ཧོང་ཀོང་སྤྱི་ཁྱབ་གསར་པས་ ‘ང་རྒྱ་ནག་གི་རྒྱུག་ཁྱི་མིན’ ཟེར།

བྷི་བྷི་སི་གསར་ཁང་གིས་ ༢༠༡༧།༦།༢༡ ཉིན་སྤེལ།
གསར་འགོད་པ་ལྕམ་ཀེར་གྷིར་སི་(Carrie Gracie)ལགས་ཀྱིས་ཧོང་ཀོང་སྤྱི་ཁྱབ་གསར་བ་ལྕམ་ཀེར་ལཱམ་(Carrie Lam)ལགས་སུ་ཧོང་ཀོང་སྤྱི་ཁྱབ་གསར་བའི་འོས་བསྡུའི་རྒྱལ་ཁ་ཐོབ་པའི་མྱོང་ཚོར་དང་འབྲེལ་ཏེ། ཧོང་ཀོང་གི་ད་ལྟའི་ཆབ་སྲིད་ཀྱི་གནས་བབ་དང་མ་འོངས་པའི་འཆར་གཞི་སོགས་ཀྱི་སྐོར་ལ་བཅར་འདྲི་བྱས་ཡོད་པ་དང་། སྐབས་དེར་ཁོ་མོས་སྐད་ཆ་འགའ་ཐད་ཀར་བཤད་ཡོད་ཀྱང་། བཅར་འདྲིའི་སྐབས་ལྕམ་ཀེར་ལཱམ་ལ་ཞེད་སྣང་སྐྱེས་བ་ལྟ་བུ་ཡང་ནས་ཡང་དུ་བཅར་འདྲི་བྱེད་སའི་ཁང་པ་དེའི་སྒོའི་ཕྱོགས་སུ་བལྟས་ཏེ་གསར་འགོད་པར། ཁྱོད་རང་གི་དྲི་བ་དེ་དག་ཐད་ཀར་དང་དྲང་མོ་མིན་ཚུལ་སོགས་བརྗོད་ཡོད་ཀྱང་། གསར་འགོད་པ་ལྕམ་ཀེར་གྷིར་སི་ལགས་ཀྱིས་ཧོང་ཀོང་སྤྱི་ཁྱབ་གསར་བའི་དམ་བཅའི་མཛད་སྒོ་མ་འཚོགས་གོང་ལྕམ་ཀེར་ལཱམ་ལགས་སུ་བཅར་འདྲི་ཞུ་ཐུབ་ཡོད་འདུག

གསར་འགོད་པས། དྲང་མོ་བཤད་ན། ལྕམ་ཀེར་ལཱམ་གྱིས་སྤྱི་ཁྱབ་གསར་བའི་དམ་འབུལ་མ་ཞུས་གོང་ནས་བཅར་འདྲི་དང་ལེན་བྱས་སོང་བ་དང་། སྐབས་དེར་ཁོ་མོས་དྲིས་ལེན་འགའ་ཕྱི་གསལ་ནང་གསལ་བཟོས་ཡོད། འོན་ཀྱང་། ཧོང་ཀོང་སྤྱི་ཁྱབ་ཟུར་བ་ལིང་ཁྲིན་ཡེན་(CY Leung)གྱིས་ལོ་ལྔའི་རིང་ཧོང་ཀོང་སྤྱི་ཁྱབ་ཀྱི་འགན་འཁུར་སྐབས་བྷི་བྷི་སིའི་བཅར་འདྲི་ཐེངས་གཅིག་ཀྱང་དང་ལེན་བྱས་མེད་པ་དང་།  དེ་ནི་ཁྱད་པར་ཞིག་ཡང་མཐོང་གི་འདུག

ལྕམ་ཀེར་ལཱམ་ནི་རཱོ་མན་ཁཱེ་ཐོ་ལི་ཁུ་(Roman Catholic)ཆོས་ལུགས་ལ་དད་པ་བྱེད་མཁན་ཞིག་ཡིན་པ་དང་། གཅིག་བྱས་ན་ལས་འབྲས་ཀྱིས་ཁོ་མོ་དེད་དེ་ཧོང་ཀོང་གི་ལས་གནས་མཐོ་ཤོས་དེ་འཚོལ་དུ་བཅུག་ཡོད་ཀྱང་སྲིད། གང་ལྟར་ཧོང་ཀོང་སྤྱི་ཚོགས་ནང་། ཁོ་མོར་མཚན་སྙན་གྲགས་ཡག་པོ་མེད་པ་གསལ་བོ་ཆགས་ཡོད།  དེ་སྔོན་ཧོང་ཀོང་སྤྱི་ཁྱབ་འོས་བསྡུའི་སྐབས། ཁོ་མོར་སྐྱོན་བརྗོད་དང་ཉེས་འཛུགས་བྱེད་མཁན་མང་དྲགས་སྟབས། སྤྱི་ཚོགས་ནང་ཕྱིར་འཐོན་མ་ཐུབ་པ་སོགས་ཀྱི་གནས་ཚུལ་མངོན་སུམ་བྱུང་ཡོད་ཀྱང་། འོས་བསྡུའི་མཐའ་མར་ལྕམ་ཀེར་ལཱམ་ལ་ཚོང་པ་དང་པེ་ཅིན་མཐུན་ཕྱོགས་ཀྱི་འོས་བསྡུ་ལྷན་ཚོགས་ཀྱི་འཐུས་མི་དག་གིས་རྒྱབ་སྐྱོར་འོག་འོས་གྲངས་ ༧༧༧ ཐོབ་སྟེ་ཧོང་ཀོང་སྤྱི་ཁྱབ་གསར་བའི་གོ་གནས་ཐོབ་ཡོད། འོན་ཀྱང་། འོས་བསྡུ་ལྷན་ཚོགས་དེ་ཚོགས་པ་འདྲ་མིན་གྱི་འཐུས་མི་ལས་གྲུབ་ཡོད་པ་ལྟར། ཁོ་མོར་མི་མང་འཐུས་མིའི་བརྒྱ་ཆ་ ༡ གིས་མ་གཏོགས་འོས་བླུགས་མེད་སྟབས། ངས་ལྕམ་ཀེར་ལཱམ་ལགས་སུ་ཁོ་མོར་ཧོང་ཀོང་མི་མང་གི་བསམ་ཚུལ་དང་རྒྱབ་སྐྱོར་མེད་པར་ཧོང་ཀོང་ཇི་ལྟར་མདུན་དུ་འཁྲིད་རྒྱུ་ཡིན་ནམ་ཞེས་དྲིས་བར་ཁོ་མོས།  “དེ་ནི་ཨང་གྲངས་མང་པོ་ཡོད་མེད་ཀྱི་གནད་དོན་ཞིག་མ་ཡིན་པར་ཁྲིམས་མཐུན་ཡིན་མིན་གྱི་དྲི་བ་ཞིག་ཆགས་ཡོད། ང་ཚོ་ཚང་མས་ཤེས་གསལ་ལྟར། ཧོང་ཀོང་འོས་བསྡུ་ལྷན་ཚོགས་ནི་ཧོང་ཀོང་སྤྱི་ཚོགས་ཁྱོན་ཡོངས་ཀྱི་འཐུས་ཚབ་ཁག་གིས་གྲུབ་པའི་ལྷན་ཚོགས་ཤིག་ཡིན་སྟབས། དེ་ནི་ཁྲིམས་མཐུན་གྱི་རྒྱལ་ཁ་ཞིག་ཆགས་ཡོད་”ཅེས་བརྗོད་ཡོད་ཀྱང་། ཕྱི་ལོ་ ༢༠༡༤ ལོར་ཧོང་ཀོང་དམངས་གཙོ་དོན་གཉེར་བ་ཚོས་ཧོང་ཀོང་འོས་བསྡུ་ལྷན་ཚོགས་ལ་སྐྱོན་བརྗོད་ཤུགས་ཆེན་བྱས་ཏེ། མི་རེ་ངོ་རེར་འོས་ཤོག་འཕེན་པའི་ཐོབ་ཐང་དགོས་པ་ལས་འོས་བསྡུ་ལྷན་ཚོགས་ཤིག་དགོས་དོན་མི་འདུག་ཅེས་ངོ་རྒོལ་བརྒྱབ་ཡོད། སྐབས་དེར་ཧོང་ཀོང་ཆར་གདུགས་གསར་བརྗེའི་ལས་འགུལ་སྤེལ་ཏེ་དམངས་གཙོ་དོན་གཉེར་བ་ཚོས་ཟླ་ ༣ མ་ཟིན་ཙམ་རིང་ཧོང་ཀོང་གྲོང་ཁྱེར་གྱི་ཚོང་འབྲེལ་ལྟེ་བ་བཟུང་སྟེ་ཧོང་ཀོང་གཞུང་ལ་ངོ་རྒོལ་བྱས་ཡོད་ཀྱང་། དེས་པེ་ཅིན་གཞུང་ལ་འགུལ་སྐྱོད་གང་ཡང་ཐེབས་མེད་པ་དང་། ད་ལྟའི་ལྕམ་ཀེར་ལཱམ་ལ་ཡང་འདས་བའི་ལོ་ངོ་ ༢༠ རིང་གི་ཧོང་ཀོང་གི་མགོ་ཁྲིད་ཚོ་ལྟར། ཧོང་ཀོང་ནང་ཁོ་མོ་རྒྱ་ནག་གཞུང་གི་རྒྱུག་ཁྱི་རེད་ཅེས་སྐྱོན་བརྗོད་བྱེད་བཞིན་ཡོད་སྟབས།  ལྕམ་ཀེར་ལཱམ་གྱིས་དེའི་སྐོར་ལ་བརྗོད་དོན་ “ཚོད་འཛིན་བྱ་རྒྱུ་གལ་ཆེན་ཡིན། གལ་སྲིད། ཧོང་ཀོང་ནང་པེ་ཅིན་མཐུན་ཕྱོགས་ཀྱིས་སྲིད་ཤུགས་བཀོལ་ཏེ་ང་ལ་འོས་བསྡུའི་རྒྱལ་ཁ་ཐོབ་པ་དང་། ངས་འདས་བའི་ལོ་ངོ་ ༣༦ རིང་ཧོང་ཀོང་སྤྱི་ཚོགས་ལ་སྲིད་ཞུ་བསྒྲུབས་ཏེ། ད་ལྟ་ང་རང་རྒྱ་ནག་གི་རྒྱུག་ཁྱི་ཞིག་ཏུ་ངོས་འཛིན་བྱེད་པ་ནི་ནོར་འཁྲུལ་རེད་”ཅེས་བརྗོད་ཡོད།

གསར་འགོད་པས། ངས་ཆུ་ཚོད་ཕྱེད་ཀ་ལྷག་གི་རིང་ལྕམ་ཀེར་ལཱམ་དང་ལྷན་དུ་བཅར་འདྲི་བྱས་ཏེ་མཐའ་མཇུག་རྒྱུ་རྐྱེན་ཅི་འདྲ་ཞིག་གིས་པེ་ཅིན་གཞུང་ལ་ཕོག་ཐུག་བཟོ་སྲིད་དམ་ཞེས་དྲིས་སྐབས། ལྕམ་ཀེར་ལཱམ་གྱིས་དྲི་བ་དེར་གཡོལ་ཏེ་ལན་བཏབས་མ་སོང་ལ། དྲི་བ་དེས་ཁོ་མོར་དཀའ་ཁག་བཟོས་བའི་ཚོར་སྣང་བྱུང་།

ཟླ་རྗེས་མའི་ཚེས་ ༡ ཉིན་ལྕམ་ཀེར་ལཱམ་གྱིས་རྒྱ་ནག་གི་དབུ་ཁྲིད་ཞི་ཅིན་ཕིན་གྱི་མདུན་དུ་ཧོང་ཀོང་མི་མང་དང་པེ་ཅིན་གཞུང་གཉིས་ལ་སྲིད་ཞུ་བསྒྲུབ་རྒྱུའི་དམ་བཅའ་འཇོག་རྒྱུ་ཡིན་པ་དང་། མི་ཁག་ཅིག་གིས་འོས་འགན་འདི་གཉིས་ཕྲག་ཏུ་འཁུར་རྒྱུ་ནི་ལས་སླ་བོ་ཞིག་མིན་ཞེས་བརྗོད་ཀྱི་ཡོད་ཀྱང་། ལྕམ་ཀེར་ལཱམ་གྱིས་དེ་སྔའི་ཧོང་ཀོང་སྤྱི་ཁྱབ་ལེང་ཁྲིན་ཡེན་གྱི་འོག་ཏུ་སྤྱི་ཁྱབ་གཞོན་པའི་འགན་ཁུར་མྱོང་ཡོད་སྟབས། ཁོ་མོར་དཀའ་ངལ་ཞེ་དྲགས་འཕྲད་རྒྱུ་མི་ཚོད་ཡང་རྗོད་མཁན་ཡོད། འོན་ཀྱང་། ངས་ལྕམ་ཀེར་ལཱམ་ལགས་སུ་བཅར་འདྲི་བྱས་བ་བརྒྱུད་དེ་ངེས་གཏན་ཐོག་བཤད་ཐུབ་པ་ཞིག་ནི། ཁོ་མོར་གཡོལ་གཟུར་གྱི་ཁྱད་ཆོས་ཞིག་འདུག དཔེར་ན། ངས་ལྕམ་ཀེར་ལཱམ་ལ་ཧོང་ཀོང་ནང་རང་བཙན་སྐད་འབོད་རྒྱག་དོན་ཅི་ཡིན་ཞེས་དྲིས་བར་ཁོས་མོས་ཧོང་ཀོང་རྩ་ཁྲིམས་ཀྱིས་སྨྲ་བརྗོད་རང་དབང་སྲུང་སྐྱོབ་བྱེད་ཀྱི་ཡོད་དང་མེད་ཁ་གསལ་མི་བྱེད་པར་བརྗོད་དོན། ང་ཚོས་རྩ་ཁྲིམས་གཞིར་བཞག་སྟེ་བཟོད་བསྲན་བྱས་ཏེ་བསྡད་ཡོད། སྤྱིར་ཁྱོད་རང་གི་དྲི་བ་དེ་སུན་གཙེར་བཟོ་བྱེད་ཞིག་ཡིན་ཡང་། རང་བཙན་སྐད་འབོད་བརྒྱབ་པར་ཧ་སང་དགོས་དོན་མེད། ཆར་གདུགས་གསར་བརྗེའི་ལས་འགུལ་ནི་ལམ་ནོར་ཞིག་ཡིན་པ་མ་ཟད། སྐབས་དེར་ཧོང་ཀོང་གི་ན་གཞོན་ལོ་ཆུང་འགས། གལ་སྲིད་རྒྱ་ནག་གཞུང་གིས་ཧོང་ཀོང་ནང་དམངས་གཙོའི་ལམ་ལུགས་ལག་བསྟར་མ་བྱས་ཚེ། ཧོང་ཀོང་རང་བཙན་བྱས་ཏེ་དམངས་གཙོ་ལག་བསྟར་བྱེད་རྒྱུ་ཡིན་ཞེས་ནོར་འཁྲུལ་ཅན་གྱི་ལམ་ཁ་ཞིག་ཏུ་བསྐྱོད་མགོ་བཙུགས་ཡོད་ཟེར།

རྒྱ་ནག་གཞུང་གིས་རང་བཙན་སྐོར་གྱི་སྐད་ཆ་ཚིག་གཅིག་ཡིན་ཡང་ཐར་བ་གཏོང་གི་མེད་ལ། ཧོང་ཀོང་ལ་རང་སྲིད་རང་སྐྱོང་ཐོབ་པ་དེས་ཧོང་ཀོང་ནང་སྨྲ་བརྗོད་རང་དབང་སྲུང་སྐྱོབ་བྱེད་ཀྱི་ཡོད་ཀྱང་། རྒྱ་ནག་གཞུང་གིས་ཧོང་ཀོང་ནང་རང་བཙན་སྐད་འབོད་རྒྱག་པ་ནི་རྒྱལ་ཁབ་བདེ་འཇགས་ལ་གཏོར་བརླག་གཏོང་གི་ཡོད་པར་ངོས་འཛིན་བྱས་ཏེ། ད་བར་ཧོང་ཀོང་གི་མི་མང་པོ་ཞིག་འཛིན་བཟུང་བྱས་བ་མ་ཟད། ཁོ་ཚོར་ལོ་མང་རིང་ཁྲིམས་ཐག་གཅོད་བཞིན་ཡོད། ངས་ལྕམ་ཀེར་ལཱམ་ལགས་ལ་གནས་སྟངས་དེའི་ཐད་སྐད་ཆ་དྲིས་བར་ཁོ་མོས་དྲིས་ལན་དེར་གཡོལ་ཏེ་བརྗོད་དོན། “རྒྱལ་ཁབ་གཅིག་གི་ནང་ལམ་ལུགས་གཉིས་ཡོད་པ་དེས་ཧོང་ཀོང་རྒྱ་ནག་མི་དམངས་སྤྱི་མཐུན་རྒྱལ་ཁབ་དང་ཁ་བྲལ་ཐབས་མེད་པ་བསྟན་ཡོད། དེ་མིན་ང་ཚོར་ལམ་ལུགས་གཉིས་དགོས་དོན་མེད་” ཟེར།

༢༠༡༥ ལོར་རྒྱ་ནག་གཞུང་གིས་གསང་མྱུལ་བཏང་སྟེ་ཧོང་ཀོང་གི་དཔེ་དེབ་འཚོང་མཁན་གཉིས་འཛིན་བཟུང་བྱས་ཡོད་པ་དང་། གནས་ཚུལ་དེའི་ཐད་དབྱིན་ཇིའི་གཞུང་གིས་ཀྱང་ཧོང་ཀོང་ནང་རྒྱ་ནག་གིས་ཐེ་གཏོགས་ཤུགས་ཆེན་པོ་བྱེད་ཀྱི་ཡོད་པའི་སྐྱོན་བརྗོད་བྱས་ཡོད་སྟབས། ངས་ལྕམ་ཀེར་ལཱམ་ལགས་སུ་དེའི་སྐོར་ལ་དྲི་བ་དྲིས་སྐབས། ལྕམ་ཀེར་ལཱམ་གྱིས་ཁོ་མོའི་འོས་འགན་ནི་པེ་ཅིན་དང་ཧོང་ཀོང་བར་གྱི་ཟམ་པ་ལྟ་བུ་ཞིག་བྱ་རྒྱུ་དེ་ཡིན་ཟེར་བ་ལས་ལན་འདེབས་བྱས་མ་སོང་བ་དང་། ཁོ་མོས་གནད་དོན་གཞན་ཞིག་བརྗོད་པ་ནི། “གལ་སྲིད་ཧོང་ཀོང་རང་སྲིད་རང་སྐྱོང་གི་རྩ་ཁྲིམས་གཞིར་བཞག་སྟེ་ཧོང་ཀོང་ནང་ལུགས་དང་མི་མཐུན་པའི་ཐེ་བྱུས་བྱེད་མཁན་བྱུང་སྐབས། ཧོང་ཀོང་སྤྱི་ཁྱབ་གསར་པར་ཧོང་ཀོང་མི་མང་གི་ཚབ་བྱས་ཏེ་སྲིད་གཞུང་གང་དང་གང་ལ་ཧོང་ཀོང་གི་སྐྱིད་སྡུག་བཤད་པའི་འོས་འགན་ཡོད་”ཅེས་བརྗོད་སོང་།

གསར་འགོད་པས། དོན་དངོས་ཐོག་རྒྱ་ནག་གཞུང་གིས་ཧོང་ཀོང་ནང་ང་ཚོས་མིག་མཐོང་ལག་ཟིན་ལས་བརྒལ་བའི་ཐེ་བྱུས་དེ་འདྲ་བྱེད་ཀྱི་ཡོད་དམ་ཞེས་དྲིས་པར། ལྕམ་ཀེར་ལཱམ་གྱིས། རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྲིད་ཇུས་ད་དུང་བཅོས་སྒྱུར་མེད་པར་གནས་ཡོད་པ་དང་། ཧོང་ཀོང་གི་རྩ་ཁྲིམས་ ༡༩༩༧ གོང་ལས་ད་ལྟ་ཇེ་ཡག་ཏུ་ཕྱིན་ཡོད། ཅེས་བརྗོད་བྱུང་།

གསར་འགོད་པས། ངས་བརྗོད་གཞི་འདྲ་མིན་ཐོག་ལྕམ་ཀེར་ལཱམ་ལ་དྲི་བ་དྲིས་ཏེ་མཐར་ཁོ་མོས་དྲི་བ་གཅིག་གི་ཐོག་གནས་འབབ་ཡག་པོ་མེད་སྐོར་བརྗོད་དོན། “ང་རང་མི་ཁ་རུ་ཁ་ཐུག་ཅིག་ཡིན། འདས་བའི་ལོ་འགའི་རིང་ཧོང་ཀོང་ནང་མཐུན་སྒྲིལ་མེད་པའི་དཀའ་ངལ་ཞིག་འཕྲད་བཞིན་ཡོད། དམིགས་བསལ་ན་གཞོན་ཚོས་རང་ཉིད་གཞུང་དང་སོ་སོའི་རྒྱལ་ཁབ་དང་ལྷན་དུ་འདུག་ཐབས་མེད་པ་ཞིག་ཏུ་མཐོང་གི་ཡོད་སྟབས། ང་ཚོས་ན་གཞོན་ཚོ་དང་ལྷན་དུ་འབྲེལ་འདྲིས་མང་ཙམ་བྱ་རྒྱུ་གལ་ཆེན་རེད་འདུག་ཅེས་བརྗོད་ཡོད་ཀྱང་། ཧོང་ཀོང་རྒྱ་ནག་ལ་རྩིས་སྤྲོད་བྱས་ཏེ་ལོ་ངོ་ ༢༠ འཁོར་བའི་མཛད་སྒོ་བསླེབ་ལ་ཉེ་བ་དང་། ཧོང་ཀོང་དམངས་གཙོ་དོན་གཉེར་བ་ཚོས་ངོ་རྒོལ་ལས་འགུལ་སྤེལ་བར་གྲ་སྒྲིག་བྱེད་བཞིན་ཡོད་སྟབས། ལྕམ་ཀེར་ལཱམ་གྱིས་ཧོང་ཀོང་སྤྱི་ཁྱབ་གསར་བའི་ཁས་ལེན་དམ་བཅའ་འཇོག་སྐབས། ད་གཟོད་ཁོ་མོས་ཧོང་ཀོང་ནང་གི་མཐུན་སྒྲིལ་མེད་པའི་དཀའ་ངལ་དེ་ཆེ་པོ་ག་ཚོད་ཅིག་ཆགས་ཡོད་མེད་མཐོང་ཡོང་གི་རེད།

གསར་འགོད་པ། སྐལ་བཟང་སྦྱིན་པ།