གྲོང་ཁྱེར་སྤྱི་ཁྱབ་ཟུར་པར་ལོ་ ༡༢ ཀྱི་ཁྲིམས་ཐག་བཅད།

རྒྱ་སྒོར་ས་ཡ་ ༤༠ ཡི་ལྐོག་རྔན་བླངས་པའི་ནག་ཉེས་འོག་རྒྱ་ནག་ཐེན་ཅེན་གྲོང་ཁྱེར་གྱི་སྤྱི་ཁྱབ་ཟུར་བ་ཧུང་ཞེན་ཀོ་ལ་ལོ་ ༡༢ ཡི་ཁྲིམས་ཐག་བཅད་འདུག

ཐེན་ཅིན་གྲོང་ཁྱེར་གྱི་སྤྱི་ཁྱབ་ཟུར་བ་ཧུང་ཞེན་ཀོ་ (Huang Xingguo) ཡིས་ས་ཁང་བདག་བཟུང་དང་གོ་གནས་བརྗེ་སྤོར་གྱི་ལྐོག་རྔན་རྒྱ་སྒོར་ས་ཡ་ ༤༠ བླངས་པའི་ནག་ཉེས་འོག ཁ་སང་རྒྱ་ནག་ནུབ་རྒྱུད་ཧུའུ་པེ་ཞིང་ཆེན་གྱི་ཧྲི་ཅ་ཀྲང་འབྲིང་རིམ་མི་མང་ཁྲིམས་ཁང་ (SIPC) ནས་ཁོ་ལ་ལོ་ ༡༢ ཁྲིམས་ཐག་བཅད་ཡོད་འདུག

ཁྲིམས་ཁང་དེའི་གསལ་བསྒྲགས་ནང་། འདས་པའི་ལོ་ངོ་ ༢༠ ནང་ཧུང་ཞེན་ཀོ་ཡིས་རང་ཉིད་ཀྱི་གོ་དབང་སྤྱད་ནས་ཁོ་རང་གི་གྲོགས་པོ་དང་ཚོང་གྲོགས་ཚོའི་ས་ཁང་བདག་བཟུང་དང་གོ་གནས་བརྗེ་སྤོར་གྱི་ལྐོག་རྔན་རྒྱ་སྒོར་ས་ཡ་ ༤༠ བླངས་ཏེ། ཐེན་ཅེན་ (Tianjin) དང་ཀྲེ་ཅང་ (Zhejiang)། ལེན་པོ་ (Ningbo)། ཐེ་ཀྲུའུ་ (Taizhou) སོགས་གྲོང་ཁྱེར་ཁག་ཅིག་ནང་གྲུ་ཁ་བཙུགས་ནས་སྒེར་ཚོང་གཉེར་ཡོད་སྐོར་བརྗོད་འདུག

ཧུང་ཞེན་ཀོ་ནི་ད་ལྟ་རང་ལོ་ ༦༣ ཡིན་པ་དང་། ཕྱི་ལོ་ ༡༩༧༣ ལོར་དམར་ཤོག་ཚོགས་ཁོངས་སུ་ཞུགས་པ་དང་། ༢༠༠༨ ལོར་ཐེན་ཅེན་གྲོང་ཁྱེར་སྤྱི་ཁྱབ་དང་། ༢༠༡༥ ནས་ ༢༠༡༦ བར་ཐེན་ཅེན་གྲོང་ཁྱེར་གྱི་དམར་ཤོག་དྲུང་ཆེར་བསྐོ་བཞག་བྱས་ཡོད་པ་རེད། ན་ནིང་ཕྱི་ཟླ་ ༡༠ ནང་ལྐོག་ཟ་རུལ་སུངས་ཀྱི་ནག་ཉེས་འོག་རྒྱ་ནག་དབུས་སྒྲིག་ཁྲིམས་ཞིབ་བཤེར་ཁང་ (CCDI) གིས་ཞིབ་བཤེར་བྱེད་མགོ་བརྩམས་འདུག

རྒྱ་ནག་དབུས་དམར་ཤོག་ཚོགས་པའི་ལྐོག་ཟ་རུལ་སུངས་ལྟ་ཞིབ་ཁང་ (Corruption Watchdog) གིས་ཧུང་ཞེན་ཀོ་ཡིས་ཏང་དང་སྲིད་གཞུང་གི་སྲིད་ཇུས་དང་ཆིག་སྒྲིལ་ལ་གཏོར་བརླག་བྱས་པའི་ནག་ཉེས་འོག་ཞིབ་བཤེར་བྱས་ཡོད་པ་དང་། ཞིབ་བཤེར་སྐབས་ཧུང་ཞེན་ཀོ་ཡིས་རང་ཉིད་ཀྱི་ནག་ཉེས་ངོས་ལེན་བྱས་ཡོད་ལུགས་བསྒྲགས་ཡོད་པ་རེད།

གསར་འགོད་པ། པདྨ་རྒྱལ།