུའི་གནས་ཚུལ་དེ་ཐོས་རྗེས། ཁོས་ཁྲིམས་ཆད་དེ་དྲང་བདེན་མིན་པ་དང་། ཁོང་གིས་རྒྱ་ནག་ནང་གི་ཁྲིམས་ཀྱི་ཁེ་དབང་སྲུང་སྐྱོབ་བྱས་པའི་རྐྱེན་གྱིས་ཁྲིམས་ཐག་ལྕི་མོ་གཅོད་ཀྱི་ཡོད་སྐོར་འགྲེལ་བརྗོད་བྱས་ལུགས་བརྗོད་འདུག
རྒྱ་རིགས་འགྲོ་བ་མིའི་ཐོབ་ཐང་དོན་གཉེར་བ་གོ་ཡས་ཧྲན་ (Guo Yushan) ལགས་ཀྱིས། སྐུ་ཞབས་ཞ་ལིན་ནི་སྔོན་ཆད་ཚོང་དོན་གྱི་ཁྲིམས་རྩོད་པ་དང་ད་ལྟ་འགྲོ་བ་མིའི་ཐོབ་ཐང་དོན་གཉེར་བའི་ཁྲིམས་རྩོད་པ་ཞིག་ཡིན་ཞིང་། ད་ལྟའི་བར་ཁོས་རྒྱ་ནག་ནང་གི་ཁྲིམས་ཀྱི་ཁེ་དབང་སྲུང་སྐྱོབ་ཀྱི་ལས་དོན་མང་པོ་བསྒྲུབས་ཡོད་སྐོར་བརྗོད་འདུག
གཞན། རྒྱལ་སྤྱིའི་ཉེས་ཡངས་ཚོགས་པས་ད་ལྟའི་བར་རྒྱ་ནག་གཞུང་གིས་རྒྱ་རིགས་འགྲོ་བ་མིའི་ཐོང་ཐབ་དོན་གཉེར་བ་དང་ཁྲིམས་རྩོད་པ་ཁྱོན་ ༢༤༨ འཛིན་བཟུང་བཀག་བསྐྱིལ་བྱས་ཡོད་སྐོར་བཤད་འདུག
ཞ་ལིན་ལགས་ནི་ད་ལྟ་ལོ་ ༤༦ ཡིན་པ་དང་། ཁོ་རྒྱ་རིགས་སྒྱུ་རྩལ་པ་གྲགས་ཅན་ཨེ་ཝི་ཝི་གཙོས་པའི་རྒྱ་ནག་ནང་གི་འགྲོ་བ་མིའི་ཐོབ་ཐང་དོན་གཉེར་བ་ཁག་གི་ཁྲིམས་རྩོད་པ་ཡིན་ཞིང་། ཕྱི་ལོ་ ༢༠༡༤ ཟླ་ ༡༡ ནང་རྒྱ་རིགས་འགྲོ་བ་མིའི་ཐོབ་ཐང་དོན་གཉེར་བ་གོ་ཡས་ཧྲན་ (Guo Yushan) གྱི་ཁྲིམས་རྩོད་པ་བྱས་པར་བརྟེན། ཉེན་རྟོག་པས་ཁོང་འཛིན་བཟུང་བྱས་ཡོད་པ་རེད།
གསར་འགོད་པ། པདྨ་རྒྱལ།
