བོད་ཀྱི་གླུ་བ་པདྨ་འཕྲིན་ལས་ལགས་དང་ཕྱག་རྡོར་ལགས་ཀྱི་ ༤ ཡི་བཙོན་འཇུག་དུས་ཡུན་རྫོགས་ཏེ་ཀློད་གྲོལ་བཏང་ཡོད་ནའང་། ཁོང་རྣམ་པ་གཉིས་ཀྱི་སྐུ་གཟུགས་གནས་སྟངས་ཤེས་རྟོགས་ཐུབ་མེད་པ་རེད།
དེ་རིང་ཕྱི་སྡོད་བོད་མི་ཞིག་གིས་འདི་ག་གསར་ཁང་དུ་གནས་ཚུལ་བཏང་བ་ལྟར་ན། ཟླ་འདིའི་ཕྱི་ཚེས་ ༣ ཉིན་མདོ་སྨད་རྔ་པ་ཁུལ་རྔ་པ་རྫོང་རྨེའུ་རུ་མའི་རུ་ཆེན་དང་པོའི་གླུ་བ་པདྨ་འཕྲིན་ལས་དང་། གླུ་བ་ཕྱག་རྡོར་གཉིས་ཀྱི་ལོ་ ༤ བཙོན་འཇུག་གི་དུས་ཡུན་ཚང་སྟེ་ཀློད་གྲོལ་བཏང་ཡོད་པ་དང་། ཁོང་རྣམ་པ་གཉིས་སི་ཁྲོན་གྱི་མེན་ཡཱང་བཙོན་ཁང་ནས་ཕྱིར་ཕ་ཡུལ་དུ་འབྱོར་རྗེས་བཙོན་གྲོགས་ཐེའུ་རང་ལགས་གཙོས་པའི་བོད་ཀྱི་རྩོམ་པ་པོ་དང་ཆབ་སྲིད་བཙོན་ཟུར་བུད་དྷ། བཙོན་ཟུར་ཨ་ཁུ་འཇངས་ཁོ་དང་སངྒྷ་སོགས་ཀྱིས་ཕེབས་བསུ་ཞུས་ཡོད་འདུག
གླུ་བ་པདྨ་འཕྲིན་ལས་དང་ཕྱག་རྡོར་གཉིས་ཀྱིས་རང་ལུས་མེར་སྲེག་སོགས་བོད་ནང་གི་གནས་སྟངས་དང་། ༧གོང་ས་མཆོག་དང་པཎ་ཆེན་རིན་པོ་ཆེ། ཀིརྟི་རིན་པོ་ཆེ་བཅས་ལ་བསྟོད་གླུ་དང་དྲན་གླུ་བླངས་པ། དེ་བཞིན། སྲིད་སྐྱོང་བློ་བཟང་སེང་གེར་བསྟོད་གླུ་བཅས་བླངས་ཡོད་པའི་ཆེད་སྒྲིག་འོད་སྡེར་༼སོས་མེད་རྨ་ཁའི་ཟུག་གཟེར༽ ཞེས་པ་འགྲེམས་སྤེལ་བྱས་པའི་ཉིན་ཤས་རྗེས་སུ་རྨ་ཆུ་རྫོང་ཐོག་ཏུ་འཛིན་བཟུང་བྱས་ཏེ། ཟླ་ ༦ ལྷག་གི་རིང་རྔ་པ་རྫོང་དུ་བཀག་ཉར་བྱས་པ་དང་། ཕྱི་ལོ་ ༢༠༡༣ ལོའི་ཟླ་ ༢ ནང་ཁོང་གཉིས་ལ་ལོ་ ༤ རེའི་ཁྲིམས་ཐག་བཅད་དེ་སི་ཁྲོན་གྱི་མེན་ཡཱང་བཙོན་ཁང་དུ་བཀག་བསྐྱིལ་བྱས་ཡོད་འདུག
གླུ་བ་པདྨ་འཕྲིན་ལས་ལགས་རང་ལོ་ ༢༢ ཡིན་ཞིང་། ཁོང་གི་ཕ་མིང་ལ་འཛམ་ལྷ་དང་མ་མིང་ལ་ཚེ་རིས་མ་ཟེར་བ་དང་། གླུ་བ་ཕྱག་རྡོར་ལགས་རང་ལོ་ ༣༢ ཡིན་ཞིང་ཕ་མིང་ལ་མཆོག་ལྡན་མདོ་བ་ཟེར་ཞིང་། ཁོང་ནི་རྒྱལ་གཅེས་པ་གཅོད་པ་ལགས་ཀྱི་སྤུན་མཆེད་ཡིན་འདུག
བོད་ཀྱི་རྩོམ་པ་པོ་དང་ཆབ་སྲིད་བཙོན་ཟུར་ཐེའུ་རང་ལགས་ནས་ “སྤུན་ཟླ་འདི་གཉི་གས་གཞས་བཏང་བས་བཙོན་ལ་འགྲོ་དགོས་ཐུག་པ་རེད། ལོ་བཞི་ལ་བཙོན་ནས་བསྡད་བཞག མདང་ནུབ་ཁོང་གཉིས་ཀ་ཕ་ས་ཕ་ཡུལ་དུ་བདེ་ལེགས་ངང་ལོག་ཐུབ་སོང་། གཅིག་གི་མིང་ལ་པད་མ་འཕྲིན་ལས་ཟེར། བཙོན་ཟས་བཙོན་ཆུ་ཅ་ནེ་གཅིག་གི་ནང་ཟ་རོགས་འཐུང་རོགས་ཡིན། གཅིག་གི་མིང་ལ་ཕྱག་རྡོར་ཟེར། ངེད་གཉིས་བཙོན་ཁང་གཅིག་ཡིན་ནའང་། བཙོན་ཁག་ཁ་ཁ་ཡིན། གཉིས་ཀ་ཨ་མདོ་རྔ་བ་རྨེ་རུ་མའི་མྱི་ཡིན། རྨེ་རུ་མ་ནི་རི་སྒང་ཞིག་ན་སོ་ཁང་ཁེར་ཧྲེང་ཧྲེང་ཞིག་ཡོད་ས་དེ་ཡིན། རི་སྒང་དེ་ནས་ཉིན་ཕྱེད་ཙམ་ལ་མྱི་རྟ་སུམ་ཅུ་ལྷག་བཞུད་སོང་” ཞེས་བཀོད་འདུག
གསར་འགོད་པ། པདྨ་རྒྱལ།
ཁྱེད་རྣམ་པ་ལའང་བཙོན་གྲོལ་ཐོབ་པར་བཀྲ་ཤིས་བདེ་ལེགས་ཞུ།བསམ་དོན་འགྲུབ་པར་སྨོན།