སྒོ་སྲུང་བས་བུ་གསོ་ཁང་མེར་བསྲེགས་བཏང་།

དེ་རིང་བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། བྷར་ཛིལ་ (Brazil) རྒྱལ་ཁབ་ཀྱི་མངའ་སྡེ་མཱི་ན་ས་གྷི་ར་ཡེ་སི་ (Minas Gerais)་ས་གནས་ཇཱ་ནུའུ་བྷ་ (Janauba)ཡི་བུ་གསོ་ཁང་གི་སྒོ་སྲུང་བས་སློབ་གྲྭ་མེར་བསྲེགས་བཏང་སྟེ་ཕྲུ་གུ་བཞི་དང་དགེ་རྒན་གཅིག་གི་སྲོག་ཤོར་བ་མ་ཟད། ཚིག་སྐྱོན་བྱུང་བའི་དགེ་ལས་སློབ་ཕྲུག་ ༢༥ ལ་ཉེ་འཁོར་གྱི་སྨན་ཁང་དུ་སྨན་བཅོས་བྱེད་བཞིན་ཡོད་པ་དང་།  དེའི་ནང་ནས་མང་ཆེ་བ་རང་ལོ་ ༤ དང་ ༥ ཅན་གྱི་ཕྲུ་གུ་ཡིན་ལ། རྨས་སྐྱོན་ཕོག་པ་ཁ་ཤས་ཀྱི་གནས་སྟངས་ཛ་དྲག་ཆགས་ཡོད་འདུག

བུ་གསོ་ཁང་ལ་མེ་འབར་སྐབས་ཕྱི་རོལ་དུ་ཕྲུ་གུ་ཚོའི་ཕ་མ་རྣམས་དངངས་སྐྲག་ཆེན་པོས་འོ་དོད་བྱེད་བཞིན་འཚང་ཁ་བརྒྱབས་པ་སོགས་གནས་སྟངས་ཟིང་ཆ་ཆེན་པོར་གྱུར་ཡོད་པ་དང་། ས་གནས་བརྒྱུད་ལམ་གྱི་གནས་ཚུལ་ལྟར་ན། བུ་གསོ་ཁང་དེར་ཁྱོན་ཕྲུ་གུ་ ༧༠ ཙམ་ཡོད་པའི་ནང་ནས་ཕྲུ་གུ་ ༤ ཡི་ཚེ་སྲོག་ཤོར་བ་མ་གཏོགས་གཞན་རྣམས་སྐབས་ཐོག་དེར་སྐྱོབ་ཐུབ་ཡོད་འདུག