རྒྱ་ནག་གིས་དམག་སྦྱོང་བྱས་ཏེ་ཐའེ་ཝན་ལ་འཇིགས་སྣང་སྐུལ།

རྒྱ་ནག་གི་མཁའ་དམག་དང་མཚོ་དམག་མཉམ་འབྲེལ་ཐོག་བྱང་ཤར་རྒྱ་མཚོའི་ངོགས་སུ་དམག་སྦྱོང་མགོ་འཛུགས་བྱས་ཡོད་ཅིང་། སྲིད་དོན་པ་ཚོས་དེ་ནི་ཐའེ་ཝན་ལ་ཉེན་བརྡ་གཏོང་གི་ཡོད་པར་ངོས་འཛིན་བྱེད་བཞིན་ཡོད།

དེ་རིང་ཨེ་ཕེ་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་ཕྱི་ཚེས་ ༡༥ ཉིན་རྒྱ་ནག་མི་དམངས་བཅིངས་འགྲོལ་དམག་ཟེར་བའི་མཁའ་དམག་དང་མཚོ་དམག་མཉམ་འབྲེལ་ཐོག་ཀོ་རི་ཡ་དང་རྒྱ་ནག་གི་བྱང་ཤར་མཐའ་མཚམས་ཀྱི་པོ་ཧྭེ་རྒྱ་མཚོའི་ (Bohai Sea) སྟེང་དུ་དྲག་ཆས་དམག་སྦྱོང་མགོ་བཙུགས་ཡོད་པ་དང་། དྲག་ཆས་དམག་སྦྱོང་ཁྲོད་དུ་མཁའ་དམག་གནམ་གྲུ་ ༡༠ དང་མཚོ་དམག་གྲུ་གཟིངས་ ༡༠ ལྷག་གིས་གོ་མཚོན་བེད་སྤྱོད་གཏོང་ཕྱོགས་ལ་སྦྱོང་བརྡར་དང་མེ་ཤུགས་འཕུར་མདེལ་དང་མེ་ཤུགས་འཕུར་མདེལ་འགོག་བྱེད་བཅས་ཀྱི་དྲག་ཆས་མང་པོར་ཚོད་ལྟ་བྱེད་ཀྱིན་ཡོད་འདུག

སྲིད་དོན་དབྱེ་ཞིབ་པ་ཚོས་རྒྱ་ནག་གི་དམག་སྦྱོང་དེ་ནི། ཐའེ་ཝན་གྱི་སྲིད་འཛིན་ལྕམ་ཚའེ་ཡེན་ཝན་གྱིས་ཐའེ་ཝན་རང་བཙན་མཁྲེགས་འཛིན་བྱས་པ་དང་། ཨ་རིའི་སྲིད་འཛིན་བདམས་འཐོན་པ་ཊི་རུམ་ཕི་ཡིས་རྒྱ་ནག་གཅིག་གི་སྲིད་བྱུས་ངོས་ལེན་མ་བྱས་པ་བཅས་ལ་བརྟེན་ཏེ། རྒྱ་ནག་གཞུང་གིས་ཐའེ་ཝན་ལ་འཇུགས་སྐུལ་དང་ཨ་རི་སོགས་འགལ་ཟླའི་རྒྱལ་ཁབ་ཁག་ལའང་བརྡ་ལན་ཞིག་སྤྲོད་ཀྱིན་ཡོད་སྐོར་བརྗོད། ཁ་སང་གཟའ་ཕུར་བའི་ཉིན། རྒྱ་ནག་གི་ཕྱི་སྲིད་བློན་ཆེན་ཝཱང་ཡིས་ཧྥ་རན་སིའི་ཕྱི་སྲིད་བློན་ཆེན་དང་ཐུག་སྐབས། རྒྱལ་ཁབ་སུ་འདྲ་ཞིག་ཡིན་ཡང་རྒྱ་ནག་ལ་འབྲེལ་ལམ་འཛུགས་པའི་ཆ་རྐྱེན་ཨང་དང་པོ་དེ་རྒྱ་ནག་གཅིག་གི་སྲིད་བྱུས་ངོས་ལེན་རྒྱུན་འཁྱོངས་བྱེད་དགོས་པ་དེ་ཡིན་པ་དང་། གལ་སྲིད་རྩ་དོན་དེར་ངོས་ལེན་མི་བྱེད་མཁན་ཞིག་ཡིན་ན་རྒྱ་ནག་གིས་སྣང་མེད་དུ་འཇོག་ཐབས་མེད་སྐོར་སོགས་བརྗོད་ཡོད་འདུག

རྒྱ་ནག་གཞུང་འབྲེལ་བརྙན་འཕྲིན་ཁང་ (CCTV) གིས། ཐེངས་འདིའི་དྲག་ཆས་སྦྱོང་བརྡར་དེ་ནི་རྒྱ་ནག་གི་མཁའ་མཚོ་གཉིས་ཀྱི་དམག་དཔུང་མཉམ་འབྲེལ་གྱི་དྲག་ཆས་དམག་སྦྱོང་ཐོག་དང་པོ་དེ་ཆགས་ཀྱི་ཡོད་ལུགས་བཤད་འདུག རྒྱ་ནག་མི་དམངས་བཅིངས་འགྲོལ་དམག་ཁུལ་གྱི་མཚོ་དམག་གི་དམག་སྤྱི་ཆེན་མོ་ཞུའུ་ཡེན་ (Xu Ying) ཟེར་བ་ཞིག་གིས། ཐེངས་འདིའི་མཁའ་མཚོ་གཉིས་མཉམ་འབྲེལ་དྲག་ཆས་སྦྱོང་བརྡར་ལ་བརྟེན་ནས། རྒྱ་ནག་གི་དྲག་ཆས་དམག་གི་སྟོབས་ཤུགས་ལ་བློ་སྤོབས་གསར་བ་ཞིག་བསྐྱེད་ཡོད། ཅེས་བཤད་འདུག

ཟླ་འདིའི་ཕྱི་ཚེས་ ༡༤ ཉིན་ཨ་རིའི་གཞུང་ཕྱོགས་ནས་རྒྱ་ནག་གཞུང་གིས་ལྷོ་བརྒྱུད་མཚོ་ཁུལ་ཁག་ཏུ་མཚོ་དམག་དང་མཁའ་དམག་གི་སྟོབས་ཤུགས་ཇེ་ཆེར་གཏོང་གི་ཡོད་པ་མ་ཟད། རྒྱ་ནག་གིས་འཛུགས་སྐྲུན་བྱས་པའི་མིས་བཟོས་གླིང་ཕྲན་ཁག་ནང་དྲག་ཆས་མང་པོ་སྐྱེལ་འདྲེན་བྱས་ཏེ་རྒྱལ་སྤྱིའི་མཚོ་འགྲུལ་རང་དབང་ལ་ཚོད་འཛིན་བྱེད་བཞིན་པར་སྐྱོན་བརྗོད་བྱས་ཡོད་འདུག

གནས་ཚུལ་འདིའི་མཇུག་ཏུ། རྒྱ་ནག་གཞུང་གིས་བྱང་ཤར་མཐའ་མཚམས་ཀྱི་པོ་ཧྭེ་རྒྱ་མཚོའི་ (Bohai Sea) སྟེང་དུ་དྲག་ཆས་དམག་སྦྱོང་བྱས་པ་དེས་འབྲེལ་ཡོད་རྒྱལ་ཁབ་ཁག་ལ་དངངས་འཚུབ་བསླངས་མེད་ནའང་། རྒྱ་ནག་གི་ལྷོ་བརྒྱུད་མཚོ་ཁུལ་ཁག་གི་བདག་དབང་དང་ལྷག་པར་དུ་ཐའེ་ཝན་མཚོ་འགག་གི་གནད་དོན་ལ་བརྟེན་ནས་ཨ་རྒྱ་གཉིས་བར་གྱི་འབྲེལ་ལམ་ལ་དོ་ཕོག་ཆེན་པོ་བཟོས་ཡོད་སྐོར་བཀོད་འདུག

རྒྱ་ནག་མི་དམངས་བཅིངས་འགྲོལ་དམག་ཁུལ་གྱི་མཁའ་དམག་དང་མཚོ་དམག་གཉིས་ཀྱིས་རྒྱ་ནག་གི་བྱང་ཤར་དང་ལྷོ་བརྒྱུད་མཚོ་ཁུལ་ཁག་ཏུ་ལའོ་ཉིན་ (Liaoning) ཞེས་པའི་དྲག་ཆས་དམག་སྦྱོང་ལ་བརྟེན་ནས་འདས་ལོ་ངོ་བཅུ་ཕྲག་རིང་གི་ཨ་རིའི་དམག་དཔང་གི་སྟོབས་ཤུགས་ལ་འགྲན་སློང་བཞིན་ཡོད་འདུག

མ་འོངས་ལོ་ངོ་ ༡༥ ནང་རྒྱ་ནག་གིས་མུ་མཐུད་དུ་མཁའ་མཚོ་གཉིས་ཀྱི་དམག་ཤུགས་ཇེ་ཆེར་བཏང་བ་ཡིན་ན། ཕྱི་ལོ་ ༢༠༢༠ བར་མཁའ་མཚོ་གཉིས་ཀྱི་དམག་དཔུང་གི་སྟོབས་ཤུགས་འཕེལ་རྒྱས་འགྲོ་རྒྱུ་ཡིན་པར་ཡིད་ཆེས་བྱེད་ཀྱིན་ཡོད་འདུག

གསར་འགོད་པ། པདྨ་རྒྱལ།