ཤེས་རིག་བཀའ་བློན་མཆོག་གིས་བྱང་ཨ་རིའི་སློབ་དེབ་ཀྱིས་བོད་སྐད་གོ་བརྡ་སྤྲོད་ཐབས་ཙམ་ལས་བོད་པའི་ཆོས་དང་རིག་གཞུང་། བརྡ་སྤྲོད་སོགས་ཀྱི་དམིགས་ཡུལ་བཟུང་མེད་སྐོར་དང་། དཔེ་སྟོན་སློབ་གྲྭ་འཛིན་གྲྭ་དགུ་བ་བཅུ་བ་ཅོན་ཏ་རའི་འོག་ཟླ་སྒྲིལ་གཏོང་རྒྱུ་ཡིན་སྐོར་སོགས་གསུངས་སོང་།
དེ་རིང་བོད་མི་མང་སྤྱི་འཐུས་གྲོས་ཚོགས་ནང་། ཤེས་རིག་ལས་ཁུངས་ཀྱི་ལས་བསྡོམས་ཐོག་བགྲོ་གླེང་གནང་སྐབས། སྤྱི་འཐུས་ཚོས་ཤེས་རིག་ལས་ཁུངས་ཀྱིས་དཔར་འགྲེམས་བྱས་པའི་བྱང་ཨ་རིའི་བཟའ་མཇུག་སློབ་དེབ་ནང་ཁ་སྐད་གཙོ་བོར་བཟུང་སྟེ། བོད་པའི་བརྡ་སྤྲོད་ནང་གི་བྱེད་སྒྲ་དང་འབྲེལ་སྒྲ་མང་པོ་ཞིག་མེད་པ་བཟོས་ཡོད་པ། དཔེར་ན། ང་ཁ་པར་གཏོང་གི་ཡོད། ང་ཟ་མ་བཟའ་བཞིན་ཡོད། ཟེར་བ་སོགས་ཀྱི་ཡིག་ནོར་དང་བརྡ་ནོར་མང་པོ་ཞིག་འཁོད་ཡོད་པ་དེ་རྒྱ་ནག་གི་རིག་གསར་སྐབས་བོད་ཡིག་ལ་གཏོར་བརླག་བཏང་བ་དང་གཅིག་མཚུངས་ཆགས་ཀྱི་ཡོད་སྐོར་བརྗོད་སོང་ལ། སྤྱི་འཐུས་རེ་གཉིས་ཤིག་གིས་སློབ་དེབ་དེའི་ནང་ནོར་འཁྲུལ་ཡོད་པ་དངོས་ཡོད་ཡིན་ཡང་། ཕྱི་རྒྱལ་ཁག་གི་བོད་ཕྲུག་ཚོར་བརྡ་སྤྲོད་སྙན་ངག་སོགས་ཀྱི་རེ་བ་ཆེན་པོ་རྒྱག་རྒྱུ་མེད་པར། བོད་སྐད་དང་བོད་ཡིག་གོ་བརྡ་སྤྲོད་ཐབས་ཙམ་གཙོ་བོར་འཛིན་དགོས་སྟབས། ཐབས་ཤེས་འདྲ་མིན་མི་འཐེན་ཐབས་མེད་ཡིན་སྐོར་ཡང་བརྗོད་སོང་།
བྱང་ཨ་རིའི་གཟའ་མཇུག་སློབ་དེབ་སྐོར་ལ་ཤེས་རིག་བཀའ་བློན་མཆོག་གིས་གསལ་བཤད་གནང་དོན། “གོང་དུ་སྤྱི་འཐུས་གཅིག་གིས་ཐོག་མ་ང་ཚོར་སྔགས་བརྗོད་གནང་སོང་ཡང་། རྗེས་ལ་རྒྱ་མི་ལས་སྡུག་པ་རེད་ཟེར་བ་དེར་ངོས་ལེན་རྩ་བ་ནས་ཞུ་ཐུབ་ཀྱི་མི་འདུག བྱང་ཨ་རིའི་སློབ་གྲྭ་དེ་བཙུགས་ནས་ལོ་ ༢༠ འགྲོ་བཞིན་ཡོད་པ་རེད། སྔོན་ཆད་ཁོ་རང་ཚོར་སློབ་དེབ་ལོགས་སུ་མེད་པར་ཤེས་རིག་གི་སློབ་དེབ་སློབ་ཁྲིད་ཀྱིན་ཡོད་པ་དང་། དེ་ས་གནས་ཀྱི་གནས་སྟངས་ལ་དེ་ཙམ་འཚམ་པོ་མེད་སྟབས། བཀའ་ཤག་སྐབས་བཅུ་བཞི་པས་དེ་ལ་ལག་པ་འཆིང་པ་རེད། སྤྱིར་བཏང་ང་ཚོས་བོད་པའི་ཆོས་དང་རིག་གཞུང་། སྐད་ཡིག་སོགས་མང་པོ་ཞིག་ཤོད་བཞིན་ཡོད་ཀྱང་། དོན་ངོ་མའི་ཐོག་བྱང་ཨ་རིའི་སློབ་ཕྲུག་ཚོའི་གནས་སྟངས་ལ་ལྟ་དགོས་པ་གལ་ཆེན་པོ་ཞེ་དྲགས་རེད། ཁོ་རང་ཚོའི་བོད་སྐད་ཀྱི་གནས་སྟངས་ཧ་ཅང་སྐྱོ་བོ་རེད།”
“༢༠༡༢ ལོར་ཨ་རིའི་ཁ་ལི་ཧྥོ་ནེ་ཡར་ཨ་རིའི་སྐུ་ཚབ་དོན་གཅོད་དབུ་བཞུགས་ཐོག་ཚོགས་འདུ་ཚོགས་ཏེ། གཅིག་གྱུར་གྱི་སློབ་དེབ་ཅིག་བཟོ་རྒྱུ་ཐག་གིས་བཅད་ནས་སྡེ་ཚན་གསུམ་དུ་བགོས་པ་རེད། སྔོན་འགྲོ་དང་པོ་གཉིས་པ་སྡེ་ཚན་གཅིག་དང་། གསུམ་པ་བཞི་པ་ལྔ་པ་སྡེ་ཚན་གཅིག དྲུག་པ་བདུན་པ་བརྒྱད་པ་སྡེ་ཚན་གཅིག་བཅས་སྡེ་ཚན་གསུམ་དུ་ཚོགས་ཆུང་ཆ་བསྒོས་བྱས་ཏེ། བྱང་ཨ་རིའི་དགེ་རྒན་ཉམས་མྱོང་ཅན་མང་པོ་ཞིག་མཉམ་རུབ་བྱས་ཏེ་སློབ་དེབ་དེ་དག་རྩོམ་སྒྲིག་གནང་བ་རེད། མཐའ་མའི་གཏན་འབེབས་དེ་ཤེས་རིག་ལས་ཁུངས་ཀྱིས་གནང་རྒྱུའི་ཐག་གཅོད་བྱུང་བ་ལྟར། ༢༠༡༣ ལོར་ཨ་རིའི་དོན་གཅོད་ཡོད་སར་ཚོགས་འདུ་ཚོགས་ཏེ། ཚོགས་ཆུང་ཁག་གིས་བཟོས་པའི་སློབ་དེབ་ཁག་ལ་གོ་བསྡུར་གནང་བ་རེད། སྐབས་དེར་ཤེས་རིག་ལས་ཁུངས་ཀྱི་མི་སྣའང་ཡོད་པ་རེད།”
“སློབ་དེབ་དེའི་སྡེ་ཚན་དང་པོའི་དམིགས་ཡུལ་སྐད་བསླབ་རྒྱུ་དང་། གཉིས་པ་ཀློག་སྟངས་བསླབ་རྒྱུ། གསུམ་པ་འབྲི་སྟངས་བསླབ་རྒྱུ་དེ་གསུམ་མ་གཏོགས་བོད་པའི་ཆོས་དང་རིག་གཞུང་། བརྡ་སྤྲོད་བསླབ་རྒྱུ་སོགས་ཀྱི་རེ་བ་གང་ཡང་བརྒྱབ་ཡོད་པ་མ་རེད། ཕར་ཕྱོགས་ཀྱི་གནས་བབ་ཐོག་ནས་ཀྱང་རེ་བ་རྒྱག་ས་ཡོད་པ་མ་རེད། ལོ་གཅིག་ལ་ཆུ་ཚོད་ ༤༡ གི་སློབ་ཐུན་མ་གཏོགས་ཡོད་པ་མ་རེད་ལ། དུས་ཚོད་དེའི་ནང་ཟློས་གར་དང་ནང་ཆོས་ངོ་སྤྲོད་སོགས་ཀྱང་ཡོད་པ་རེད།”
“སློབ་དེབ་དེ་དག་ལ་ཤོག་ངོས་ ༦༠༩ ཡོད་པ་ལས་བོད་པའི་བརྡ་སྤྲོད་དང་མཐུན་གྱི་མེད་པའི་ཤོག་ངོས་ ༩ ཙམ་ལས་ཡོད་པ་མ་རེད། བརྡ་སྤྲོད་དང་མཐུན་པའི་ཤོག་ངོས་ ༦༠༠ ཡོད་པ་རེད། དེ་བརྒྱ་ཆར་བཀུག་ན་བརྒྱ་ཆ་༡།༥༠ ཙམ་མ་འགྲིག་པ་དང་། བརྒྱ་ཆ་ ༩༨།༥༠ འགྲིག་པ་ཆགས་ཡོད་པ་རེད། འདས་པའི་ལོ་ ༢༠ རིང་གང་ཡང་མ་བྱས་ན་བཤད་མཁན་ཡོད་པ་མ་རེད། ༧གོང་ས་མཆོག་གིས་ག་ཚོད་ཅིག་བྱས་ན་དེ་ཙམ་ཞིག་བཤད་རྒྱུ་མང་པོ་ཡོད་པ་རེད་གསུངས་པ་དེ་ང་ཚོའི་ལས་བྱེད་ཚོའི་སེམས་ནང་བཟུང་བསྡད་ཡོད།”
“གནད་དོན་དེའི་སྐོར་སྤྱི་ཚོགས་དྲ་རྒྱའི་ནང་གླེང་སློང་མང་པོ་བྱུང་བ་ཁག་ང་ཚོས་ཕྱོགས་བསྒྲིགས་བྱས་ཏེ་ཉར་བསྡད་ཡོད། ང་ཚོ་བོད་སྐད་ཡིག་རྩ་མེད་བཟོ་མཁན་རེད་ཟེར་བ་དང་། རྒྱ་མི་ལས་སྡུག་པ་རེད་ཟེར་བ་སོགས་ཡོང་གི་འདུག ཡིན་ནའང་གྲོས་ཚོགས་འདི་ལྟ་བུའི་ནང་དུ་རྒྱ་མི་ལས་སྡུག་པ་འདུག་ཟེར་ན་ངོས་ལེན་བྱེད་ཐབས་རྩ་བ་ནས་ཡོད་པ་མ་རེད། ངས་ཤེས་རིག་བཀའ་བློན་གྱི་མིང་ཞིག་འཁྱེར་བསྡད་ཡོད་པ་རེད། འགྲིག་གི་མེད་ན་ང་རང་རེད། རྒྱ་མི་ལས་སྡུག་པ་ཡིན་ན་ངས་ད་ལྟ་རང་དགོངས་པ་ཞུ་ཆོག་ཆོག་ཡོད། ངས་ཀྱང་ཤེས་རིག་ལས་ཁུངས་ཀྱི་འགན་ཆེན་པོ་འདི་ལྟ་བུ་ཞིག་བློས་འགན་བཟོད་ཀྱི་མི་འདུག” ཅེས་སོགས་གསུངས་པ་དང་འབྲེལ་ཏེ། བོད་ཀྱི་བང་ཆེན་ནང་དུ་ང་ཚོའི་སློབ་དེབ་དེར་སྔགས་བརྗོད་བྱེད་མཁན་ཡོད་ཚུལ་དང་། བྱང་ཨ་རིའི་སློབ་དེབ་དེ་དག་ད་ལྟའི་ཆར་ཚོད་ལྟ་ཡིན་སྐོར་སོགས་གསུངས་སོང་།
གཞན། སྤྱི་འཐུས་རེ་གཉིས་ཤིག་གིས་དྷ་ཤོད་དཔེ་སྟོན་སློབ་གྲྭ་དེ་བོད་གཞུང་དམངས་གཉིས་ཀྱིས་རེ་བ་རྒྱག་ས་ཞིག་དང་། ལྷག་པར་དུ་བཀའ་ཤག་སྐབས་སྔ་མའི་བཀའ་ཁྲི་ཟམ་གདོང་རིན་པོ་ཆེ་མཆོག་གིས་བུ་ཕྲུག་བཞིན་སྐྱོང་བའི་སློབ་གྲྭ་ཞིག་ཆགས་ཡོད་ཀྱང་། ད་ལྟའི་ཆར་སློབ་གྲྭ་དེའི་འཛིན་ཁང་དང་ཉལ་ཁང་། རྩེད་ཐང་སོགས་ཧ་ཅང་སྐྱོ་བོ་ཡིན་ཚུལ་བརྗོད་པའི་ལན་དུ། ཤེས་རིག་བཀའ་བློན་མཆོག་གིས། དྷ་ཤོད་དཔེ་སྟོན་སློབ་གྲྭའི་གནས་སྟངས་སྐྱོ་བོ་ཡིན་པ་དངོས་ཡོད་ཡིན་ཡང་། སྔོན་ཆད་ཤེས་རབ་དགའ་ཚལ་སློབ་གླིང་གི་སློབ་ཕྲུག་ཉུང་ཕྱིན་པ་དང་བསྟུན་ཏེ། དཔེ་སྟོན་སློབ་གྲྭ་ཤེས་རབ་དགའ་ཚལ་སློབ་གླིང་དུ་གནས་སྤོ་བྱ་རྒྱུའི་འཆར་གཞི་བཏིང་ཡང་། ཤེས་རབ་དགའ་ཚལ་སློབ་གླིང་གི་སློབ་ཕྲུག་ཚོས་མོས་མཐུན་གནང་མེད་པ་སོགས་གནས་སྟངས་འདྲ་མིན་འོག་གནས་སྤོ་བྱེད་ཐུབ་མེད་པ་དང་། རྩ་བའི་དཔེ་སྟོན་སློབ་གྲྭར་སློབ་ཕྲུག་ཉུང་ཉུང་ཡིན་སྟབས་སྡེ་ཚན་མང་པོར་དགར་ན་འཛིན་སྐྱོང་བྱེད་པར་ཡང་དཀའ་ངལ་ཡོད་སྟབས། ད་ལྟ་དཔེ་སྟོན་སློབ་གྲྭའི་སྔོན་འགྲོ་ནས་འཛིན་རིམ་གསུམ་པའི་བར་གངས་སྐྱིད་སློབ་གྲྭ་དང་། འཛིན་རིམ་བཞི་པ་ནས་བརྒྱད་པའི་བར་དྷ་ཤོད་སློབ་གྲྭ། འཛིན་རིམ་དགུ་བ་བཅུ་བ་གཉིས་མི་དགོས་པ་བྱས་ཏེ་ཅོན་ཏ་ར་སམ་བྷོ་ཊ་སློབ་གྲྭའི་ཁོངས་སུ་ཟླ་སྒྲིལ་བཏང་སྟེ། དཔེ་སྟོན་སློབ་གྲྭ་དེ་འབྲིང་རིམ་སློབ་གྲྭར་བསྒྱུར་རྒྱུའི་འཆར་གཞི་བཀའ་ཤག་ལ་ཕུལ་བར་བཀའ་ཤག་གིས་ཀྱང་བཀའ་འཁྲོལ་གནང་ཡོད་སྟབས། ༢༠༡༧ ལོ་ནས་ལག་ལེན་བསྟར་རྒྱུ་ཡིན་སྐོར་སོགས་བརྗོད་སོང་།
རྒྱ་དམར་གྱིས་རིག་གསར་སྐབས་བོད་ཡིག་རྩ་མེད་བཟོ་བའི་སྲིད་ཇུས་ལག་སྟར་བྱས་པ་དང་གཅིག་མཚུངས་རེད།
གང་ལྟར་རྒྱ་གར་ནང་བོད་ནས་གསར་དུ་ཡོན་མཁན་ཉུང་ཉུང་རེད་ལ་ཞི་ཆགས་ཁག་ལ་ཕྲུ་གུ་སྐྱེས་མཁན་དེ་བས་ཉུང་ཉུང་རེད་གཞོན་ནུ་གང་ཡོད་ཕྱི་རྒྱལ་ཡུལ་གྲུ་གང་གསར་འགྲོ་བ་དང་བོད་མིའི་སྒྲིགས་འཛུགས་འོག་ཡོད་པའི་སློབ་གྲ་ཁག་ལ་སློབ་ཞུགས་ལོ་རེ་ནས་ལོ་རེར་ཉུང་དུ་འགྲོ་གི་ཡོད་ གང་ལྟར་བྱེད་སྟངས་ལས་སྟངས་འགྲོ་སྟངས་བཤད་སྟངས་སོགས་ལ་ལྟས་ན་རེ་བ་དང་ཡིད་མཆེད་ག་ཚོད་ཙམ་དང་མ་འོངས་བོད་ཀྱི་སྐད་ཡིག་རིགས་གཞུང་དེའི་ལས་དབང་ཇི་ལྟར་གནས་སམ་
༢༠༡༦/༠༩/༢༧ ༡༡:༤༣:༡༢
ད་ལྟའི་བཀའ་ཤག་གིས་བོད་ཀྱི་རིག་གནས་ཀྱི་སྲོག་རྩ་སྐད་ཡིག་ལ་ཐོག་ལ་དོ་སྣང་དང་མཐོང་ཆུང་བྱེད་པ་ནི། འཛིན་རིམ་བཅུ་གཉིས་ཀྱི་སྲིད་སྐྱོང་གཟེངས་བརྟགས་སྤྲོད་ཚུལ་དེ་ནས་རྟོག་ཐུབ། མ་ཟད་ཟམ་གདོང་རིན་པོ་ཆེའི་ཆ་གཞི་དཔེ་སྟོན་སློབ་གྲར་རྒྱ་བསྐྱེད་དང་། ཡར་རྒྱས་གཏོང་རྒྱུ་ཕར་ཞོག། ད་ལྟ་བར་དུ་ཉལ་ཁང་དང་འཛིན་ཁང་དགེ་རྒན་གྱི་ལས་ཤག་སོགས་གང་ལ་ཡང་བཀའ་གཤག་སྡོན་མ་དང། ད་ལྟ་གཉིས་ཀྱི་ཡར་རྒྱས་གང་ཡང་གཏང་མེད། མ་ཟད་ཕྲུག་གུའི་ཞལ་ལག་དེ་སྔ་མ་ཟམ་གདོང་རིན་པོ་ཆེའི་སྐབས། ཕྲུག་གུའི་འཕྲོད་རྟེན་དང་ཚར་ལོངས་སོགས་ལ་དགོངས་པ་ཆེར་བཞེས་ཀྱིས། རྫས་ལུས་མེད་པའི་སྲོལ་རྒྱུན་གྱི་འབྲུ་རིགས་དང་སྔོ་ཚལ་སོགས་གནང་གི་ཡོད་ཀྱང་། དེ་ལྟར་གནང་རྒྱུ་ཕར་ཞོག ད་ལྟ་ཕྲུག་གུའི་གྲོད་པ་མ་འབྲང་བའི་དཀའ་ངལ་ཡོད།། ད་ཡིན་ན་ཡར་རྒྱས་གཏོང་བའི་དུས་ལ་བབ་ཡོད། སྐད་ཆ་སྐམ་པོ་ཀྱང་ཀྱང་མ་གཤོད། ལག་ལེན་གྱིས། ལག་ལེན་གྱིས། ཡར་རྒྱས་གཏོང་། ཡར་རྒྱས་གཏོང་།།།
གང་ལྟར་བོད་ཀྱི་བརྡ་སྤྲོད་གཞུང་དང་མཐུན་པ་བྱས་ནས་འགྲོ་དགོས་རེད་མ་གཏོགས་དེ་མིན་རང་སྣང་གང་ཤར་བྱས་ཏེ་སོང་ན་ཉིན་ཞིག་བོད་མི་ནང་ཁུལ་དབར་ལའང་ཡིག་ཐོག་ནས་གོ་བརྡ་སྤྲོད་མི་ཐུབ་པའི་དུས་ངན་ཞིག་ཡོང་སྲིད་པ་རེད། བྱང་ཨ་རིའི་སློབ་ཕྲུག་ཚོར་སུམ་རྟགས་གཞུང་གཞིར་བཞག་ཐོག་ཀློག་དེབ་གོ་བདེ་དང་སླ་བོ་ཞིག་བཟོ་ཐུབ་ངེས་རེད།
སྒེར་གཅོད་དབང་ཤེད་ཅན་ཚོས་ངོས་ལེན་ཡོད་ཀྱང་མེད་ཀྱང་རྒྱ་དམར་གྱིས་རིག་གསར་སྐབས་བོད་ཡིག་རྩ་མེད་བཟོ་བའི་སྲིད་ཇུས་ལག་སྟར་བྱས་པ་དང་གཅིག་མཚུངས་རེད་ཟེར་མཁན་བོད་ནང་ཁུལ་གྱི་རིག་ཞེན་ཅན་རྣམ་པའི་ནང་ན་མང་པོ་འདུག