༧གོང་ས་མཆོག་གིས་རྒྱ་ནག་ནི་ལོ་རྒྱུས་ཐོག་ནས་ནང་པའི་རྒྱལ་ཁབ་ཅིག་ཡིན་སྟབས་མ་འོངས་པར་གོ་སྐབས་བྱུང་ན་རྒྱ་ནག་ནང་བྱམས་སྙིང་རྗེ་གོང་འཕེལ་གཏོང་བར་ཧུར་ཐག་འབད་ཐག་གནང་རྒྱུ་ཡིན་སྐོར་གསུངས་འདུག
ཨ་རིའི་སྐུ་ཚབ་དོན་གཅོད་ཁང་གི་གོ་སྒྲིག་འོག ལོ་ལྟར་རྒྱ་རིགས་བོད་དོན་ཐུགས་སྣང་ཅན་རྣམས་བཙན་བྱོལ་བོད་མིའི་ལྟེ་གནས་བཞུགས་སྒར་དྷ་རམ་ས་ལར་བོད་དོན་ཤེས་རྟོགས་སླད་ཆེད་གཏོང་བཞིན་ཡོད་པ་ལྟར། ཕྱི་ཟླ་ ༡༡ ཚེས་ ༢༨ ཉིན་རྒྱ་རིགས་ན་གཞོན་ཤེས་ཡོན་པ་ཁག་ཅིག་བཞུགས་སྒར་དྷ་རམ་ས་ལར་གཟིགས་སྐོར་དུ་ཕེབས་ཡོད་པ་མ་ཟད། ༧གོང་ས་མཆོག་ལ་མཇལ་ཁ་ཞུས་ཏེ་རྒྱ་ནག་ནང་མྱུར་ཚད་མཐོན་པོས་དཔལ་འབྱོར་འཕེལ་རྒྱས་ཕྱིན་ཡོད་ཀྱང་། ཡ་རབས་བཟང་སྤྱོད་ཐོག་ཉམས་རྒུད་ཤུགས་ཆེན་ཕྱིན་ཏེ་དཀའ་ངལ་མང་པོ་འཕྲད་བཞིན་ཡོད་པ་དེ་སེལ་ཐབས་ཅི་ཡོད་སོགས་བཀའ་འདྲི་དགོངས་སྐོར་ཞུས་ཡོད་པ་དང་། སྐབས་དེར་༧གོང་ས་མཆོག་ནས་རྒྱ་ནག་ནི་ལོ་རྒྱུས་ཀྱི་ཐོག་ནས་ནང་པའི་རྒྱལ་ཁབ་ཅིག་ཡིན་ལ། ད་ལྟ་མིས་བཟོས་པའི་དཀའ་ངལ་མང་དག་ཅིག་འཕྲད་ཡོང་དུས་གུང་ཁྲན་ཏང་གིས་སྣེ་འཁྲིད་དེ་བྱམས་སྙིང་རྗེ་ཡི་ཀུན་ནས་བསླངས་བའི་ཡ་རབས་བཟང་སྤྱོད་གོང་འཕེལ་དུ་གཏོང་དགོས་ལ། སྔོན་མ་རིག་གནས་གསར་བརྗེ་ཞེ་སྡང་གིས་བསླངས་ཡོད་ཀྱང་། ད་ལྟ་བྱམས་སྙིང་རྗེ་ཡིས་བསླངས་བའི་རིག་གནས་གསར་བརྗེ་བྱེད་དགོས་སྐོར་གསུངས་འདུག
མཇལ་བཅར་ཞུ་མཁན་རྒྱ་རིགས་དཔལ་འབྱོར་རིག་པའི་ཤེས་ཡོན་པ་ཆིན་ཝེ་ཕིན་ལགས་ཀྱིས། རྒྱ་ནག་ནང་དཔལ་འབྱོར་ཉམས་ཉེན་བྱུང་རྗེས་ཆབ་སྲིད་ཀྱི་ཉེན་ཁ་དང་སྤྱི་ཚོགས་ཉེན་ཁ་འབྱུང་སྲིད་པ་དང་། མུ་མཐུད་དུ་ཕྱིན་པ་ཡིན་ན་རྒྱ་ནག་གི་སྲིད་དབང་འཐོར་ཞིག་ཏུ་འགྲོ་ཉེན་ཡོད་ལ། སྲིད་དབང་འཐོར་ཞིག་ཏུ་ཕྱིན་ན་ཡུལ་གྱར་གྱི་ཉེན་ཁ་འབྱུང་སྲིད་མིན་དང་། ཡུལ་གྱར་གྱི་ཉེན་ཁ་བྱུང་ཚེ་སེལ་ཐབས་ཅི་ཡོད་སྐོར་བཀའ་འདྲི་ཞུས་པར་༧གོང་ས་མཆོག་གིས། དེ་འདྲ་རང་ཕལ་ཆེར་ཡོང་གི་མ་རེད། རྒྱ་ནག་ལོ་སྟོང་ཕྲག་ཁ་ཤས་ཀྱི་ལོ་རྒྱུས་ཡོད་པའི་རྒྱལ་ཁབ་ཅིག་དང་། མི་རིགས་ལ་ཆ་བཞག་ནའང་རིག་གཞུང་ཡོད་པ་དང་། དཀའ་ལས་རྒྱག་ཐུབ་མཁན་གྱི་མི་རིགས་ཤིག་རེད། རྒྱ་ནག་གི་སྐྱོན་ཆ་གཙོ་བོ་སྐྱོན་བརྗོད་ཏོག་ཙམ་བྱུང་ན་གསང་བ་ཞེ་དྲགས་བྱས་ཏེ་གསར་འགྱུར་ཕྱི་གསལ་ནང་གསལ་མེད་པ་དེ་རེད། ངས་ནམ་རྒྱུན་རྒྱ་རིགས་གྲོགས་པོ་ཚོར་རྒྱ་ནག་མི་མང་དུང་ཕྱུར་ ༡༣ ལ་དངོས་ཡོད་གནས་སྟངས་ཤེས་པའི་ཐོབ་ཐང་ཡོད་པ་རེད། དངོས་ཡོད་གནས་ཚུལ་ཤེས་པ་ཡིན་ན་བཟང་དང་ངན་གྱི་དབྱེ་བ་དེ་ཕྱེ་ཐུབ་པས། གནས་ཚུལ་ལ་གསང་བ་ཞེ་དྲགས་བྱས་ཏེ་ཕྱི་ལོགས་ཀྱི་གསར་འགྱུར་རྦད་དེ་བཀག་སྡོམ་བྱེད་བཞིན་པའི་གྲས་དེ་ཡག་པོ་མི་འདུག་ཅེས་རྟག་པར་བཤད་ཀྱི་ཡོད། དེ་བཞིན་རྒྱ་ནག་གི་ཁྲིམས་དེ་རྒྱལ་སྤྱིའི་ཁྲིམས་ཀྱི་གནས་ཚད་ལ་ཡར་བསླེབས་ཐུབ་པ་ཞིག་བཟོ་དགོས་ཀྱི་འདུག་ཅེས་བཤད་ཀྱི་ཡོད། ད་ལྟ་གནས་ཚད་གསལ་པོ་མེད་པར་ཁྲིམས་ཀྱི་ཐོག་ནས་ཏག་ཏག་ཅིག་མེད་པ་རེད། ང་རྒྱུན་དུ་རྒྱ་མི་མང་པོར་ཐུག་གི་ཡོད་པ་རེད། ཉིན་ཞིག་ཧུའུ་ནན་ནས་ཡིན་པའི་ཞིང་པ་སྐྱོ་བོ་ཞིག་ལ་ཐུག་བྱུང་། སྐྱོ་བོ་ཞེ་དྲགས་རེད་འདུག གྱོན་གོས་དང་གདོང་སྐྱོ་བོ་འདུག་པས་ག་འདྲ་འདུག། ཁྱེད་རང་ཚོ་གྲོང་གསེབ་ལ་ག་འདྲ་འདུག་ཅེས་སྐད་ཆ་དྲིས་དུས། ཁོས་སྐྱོ་བོ་ཞེ་དྲགས་ཡོད། ས་གནས་ཀྱི་མགོ་འཁྲིད་དེ་ཚོས་སོ་སོར་དབང་ཆ་དང་ཐོབ་ཐང་ཡོད་པ་དེས་དངུལ་བཟོ་རྒྱུ་མ་གཏོགས་མི་མང་ལ་བསམ་བློ་གཏོང་གི་མི་འདུག་ཟེར།
ང་འཛམ་བུ་གླིང་འདིའི་སྒང་གི་ལུང་པ་ག་བར་བསླེབས་པ་ཡིན་ནའང་། ང་ཚོའི་དཀའ་ངལ་མང་པོ་ཞིག་མིས་བཟོས་པའི་དཀའ་ངལ་རེད་འདུག་ལ། མིས་བཟོས་པའི་དཀའ་ངལ་དེ་སྨོན་ལམ་བརྒྱབ་ནས་སེལ་ཐབས་མེད་པས་མི་རང་གིས་སེལ་ཐུབ་དགོས་པ་རེད་ཅེས་ལབ་ཀྱི་ཡོད། ངས་མཚམས་རེར་རྩེད་མོ་བྱས་ནས་རྙོག་དྲ་ང་རང་ཚོས་བཟོས་ཏེ་དཀོན་མཆོག་ལ་གསོལ་བ་བཏབ་ནས་ཡོང་ཐབས་མེད་པར་བརྟེན། ངས་འཛམ་བུ་གླིང་བྱམས་བརྩེ་ལྡན་པ་ཞིག་དགོས་ཀྱི་འདུག་ཅེས་བཤད་ཀྱི་ཡོད། ཚན་རིག་པ་མང་པོས་མི་རང་བཞིན་ལྷན་སྐྱེས་ཀྱི་ཐོག་ནས་བྱམས་བརྩེའི་རང་བཞིན་ཅན་ཞིག་རེད་འདུག་ཟེར་གྱི་ཡོད་པ་རེད། འཛམ་བུ་གླིང་ལ་ངས་སྐད་ཆ་དེ་བཤད་ཡོང་དུས་རྒྱ་ནག་མི་དམངས་སྤྱི་མཐུན་རྒྱལ་ཁབ་སེམས་ལ་འཁོར་ཡོང་གི་འདུག རྒྱ་ནག་མི་མང་ཤོས་ཡོད་པའི་རྒྱལ་ཁབ་ཅིག་རེད་ལ། ལོ་རྒྱུས་ཀྱི་ཐོག་ནས་བཤད་ན་ནང་པའི་རྒྱལ་ཁབ་ཅིག་ཡིན་སྟབས། དེའི་ནང་དུ་བྱམས་བརྩེ་སྤེལ་བའི་གོ་སྐབས་ཤིག་ཏན་ཏན་ཡོད་པ་རེད་དྲན་གྱི་འདུག ངས་ནུབ་ཕྱོགས་ཀྱི་ལུང་པའི་ནང་དུ་བྱམས་བརྩེའི་སྐོར་བཤད་སྐབས་མཇུག་ཏུ་ངས་བསམ་བློ་གཏོང་སྟངས་དེ་ནང་པའི་བསམ་བློ་གཏོང་སྟངས་ཏོག་ཙམ་སླེབ་ཡོང་གི་ཡོད་དུས། ང་རང་ཏོག་ཙམ་མ་བདེ་བ་ཡོང་གི་འདུག ངས་ནང་ཆོས་སྤེལ་བར་བསམ་བློ་ཁྱོན་ནས་གཏོང་གི་མེད་ཀྱང་ཆོས་ལུགས་གཞན་དག་ལ་འཚམ་པོ་ཡོང་ཁག་པོ་རེད། རྒྱ་ནག་ལ་ཆ་བཞག་ན། རྒྱ་མི་སུ་ལ་ནང་ཆོས་ཞེས་ལབ་པ་ཡིན་ནའང་རང་བཞིན་གྱིས་སེམས་ཐག་ཉེ་བོ་ཞིག་ཡོད་སྟབས། ད་ལྟའི་ཆར་རྒྱ་ནག་ནང་ལྷ་ཁང་ག་ཚོད་ཅིག་འདུག དེ་འདྲ་ཡིན་དུས་རྒྱ་ནག་ནང་བྱམས་བརྩེ་སྤེལ་བའི་ལས་འགུལ་ལ་ཏོག་ཙམ་ཤུགས་ཅིག་རྒྱག་རོགས་བྱས་ན་དྲན་གྱི་འདུག དངོས་གནས་བྱས་ན་གུང་ཁྲན་ཏང་གིས་མགོ་འཁྲིད་དེ་བྱེད་ཐུབ་པ་དང་བྱེད་འོས་པ་རེད་བསམ་གྱི་འདུག
མཱ་ཁེ་སི་རིང་ལུགས་ལ་ཆ་བཞག་ན། སྤྱི་ཚོགས་དཔལ་འབྱོར་གྱི་ཐོག་ནས་བཤད་ན་ང་མཱ་ཁེ་སི་རིང་ལུགས་པ་ཞིག་ཡིན་ཞེས་ཡོངས་གྲགས་ཀྱི་ཐོག་ནས་བཤད་ཀྱི་ཡོད། མཱ་ཁེ་སི་ཡིས་ངལ་རྩོལ་མི་མང་གི་ཐོབ་ཐང་བཤད་ཡོང་དུས་སྙིང་རྗེས་བསླངས་བ་ཞིག་རེད། སྐབས་རེར་ངས་མཱ་ཁེ་སི་རིང་ལུགས་དེ་ལེ་ཉིན་གྱིས་འཕྲོ་བརླག་ཏུ་བཏང་བ་རེད་དྲན་གྱི་འདུག ལེ་ཉིན་གྱིས་དམག་འཁྲུག་གི་ལས་ཀ་བྱས་ཏེ་དྲག་པོ་བྱས་པ་དང་། གསང་བ་ཞེ་དྲགས་བྱས་པ་དེ་དམག་ཇུས་རེད་འདུག་གཱ། དེ་འདྲ་ཡིན་དུས་ང་མཱ་ཁེ་སི་རིང་ལུགས་ལ་ཡིད་ཆེས་བྱེད་མཁན་ཞིག་དང་། ལེ་ཉིན་རིང་ལུགས་ལ་ངོ་རྒོལ་བྱེད་མཁན་ཞིག་ཡིན། རྒྱ་ནག་ནང་དཀའ་ངལ་མང་པོ་འཕྲད་ཀྱི་ཡོད་པ་དེ་ཕལ་ཆེར་ལེ་ཉིན་རིང་ལུགས་དང་སི་ཏ་ལིན་རིང་ལུགས་ཏོག་ཙམ་ཤུགས་ཆེ་དྲགས་པས་རེད་དྲན་གྱི་འདུག
དཔེར་ན། ངའི་ངོ་ཤེས་པ་ཨེ་ཛི་རལ་གྱི་སྲིད་འཛིན་དམ་པ་ཞི་མོན་པིར་སི་(Shimon Peres)ཞི་བདེའི་གཟེངས་རྟགས་བཞེས་མཁན་ཁོང་སྤྱི་ཚོགས་རིང་ལུགས་པ་རེད། རྒྱ་ནག་ཀྱང་སྤྱི་ཚོགས་རིང་ལུགས་ཡིན་དུས་ཁོང་རྒྱ་ནག་དང་ཞེ་དྲགས་སེམས་ཐག་ཉེ་བོ་ཡོད་པ་རེད། ལོ་ཁ་ཤས་ཀྱི་གོང་དུ་ང་ཁོང་ལ་ཐུག་སྐབས། རྒྱ་ནག་སྤྱི་ཚོགས་རིང་ལུགས་རེད་དམ་ལབ་དུས་ཁོང་གིས་རྒྱ་ནག་སྤྱི་ཚོགས་རིང་ལུགས་མ་རེད། མ་རྩ་རིང་ལུགས་རེད་ཅེས་བརྗོད་ཀྱི་འདུག ནུབ་ཕྱོགས་ཀྱི་མ་རྩ་རིང་ལུགས་ཀྱི་རྒྱལ་ཁབ་ཁག་ལ་ཁྲིམས་ཀྱི་དབང་བསྒྱུར་ཡོད་པ་རེད། གཏམ་བརྗོད་རང་དབང་ཡོད་ཀྱང་རྒྱ་ནག་གི་མ་རྩ་རིང་ལུགས་ལ་དེའང་མེད་པས་རྙོག་དྲ་ཞེ་དྲགས་རེད་འདུག ད་ལྟ་སྲིད་འཛིན་ཞི་ཅིན་ཕིན་གྱིས་ལྐོག་ཟ་རུལ་སུངས་དེ་ཚོ་ཐག་གཅོད་བྱེད་པར་དཀའ་ངལ་ཞེ་དྲགས་འདུག་གཱ། ལྐོག་ཟ་རུལ་སུངས་ལ་འཐབ་རྩོད་བྱེད་སྐབས་ཡང་ལྐོག་ཟ་རུལ་སུངས་བྱེད་པའི་གོ་སྐབས་གསར་པ་དེ་འདྲ་རག་གི་འདུག་ཅེས་ང་ལ་དེ་འདྲ་བཤད་མཁན་བྱུང་། སྲིད་འཛིན་ཞི་ཅིན་ཕིན་གྱིས་བསམ་བློ་ཏོག་ཙམ་རྒྱ་ཆེན་པོ་གཏོང་དགོས། ངས་སྔ་མོ་རིག་གནས་གསར་བརྗེ་ཆེན་མོ་གཅིག་བྱུང་བ་རེད། དེ་ཞེ་སྡང་གི་སྒང་ནས་བསླངས་འདུག ད་རིག་གནས་གསར་བརྗེ་ཆེན་མོ་ཞིག་བྱེད་དགོས་པ་དང་། དེ་སྙིང་རྗེའི་སྒོ་ནས་བྱེད་དགོས་པ་རེད་ཅེས་བཤད་ཀྱི་ཡོད། ཅེས་གསུངས་འདུག
ཡང་ཁོང་གིས་མུ་མཐུད་དུ། ང་བཅོམ་ལྡན་འདས་ཀྱི་རྗེས་འབྲང་དགེ་སློང་ཞིག་རེད། ནུབ་ཕྱོགས་རྒྱལ་ཁབ་གང་སར་ངས་བྱམས་བརྩེའི་སྐོར་ཞེ་དྲགས་བཤད་ཀྱི་ཡོད། རྒྱ་ནག་ནང་པའི་ལུང་པ་ཞིག་ཡིན་ཞིང་། དེར་ཤེས་རབ་སྙིང་པོ་ལུངས་དྲངས་ཏེ་བྱམས་བརྩེ་སྤེལ་བའི་གོ་སྐབས་ཤིག་བྱུང་བ་ཡིན་ན་ཧུར་ཐག་འབད་ཐག་བྱེད་དགོས་བསམ་གྱི་འདུག ང་ལ་ཐོབ་ཐང་དང་གོ་ས་སོགས་གང་ཡང་མི་དགོས། ལོ་རྒྱུས་ཀྱི་ཐོག་ནས་ཏཱ་ལའི་བླ་མ་ཟེར་དུས་ཆོས་སྲིད་གཉིས་ཀྱི་དབུ་འཁྲིད་ཅིག་བྱས་ཏེ་ལོ་ ༤༠༠ ཙམ་ལ་བསྡད་པ་རེད། དེ་ངས་ཕྱི་ལོ་ ༢༠༡༡ ལོ་ནས་རྦད་དེ་གཙང་མ་བཟོས་ཡིན། ཞེས་བཀའ་ལན་གནང་།
ཤེས་ཡོན་པ་ཆིན་ཝེ་ཕིན་ལགས་ཀྱིས། བྱམས་སྙིང་རྗེ་ནི་ཧ་ཅང་གལ་ཆེན་པོ་རེད། ཉེ་བའི་ལོའི་ནང་རྒྱ་ནག་ནང་གི་དཔལ་འབྱོར་ཐད་འགྱུར་ལྡོག་ཆེན་པོ་ཕྱིན་ཡོད་ཀྱང་། ཡ་རབས་བཟང་སྤྱོད་ཐོག་ལྡོག་ཕྱོགས་ཀྱི་ཉམས་ཆག་ཆེན་པོ་ཕྱིན་ཡོད་སྟབས། ༧གོང་ས་མཆོག་གིས་གསུངས་པའི་བྱམས་སྙིང་རྗེ་དེ་རྒྱ་ནག་གི་དཀའ་ངལ་སེལ་ཐབས་ཙམ་མ་ཟད། སྤྱི་ཚོགས་ཧྲིལ་པོའི་གནད་དོན་སེལ་ཐབས་ཤིག་ཡིན་པས་ང་ཚོས་ནུས་པ་ཆེན་པོ་བཏོན་ཏེ་སྐུལ་འདེད་གཏོང་དགོས་པ་ཞིག་ཡིན་ཡང་། རྒྱ་ནག་གི་སྤྱི་ཚོགས་མྱུར་ཚད་མཐོན་པོས་འཕེལ་རྒྱས་ཕྱིན་པ་དང་བསྟུན། སྤྱི་ཚོགས་གྲལ་རིམ་ལ་འགྱུར་ལྡོག་ཆེན་པོ་ཕྱིན་ཡོད་པ་དེར་གཞོན་སྐྱེས་ཚོས་དོ་འཁུར་གནང་གི་ཡོད་ཀྱང་། སྤྱི་ཚོགས་གྲལ་རིམ་ཧ་ཅང་མཁྲེགས་པོ་ཆགས་ཚར་ཡོད་དུས་བསྒྱུར་བཅོས་གཏོང་བའི་ནུས་པ་མེད་སྟབས། སྤྱི་ཚོགས་ཀྱི་བཟང་ཆ་དར་སྤེལ་དང་སྤྱི་ཚོགས་སྔར་ལས་མཛེས་སྡུག་ལྡན་པ་ཞིག་བཟོ་བར་ཐབས་ལམ་ཅི་དགོས་སྐོར་བཀའ་འདྲི་ཞུས།
༧གོང་ས་མཆོག་གིས། རྙོག་དྲ་དེ་ཚོའི་གྲས་ཀྱི་རྩ་བ་འདྲ་པོ་དེར་ང་ཚོས་འགུལ་སྐྱོད་ཅིག་གཏང་མ་ཐུབ་ན་ཁག་པོ་ཞེ་དྲགས་རེད་འདུག འཛམ་བུ་གླིང་གི་རྙོག་དྲ་དེ་རིགས་དཔེར་ན་སི་རི་ཡའི་གནས་ཚུལ་དེ་ཚོ་ཁྱོན་ནས་སེམས་ཀྱིས་མ་བཟོད་པ་ཞིག་འདུག་སྟེ། གནས་ཚུལ་དེ་ཚོ་མཐོང་ཐོས་བྱུང་སྐབས་མིག་ཆུ་བཏང་ནས་འདུག་རྒྱུ་མ་གཏོགས་བྱེད་རྒྱུ་གང་ཡང་མི་འདུག་གཱ། ད་ལྟའི་གནས་སྟངས་ཐབས་སྐྱོ་བོ་ཞེ་དྲགས་ཡོད་པ་དེ་མ་འོངས་པར་མི་ཡོང་བ་ཞིག་ལ་ང་ཚོས་ད་ལྟ་བསམ་བློ་གཏོང་དགོས་ཀྱི་འདུག་ཅེས་ངས་བཤད་ཀྱི་ཡོད། རྒྱ་ནག་ལ་ཆ་བཞག་ན། ད་ལྟའི་གནས་སྟངས་ཀྱི་ཐོག་ནས་རིམ་གྱིས་རིམ་གྱིས་འགྱུར་བ་ཞིག་གཏོང་ཐུབ་ན་མ་གཏོགས་ཁག་པོ་ཞེ་དྲགས་རེད་ཅེས་གསུངས་འདུག
མུ་འགོད།
གསར་འགོད་པ། པདྨ་མཚོ།
