མདུན་ངོས།
About Us
  • English
Advertisement
བོད་ཀྱི་དུས་བབ།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
བོད་ཀྱི་དུས་བབ།
English
No Result
ཆ་ཚང་གཟིགས།

འོས་བསྡུའི་སྒྲིག་གཞི་བསྐྱར་བཅོས་ཐད་སྤྱི་འཐུས་ཁག་ཅིག་གི་དགོངས་ཚུལ།

བོད་ཀྱི་དུས་བབ།
༢༠༡༧/༠༣/༢༧
Share on FacebookShare on TwitterShare on EmailShare on Whatsapp

དེ་རིང་སྔ་དྲོའི་ཆུ་ཚོད་ ༩ སྟེང་། བཞུགས་སྒར་དྷ་ས་ནོར་བུ་གསོལ་མགྲོན་ཁང་དུ། བོད་རྒྱལ་ཡོངས་མང་གཙོ་ཚོགས་པས་གོ་སྒྲོག་འོག སྐབས་བཅུ་དྲུག་པའི་བོད་མི་མང་སྤྱི་འཐུས་གྲོས་ཚོགས་ཚོགས་དུས་གསུམ་པའི་སྟེང་གི་གླེང་གཞི་དང་འབྲེལ་ཏེ། བུད་མེད་ཀྱི་ནུས་སྟོབས་གོང་འཕེལ་གཏོང་ཕྱོགས་དང་། འོས་བསྡུའི་སྒྲིག་གཞི་བསྐྱར་བཅོས་གཉིས་ཀྱི་ཐོག་བགྲོ་གླེང་ཚོགས་སོང་།

བགྲོ་གླེང་ཐོག་གཏམ་བཤད་གནང་མཁན་བོད་མི་མང་སྤྱི་འཐུས་པདྨ་འབྱུང་གནས་དང་། ཨ་ཀྲུག་ཚེ་བརྟེན། ཐུབ་བསྟན་ལུང་རིགས། གསེར་རྟ་ཚུལ་ཁྲིམས། ཟླ་བ་ཕུད་སྐྱིད་བཅས་རེད།

འོས་བསྡུའི་སྒྲིག་གཞི་བསྐྱར་བཅོས་སྐོར་ལ་སྤྱི་འཐུས་ཟླ་བ་ཕུན་སྐྱིད་ལགས་བརྗོད་དོན། ང་རང་ཚོའི་གནས་བབ་ལ་དཔག་པའི་ང་ཚོའི་བཙན་བྱོལ་གྱི་ཆབ་སྲིད་གནས་བབ་དམངས་གཙོའི་ལམ་ལུགས་འདི་གཞན་དང་མ་འདྲ་བའི་དམངས་གཙོའི་ཁྱད་ཆོས་ལྡན་པ་ཞིག་ཆགས་བསྡད་ཡོད་པ་དང་། འདིའི་ཐོག་ནས་མི་མང་ལ་བསམ་བློ་གཏོང་བའི་གོ་སྐབས་ཐོལ་པ་ཞིག་སྐྲུན་གྱི་ཡོད་པ་རེད། རྒྱལ་ཁབ་གཞན་པ་ཚོས་འོས་ཐེངས་གཅིག་ལྡུག་གི་ཡོད་པ་དེ་ཁོ་རང་ཚོར་ཆབ་སྲིད་ཚོགས་པའི་ཐོག་ནས་འོས་མི་འདོན་མཁན་དང་རྒྱབ་སྐྱོར་བྱེད་མཁན་ཡོད་པ་རེད། ཡིན་ནའང་ང་ཚོར་དེ་མེད་པས་མི་མང་རང་གི་རྣམ་དཔྱོད་ཀྱི་ཐོག་ནས་ཐག་གཅོད་དགོས་པ་ཞིག་ཡིན་སྟབས། འོས་ཐེངས་དང་པོར་མཉམ་ཞུགས་བྱེད་མ་ཐུབ་ཀྱང་ཐེངས་གཉིས་པར་མཉམ་ཞུགས་བྱེད་ཐུབ་པ་དང་། འོས་ཐེངས་དང་པོར་ནོར་འཁྲུལ་ཤོར་ཡང་ཐེངས་གཉིས་པར་མ་ནོར་བ་བྱེད་ཐུབ་པ་རེད་དེ་གཅིག་རེད།

གཉིས་པ་འོས་ཐེངས་གཅིག་མ་གཏོགས་བླུག་རྒྱུ་མེད་པ་ཡིན་ན། སྤྱི་འཐུས་རྙིང་པ་ཤ་སྟག་བསླེབ་རྒྱུ་རེད། གང་ཡིན་ཟེར་ན། སྤྱི་འཐུས་རྙིང་པ་དེ་ཚོ་རྟག་པར་གཟིགས་མཐོང་བརྙན་འཕྲིན་ནང་མཐོང་བསྡད་ཡོད་སྟབས་མི་མང་གིས་ངོ་ཤེས་ཀྱི་ཡོད་པ་རེད། ཡིན་ནའང་དེ་ཚོ་ལས་གཞན་པའི་མི་ཡག་པོ་དང་འཇོན་པོ་སུ་ཡོད་མེད་མི་མང་གིས་ཧ་གོ་བ་མ་རེད། དེར་བརྟེན། འོས་ཐེངས་གཉིས་པ་ལྡུག་པའི་གོ་སྐབས་ཡོད་ན། སྤྱི་འཐུས་ཚོར་སྐྱོན་ཡོད་ན་མི་མང་གིས་བཤད་སའི་སྡིངས་ཆ་རག་གི་རེད་ལ། སྤྱི་འཐུས་ལ་བཞེངས་མཁན་ཚོའང་རྙིང་པ་ཚོ་ལས་ལྷག་པའི་འཇོན་ཐང་ཞིག་ཡོད་ན་དེ་སྟོན་པའི་སྡིངས་ཆ་རག་གི་ཡོད་སྟབས། འོས་ཐེངས་གཉིས་བླུག་དགོས་པ་དེ་གལ་ཆེན་པོ་ཞེ་དྲགས་རེད།

དཔེར་ན། ང་སྐབས་བཅུ་གསུམ་པའི་སྤྱི་འཐུས་རེད། ད་ལྟ་གྲོས་ཚོགས་ནང་སྐབས་བཅུ་གསུམ་པའི་སྤྱི་འཐུས་གཉིས་ལས་ཡོད་པ་མ་རེད། མདོ་སྨད་ལ་མཚོན་ན་ཚང་མ་བརྗེ་བོ་ཐེབས་ཚར་བ་རེད། མདོ་སྟོད་ནང་ད་ལྟ་གཅིག་རང་ལྷག་ཡོད་པ་རེད། ཆོས་ལུགས་ཀྱང་དེ་དེ་བཞིན་རེད། འོས་ཐེངས་གཅིག་ལས་ལྡུག་རྒྱུ་མེད་པ་ཡིན་ན་སྤྱི་འཐུས་རྙིང་པ་རྣམས་རང་འཇགས་འདུག་གི་རེད། དེར་བརྟེན། དམངས་གཙོ་ཚད་དང་ལྡན་པ་ཞིག་ཡོང་དགོས་ན་འོས་བསྡུའི་སྒྲིག་གཞིའི་ནང་སྔོན་འགྲོ་དང་དངོས་གཞི་ཐེངས་གཉིས་དགོས་པ་གལ་ཆེན་པོ་རེད། ཅེས་བརྗོད་སོང་།

སྤྱི་འཐུས་གསེར་རྟ་ཚུལ་ཁྲིམས་ལགས་ཀྱིས་བརྗོད་གཞི་དེའི་སྟེང་གསུངས་དོན། དྷ་རམ་ས་ལར་ལོ་ཉི་ཤུར་བསྡད་པའི་ཉམས་མྱོང་གང་ལ་གང་འཚམ་བསགས་ཡོང་བའི་བསམ་བློའི་ཐོག་ནས་བཤད་ན། ཁ་གསལ་པོ་བྱས་ཏེ་ཞུས་པ་ཡིན་ན། ང་ལྟ་བུར་མཚོན་ན། སྔོན་འགྲོ་དང་དངོས་གཞི་གཉིས་དགོས་པའི་རྒྱུ་མཚན་གསལ་བོ་མཐོང་གི་མི་འདུག ནམ་རྒྱུན་སྤྱི་འཐུས་རྙིང་པ་ཡིན་ན་འདྲ་ལ་གསར་པ་ཡིན་ནའང་འདྲ། དངོས་གཞི་གཅིག་མ་གཏོགས་མེད་ཀྱང་། དེའི་སྔོན་ལ་ཁྱབ་བསྒྲགས་བྱེད་པ་དང་མི་མང་གིས་ཤེས་རྟོགས་བྱེད་པའི་བརྒྱུད་ལམ་ཆ་ཚང་ཡོད་པ་རེད། ང་རང་གི་ཞེད་སྣང་ཆེ་ཤོས་དེ་ག་རེ་ཡིན་ལབ་ན། ལོ་སྔོན་མར་བྱུང་མ་ཐག་པའི་སྲིད་སྐྱོང་འོས་བསྡུར་བལྟས་ན། མ་འོངས་པར་མུ་མཐུད་དུ་དེ་འདྲ་ཞིག་ཡོང་བ་ཡིན་ན། བཙན་བྱོལ་སྤྱི་ཚོགས་འདི་ཁ་འཐོར་དགུ་འཐོར་དུ་འགྲོ་རྒྱུ་མ་གཏོགས་ང་ཚོར་ལམ་ཀ་གཞན་མི་འདུག་བསམ་པའི་ཚོར་སྣང་ཡོང་གི་འདུག འདས་པའི་ལོ་རྒྱུས་ཀྱི་བརྒྱུད་རིམ་ལ་བལྟས་ནའང་སྔོན་འགྲོ་དང་དངོས་གཞིར་འགྱུར་བ་ཆེན་པོ་འགྲོ་ཐུབ་ཡོད་པ་མ་རེད།

ད་ལྟ་ང་ཚོར་བརྟན་བརླིང་དེ་གནད་འགག་ཆེ་ཤོས་རེད་འདུག ལོ་སྔོན་མའི་འོས་བསྡུ་ཆེན་མོས་ང་ཚོའི་སྤྱི་ཚོགས་ལ་བརྡབ་གསིག་ཆེན་པོ་ཞིག་ཐེབས་སོང་། སྤྱིར་བཏང་ནོར་འཁྲུལ་དེ་འོས་བསྡུའི་སྒྲིག་གཞིར་བརྟེན་ཏེ་བྱུང་བ་ཞིག་མ་རེད། ཡིན་ནའང་འོས་བསྡུའི་སྒྲིག་གཞི་འདི་ལྟར་མུ་མཐུད་ནས་བསྡད་ན། ང་ཚོ་གང་ཟག་ཚོའི་བྱེད་སྟངས་དེ་མུ་མཐུད་ནས་སྡུག་ཏུ་སྡུག་ཏུ་འགྲོ་བ་མ་གཏོགས་ཡག་ཏུ་འགྲོ་ཡི་ཡོད་པ་ཞིག་ཚོར་གྱི་མི་འདུག དེར་བརྟེན། འོས་བསྡུ་དེ་ཐེངས་གཅིག་གིས་ཐག་བཅད་ན་ཡག་པོ་འདུག་བསམ་ཡོད། འདས་པའི་ལོ་རྒྱུས་ནང་ང་ཚོའི་སྤྱི་ཚོགས་ནང་ཆབ་སྲིད་དང་དམངས་གཙོ་སོགས་ལ་རེ་བ་མང་པོ་བརྒྱབ་པ་རེད། འོན་ཀྱང་ང་ཚོའི་སྤྱི་ཚོགས་འདི་ལྟར་འགྲོ་སྟངས་ལ་བལྟས་ཡོང་ན། རྒྱ་ཆེན་པོའི་བག་ཆགས་ཤིག་འཇོག་མ་ཐུབ་ཀྱང་སྤྱི་ཚོགས་ཆིག་སྒྲིལ་གྱི་ངོ་བོར་གནས་དགོས་པ་དེ་གལ་ཆེ་ཤོས་རེད། དེ་ཡོང་ཐབས་ལ་འོས་བསྡུ་གཅིག་བྱས་ན་དྲག་པ་མེད་འགྲོ་བསམ་པ་ཡིན། ཞེས་བརྗོད་སོང་།

སྤྱི་འཐུས་ཨ་ཀྲུག་ཚེ་བརྟེན་ལགས་ཀྱིས་བརྗོད་དོན། ང་རང་གི་བསམ་ཚུལ་དེ་གསལ་བོ་ཡིན། ནམ་བཞག་རྒྱུན་དུ་ནས་སྐད་ཆ་ག་རེ་བཤད་ཀྱང་སོ་སོའི་བསམ་ཚུལ་དེ་ཤོད་ཀྱི་ཡོད། འོས་བསྡུ་ཐེངས་གཅིག་བྱེད་དམ་གཉིས་བྱེད་ལས་ཐེངས་གཅིག་བྱེད་དགོས་ཟེར་གྱི་ཡོད།

འོས་བསྡུ་ཐེངས་གཉིས་བྱས་ན་སྐྱོན་ག་རེ་ཡོད་པ་རེད་ཟེར་ན། ང་ཚོ་རྩ་དོན་འཐབ་རྩོད་པ་ཞིག་ཡིན་པ་དང་། རྩ་དོན་འཐབ་རྩོད་པ་ཞིག་གི་སྲོག་རྩ་ལྟ་བུ་དེ་རྡོག་རྩ་གཅིག་བསྒྲིལ་རེད། རྡོག་རྩ་གཅིག་སྒྲིལ་བྱས་ཏེ་རྩ་དོན་རྩོད་དགོས་ན་རྡོག་རྩ་གཅིག་སྒྲིལ་ལ་གཏོར་བཤིག་གཏོང་པའི་ལམ་ཁ་དེ་འཇོག་རྒྱུ་ཡོད་པ་མ་རེད། འོས་བསྡུ་ཐེངས་གཉིས་ཀྱི་ལམ་ལུགས་དེས་ཆོལ་ཁ་ཆོས་ལུགས་འཐེན་འཁྱེར་ཤུགས་ཆེན་པོ་འགྲོ་བ་དང་། ང་ཚོའི་རྩ་དོན་ནུས་ཤུགས་གཅོག་མཁན་རྒྱ་ནག་གཞུང་གིས་ཀྱང་དེའི་ནང་ལག་པ་བསྐྱངས་ཡོང་བ་གི་ཡོད་པ་རེད། དེ་བཞིན། བོད་མིའི་སྒྲིག་འཛུགས་ལ་བློ་ལོག་མཁན་དོལ་རྒྱལ་རྗེས་འབྲང་བ་ཚོའང་དེའི་བར་འཛུལ་ཡོང་གི་ཡོད་པ་རེད། དེ་ལ་ང་ཚོའི་མང་ཚོགས་མགོ་འཐོམ་ཏེ་ང་ཚོའི་སྤྱི་ཚོགས་ནང་ཁྱོད་ཤི་ང་གསོན་ལྟ་བུའི་གནས་སྟངས་དེ་འོས་བསྡུ་སྔོན་འགྲོ་དང་དངོས་གཞིའི་བར་དུ་ཡོང་གི་ཡོད་པ་རེད།

འོས་ཐེངས་གཅིག་ལའང་ཉེན་ཁ་མེད་པ་མིན་ཡང་། དུས་ཚོད་ཐུང་ཐུང་ཞིག་གི་ནང་ལ་ཚར་འགྲོ་བཞིན་ཡོད་སྟབས་ཉེན་ཁ་ཆུང་བ་ཡོད་པ་རེད། མང་ཚོགས་ཀྱིས་འོས་སུ་ལ་ལྡུག་དགོས་ཧ་གོ་དང་མ་གོའི་དཀའ་ངལ་དེ་ད་ལྟ་ཡོད་པ་མ་རེད། ད་ལྟའི་བརྡ་འཕྲིན་དུས་རབས་ནང་གནས་ཚུལ་ག་རེ་ཡིན་ཡང་ཆུ་ཚོད་ ༢༤ ནང་གསལ་བོ་ཆགས་འགྲོ་བཞིན་ཡོད་པ་རེད། དེར་བརྟེན། མང་ཚོགས་ལ་འདམ་ག་མ་རག་པ་དང་དུས་ཚོད་མ་འདང་བའི་དཀའ་ངལ་ཡོད་པ་མ་རེད།

འོས་ཐེངས་གཅིག་བླུགས་པ་དང་ཐེངས་གཉིས་བླུགས་པ་གཉིས་ཀྱི་མཇུས་འབྲས་གཅིག་པ་རེད། དཔེར་ན། ང་རང་ལ་ཆ་བཞག་ན་འོས་གསུམ་ལྡུག་ཆོག་པ་རེད། ངས་སྔོན་འགྲོའི་སྐབས་སུ་སྲིད་སྐྱོང་སུ་ལ་འོས་བླུགས་པ་དེ་དངོས་གཞིའི་སྐབས་རང་འཇགས་བསླེབས་ཡོད། ཆོས་བརྒྱུད་སྤྱི་འཐུས་ལ་མཚོན་ན་ངས་སྔོན་འགྲོའི་སྐབས་འོས་བླུགས་པ་དེ་དངོས་གཞིའི་སྐབས་སུ་དང་པོ་གཉིས་པ་ཆགས་ཡོད་པ་རེད། དེ་བཞིན། ཆོལ་ཁའི་སྤྱི་འཐུས་བཅུ་ལས་གཅིག་མ་གཏོགས་རང་འཇགས་བསླེབས་ཡོད་པ་རེད།

འོས་བསྡུའི་ཚོགས་ཆུང་གིས་གསུངས་པ་ལྟར། རྒྱ་ཆེའི་མང་ཚོགས་ཀྱི་བསམ་ཚུལ་བསྡུས་ཡོད་ཀྱང་། ང་རང་གི་བསམ་ན་དེའི་ནང་ཁ་གདངས་སྡོད་མཁན་ཚོའི་བསམ་ཚུལ་མ་གཏོགས། གཞི་རིམ་མང་ཚོགས་ཀྱི་བསམ་ཚུལ་དེ་བསླེབས་ཡོད་པ་མ་རེད་བསམ་གྱི་འདུག དཔེར་ན། ཁ་སང་གི་གནས་ཚུལ་དེའི་རྗེས་ལ་ང་རང་སྒེར་ལ་མང་པོ་ཞིག་གིས་འབྲེལ་བ་བྱས་ཏེ། ང་ཚོའི་བསམ་བློ་དེ་ཕུལ་ཐུབ་མ་སོང་། འོས་གཅིག་བྱས་ན་ཡག་པོ་འདུག་གསུང་མཁན་མང་པོ་བྱུང་སོང་། ད་ལྟ་དྲ་ཐོག་ཏུ་འོས་བསྡུ་ཞིག་འགྲོ་བསྡད་པའི་ནང་འོས་ཐེངས་གཅིག་ལྡུག་རྒྱུ་དེ་བརྒྱ་ཆ་བདུན་ཅུ་དོན་གཉིས་དང་། ཐེངས་གཉིས་ལྡུག་རྒྱུ་དེ་བརྒྱ་ཆ་ཉི་ཤུ་རྩ་གྲངས་ཤིག་རེད། ཅེས་བརྗོད་སོང་།

སྤྱི་འཐུས་པདྨ་འབྱུང་གནས་ལགས་ཀྱིས་བརྗོད་དོན། ངའི་ལངས་ཕྱོགས་ཟེར་ན་རེད། ལྟ་ཕྱོགས་དེ་དངོས་གཞི་དང་སྔོན་འགྲོ་གཉིས་དགོས་པ་དེ་རེད། མང་ཚོགས་ཀྱིས་དགོངས་འཆར་གསུངས་ཡོད་པ་དེ་ང་ཚོའི་གཞུང་འབྲེལ་གྱི་ཐོག་ནས་ས་གནས་མགོ་འཛིན་ཡོད་ས་ཚང་མར་གསལ་བསྒྲགས་བྱས་པ་རེད། སྐུ་ཚབ་དོན་གཅོད་ཡོངས་རྫོགས་ལ་གསལ་བསྒྲགས་བྱས་པ་རེད། དེ་འདྲའི་བརྒྱུད་རིམ་ཁྲོད་ནས་བསམ་ཚུལ་བསླེབས་པ་ཞིག་རེད་མ་གཏོགས། དེ་རིང་ཁ་སང་དྲ་ལམ་བརྒྱུད་དེ་བསམ་ཚུལ་མང་པོ་ཞིག་ཡོང་གི་ཡོད་པ་དེ་འདྲ་མ་རེད། གལ་སྲིད་མང་ཚོགས་ཀྱིས་སྐབས་དེར་དགོངས་ཚུལ་གསུངས་མེད་ན། སུས་བཀག་པ་རེད། དེ་འགོག་པ་པོ་སུ་རེད། ང་ཚོའི་ངོས་ནས་དེ་དང་འདིའི་ཐོག་ལ་དགོངས་འཆར་འདོན་ཆོག་གི་མ་རེད་གང་ཡང་ལབ་མེད། མི་མང་ལ་དགོངས་ཚུལ་གང་ཡོད་པ་དེ་འཁྱེར་ཤོག་ལབ་ཡོད་པ་རེད། ང་ཚོར་འབྱོར་བསྡད་པའི་བསམ་ཚུལ་ནང་དུ་སྔོན་འགྲོ་དང་དངོས་གཞི་དགོས་ཀྱི་ཡོད་པ་གསལ་བོ་རེད།

ད་ལྟའི་ང་ཚོའི་གསུང་སྟངས་བྱས་ན་ཆིག་སྒྲིག་གསུང་གི་ཡོད་པ་རེད། ཕྱོགས་གཅིག་ནས་ཆིག་སྒྲིལ་དགོས་ཀྱི་རེད། ཡིན་དང་ཡིན། ཆིག་སྒྲིལ་མ་ཡོང་བའི་རྐྱེན་དེ་སྔོན་འགྲོ་དང་དངོས་གཞི་གཉིས་ཡོད་པའི་རྐྱེན་གྱིས་རེད་དམ། དངོས་ཡོད་གནས་ཚུལ་དེ་ང་ཚོས་ཁས་ལེན་དགོས་པ་རེད། ཁ་སང་དེ་རིང་དྲ་ལམ་གྱི་ཆུ་ཚོད་ཡིན་སྟབས། ཆུ་ཚོད་ ༢༤ ནང་ཡོངས་རྫོགས་ཁྱབ་འགྲོ་བ་རེད་གསུང་གི་ཡོད་པ་རེད། དེ་འདྲ་ཡིན་ན། ཆུ་ཚོད་ཉེར་བཞི་བཞག་ནས་ཆུ་ཚོད་ ༡༢ ནང་ལ་ང་ཚོས་འོས་བསྡུ་བྱེད་ཐུབ་པ་རེད་དམ། ཁ་སང་དཔལ་ལྡན་སྲུད་སྐྱོང་མཆོག་གིས་གསུངས་པ་དེ་ག་རང་རེད་ལ། དེ་རིང་སྤྱི་འཐུས་མཆོག་གི་གསུངས་པའང་དེ་ག་རང་རེད།

ང་ཚོའི་ཆིག་སྒྲིལ་སོགས་ཀྱི་ཐོག་ལ་མི་སོ་སོའི་བསམ་བློ་གཏོང་སྟངས་ལ་འགྱུར་བ་གཏོང་དགོས་ཀྱི་ཡོད་པ་རེད། འོས་བསྡུའི་སྒྲིག་གཞི་ཟེར་བ་དེ་གནད་དོན་གཅིག་རེད་མ་གཏོགས་གཙོ་བོ་དེ་མི་སོ་སོའི་བསམ་བློ་གཏོང་སྟངས་ལ་འགྱུར་བ་གཏོང་དགོས་པ་རེད། ང་ཚོས་ཆིག་སྒྲིལ་ཡོང་བའི་ཆེད་དུ་ག་རེ་གནང་དགོས་པ་དེ་སོ་སོའི་ངོས་ནས་བསམ་བློ་གཏོང་དགོས་པ་རེད། སོ་སོའི་ངོས་ནས་འགྱུར་བ་གཏོང་མ་ཐུབ་པ་ཡིན་ན། སྒྲིག་གཞི་ག་ཚོད་འགྱུར་བ་བཏང་ཡང་ཁྱད་པར་དེ་ཙམ་འགྲོ་བ་རེད་བསམ་གྱི་མི་འདུག དེར་བརྟེན། དམངས་གཙོ་ཡང་དག་པ་ཞིག་གི་ཐོག་ལ་འགྲོ་དགོས་ན། མང་ཚོགས་ཀྱི་དགོངས་པའི་ནང་གང་ཡོད་པ་དེ་ཡོང་དགོས་པ་ཞིག་དང་། ལྷག་པར་དུ་ང་ཚོ་ནང་པ་སངས་རྒྱས་པ་ཡིན་གསུང་གི་ཡོད་སྟབས། གང་ལྟར་ཡ་རབས་བཟང་སྤྱོད་དང་མཐུན་པ་ཞིག་ཡོང་དགོས་པ་རེད། འོས་བསྡུ་གཅིག་བྱས་ན་དམངས་གཙོ་ཡང་དག་པ་ཞིག་གོ་ཐོག་ལ་འགྲོ་ཐུབ་མ་རེད་དམ་མ་རེད་དྲི་རྟགས་མང་པོ་ཞིག་ཡོད་པ་རེད། ཅེས་བརྗོད་སོང་།

སྤྱི་འཐུས་ཐུབ་བསྟན་རུང་རིགས་ལགས་ཀྱིས་བརྗོད་དོན། འོས་བསྡུའི་སྒྲིག་གཞིའི་ཐོག་ནས་སྤྱི་ཚོགས་ལ་བརྡབ་གསིག་ཕྱིན་པ་ཞིག་ངོས་ལེན་བྱེད་ཀྱི་མེད་པ་དེ་ཡོངས་གྲགས་རེད། དེ་ང་ཚོས་ཁས་ལེན་ན་འདྲ་མ་ལེན་ན་འདྲ་དེ་ག་རང་རེད། བརྡབ་གསིག་ཕྱིན་པ་དེ་ག་རེ་སྒང་ལ་ཕྱིན་པ་རེད་ཟེར་ན། ཆིག་སྒྲིལ་སྒང་ལ་ཕྱིན་པ་རེད། འོས་གཞི་ལ་ལང་མཁན་མི་གཉིས་པོ་དེའི་ཐོག་ནས་སྤྱི་ཚོགས་ནང་བཀའ་མོལ་གནང་ཕྱོགས་ཐོག་ནས་མང་ཚོགས་ཀྱི་བསམ་ཚུལ་ལ་དོ་ཕོག་ཕྱིན་པ་དེ་དངོས་ཡོད་རེད། དེ་ལ་སྦེད་ས་ཡོད་པ་མ་རེད། སྤྱི་ཚོགས་ལ་བརྡབ་གསིག་ཐེབས་ས་གཙོ་བོ་གཅིག་འོས་གཞི་སོ་སོར་རྒྱབ་སྐྱོར་བྱེད་མཁན་ཚོའི་ངོས་ནས་རྒྱབ་སྐྱོར་བྱེད་སྟངས་ཀྱི་ཐོག་ནས་སྤྱི་ཚོགས་དང་ཆོལ་ཁ། དེའི་བར་ལ་བརྡབ་གསིག་འགྲོ་བའི་བཀའ་མོལ་བེད་སྤྱོད་བཏང་བཞག་ཡོད་པ་དེ་ང་ཚོས་མཐོང་རྒྱུ་ཐོས་རྒྱུ་གཉིས་ཆ་ཡོད་པ་རེད། དེ་སྦེད་ས་ཡོད་པ་མ་རེད། དེའི་ཐོག་ནས་སྤྱི་ཚོགས་ལ་བརྡབ་གསིག་ཕྱིན་པ་རེད་མ་གཏོགས། སྔོན་འགྲོ་དང་དངོས་གཞི་གཉིས་ཡོད་པའི་ཐོག་ནས་སྤྱི་ཚོགས་ལ་བརྡབ་གསིག་རྩ་བ་ནས་ཕྱིན་ཡོད་པ་མ་རེད་ཅེས་བླ་མ་དཀོན་མཆོག་བྱས་ཏེ་བཤད་ན་འགྲིག་གི་རེད།

གཉིས་པ་དེ་ད་ལྟ་དཀའ་ངལ་ག་རེ་འཕྲད་ཀྱི་ཡོད་ཟེར་ན། ད་ལྟ་འོས་བསྡུ་གཅིག་དགོས་ཀྱི་འདུག ཁ་སང་ང་ཚོར་བསམ་འཆར་འབུལ་རྒྱུའི་གོ་སྐབས་རག་མ་སོང་ཞེས་ཞལ་པར་ཕུལ་ཡོང་གི་འདུག་གསུང་གི་ཡོད་པ་རེད། དེ་ལ་དགོངས་པ་བཞེས་དང་། འགན་མ་འཁུར་བའི་སྐད་ཆ་རེད། འོས་བསྡུའི་ཚོགས་ཆུང་གིས་བསམ་ཚུལ་འཁྱེར་ཤོག་གསུངས་དུས་ཕུལ་ཡོད་པ་མ་རེད། ད་ལྟ་ཐག་གཅོད་པའི་མཚམས་ལ་བསླེབས་སྐབས་ཞལ་པར་ཕུལ་ཡོང་སྟེ། ཁ་སང་ང་ལ་བསམ་འཆར་ཕུལ་བའི་གོ་སྐབས་རེག་མ་སོང་། ང་ལ་འོས་བསྡུ་གཅིག་དགོས་མཁན་དེ་ཡིན་གསུངས་ཀྱི་ཡོད་ན་དེ་འགན་མ་འཁུར་བའི་སྐད་ཆ་རེད། འགན་མི་འཁུར་མཁན་གྱི་མི་དེ་དག་ལ་ང་ཚོས་ཆ་འཇོག་ག་ཚོད་བྱེད་ཐུབ་བམ། སྐྱབས་མགོན་རིན་པོ་ཆེ་མཆོག་གིས་སྐུ་དབང་མར་གནང་ཚར་བའི་རྗེས་ཀྱི་བཀའ་བློན་ཁྲི་བ་དང་པོའི་འོས་བསྡུའི་སྐབས། ང་ཚོའི་སྤྱི་ཚོགས་ལ་དཀའ་ངལ་རྩ་བ་ནས་འཕྲད་ཡོད་པ་མ་རེད། དེ་གང་ཡིན་ཟེར་ན། འོས་བསྡུའི་འགྲོ་སྟངས་ལྟར་བཞེངས་མཁན་སོ་སོས་ཁྱབ་བསྒྲགས་གནང་གི་ཕྱིན་པ་རེད་མ་གཏོགས། གཅིག་གིས་གཅིག་ལ་ཕར་ཚུར་སྐྱོན་འཛུགས་བྱེད་པའི་ལམ་ཁ་དེའི་ཐོག་ཕྱིན་ཡོད་པ་མ་རེད།

གཉིས་ནས་དེའི་ཐོག་ལ་རྒྱབ་སྐྱོར་བྱེད་མཁན་ཚོས་ད་ལྟའི་འོས་བསྡུ་ཆེན་མོའི་སྐབས་ལྟར་ཕར་ཚུར་རང་རྒྱལ་གཞན་ཕམ་གྱི་བསམ་བློ་འཁྱེར་ནས་སྐྱོན་བརྗོད་བྱས་ཡོད་པ་མ་རེད། སྐྱོན་བརྗོད་བྱུང་ས་དེ་ཐེངས་འདིའི་འོས་བསྡུའི་སྐབས་སུ་བྱུང་བ་རེད། ད་ལྟ་བརྡ་འཕྲིན་དུས་རབས་ཡིན་སྟབས། གནས་ཚུལ་ག་རེ་ཡིན་ཡང་སྐར་མ་ཁ་ཤས་ནང་ཧ་གོ་ཡི་ཡོད་པ་ཚང་མས་མཁྱེན་གསལ་རེད། དེ་གལ་པོ་ཆེ་ལ་ནན་ཏན་གྱིས་ཞུ་རྒྱུ་ལས་གསར་པ་གཞན་གང་ཡང་ཞུ་རྒྱུ་མེད། སྔོན་འགྲོ་དང་དངོས་གཞི་གཉིས་ཡོད་པའི་རྐྱེན་གྱིས་སྤྱི་ཚོགས་ནང་བརྡབ་གསིག་རྩ་བ་ནས་བྱུང་ཡོད་པ་མ་རེད་ཞུ་རྒྱུ་ཡིན། དོ་བདག་དང་། དེའི་སྟེང་རྒྱབ་སྐྱོར་བྱེད་མཁན་ཁ་ཤས་དངོས་སུ་འཐོན་པ་དང་ཁ་ཤས་ལྐོག་ནས་བཤད་དེ་ད་ལྟའི་སྤྱི་ཚོགས་ནང་གི་རྙོག་གྲ་དེ་བྱུང་བ་རེད། ཅེས་བརྗོད་སོང་།

 

 

གསར་འགོད་པ་པདྨ་མཚོ་དང་པདྨ་རྒྱལ་གཉིས་ཀྱིས་བསྡུ་སྒྲིག་བྱས།

 

འབྲེལ་ཡོད་གསར་འགྱུར།

Alexandra Xanthaki was appointed UN Special Rapporteur in the field of cultural rights in October 2021
Mobile App

མཉམ་འབྲེལ་རྒྱལ་ཚོགས་ཀྱི་ཆེད་མཁས་པས་ཧྥ་རན་སིའི་འགྲེམས་སྟོན་ཁང་ལ་སྐྱོན་བརྗོད་གནང་།

ཆུ་ཚོད་ ༡༢ སྔོན་ལ།
Mobile App

རྒྱ་ནག་གིས་ཇོ་མོ་གླང་མར་གཏེར་ཁ་སྔོག་འདོན་བྱེད་ཉེན་ཡོད་འདུག

ཆུ་ཚོད་ ༡༢ སྔོན་ལ།
བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་ཐེངས་ ༡༩ པ་འཚོག་བཞིན་པ། ༢༠༢༥།༠༩།༢༩། དུས་བབ་ཀྱི་པར།
Mobile App

གཞོན་སྐྱེས་རྣམས་ཀྱིས་བོད་པ་གཅིག་ཡིན་བསམ་པའི་འདུ་ཤེས་ཀྱི་ཐོག་ནས་ནུས་པ་གཅིག་ཏུ་སྒྲིལ་བའི་འགན་འཁུར་དགོས་པའི་བཀའ་སློབ་བསྩལ།

༢༠༢༥/༠༩/༢༩
Tibetan Children at China’s Colonial Boarding School in Nagchu area, Tibet
Mobile App

མི་རིགས་མཐུན་སྒྲིལ་གྱི་མིང་ཐོག་ནས་གྲངས་ཉུང་མི་རིགས་ཀྱི་སྐད་ཡིག་རིག་གཞུང་ལ་སྔར་ལས་བཙན་གནོན་བྱ་རྒྱུ་རེད།

༢༠༢༥/༠༩/༢༩
China's former agriculture minister Tang Renjian (centre) received a suspended death sentence for bribery at a court in Jilin province on Sunday, Sep 28, 2025. (Photo: Changchun Intermediate People's Court)
Mobile App

རྒྱ་ནག་གི་ཞིང་ལས་བློན་ཆེན་ཟུར་བ་ཐང་རེན་ཅན་ལ་སྲོག་ཁྲིམས་བཅད།

༢༠༢༥/༠༩/༢༩
Mobile App

རྒྱལ་སྤྱིའི་ནང་པའི་གླེང་སྟེགས་ཐོག་བོད་ཀྱི་བླ་ཆེན་དང་མཁན་པོ་ཁག་ཅིག་ཕེབས་ཐུབ་མི་འདུག

༢༠༢༥/༠༩/༢༨

མཆན། 5

  1. བཀྲ་ཡེ་ཚང་། says:
    ལོ་ 9 སྔོན།

    སོ་སོའི་སྐྱེས་བོ་ཞིག་ཡིན་ནས་བཟུང་ཕྱོགས་ལྷུང་དང་མ་བྲལ་བ་ཡིན་ཡིན་པ་རེད་་་་་་གང་ལྟར་སྤྱི་ཚོགས་ལ་ཕན་མ་ཐོག་ཀྱང་གནོད་མི་སྐྱེལ་བའི་སྐད་ཆ་རེ་བཤད་རྒྱུ་གལ་ཆེ།

    Reply
  2. སྲས་སྐུ་ངོ་། says:
    ལོ་ 9 སྔོན།

    མང་ཚོགས་ལ་སྲིད་དོན་གོ་རྟོགས་མེད་པ་དང་དད་ལོག་ཆེ་བ། ཆོལ་ཞེན་ཆེ་བ། འོས་མི་གང་མང་ཞིག་ལ་སྲིད་དོན་འཁྲབ་སྟངས་ངན་པ་ཡིན་སྟབས། སྔོན་འགྲོ་འོས་བསྡུ་དང་དངོས་གཞི་འོས་བསྡུ་ཡོད་ཀྱང་མེད་ཀྱང་གཅིག་པ་རེད།

    Reply
  3. བསྟན་འཛིན་དབང་རྒྱལ་ says:
    ལོ་ 9 སྔོན།

    འོས་བསྡུ་ཐེངས་གཅིག་བྱས་ན་འོས་མི་ཚད་ལྡན་ཡོང་རྒྱུ་ཧ་ཅང་ཁག་པོ་ཡིན་པ་ས་རིས་ཐང་གསལ་རེད་
    མ་ཟད་རང་ཅག་བོད་མི་རྒྱལ་ཁབ་འདྲ་མིན་དུ་གནས་ཡོད་སྟབས་ས་གནས་སོ་སོའི་ཁྲིམས་ལུགས་དང་རང་སྒེར་
    གྱི་ལས་དུས་སོགས་རྒྱུ་རྐྱེན་སྣ་ཚོགས་ཀྱིས་འོས་འཕེན་གོ་སྐབས་མང་པོ་ཤོར་རྒྱུ་སོང་་་་འོས་འཕེན་ཆ་ཤས་ལེན་མཁན་ཉུང་དུ་འགྲོ་སྲིད་པས་ སྔར་བཞིན་འོས་ཐེངས་གཉིས་དེ་གནོད་ལས་ཕན་ཆེ་བ་ཡོད་

    Reply
  4. བློ་བཟང་། says:
    ལོ་ 9 སྔོན།

    བཀུར་འོས་སྤྱི་འཐུས་རྣམ་པའི་གསུང་མོལ་ཧ་ཅང་རིན་ཐང་ཅན་གནང་འདུག མང་ཚོགས་ལ་བརྡ་ལན་དང་གོ་རྟོགས་ཡག་པོ་སྤྲོད་ཐུབ་ས་རེད། ཅུང་མི་ལེགས་ས་ཞིག་ནི་གསུང་བཤད་གནང་མཁན་ཕྱི་མ་ཕྱི་མས་སྔ་མའི་སྔ་མ་ཅུང་དགག་པའི་ཟོལ་མཛད་འདུག

    Reply
  5. Gendun says:
    ལོ་ 9 སྔོན།

    ཨ་ཀྲུག་ཚེ་བརྟན་དང་གསེར་རྟ་ཚུལ་ཁྲིམས་གཉིས་ཀྱི་བསམ་ཚུལ་ཕྱོགས་ལྷུང་མིན་པའི་རེ་བ་ཡོད།

    Reply

དཔྱད་མཆན་སྤེལ། Cancel reply

Your email address will not be published. Required fields are marked *

སྤྱི་ཚོགས་དྲ་གནས།

ཁྱབ་བསྒྲགས།

དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།

གློག་འཕྲིན།

editor@tibettimes.net | office@tibettimes.net

ཁ་པར།

+91-98823-47075 | +91-92189-38041 | +91-81972-44372

Welcome Back!

OR

Login to your account below

Forgotten Password?

Retrieve your password

Please enter your username or email address to reset your password.

Log In

Add New Playlist

No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese