སྲིད་སྐྱོང་དང་སྤྱི་འཐུས་གཉིས་ཀྱིས་རྩོད་པ་བརྒྱབ།

ཐེངས་འདིའི་གྲོས་ཚོགས་ནང་སྤྱི་འཐུས་ཐུབ་བསྟན་ལུང་རིགས་ལགས་ཀྱིས། ཐེངས་སྔོན་མའི་གྲོས་ཚོགས་ནང་སྲིད་སྐྱོང་བློ་བཟང་སེང་གེ་མཆོག་གིས་གྲོས་ཚོགས་ལ་དབུ་སྐོར་བཏང་ཡོད་སྐོར་དང་། གནང་སྟངས་རེ་ཟུང་གྲོས་ཚོགས་ཀྱི་ཚོགས་འདུའི་འགྲོ་ལུགས་ཀྱི་སྒྲིག་གཞི་དང་འགལ་ཡོད་པ་བཅས་གནད་དོན་གཉིས་ཀྱི་ཐོག་གསལ་བཤད་གནང་སོང་།

ཟླ་འདིའི་ཚེས་ ༢༨ ཉིན་གྱི་ཕྱི་དྲོར་སྤྱི་འཐུས་གྲོས་ཚོགས་ནང་། སྤྱི་འཐུས་ཐུབ་བསྟན་ལུང་རིགས་ལགས་ཀྱིས་སྤྱི་འཐུས་སྒེར་གྱི་གསལ་བཤད་ཀྱི་གོ་སྐབས་བླངས་ཏེ། གནད་དོན་གཉིས་ཀྱི་ཐོག་གསལ་བཤད་གནང་ཡོད་པ་ནི། དང་པོ། ད་ལོའི་ཕྱི་ཟླ་ ༦ པའི་ནང་གི་གྲོས་ཚོགས་ཚོགས་དུས་དང་པོའི་སྟེང་། སྲིད་སྐྱོང་མཆོག་གིས་བཀའ་བློན་འོས་མི་རྣམས་མཚན་འདོན་གནང་སྐབས། ཐུབ་བསྟན་ལུང་རིགས་ཁོ་རང་དང་སྤྱི་འཐུས་ཁག་ཅིག་གིས་ལས་རིམ་རྣམ་བཞག་བཏོན་ཏེ། བཀའ་བློན་འོས་མི་དེ་དག་ལ་དཔྱ་དངུལ་ལག་དེབ་འཐུས་ཚང་ཡོད་མེད་དང་། བཀའ་ཤག་སྐབས་སྔ་མ་དག་གིས་བཀའ་བློན་འོས་མི་འདོན་སྐབས་འོས་མི་རེ་རེའི་ལོ་རྒྱུས་གྲོས་ཚོགས་ནང་བཀྲམ་ཡོད་སྟབས་ད་རེས་སྔར་སྲོལ་ལྟར་གནང་ན་ལེགས་ཚུལ་བརྗོད་ཀྱང་། རྗེས་ལ་སྲིད་སྐྱོང་མཆོག་གིས་བཀའ་ཤག་གི་གསལ་བཤད་དང་བསྟུན་ཏེ་ཐེངས་འདིར་གྲོས་ཚོགས་ནང་བཀའ་བློན་འོས་མི་མཚན་འདོན་བྱེད་སྟངས་དེ་བཀའ་ཤག་སྐབས་བཅུ་གཉིས་བཅུ་གསུམ། བཅུ་བཞི་སོགས་དང་གཅིག་པ་གཅིག་རྐྱང་ཡིན་སྐོར་གསུངས་པ་དེ་བདེན་པ་མིན་པའི་ཁུངས་སྐྱེལ་གནང་ཡོད་པ་དང་། གནད་དོན་གཉིས་པ། སྲིད་སྐྱོང་གིས་གྲོས་ཚོགས་ནང་དུ་སྤྱི་འཐུས་ཚོགས་གཙོར་འབུལ་དགོས་པའི་ཡིག་ཆ་རིགས་ཚོགས་དྲུང་མི་བརྒྱུད་པར། ཐད་ཀར་ཚོགས་གཙོའི་གསོལ་ཅོག་སྟེང་བཞག་པ་དེ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞི་དང་འགལ་འདུག་ལབ་པ་དེར། རྗེས་ལ་སྲིད་སྐྱོང་གིས་གསལ་བཤད་གནང་བ་དེ་ཁོ་རང་གིས་ལབ་པའི་གནད་དོན་དེའི་གསལ་བཤད་ཆགས་མེད་སྐོར་སོགས་བརྗོད་སོང་།

ད་ལོའི་ཕྱི་ཟླ་ ༦ ཚེས་ ༡ ཉིན་གྱི་སྔ་དྲོར་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དང་པོའི་སྟེང་། སྲིད་སྐྱོང་མཆོག་གིས་གྲོས་ཚོགས་ནང་ཡིག་ཆ་གང་ཡང་མ་བཀྲམ་པར། ཐད་ཀར་ཡར་བཞེས་ཏེ་བཀའ་བློན་འོས་མི་མཚན་འདོན་གནང་རྩིས་བྱེད་སྐབས། སྤྱི་འཐུས་གསེར་རྟ་ཚུལ་ཁྲིམས་ལགས་ཀྱིས་ལས་རིམ་རྣམ་བཞག་བཏོན་ཏེ། “ནམ་རྒྱུན་བཀའ་བློན་འོས་འདེམས་བྱེད་དུས། ཡིག་ཆ་གྲོས་ཚོགས་ནང་ཆ་ཚང་འགྲེམ་གྱི་ཡོད་པ་རེད། དེར་བརྟེན། དེ་རིང་མ་བཀྲམ་ནས་འགྲེལ་བཤད་རྒྱག་གི་ཡོད་དུས་ང་ཚོར་ཡང་བསམ་བློ་གཏོང་རྒྱུ་ལ་ཁྱད་པར་ཞིག་འདུག དེར་བརྟེན། རྒྱུན་སྲོལ་ལྟར་གནང་རོགས་གནང་།” ཞེས་བརྗོད་ཡོད།

དེའི་རྗེས་ལ་སྤྱི་འཐུས་དགེ་བཤེས་སྨོན་ལམ་ཐར་ཕྱིན་ལགས་ཀྱིས་ཀྱང་ལས་རིམ་རྣམ་བཞག་བཏོན་ཏེ། “དཔལ་ལྡན་ཚོགས་གཙོ་མཆོག་གིས་བཀའ་གནང་བ་དེ་ལས་རིམ་རྣམ་བཞག་ལ་ངོས་ལེན་བྱས་པ་ཡིན་ནམ། མ་བྱས་པ་ཡིན་གསལ་བོ་ཤེས་མ་སོང་། ང་ཚོ་སྐབས་བཅུ་བཞི་པའི་གྲོས་ཚོགས་ནས་བཟུང་སྟེ་ཡོང་བ་རེད། དེ་དུས་གནང་གི་འདུག་ལ། གནང་བའི་ཡིག་ཆ་དེ་ཆ་ཚང་ཞིག་ང་ཚོའི་ལག་པར་ཡོད་པ་རེད། དེ་རིང་འདི་འདྲ་ཆགས་ཀྱི་ཡོད་པ་ཧ་གོ་མ་སོང་། འདིའི་ནང་དུའང་བཅའ་ཁྲིམས་དོན་ཚན་ཉི་ཤུ་རྩ་གཉིས་པའི་དགོངས་དོན་བཞིན་བཀའ་ཤག་སྐབས་བཅོ་ལྔ་པའི་བཀའ་བློན་བསྐོ་བཞག་སྩལ་རྒྱུའི་འོས་གཞིའི་མཚན་དང་ལོ་རྒྱུས་བཅས་འདི་མཉམ་འབུལ་ལམ་ཞུས་ཡོད་པ་བཀའ་བློན་འོས་གཞིར་མོས་མཐུན་གནང་སྐྱོང་ཡོང་བ་ཞུ། ཞེས་གསུངས་འདུག་པ་འདི་ཚོགས་གཙོ་ཚོགས་གཞོན་གཉིས་གཅིག་པོ་ལ་བཀའ་བློན་མོས་མཐུན་གནང་རོགས་ཞུ་བཞིན་ཡོད་རྒྱུ་མ་རེད། གྲོས་ཚོགས་ཆ་ཚང་ལ་ཞུ་བཞིན་ཡོད་དུས་གྲོས་ཚོགས་ཆ་ཚང་ལ་ཡིག་ཆ་དེ་དགོས་པ་རེད་མ་གཏོགས། དེ་མེད་ན་འགྲོ་ཐབས་རྩ་བ་ཉིད་ནས་ཡོད་པ་མ་རེད། ཕར་ནས་གསུང་ད་གསུང་གི་རེད། ང་ཚོས་གོ་ད་གོ་གི་རེད་དེ། སོ་སོའི་མདུན་ལ་ཡིག་ཆ་ཡོད་དུས་དེ་ལ་ལྟ་ས་ཞིག་དང་ཁྱད་པར་ཞིག་འགྲོ་གི་རེད། ད་ལྟའི་བར་དུ་གནང་བསྡད་ཡོད་པ་རེད། ངས་ཤེས་ཀྱི་ཡོད། དེ་གསལ་བོ་གསལ་རྐྱང་ཞུ་བཞིན་ཡོད།”ཅེས་བརྗོད་ཡོད།

སྐབས་དེར་སྤྱི་འཐུས་ཚོགས་གཙོ་མཆོག་གིས་བཀའ་བློན་འོས་མིའི་མཚན་དང་ལོ་རྒྱུས་གྲོས་ཚོགས་ནང་བཀྲམ་པའི་ལམ་སྲོལ་མེད་སྐོར་གསུངས་པ་དང་འབྲེལ་ཏེ། གོང་གི་ལས་རིམ་རྣམ་བཞག་དེ་གཉིས་ངོས་ལེན་མེད་པའི་ཐག་གཅོད་གནང་རྗེས། སྲིད་སྐྱོང་མཆོག་གིས་བཀའ་བློན་འོས་མི་དང་པོ་དངོས་གྲུབ་ཚེ་རིང་མཆོག་མཚན་འདོན་དང་སྦྲགས་ཏེ། ཁོང་གི་ལོ་རྒྱུས་སྙིང་བསྡུས་ཡིག་ཐོག་ནས་སྒྲོགས་སྦྱང་གནང་རྗེས། དགག་བྱ་ཡོད་མེད་ལ་ལྟ་སྐབས་སྤྱི་འཐུས་ཁག་ཅིག་གིས་དགག་པ་བརྒྱབ་ཡོད།

སྐབས་དེར་སྤྱི་འཐུས་ཐུབ་བསྟན་ལུང་རིགས་ལགས་ཀྱིས་བརྗོད་དོན། “དང་པོ་དེར། ངས་གོ་མེད་ན་གང་ཤེས་མ་གཏོགས། གཞན། དཔྱ་དངུལ་ལག་དེབ་ཡོད་མེད་གསུངས་མ་སོང་བསམ་སོང་། དུས་རྒྱུན་ཡིན་ན་དཔྱ་དངུལ་ལག་དེབ་ཡོད་དང་མེད། ད་ལྟའི་བར་དུ་འབུལ་ཆད་ཡོད་དང་མེད་དེ་དུས་རྒྱུན་ཆ་རྐྱེན་ནང་ལ་གསུང་གི་ཡོད་པ་རེད། དེ་ནས་དགག་པ་ཞུ་དོན་དེ་ཆུ་མ་ཡོང་གོང་གི་ཆུ་རག་གི་ཚུལ་འདྲ་བོ་ཡིན། འདས་པའི་ཉམས་མྱོང་ལ་ཞུགས་ནས། རེ་བ་བཟང་སར་རྒྱག་དགོས་པ་རེད་དེ། ཡིན་ནའང་མ་འོངས་པར་འབྱུང་བའི་ངེས་པ་ཡོད་པ་མ་རེད་དེ། གལ་སྲིད་སྐྱོན་ཆ་དེ་འདྲ་ལྷག་པ་ཡིན་ན། དེ་གྲོས་ཚོགས་ནང་ནས་སྤྱི་མོས་བཏང་བ་རེད་ཅེས་གྲོས་ཚོགས་ལ་འགན་དེ་མ་བསླེབ་པའི་ཆེད་དུ་ཡིན། འདས་པའི་གནས་སྟངས་ནང་ལ་དེ་གྲོས་ཚོགས་ཀྱི་འགན་རེད། གྲོས་ཚོགས་ཀྱིས་དེ་དུས་གནང་ཡོད་པ་མ་རེད། ཟེར་བའི་གནས་ཚུལ་དེ་འདྲ་མང་པོ་ཞིག་སྤྱི་ཚོགས་ནང་ཐོན་ཡོད་པ་རེད། དེ་མི་ཡོང་བའི་ཆེད་དུ་སྤྱི་མོས་ལ་འགྲོ་རྒྱུར་དགག་པ་བརྒྱབ་པ་ཡིན།” ཞེས་བརྗོད་སོང་།

དེའི་རྗེས་སྲིད་སྐྱོང་མཆོག་གིས་འགྲེལ་བཤད་གནང་དོན། “དཔལ་ལྡན་ཚོགས་གཙོ་མཆོག སྐབས་བཅུ་བཞི་པའི་བཀའ་བློན་རྣམ་པའི་འོས་མི་འཁུར་ཡོང་བའི་སྐབས་ལ་ཡིག་ཐོག་ནས་ཞུ་ཡག་དང་ངག་ཐོག་ནས་ཞུ་ཡག་དེ་ག་རང་འགྲོ་ཡོད་ཞུ་རྒྱུ་ཡིན། མཐའ་མ་དེར། བཅའ་ཁྲིམས་དོན་ཚན་ཉེར་གཅིག་པར་གསལ་བའི་བཀའ་བློན་གྱི་འོས་ཆོས་ཡོངས་རྫོགས་འཚང་ཡོད། གཞི་རྩའི་དཔྱ་ཁྲལ་ལག་དེབ་ཡོད་དང་མེད་ཁོ་རང་ཚོར་བཀའ་འདྲི་གནང་བའི་ཐོག་ནས་ཆ་རྐྱེན་ཆ་ཚང་འཚང་ཡོད།” ཅེས་གསུངས་སོང་།

ཕྱི་ཟླ་ ༦ ཚེས་ ༡ ཉིན་བཀའ་བློན་བདུན་འོས་འདེམས་གནང་རྗེས་ཚེས་ ༢ ཉིན་གྱི་སྔ་དྲོར་བདམས་འཐོན་བཀའ་བློན་རྣམ་པས་བོད་མིའི་སྒྲིག་འཛུགས་ཆེས་མཐོའི་ཁྲིམས་ཞིབ་ཁང་གི་ཁྲིམས་དཔོན་ཆེན་མོའི་མདུན་ནས་དམ་འབུལ་ཞུས་ཡོད་ཀྱང་། ཉིན་དེའི་ཕྱི་དྲོར་གསར་འགྱུར་བརྒྱུད་ལམ་ཏུ། ཤར་གླིང་བསྟན་འཛིན་ཟླ་སྒྲོན་བཅའ་ཁྲིམས་ཀྱི་དགོངས་དོན་ལྟར། རང་ལོ་ ༣༥ ཧྲིལ་བོ་ཚང་ཡོད་མེད་ཀྱི་གནས་ཚུལ་ཐོན་ཡོད་སྟབས། དྷ་རམ་ས་ལའི་བོད་པའི་གསར་འགོད་པ་ཚོས་སྲིད་སྐྱོང་དང་བསྟན་འཛིན་ཟླ་སྒྲོན་གཉིས་ལ་འབྲེལ་བ་ཞུས་ཀྱང་བཅར་འདྲི་དང་ལེན་གནང་མེད།

ཕྱི་ཚེས་ ༣ ཉིན་གྱི་ཞོགས་པར་གྲོས་ཚོགས་ཚོགས་ཐུན་དང་པོ་དབུ་འཛུགས་གནང་མ་ཐག སྲིད་སྐྱོང་མཆོག་གིས་གསལ་བཤད་གནང་དོན། “དགོངས་སེལ་དང་སྦྲགས་ཞུ་རྒྱུ་ཞིག་ལ། མ་གཞི་འདིིའི་སྔོན་ལ་གླེང་སློང་བྱུང་ཚར་སོང་། ད་ལྟ་ཆར་བཀའ་བློན་གཅིག་འདིར་གྲོས་ཚོགས་སུ་ཕེབས་ཐུབ་མེད་པ་ཚང་མས་གཟིགས་ཡོད་པ་རེད། གཞི་རྩའི་ཁོ་རང་གི་སྐྱེས་ཚེས་དང་འབྲེལ་བའི་ཐོག་ནས་ལོ་ངོ་ ༣༥ ཟིན་པ་ལ་ཟླ་བ་གསུམ་ལྷག་ཅིག་གི་མ་འདང་པའི་གནས་སྟངས་ཐོག་ནས། གཞི་རྩའི་ཁྲིམས་ཞིབ་ཁང་ལའང་ད་ནིང་ཞོགས་པར་ཁོ་རང་གི་དཔྱ་ཁྲལ་ལག་དེབ་དང་སྐྱེས་ཚེས་དང་འབྲེལ་བའི་ཡིག་ཆ་ཁག་ཆ་ཚང་ཕུལ་གྲུབ་ཡོད། དེ་བཞིན་བཀའ་ཤག་ནང་དུའང་བཀའ་བསྡུར་གནང་སྟེ། ད་ལྟའི་བཀའ་བློན་གྱི་ལས་གནས་ནས་བཀའ་ཤག་གིས་ཁོང་ཕྱིར་འཐེན་བྱས་པ་ཡིན། དེ་ཁ་སང་གོང་ནས་ཞུས་པ་བཞིན་རེད། བཀའ་བློན་བསྐོ་བ་ཡིན་ན་གསང་བའི་ཐོག་ནས་གནང་དགོས་པ་རེད། ཉི་མ་དང་པོར་ཞུས་པ་བཞིན་རེད། གཟའ་ཟླ་བའི་ཕྱོགས་པ་ཆུ་ཚོད་བཅུ་གཅིག་གཡས་གཡོན་ནས་བཀའ་བློན་འོས་མི་རིམ་པར་འབྲེལ་བ་ཞུས་པ་ཡིན། ཆ་རྐྱེན་གཉིས་སྟེ། ༧གོང་ས་མཆོག་གི་བཀའ་དགོངས་གཞིར་བཟུང་དང་། དབུ་མའི་ལམ་གཞིར་བཟུང་ཕྱག་ལས་གནང་དགོས་པ་རེད་ཅེས་ཞུས་པ་དང་སྦྲགས། དོ་བདག་ཁོ་རང་ལ། ཁྱེད་རང་གི་སྐྱེས་ལོ་ག་འདྲ་རེད་ཅེས་དྲིས་དུས་སྒང་ལ། ཕྱི་ལོ་ ༡༩༨༡ རེད་གསུངས་ཡོང་དུས་སྐབས་ལ། ང་ཚོས་ཧོབ་སྟེ་བསམ་བློ་བཏང་ན་རང་ལོ་ ༣༥ འཚང་འདུག་དགོངས་པ་རེད། དོ་བདག་ཡིན་ནའང་ཐོག་རྒྱག་གོབ་རྒྱག་ལ་བཀའ་བློན་དུ་བསྐོས་ཡོང་དུས་སྐབས་ལ། བཀའ་བློན་གནང་རྒྱུ་སོགས་དགོངས་པ་མང་པོ་ཞིག་བཞེས་པའི་ཐོག་ནས་ཁ་གསལ་བོ་མ་ཆགས་པར་འདི་ལྟར་ལྷག་པ་ཞིག་རེད། དེར་བརྟེན། དགོངས་སེལ་ཞུ་བ་དང་སྦྲགས་གྲོས་ཚོགས་ལ་དབུ་སྐོར་ཞུས་བཞག་པ་རྩ་བ་ནས་མེད། དེ་ལྟར་ལྷག་སོང་བ་ཞིག་རེད་ཅེས་ཞུ་རྒྱུ་ཡིན། དེར་བརྟེན། ཁོང་བཀའ་བློན་གྱི་ལས་གནས་ནས་ཕྱིར་འཐེན་བྱས་པར་ངོས་འཛིན་གང་རོགས་གནང་།” ཞེས་གསུངས་སོང་།

ཉིན་རྒྱབ་འོས་བསྡུ་ལྷན་ཁང་གི་སྒྲིག་གཞི་བསྐྱར་བཅོས་ཐོག་བགྲོ་གླེང་དང་བསྟུན་ཏེ། སྤྱི་འཐུས་ཐུབ་བསྟན་ལུང་རིགས་ལགས་ཀྱིས་གསུངས་དོན། “དེ་ནས་བཀའ་བློན་འོས་གཞི་འདོན་སྟངས་འདིའི་སྒང་ལ་ཡིན་ནའང་། གསལ་བོ་ཞིག་བཟོ་དགོས་ཀྱི་འདུག བཅའ་ཁྲིམས་དང་སྒྲིག་གཞིའི་ནང་དུ་དོན་ཚན་ ༢༡ པ་དེ་རེ་རེ་བཞིན་འཚང་ལུགས་གསལ་བཤད་དང་སྦྲགས་ནས། འདེམས་འཐོན་བྱེད་དགོས་པའི་གནས་ཚུལ་ཞིག་ཡོད་པ་རེད། ཡིན་ནའང་ང་ཚོས་དེ་བྱུང་ཡོད་པ་མ་རེད། གོང་དུ་གྲོས་ཚོགས་ལ་དབུ་སྐོར་ཞུས་མེད། ཁོ་ལྷག་སོང་བ་རེད་གསུངས་པ་རེད། ཡིན་ནའང་དེ་ལ་དག་ས་རེད་དམ། དག་ས་མ་རེད། ཁ་སང་ལས་རིམ་རྣམ་བཞག་དེ་བཏོན་པའི་སྐབས་ལ། དོན་ཚན་ ༢༡ པ་དེ་ཆ་ཚང་འཚང་ཡོད་ཅེས་ལན་ཁ་ཤས་གསུངས་ཏེ། རྒྱབ་སྐྱོར་གནང་རོགས་གསུངས་པ་རེད། འཚང་ཡོད་གསུངས་དུས་སྒང་ལ། ལྷག་ག་འདྲ་བྱས་ཏེ་སོང་པ་རེད། སྒྲིག་གཞི་ལ་ཐུགས་སྣང་ཁྱོན་ནས་གནང་གི་མེད་པའི་མཐོང་སྣང་བྱུང་། ད་རེས་འདི་ལྟ་བུར་ཆ་བཞག་ན། དོན་ཚན་ ༢༡ པའི་ནང་དུ་བོད་ཀྱི་ཡུལ་མི་ཟེར་བ་ཞིག་ཡོད་པ་རེད། དེའི་ནང་ལོ་ ༣༥ ཧྲིལ་བོ་ལོན་པ་ཞེས་འཁོད་ཡོད་པ་རེད། ཧྲིལ་བོ་ལོན་དང་མ་ལོན་ཟེར་བ་དེར་དམ་དོན་གནང་དགོས་པ་ཞིག་ཆགས་ཡོད་པ་རེད། ལྷག་པར་དུ་དཔྱ་དངུལ་གྱི་དེབ་དེ་དགོས་ཀྱི་འདུག་ཟེར་དུས་དེ་གནང་བཞག་པ་ཡིན་ན། ད་ལྟའི་རྙོག་དྲ་འདི་ཡོད་པ་མ་རེད། དཔྱ་དངུལ་ནང་དུ་སྐྱེས་ལོ་སྐྱེས་ཚེས་ཆ་ཚང་ཡོད་པ་རེད། དེ་དུས་རང་ནས་དོ་བདག་དགོངས་པ་ཞུ་མི་དགོས། ཁྲིམས་འགལ་གྱི་ལས་ཀ་དེའང་ཆགས་མི་དགོས། ཁྲིམས་ཞིབ་ཁང་གིས་ཀྱང་དམ་བཅའ་ཡར་བཞེས། མར་རྩིས་མེད་ཡིན་ཞེས་གསུངས་མི་དགོས། བཀའ་བློན་ཡར་བསྐོས། དེ་ནས་མར་ཕྱིར་འཐེན་བྱས་པ་ཡིན་ཞེས་གསུངས་མི་དགོས། འདྲ་ཆགས་པོ་དང་ཁྲིམས་དང་མཐུན་པ་ཡག་པོ་ཞིག་ཡོང་གི་ཡོད་པ་རེད། དེ་བྱུང་ཡོད་པ་མ་རེད། དེར་བརྟེན། བཅའ་ཁྲིམས་ནང་གི་དོན་ཚན་དེ་གཞི་ལ་བཞག་པའི་ཐོག་ནས་སྒྲིག་གཞིའི་ནང་ལ་སྣོན་པ་བཅུག་རྒྱུ་ཡོད་པ་རེད། དེ་འདྲ་ཡིན་དུས་བོད་ཀྱི་ཡུལ་མི་ཡིན་པ་དང་། རང་ལོ་ ༣༥ ཧྲིལ་བོ་ལོན་པ་ཟེར་བ་དེའི་དན་རྟགས་ལ་དཔྱ་དངུལ་ལག་དེབ་ཀྱི་ཤོག་ངོས་དང་པོ་དང་མཐའ་མ་དེ་མཉམ་དུ་འཁྱེར་དགོས་པ་དེ་ཚོ་སྒྲིག་གཞིའི་ནང་བཅུག་སྟེ། སྒྲིག་གཞི་བསྐྱར་བཅོས་བྱས་པ་ཡིན་ན། མ་འོངས་པར་དེ་འདྲའི་དཀའ་ངལ་ཆགས་ཀྱི་མ་རེད་བསམ་གྱི་འདུག” ཅེས་བརྗོད་སོང་།

ཁོང་གིས་མུ་མཐུད་དུ་གནད་དོན་གཉིས་པའི་ཐོག་གསུངས་དོན། “དེ་རིང་ཆ་བཞག་ན། རྣམ་པ་ཚང་མས་གཟིགས་ཡོད་རྒྱུ་རེད། དཔལ་ལྡན་སྲིད་སྐྱོང་མཆོག་གིས་ཡིག་ཀོག་གཉིས་ཚོགས་གཙོར་ཕུལ་སོང་། སྒྲིག་གཞིའི་ནང་ཚོགས་དྲུང་བརྒྱུད་ནས་མ་གཏོགས་གྲོས་ཚོགས་ནང་ཐད་ཀར་ཕུལ་ཆོག་གི་ཡོད་པ་མ་རེད། དེ་རིགས་ལ་ཐུགས་སྣང་གནང་དགོས་པ་རེད། སྒྲིག་གཞི་ཟེར་བ་དེ་ལག་པ་རྐང་པ་སྡོམ་སྤྱད་མ་རེད། ལས་ཀ་བྱེད་བདེ་བོ་ཆགས་རྒྱུ་དང་། མི་དེ་ལ་མ་འོངས་པར་ལབ་གླེང་མི་ཡོང་བ། སུ་ལ་ཡིན་ནའང་འགྲེལ་བཤད་བརྒྱབ་ཆོག་ཆོག་ཅིག སྒྲིག་གཞི་འདིའི་འོག་ནས་བྱས་པ་ཡིན། སྒྲིག་གཞི་འདི་དང་དེ་མཐུན་བསྡད་ཡོད། ཅེས་ཕར་ཕྱོགས་ནས་ཚུར་མཛུབ་མོ་འཛུགས་ས་མེད་པ་ཞིག་གི་དོན་དུ་ཡིན་སྟབས། ང་ཚོས་སྒྲིག་གཞི་དེ་རྐང་པ་ལག་པ་སྡོམ་སྤྱད་ཡིན་པའི་བཟོ་འདྲ་བོར་དགོངས་པ་མ་བཞེས་པའི་ཐོག་ནས་སྒྲིག་གཞི་ལ་ཐུགས་སྣང་གནང་དགོས་པ་དེ་གལ་ཆེན་པོ་འདུག་བསམ་སོང་།”ཞེས་བརྗོད་སོང་།

ཉིན་དེའི་ཕྱི་དྲོར་སྲིད་སྐྱོང་མཆོག་གིས་བཀའ་ཤག་གི་གསལ་བཤད་དང་འབྲེལ་ཏེ་གསུངས་དོན། “སྲིད་སྐྱོང་མཆོག་གིས་བཀའ་བློན་གྱི་འོས་མི་འཁུར་ཡོང་ཡག་དེ་འགྲིག་མ་སོང་། སྐྱེས་ཚེས་དགོས་པ་རེད། དཔྱ་ཁྲལ་ལག་དེབ་དགོས་པ་རེད་ཅེས་གསུངས་སོང་། བཀུར་འོས་སྤྱི་འཐུས་གཅིག་གིས། དེ་སྔ་ཡིག་ཆ་ནང་འཁོད་ཡོད་པ་རེད། དེ་སྔ་གསུངས་ཡོང་དུས། དེ་སྔ་བཀུར་འོས་སྤྱི་འཐུས་ཁོ་རང་བཀའ་ཤག་སྐབས་བཅུ་གཉིས་དང་བཅུ་གསུམ་ལ་བཀའ་བློན་གནང་མྱོང་མཁན་ཞིག་ཡིན་སྟབས། དེ་སྔ་ཡིག་ཆའི་ནང་དུ་ཡོད་པ་རེད། ཁྲིམས་དང་སྒྲིག་གཞི་ལ་དོ་སྣང་བྱེད་ཀྱི་མི་འདུག གཞི་རྩའི་བརྒྱུད་ལམ་ཁག་ཏུ་ཞུས་པ་ཡིན། ད་རེས་གྲོས་ཚོགས་ལ་གསུང་གི་ཡོད། ཅེས་གསུང་ཡོང་བའི་སྐབས་ལ། དེ་ལ་གསལ་བཤད་ཅིག་མ་བྱས་ན་འགྲིག་གི་མི་འདུག” ཅེས་དང་། “ ད་ལན་བཀའ་བློན་འོས་མིའི་ཆ་རྐྱེན་དང་ཡིག་ཆ་འཁུར་ཡོང་ཡག་དེ། དེ་སྔའི་བཀའ་ཤག་སྐབས་བཅུ་བཞི་པའི་སྐབས་ལ་འཁུར་ཡོང་བ་དེ་ག་རང་རེད། སྐབས་བཅུ་བཞི་པའི་སྐབས་ལ་བཀའ་བློན་འོས་མིའི་ཡིག་ཆ་དང་ཆ་རྐྱེན་འཁུར་ཡོང་བ་དེ་སྐབས་བཅུ་གསུམ་པའི་བཀའ་བློན་འོས་མི་ག་འདྲ་བྱས་ཏེ་འཁུར་ཡོང་འདུག དེ་ལ་བལྟས་ཏེ་བཟོས་བཞག་པ་ཞིག་རེད། སྐབས་བཅུ་གསུམ་པའི་བཀའ་བློན་འོས་མི་འཁུར་ཡོང་ཡག་དེ་སྐབས་བཅུ་གཉིས་པའི་བཀའ་ཤག་གིས་བཀའ་བློན་འོས་མི་འཁུར་ཡོང་བ་དེ་ལ་བལྟས་ཏེ་བཟོས་བཞག་པ་ཞིག་རེད། བཀུར་འོས་སྤྱི་འཐུས་སྐབས་བཅུ་གཉིས་དང་བཅུ་གསུམ་ལ་བཀའ་བློན་གནང་མྱོང་སྟབས། དེ་སྔོན་མ་ཡིག་ཆ་ཡོད་པ་རེད། ཁྲིམས་སྒྲིག་གཞི་ཡོད་པ་རེད་གསུངས་ཡོང་བའི་སྐབས་ལ། ངས་ཡོད་པ་མ་རེད་ཅེས་ད་རེས་གྲོས་ཚོགས་ནང་ཐག་ཆོད་པའི་སྒོ་ནས་ཞུ་བཞིན་ཡོད། སྐབས་བཅུ་གཉིས་པ་ལ་མི་འདུག སྐབས་བཅུ་གསུམ་པ་ལའང་མི་འདུག ཡོད་པ་ཡིན་ན་ཡིག་ཆ་འཁུར་ཡོང་རོགས་གནང་། ང་ཚོས་ཡིག་ཆ་སྔོག་པ་ཡིན། བལྟས་པ་ཡིན། སྐབས་བཅུ་གཉིས། བཅུ་གསུམ། བཅུ་བཞི་གཅིག་པ་གཅིག་རྐྱང་ཡིན། བཅོ་ལྔ་ལ་གཅིག་པ་གཅིག་རྐྱང་འཁུར་ཡོང་ཡོད།” ཅེས་གསུངས་སོང་།

སྲིད་སྐྱོང་མཆོག་གིས་མུ་མཐུད་དུ་གསུངས་དོན། “ གཉིས་པ། སྐྱེས་ལོ་མ་གཏོགས་སྐྱེས་ཚེས་འཁོད་མི་འདུག་ཟེར་བ་དེ། སྐྱེས་ལོ་མ་གཏོགས་སྐྱེས་ཚེས་འཁོད་མི་འདུག དེར་བརྟེན་སྐད་ཆ་དྲིས་སྐབས། ཁྱེད་རང་སྐྱེས་ལོ་ག་རེ་རེད་ཅེས་དྲིས་ཡོང་དུས་ ༡༩༨༡ རེད་ཅེས་གསུངས་སྐབས། ཕྱི་གསལ་ནང་གསལ་ཐོག་ནས་ངས་ཡིག་ཆ་བཀྲམས་པའི་ནང་ལ། འཁྲུངས་ལོ་ ༡༩༨༡ ཞུ་དགོས་དོན་དེ། སྐབས་བཅུ་བཞི་བཅུ་གཉིས་བཅུ་གསུམ་ལ་སྐྱེས་ལོ་འཁོད་ཡོད་སྟབས། བཅོ་ལྔ་ལ་སྐྱེས་ལོ་སྐད་ཆ་དྲིས་ཏེ་སྐྱེས་ལོ་འཁོད་པ་རེད། དེ་ལ་ཟླ་བ་ཁ་ཤས་ཀྱིས་ང་ཚོས་གནས་ཚུལ་རྟོག་མ་ཐུབ་སྟབས། གནས་སྟངས་དེ་ཆགས་པ་རེད། དེར་བརྟེན་ཕྱིར་འཐེན་བྱས་པ་རེད་མ་གཏོགས་གྲོས་ཚོགས་ལ་དབུ་སྐོར་བྱས་པ་ཡིན་ན། དེ་སྔ་མ་བྱས་པ་ཞིག་བྱས་ཡོད་པ་ཡིན་ན་དབུ་སྐོར་རེད། སྐབས་བཅུ་གཉིས་བཅུ་གསུམ། བཅུ་བཞི་ལ་དེ་ག་རང་བྱས་ཡོད་པ་ཡིན་ན། ད་ལྟ་ཁྲིམས་དང་ལམ་ལུགས་གཞིར་བཟུང་འགྲོ་དགོས་ཀྱི་ཡོད་དུས། ཁྲིམས་དང་ལམ་ལུགས་གཞིར་བཟུང་འགྲོ་ཡོད་ཅེས་ཞུ་རྒྱུ་ཡིན།” ཞེས་གསུངས་སོང་།

སྲིད་སྐྱོང་མཆོག་གིས་གནད་དོན་གཉིས་པའི་ཐོག་གསུངས་དོན། “ད་གིན་འདིར་ཅིག་གསུངས་སོང་། དཔེ་དང་སྦྲགས་ཏེ། སྲིད་སྐྱོང་གིས་ཚོགས་གཙོའི་མདུན་ཅོག་སྟེང་ལ་ཡིག་ཀོག་བཞག་པ་དེ་ལམ་ལུགས་ཐོག་ནས་འགྲིག་ཡོད་པ་མ་རེད། དེའི་སྐོར་དེ་བཀུར་འོས་སྤྱི་འཐུས་ཀྱིས་མཁྱེན་དགོས་ངེས་བཟོ་འདྲ་བོ་ཞིག་ཡོད་པ་རེད། འོས་བསྡུ་ལྷན་ཁང་གི་ཚོགས་མི་ཡིན་ན་རེད། ཁྲིམས་ཞིབ་ཁང་གི་ཁྲིམས་དཔོན་བསྐོ་བའི་སྐབས་ལ་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་འཛོམས་ནས་ཚོགས་ཆུང་ཞིག་བསྐོ་བཞིན་ཡོད་པ་རེད། བསྐོས་ཚར་བའི་རྗེས་ལ་ཚོགས་ཆུང་དེའི་འགན་ག་རེ་རེད་ཟེར་ན། ནམ་རྒྱུན་གྱི་འགྲོ་སྟངས་འགྲོ་ལུགས་ངས་ཤེས་ཀྱི་ཡོད། ནམ་རྒྱུན་ཡིན་ན་སྲིད་སྐྱོང་ལ་ཡི་གེ་ཞིག་གནང་དགོས་པ་ཡིན་ན། ཡང་མིན་ན་བཀའ་དྲུང་ལ་གནང་དགོས་པ་རེད་ལ། ཡང་མིན་ན་སྒེར་དྲུང་ལ་གནང་དགོས་པ་རེད། ཡིན་ནའང་འོས་མི་དེ་གསང་བ་ཡིན་སྟབས། ཚོགས་ཆུང་ལ་བཀོད་ཁྱབ་ག་རེ་ཡོད་པ་རེད་ཟེར་ན། འོས་མི་དེ་དག་གི་ཡིག་ཀོག་དེ་ཚོགས་ཆུང་གིས་ཐད་ཀར་སྲིད་སྐྱོང་ལ་འབུལ་དགོས་པ་རེད་མ་གཏོགས་བཀའ་དྲུང་དང་སྒེར་དྲུང་བརྒྱུད་ཆོག་གི་ཡོད་པ་མ་རེད། ཡིག་ཀོག་དེ་སྲིད་སྐྱོང་གི་ལག་ཏུ་བསླེབས་ཚར་བའི་རྗེས་ལ། གྲོས་ཚོགས་ཚོགས་པའི་སྐབས་ལ་གསང་བ་ཡིན་སྟབས། སྲིད་སྐྱོང་གིས་འཕྲལ་དུ་ཚོགས་གཙོར་འབུལ་དགོས་ཀྱི་ཡོད་པ་རེད། འདི་ཐེངས་དང་པོ་མ་རེད། ང་སྲིད་སྐྱོང་བྱས་ཏེ་ལོ་བཞི་དང་ཕྱེད་ཀའི་ནང་ལ་ཁྲིམས་དཔོན་ཐེངས་གཉིས་བདམས་ཚར་བ་རེད། འོས་མི་གཞན་དག་བདམས་ཡོད་པ་རེད། དེ་དག་ཚང་མ་ལ་ཐུགས་སྣང་གནང་ཡོད་ན། ཡིག་ཀོག་དེ་ག་དུས་ཡིན་ན་ཡང་། དེ་རིང་འདིར་གྲོས་ཚོགས་ལས་རིམ་ནང་འཁོད་འདུག་གཱ། ཆུ་ཚོད་ ༡༡ དང་སྐར་མ་ ༡༥ ལ་ལས་བྱེད་འདེམས་བསྐོ་ལྷན་ཁང་གི་ཚོགས་མི་གཅིག་གི་འོས་བསྡུ་ཞེས་ལས་རིམ་ནང་བཀོད་ཡོད་སྟབས། ཆུ་ཚོད་ ༡༡ དང་སྐར་མ་ ༡༥ ལ་ངས་འགན་འཁུར་ཏེ་གསང་བའི་ཡིག་ཀོག་དེ་ཚོགས་གཙོའི་མདུན་ཅོག་སྟེང་འབུལ་རྒྱུ་དེ་ངའི་འགན་རེད། ལས་རིམ་ནང་བཀོད་མེད་ན་ངས་བྱེད་ཀྱི་མ་རེད། དེ་སྔ་ཁྲིམས་དཔོན་ལས་རོགས་བསྐོ་བའི་སྐབས་ལ་དེ་ག་རང་བྱས་བཞག་ཡོད། དེར་བརྟེན་འགྲོ་སྟངས་འགྲོ་ལུགས་དེ་སྔ་བྱས་བཞག་པ་དེ་ག་རང་རྒྱུན་སྐྱོང་བའི་ཆེད་དུ་ངས་ད་རེས་ཀྱང་འགན་འཁུར་ཏེ། ཡིག་ཀོག་འདིར་བཞག་པ་ཡིན་མ་གཏོགས་ཁྲིམས་ལ་མ་རྩིས་པའི་ཐོག་ནས་ད་ལན་གྱི་གནང་ཕྱོགས་དེ་དག་མ་འགྲིག་པ་མེད་ཅེས་ཞུ་རྒྱུ་ཡིན།” ཞེས་གསུངས་ཡོད།

ཐེངས་འདིའི་སྐབས་བཅུ་དྲུག་པའི་གྲོས་ཚོགས་ཚོགས་དུས་གཉིས་པའི་ལས་ཉིན་བརྒྱད་པ་སྟེ། ཟླ་འདིའི་ཚེས་ ༢༨ ཉིན་གྱི་ཕྱི་དྲོར། སྤྱི་འཐུས་ཐུབ་བསྟན་ལུང་རིགས་ལགས་ཀྱིས་གོང་གསལ་གནད་དོན་གཉིས་ཀྱི་ཐོག་གསལ་བཤད་གནང་དོན། ༢༠༡༦ ཟླ་ ༦ ཚེས་ ༣ ཉིན་གྱི་ཆུ་ཚོད་ ༡༡ དང་སྐར་མ་ ༣༩ ཐོག་ལ་བཀའ་ཤག་གི་གསལ་བཤད་ཅིག་ཕེབས་པ་རེད། དེ་བཀའ་ཤག་གི་གསལ་བཤད་རེད་ཞུ་དགོས་པ་ཡིན་ན། མ་རེད་ཞུ་དགོས་པ་ཡིན་ན་ཧ་གོ་ཡི་མི་འདུག གང་ལྟར། བཀའ་བློན་འོས་གཞི་བཏོན་པའི་སྐབས་ལ་ལས་རིམ་རྣམ་བཞག་བཏོན་པ་རེད། ལས་རིམ་རྣམ་བཞག་བཏོན་པའི་སྐབས་ལ་ཡིག་ཆ་སྤྲད་པ་དེ་སྔ་བྱུང་མྱོང་ཡོད་པ་མ་རེད་ཅེས་གནས་ཚུལ་ཞིག་ཆགས་པ་རེད། སྐབས་དེར་འདིར་ལངས་སྡོད་མཁན་དེས་ལས་རིམ་རྣམ་བཞག་ཞུས་ཏེ་ཡིག་ཆ་སྔོན་མ་བཀྲམས་ཡོད་པ་རེད། གོང་དུ་ལས་རིམ་རྣམ་བཞག་འདོན་མཁན་གྱིས་གསུངས་པ་ལྟར་བྱུང་ཡོད་པ་རེད་ཅེས་ཞུས་པ་རེད། དེ་ལས་མར་འཕྲོས་པའི་གནས་ཚུལ་ཞིག་རེད། དེའི་ཐོག་ལ་དེ་རིང་འདིར་སྒེར་གྱི་གསལ་བཤད་ཀྱི་དུས་ཚོད་ཞུས་པ་ཡིན།

ངས་དེ་དུས་གྲོས་ཚོགས་ནང་དུ་ལས་རིམ་རྣམ་བཞག་བཏོན་པ་དང་མཉམ་དུ་སྔོན་མ་ཡིག་ཆ་བཀྲམ་ཡོད་པ་རེད་ཅེས་ཞུས་པ་རེད། གཉིས་པ་ག་རེ་ཞུས་པ་རེད་ཟེར་ན། བཅའ་ཁྲིམས་དོན་ཚན་ཉེར་གཅིག་པའི་ནང་གསེས་བཀའ་བློན་འོས་ཆོས་ཡོངས་རྫོགས་འཚང་ཡོད་ཅེས་ལན་ཁ་ཤས་གསུངས་སོང་། འོན་ཀྱང་འོས་ཆོས་འཚང་ཡོད་པ་མ་རེད། འཚང་མེད་པ་དེ་འཚང་ཡོད་ལབ་པ་དེ་གྲོས་ཚོགས་ལ་དབུ་སྐོར་ཆགས་ཀྱི་འདུག་ཞུས་པ་རེད། གནད་དོན་གཞན་པ་གཅིག གྲོས་ཚོགས་ནང་ཡིག་ཆ་དང་ག་རེ་ཡིན་ནའང་དཔལ་ལྡན་ཚོགས་གཙོ་མཆོག་ལ་འབུལ་སྐབས་ཚོགས་དྲུང་བརྒྱུད་ནས་འབུལ་དགོས་པ་དེ་གྲོས་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞིའི་དགོངས་དོན་རེད། དེ་མ་ཕུལ་བ་དེ་སྒྲིག་གཞི་དང་འགལ་གྱི་ཡོད་པ་རེད་ཅེས་ཞུས་པ་རེད།” ཅེས་བརྗོད་སོང་།

སྤྱི་འཐུས་ཐུབ་བསྟན་ལུང་རིགས་ལགས་ཀྱིས་དཔང་རྟགས་དང་བཅས་བརྗོད་པ་ལྟར་ན། ཕྱི་ལོ་ ༢༠༠༡ ཟླ་ ༩ ཚེས་ ༡༨ ཉིན། སྐབས་བཅུ་གསུམ་པའི་གྲོས་ཚོགས་ནང་། སྐབས་དེའི་བཀའ་ཁྲི་ཟམ་གདོང་རིན་པོ་ཆེ་མཆོག་གིས་བཀའ་བློན་འོས་མི་གསུམ་མཚན་འདོན་གནང་སྐབས། བཀའ་བློན་འོས་མི་དག་གི་མཚན་དང་སྐྱེས་ལོ་སྐྱེས་ཚེས་ཆ་ཚང་ཡོད་པའི་ཡིག་ཆ་དང་མཉམ་དུ། དཔྱ་དངུལ་ལག་དེབ་ཀྱི་ངོ་བཤུས་ཀྱང་མཉམ་སྦྱར་བྱས་ཡོད་འདུག སྐབས་དེར་བཀའ་ཁྲི་མཆོག་གིས་གྲོས་ཚོགས་ནང་བཀའ་བློན་འོས་མི་མཚན་འདོན་གནང་བ་དང་བསྟུན་ཏེ་གསུང་བཤད་གནང་དོན། “འོས་མི་གསུམ་གྱི་མཚན་དང་ལོ་རྒྱུས་ད་ལྟ་སྤྱི་འཐུས་ཚང་མའི་ཕྱག་ལ་ཕུལ་བ་དེ་རང་ཡིན། ཁོང་གསུམ་གྱི་འོས་ཆོས་དང་ལོ་རྒྱུས་རྣམས་ཡིག་ཐོག་ཏུ་ཡོད་པས་བསྐྱར་སློག་བྱས་ཏེ་དུས་ཚོད་འཕྲོ་བརླག་ཏུ་གཏང་མི་དགོས་པའི་ཐོག་ནས་སྡོམ་བརྒྱབ་ནས་ཞུས་ན། ད་ལྟ་ངས་ཕུལ་བའི་མི་གསུམ་པོ་དེ་ལ་བཅའ་ཁྲིམས་དང་སྒྲིག་གཞིའི་ནང་གཏན་ལ་ཕབ་པའི་འོས་ཆོས་ཡོངས་སུ་རྫོགས་པ་བརྒྱ་ཆ་བརྒྱ་འཚང་གི་ཡོད་ཅེས་ཞུ་རྒྱུ་ཡིན།” ཞེས་གསུངས་ཡོད་འདུག

དེ་བཞིན། བཀའ་ཤག་སྐབས་བཅུ་གསུམ་པའི་བཀའ་བློན་འོས་འདེམས་སྐབས། བཀའ་བློན་རྣམ་པའི་ལོ་རྒྱུས་གྲོས་ཚོགས་ནང་བཀྲམས་ཡོད་པ་མ་ཟད། ཡིག་ཆའི་ནང་འོས་མི་མང་ཆེ་བའི་མཚན་དང་འཁྲུངས་ལོ་འཁྲུངས་ཚེས་བཀོད་ཡོད་ཀྱང་། རེ་གཉིས་ཤིག་གི་འཁྲུངས་ཚེས་བཀོད་མེད་དག་སྔོན་ཆད་བཀའ་བློན་གནང་མྱོང་མཁན་དང་། ལོ་ན་བགྲེས་པོ་རང་ལོ་སོ་ལྔ་ལོན་ཡོད་མེད་ལ་རྩོད་གཞི་མེད་པ་དག་ཡིན་འདུག

ཐུབ་བསྟན་ལུང་རིགས་ལགས་ཀྱིས་བརྗོད་དོན། “ དང་པོ། ཡིག་ཆ་ཡོད་པ་དེ་ཁུངས་སྐྱེལ་ཡིན། གཉིས་པ། བཅའ་ཁྲིམས་ནང་གསལ་བའི་འོས་ཆོས་ཆ་ཚང་འཚང་ཡོད། ཅེས་ཐེངས་ཁ་ཤས་ལ་གསུངས་ཡོད་ཀྱང་། མཐའ་མར་འོས་ཆོས་འཚང་མེད་པ་དེ་གྲོས་ཚོགས་ལ་དབུ་སྐོར་བཏང་བ་རེད། སྲིད་སྐྱོང་མཆོག་གིས་ཡིག་ཆ་སྔོག་པ་ཡིན། མི་འདུག་གསུངས་པ་དེ་ཐུགས་སྣང་གནང་བཞག་པ་ཞིག་ལ་ངོས་འཛིན་བྱེད་དགོས་པ་རེད་དམ། ཐུགས་སྣང་གནང་མེད་པ་ཞིག་ལ་ངོས་འཛིན་བྱེད་དགོས་པ་རེད། གནང་ཡོད་ན་ད་ལྟའི་གནས་སྟངས་འདི་ཆགས་ཀྱི་རེད་དམ། གནང་མེད་ན་དབུ་སྐོར་ཆགས་ཀྱི་རེད་དམ་མ་རེད།” ཅེས་བརྗོད་སོང་།

སྤྱི་འཐུས་ཐུབ་བསྟན་ལུང་རིགས་ལགས་ཀྱིས་གནད་དོན་གཉིས་པའི་ཐོག་བརྗོད་དོན། “ངས་གྲོས་ཚོགས་ནང་དུ་ཡིག་ཆ་ག་རེ་འཕུལ་བ་ཡིན་ན་ཚོགས་དྲུང་བརྒྱུད་དེ་ཚོགས་གཙོར་འབུལ་དགོས་པ་རེད་ཟེར་གྱིན་ཡོད་མ་གཏོགས། ཕྱི་ལོགས་ཀྱི་སྐད་ཆ་ཤོད་ཀྱི་ཡོད་པ་མ་རེད། དཔལ་ལྡན་སྲིད་སྐྱོང་མཆོག་གིས། ཕྱི་ལོགས་ནས་ནམ་རྒྱུན་ཡིག་ཆ་དེ་རིགས་སྒེར་དྲུང་བརྒྱུད་ནས་སྤྲོད་དགོས་ཀྱི་ཡོད་ཀྱང་། གསང་བའི་ཡིག་ཆ་དེ་རིགས་སྒེར་དྲུང་མ་བརྒྱུད་པར་ཐད་ཀར་དཔལ་ལྡན་སྲིད་སྐྱོང་མཆོག་ལ་འབུལ་དགོས་ཀྱི་ཡོད་པ་རེད་གསུངས་སོང་། དེ་ངས་ཞུས་པ་དེའི་གསལ་བཤད་མ་རེད། ངས་བཀའ་འདྲི་ཞུ་རྒྱུ་དེ། ཚོགས་དྲུང་བརྒྱུད་ནས་ཚོགས་གཙོར་ཕུལ་རྒྱུ་དེ་གོམ་པ་གང་གི་བར་ནས་གསང་བ་ཇི་ལྟར་ཤོར་གྱི་རེད་དམ། ལྷག་པར་དུ་ངས་གསལ་བོ་ཞུས་མེད་མ་གཏོགས། ཚང་མས་གཟིགས་ཡོད་རྒྱུ་རེད། ཡིག་ཀོག་དེ་ཚོགས་གཙོའི་མདུན་ཅོག་སྟེང་བཞག་གནང་སོང་། དེ་དུས་ཚོགས་གཙོ་ཕེབས་ཡོད་པ་མ་རེད། ཚོགས་དྲུང་བརྒྱུད་ནས་ཚོགས་གཙོར་འབུལ་རྒྱུ་དང་། ཚོགས་གཙོ་མེད་བཞིན་དུ་ཅོག་ཙེ་སྟེང་ལ་བཞག་པ་གཉིས་ལས་ཉེན་ཁ་ཆེ་ཤོས་གང་ཆགས་ཀྱི་རེད་དམ། དོན་དག་ཡང་སྙིང་། གྲོས་ཚོགས་ནང་གི་ཡིག་ཆ་ག་རེ་ཡིན་ནའང་ཚོགས་དྲུང་བརྒྱུད་དེ་ཚོགས་གཙོར་འབུལ་དགོས་པ་རེད་ངས་དེ་ཞུས་པ་རེད། དེ་དུས་ང་ལ་གསལ་བཤད་རིང་པོ་ཞེ་དྲགས་གནང་བ་རེད། ཡིན་ནའང་ད་རེས་ཁྲིམས་ཞིབ་པའི་འོས་གཞི་དེ་ཚོགས་དྲུང་བརྒྱུད་དེ་དཔལ་ལྡན་ཚོགས་གཙོར་ཕུལ་ཡོད་པ་རེད། དེ་དུས་ཀྱི་གསལ་བཤད་དེ་འགྲིག་ཡོད་པ་དང་ང་ནོར་ཡོད་ན། ད་རེབ་ཀྱི་འདི་ག་འདྲ་བྱས་ཏེ་གནང་ཡག་ཆགས་པ་རེད།” ཅེས་བརྗོད་སོང་།

ཁ་སང་ཕྱི་ཚེས་ ༢༩ ཉིན་གྱི་སྔ་དྲོར་གྲོས་ཚོགས་མཇུག་བསྡོམས་དང་བསྟུན་ཏེ། སྲིད་སྐྱོང་མཆོག་གིས་བཀའ་ཤག་གི་གསལ་བཤད་དང་བསྟུན་ཏེ། སྐབས་བཅོ་ལྔ་པའི་བཀའ་བློན་འོས་མི་བསྐོས་བའི་སྐབས་ལ་བཀུར་འོས་སྤྱི་འཐུས་ནས་ལས་རིམ་རྣམ་བཞག་དང་འབྲེལ་ཏེ། བཀའ་འདྲི་ག་རེ་གནང་བ་རེད་ཟེར་ན། དཔྱ་ཁྲལ་ལག་དེབ་ཡོད་དང་མེད་དྲིས་བ་རེད། འོས་ཆོས་ནང་དུ་དཔྱ་ཁྲལ་ལག་དེབ་དགོས་པ་རེད། དེ་སྔ་བཀའ་བློན་ཁྲི་པས་བཀའ་བློན་བསྐོས་བའི་སྐབས་སུའང་དཔྱ་ཕྲལ་ལག་དེབ་ཡོད་པ་བྱེད་ཀྱི་ཡོད་པ་རེད། ད་རེབ་དཔྱ་ཁྲལ་ལག་དེབ་མི་འདུག དཔྱ་ཁྲལ་ལག་དེབ་དགོས་པ་རེད། ཅེས་གསུངས་པ་རེད། བཀའ་ཤག་སྐབས་བཅོ་ལྔ་པའི་འོས་མི་བཏོན་པ་དེ་བཀའ་ཤག་སྐབས་བཅུ་བཞི་པའི་འོས་མི་འདོན་སྟངས་གཞིར་བཞག་ཡོད། བཀའ་ཤག་སྐབས་བཅུ་བཞི་པའི་འོས་མི་འདོན་སྟངས་དེ་བཀའ་ཤག་སྐབས་བཅུ་གསུམ་པ་གཞིར་བཞག་པ་རེད། ཅེས་ཞུས་པ་ཡིན། དེའི་སྔོན་ལ་བཀའ་ཤག་སྐབས་བཅུ་གཉིས་པའང་ཕྱིན་པ་རེད། བཀའ་ཤག་སྐབས་བཅུ་བཞི་པའི་སྐབས་སུ་དཔྱ་ཁྲལ་ལག་དེབ་ཕུལ་མེད། སྐབས་དེར་བཀུར་འོས་སྤྱི་འཐུས་གྲོས་ཚོགས་ནང་ཡོད་པ་རེད། བཀའ་ཤག་སྐབས་བཅུ་བཞི་པའི་བཀའ་བློན་འོས་མི་འདོན་མཁན་སྲིད་སྐྱོང་དེ་ག་རང་ཡིན། དེ་དུས་སྐབས་ལ་དཔྱ་ཁྲལ་ལག་དེབ་ཕུལ་ཡོད་པ་མ་རེད། དེའི་ནང་ག་རེ་འཁོད་ཡོད་པ་རེད་ཟེར་ན། མཚན། འཁྲུངས་ལོ། འཁྲུངས་ཚེས་མ་རེད། འཁྲུངས་ལོ་རེད། ད་ལྟའི་བཞུགས་ཡུལ། ད་ལྟའི་ཕྱག་ལས། ལོ་རྒྱུས་སྙིང་བསྡུས་བཅས་འཁོད་ཡོད་པ་རེད། སྐབས་དེ་དུས་བཀུར་འོས་སྤྱི་འཐུས་ཡོད་པ་རེད། ལས་རིམ་རྣམ་བཞག་བཏོན་ཡོད་པ་མ་རེད། དཔྱ་ཁྲལ་ལག་དེབ་དགོས་པ་རེད་གསུངས་ཡོད་པ་མ་རེད།

བཀའ་བློན་རྣམ་པ་ཚང་མ་གཏན་འབེབས་བྱས་པ་རེད། ད་བཀའ་ཤག་སྐབས་བཅོ་ལྔ་པའི་འོས་མི་བཏོན་ཡོང་སྐབས། དཔྱ་ཁྲལ་ལག་དེབ་དགོས་པ་རེད། ག་རེ་གསུངས་ཡོད་པ་རེད་ཟེར་ན། དེ་སྔ་བཀའ་ཤག་གི་བཀའ་བློན་འོས་མི་ལ་དཔྱ་ཁྲལ་ལག་དེབ་ཟུར་ལ་འཁུར་ཡོང་གི་ཡོད་པ་རེད་གསུངས་པ་རེད། དེ་སྔ་མི་འདུག་ཞུས་པ་ཡིན། ཁ་སང་བཀུར་འོས་སྤྱི་འཐུས་ནས་སྐབས་བཅུ་གཉིས་པའི་ནང་འདུག་ཅེས་ཡིག་ཆ་དང་སྦྲགས་ཏེ་དཔྱ་ཁྲལ་ལག་དེབ་ཚང་མ་བསྟན་གནང་བ་རེད། དེ་ངས་ངོས་ལེན་ཞུ་བཞིན་ཡོད། ང་འདིར་ལངས་བསྡད་ཡོད་པ་རེད། ང་ལ་ཡིག་ཆུང་ཞིག་བསླེབས་པ་རེད། ཡིག་ཆ་གོ་སྒྲིག་བྱེད་མཁན་སྒེར་དྲུང་གིས་བྱེད་ཀྱི་ཡོད་པ་རེད། ཁོ་རང་གིས་བཀའ་ཤག་སྐབས་བཅུ་བཞི་ལ་མི་འདུག བཅུ་གསུམ་ལ་མི་འདུག བཅུ་གཉིས་ལ་མི་འདུག ཅེས་གསུངས་ཡོང་དུས་ངས་བཅུ་གཉིས་ལ་འདུག་ཞུས་པ་ཡིན། ངས་ངོས་ལེན་ཞུ་བཞིན་ཡོད་དཱ། བཀའ་ཤག་སྐབས་བཅུ་བཞི་པས་འཁུར་ཡོང་སྐབས། བཀའ་ཤག་སྐབས་བཅུ་གསུམ་པར་ལྟ་དགོས་པ་རེད། བཀའ་ཤག་སྐབས་བཅུ་གསུམ་པའི་བཀའ་བློན་ཁྲི་པ་ཟམ་གདོང་རིན་པོ་ཆེ་ཡིས་བཀའ་བློན་བསྐོས་པའི་ནང་ལ། མཚན་དང་འཁྲུངས་ལོ། ད་ལྟའི་བཞུགས་ཡུལ། ད་ལྟའི་ཕྱག་ལས། ལོ་རྒྱུས་སྙིང་བསྡུས་སོགས་མ་གཏོགས་དཔྱ་ཁྲལ་ལག་དེབ་མི་འདུག བཀའ་ཤག་སྐབས་བཅུ་གསུམ་ལ་མི་འདུག བཀའ་ཤག་སྐབས་བཅུ་བཞི་ལ་མི་འདུག དེར་བརྟེན། བཀའ་ཤག་སྐབས་བཅོ་ལྔ་ལ་མེད་པ་བྱས་ཏེ་བསླེབས་པ་རེད། ལམ་ལུགས་ལག་བསྟར་བྱས་ཏེ་འགྲོ་བསྡད་ཡོད།

བཀའ་ཤག་སྐབས་བཅུ་གཉིས་པའི་ནང་དུ་འཁྲུངས་ཚེས་འདུག དེ་སྐབས་བཅུ་གསུམ་པས་འགྱུར་བ་བཏང་འདུག དེ་འགྱུར་བ་གཏོང་མཁན་བཀའ་བློན་ཁྲི་པ་ཟམ་གདོང་རིན་པོ་ཆེས་འགྱུར་བ་བཏང་འདུག དེའི་ནང་འཁྲུངས་ཚེས་ཡོད་མཁན་འདུག་ལ། མེད་མཁན་ཡང་འདུག བཀའ་ཤག་སྐབས་བཅུ་གསུམ་པའི་ནང་འཁྲུངས་ལོ་བྲིས་ཡོད་ན། དེ་གཞིར་བཟུང་བཀའ་ཤག་སྐབས་བཅུ་བཞི་པས་འཁྲུངས་ལོ་བྲིས་པ་རེད། བཀའ་ཤག་སྐབས་བཅོ་ལྔ་པའི་འཁྲུངས་ལོ་བྲིས་པ་རེད། དེར་བརྟེན། གྲོས་ཚོགས་ལ་དབུ་སྐོར་རྩ་བ་ནས་གཏོང་རྒྱུ་མ་བྱུང་།

ངས་ཞུ་རྒྱུ་གཅིག་བཀུར་འོས་སྤྱི་འཐུས་ཀྱིས་དཔྱ་ཁྲལ་ལག་དེབ་དགོས་པ་རེད། འཁྲུངས་ཚེས་དགོས་པ་རེད་གསུང་གི་ཡོད་ན། བཀའ་ཤག་སྐབས་བཅུ་གསུམ་པར་གསུང་དགོས་པ་རེད། བཀའ་ཤག་སྐབས་བཅུ་གསུམ་པའི་འོས་མིའི་ནང་དུ་འཁྲུངས་ལོ་ལས་མི་འདུག བཀའ་ཤག་སྐབས་བཅུ་བཞི་པས་བཏོན་པའི་སྐབས་ལ་དཔྱ་ཁྲལ་ལག་དེབ་དགོས་པ་རེད། འཁྲུངས་ཚེས་དགོས་པ་རེད་གསུང་དགོས་པ་རེད་དེ་གསུང་ཡོད་པ་མ་རེད། དྲང་བདེན་དང་ཁྲིམས་དང་སྒྲིག་གཞི་གཞིར་བཟུང་ཕེབས་དགོས་པ་ཡིན་ན། སྐབས་བཅུ་གཉིས་བཅུ་གསུམ། བཅུ་བཞི་ཚང་མ་ལ་དྲང་བདེན་གནང་དགོས་པ་རེད་མ་གཏོགས། ད་ལྟའི་བཀའ་ཤག་མ་འགྲིག་པ་དང་། དེ་སྔའི་བཀའ་ཤག་འགྲིག་བསྡད་ཚུལ་གསུང་ན་འགྲིག་གི་མ་རེད། ཅེས་གསུངས་སོང་།

གཅིག་དེ་ག་རེ་གསུངས་ཡོད་པ་རེད་ཟེར་ན། འོས་བསྡུ་ལྷན་ཁང་གི་འོས་འཁུར་ཡོང་ན་རེད། སྲིད་སྐྱོང་གིས་ཚོགས་གསོའི་མདུན་ཅོག་སྟེང་ལ་ཡིག་ཀོག་འཇོག་གི་འདུག་གསུང་གི་ཡོད་པ་རེད། འོས་མི་སུ་ཞིག་བསྐོས་ཀྱང་དེ་ལ་ཚོགས་ཆུང་ཞིག་ཡོད་པ་རེད། ཚོགས་ཆུང་ནང་སུ་ཡོད་པ་རེད་ཟེར་ན། ཁྲིམས་དཔོན་ཆེ་བ་དང་། དུ་ཚོགས་གཙོ་ཚོགས་གཞོན། སྲིད་སྐྱོང་བཅས་མི་བཞི་ལས་ཡི་ཚོགས་ཆུང་ཞིག་ཡོད་པ་རེད། ཚོགས་ཆུང་ལ་རྩ་འཛིན་ཡིག་ཆ་ཞིག་ཡོད་པ་རེད། ཡིག་ཆ་དེའི་ནང་། འོས་གཞི་འདེམས་སྒྲུག་ཚོགས་ཆུང་གི་ལས་དོན་གྲུབ་མཚམས་གསང་གནས་ཐོག འོས་གཞིའི་མཚན་གཞུང་ཡིག་ཀོག་ཆུང་བའི་ནང་དམ་སྦྱར་དང་། ཡིག་ཆ་ཁག་ཡིག་ཀོག་ཆེ་བའི་ནང་ཐིམ་སྒྲིལ་དང་དམ་སྦྱར་གྱིས་སོ་སོར་སྲིད་སྐྱོང་ལ་འབུལ་རྒྱུ། སྲིད་སྐྱོང་གིས་སྤྱི་འཐུས་ཚོགས་གཙོ་སྦྲེལ་པོར་འབུལ་རྒྱུ། ཞེས་འཁོད་ཡོད་པ་རེད། སྲིད་སྐྱོང་གིས་ཚོགས་དྲུང་བརྒྱུད་ཚོགས་གཙོར་འབུལ་རྒྱུ་ཞེས་འཁོད་ཡོད་པ་མ་རེད། རྩ་འཛིན་དེ་ ༢༠༡༣ ཟླ་ ༤ ཚེས་ ༢༤ ལ་གཏན་འབེབས་གནང་འདུག ཅེས་གསུངས་སོང་།

མཇུག་ཏུ་སྤྱི་འཐུས་ཐུབ་བསྟན་ལུང་རིགས་ལགས་ཀྱིས་སྲིད་སྐྱོང་གི་གསལ་བཤད་ལ་བསྐྱར་དུ་གསལ་བཤད་གནང་དོན། དོ་སྣང་གནང་མེད་ན་གྲོས་ཚོགས་ལ་དབུ་སྐོར་རེད། དོ་སྣང་གནང་ཡོད་ན་རང་ལོ་ ༣༥ ཧྲིལ་བོ་ལོན་དགོས་ཟེར་བ་དེ་མ་བྱུང་སྟབས། སྤྱི་ཟུར་དེས་དམ་འབུལ་ཕྱིར་འཐེན་བྱས། བཀའ་ཤག་གིས་མིང་འདོན་གནང་གྲུབ་པའི་རྗེས་ལ་ཕྱིར་འཐེན་བྱེད་དགོས་པའི་གནས་སྟངས་དེ་གང་ལ་ཐུག་ཡོད་པ་རེད། དེ་བཅའ་ཁྲིམས་དང་འགལ་བ་རེད་དམ་མ་རེད། ་བཅའ་ཁྲིམས་ནང་། རང་ལོ་ ༣༥ ཧྲིལ་བོ་ལོན་དགོས་ཞེས་ཐག་བཅད་བཞག་པ་དེ་འཚང་ཡོད་ཅེས་གྲོས་ཚོགས་ནང་ཐེངས་མ་ཁ་ཤས་ལ་གསུངས་སོང་། དེ་འགལ་བ་དང་མ་ཡིན་པ་དེ་སྤྱི་ཟུར་དེ་བཀའ་བློན་ནས་ཕྱིར་འཐེན་བྱེད་དགོས་བ་དེས་བསྒྲུབ་ཐུབ་པ་རེད། བཅའ་ཁྲིམས་དོན་ཚན་དེའི་ནང་གི་རང་ལོ་སུམ་ཅུ་སོ་ལྔ་ཧྲིལ་བོ་ལོན་དགོས་ཟེར་བ་དེ་དང་འགལ་བའི་ཐོག་ནས་ཕྱིར་འཐེན་བྱེད་དགོས་བྱུང་བ་དེས་ཐུགས་སྣང་གནང་མེད་པ་དེ་བསྒྲུབ་ཐུབ་པ་རེད། དེར་བརྟེན་དབུ་སྐོར་བཏང་འདུག་ཅེས་ཞུ་རྒྱུ་ཡིན། ཞེས་བརྗོད་བརྗོད་སོང་།