ཁཱ་ཐོ་ལོ་ནེ་ཡཱས་མང་མོས་འོས་བསྡུ་བྱས་ཏེ་སི་པིན་ནས་ལོགས་སུ་རང་བཙན་བྱ་རྒྱུ་ཡིན་པའི་གསལ་བསྒྲགས་སྤེལ་རྒྱུར་ས་རྟགས་བརྒྱབ་ཡོད་འདུག
ཟླ་འདིའི་ཕྱི་ཚེས་༡ ཉིན་ཁཱ་ཐོ་ལེ་ནེ་ཡཱ་((Catalonia))སི་པིན་ནས་ལོགས་སུ་རང་བཙན་བྱེད་མིན་གྱི་མང་མོས་འོས་བསྡུ་ཡུལ་དེའི་མངའ་སྡེ་བྷར་སི་ལོ་ནཱ་(Barcelona)རུ་མི་མང་འདུ་འཛོམས་ཀྱིས་འོས་བསྡུ་ཐག་གཅོད་བྱས་ཡོད་པ་དང་། ཁཱ་ཐ་ལོ་ནེ་ཡཱ་གཞུང་གིས་གསལ་བསྒྲགས་བྱས་པ་ལྟར་ན། འོས་བསྡུའི་ཁྲོད་མི་མང་བརྒྱ་ཆ་ ༤༣ གྱིས་རང་བཙན་མི་དགོས་པར་མུ་མཐུད་རང་སྐྱོང་ཁུལ་གྱི་ངོ་བོར་གནས་རྒྱུར་མོས་མཐུན་བྱས་ཡོད་པ་དང་། མི་མང་བརྒྱ་ཆ་ ༩༠ ཡིས་ཁཱ་ཐ་ལོ་ནེ་ཡཱ་སི་པིན་ནས་ལོགས་སུ་རང་བཙན་བྱ་རྒྱུ་ཡིན་པའི་འོས་བླུགས་པར་བརྟེན། ཁ་སང་ཁུལ་དེའི་དབུ་ཁྲིད་ཆཱར་ལེ་པོག་ཌེ་མོན་ཊི(Carles Puigdemont) ཡིས་ཁཱ་ཐོ་ལོ་ནེ་ཡཱ་སི་པིན་ནས་ལོགས་སུ་རང་བཙན་བྱ་རྒྱུ་ཡིན་པའི་གསལ་བསྒྲགས་ཡིག་ཆར་ས་རྟགས་བཀོད་ཡོད་འདུག
གསལ་བསྒྲགས་ས་རྟགས་དེ་བརྒྱབ་མ་ཐག་སི་པིན་གཞུང་གིས་ཐག་གཅོད་དེར་དང་ལེན་མ་བྱས་པར་རྩིས་མེད་བཏང་ཡོད་པ་མ་ཟད། སི་པིན་གཞུང་དང་གྲོས་མོལ་བྱེད་དགོས་པ་ལས་ཐག་གཅོད་དེ་ལག་བསྟར་བྱེད་མི་ཆོག་པ་དང་། ཁཱ་ཐོ་ལོ་ནེ་ཡཱ་མུ་མཐུད་རང་སྲིད་རང་སྐྱོང་གི་མངའ་སྡེའི་ངོ་བོའི་ཐོག་གནས་དགོས་པའི་གསལ་བསྒྲགས་བྱས་ཡོད་པ་རེད། ཡིན་ནའང་། ཁཱ་ཐོ་ལོ་ནེ་ཡཱའི་དབུ་ཁྲིད་ཀྱིས་འོས་བསྡུའི་ཐག་གཅོད་ལ་རྒྱལ་ཁ་ཐོབ་ཡོད་པས་སི་པིན་གཞུང་གི་རྩ་ཁྲིམས་ལྟར་རང་བཙན་གསལ་བསྒྲགས་བྱེད་ཆོག་སྐོར་ལན་འདེབས་བྱས་ཡོད་འདུག
ད་ལོའི་ཕྱི་ཟླ་༧ པ་ནས་ཁཱ་ཐ་ལོ་ནེ་ཡཱ་འཛིན་སྐྱོང་ལྷན་ཚོགས་ཀྱིས། ཕྱི་ཟླ་ ༡༠ པའི་ནང་ཁཱ་ཐ་ལོ་ནེ་ཡཱ་མི་མང་གིས་མང་མོས་འོས་བསྡུ་བྱས་ཏེ་ཁཱ་ཐ་ལོ་ནེ་ཡཱ་སི་པིན་ལས་ལོགས་སུ་རང་བཙན་བྱེད་མིན་ཐག་གཅོད་བྱ་རྒྱུ་ཡིན་པ་དང་། གལ་ཏེ་འོས་ཤོག་འཐོབ་པ་ཡིན་ན་གང་མགྱོགས་ཁཱ་ཐ་ལོ་ནེ་ཡཱ་རང་བཙན་བྱ་རྒྱུ་ཡིན་པའི་གསལ་བསྒྲགས་བྱས་ཡོད་འདུག
རང་བཙན་གསལ་བསྒྲགས་ནང་དུ་ང་ཚོས་འཛམ་གླིང་ཡོངས་ཀྱི་སྲིད་གཞུང་དང་རྒྱལ་སྤྱིའི་ཚོགས་སྡེ་ཁག་ལ་ཞུ་རྒྱུར། ཁཱ་ཐོ་ལོ་ནེ་ཡཱ་རང་བཙན་ལྡན་པའི་སྤྱི་མཐུན་རྒྱལ་ཁབ་ཅིག་ཏུ་ངོས་འཛིན་བྱེད་རོགས། ཞེས་འཁོད་ཡོད་པ་དང་། དེ་བཞིན་དབུ་ཁྲིད་ཆཱར་ལེ་པོག་ཌེ་མོན་ཊི་ཡིས་གྲོས་ཚོགས་ནང་མི་རིང་བར་ཁཱ་ཐོ་ལོ་ནེ་ཡཱ་སི་པིན་ནས་ལོགས་སུ་གྱེས་རྒྱུ་ཡིན་པ་དང་། ང་ཚོ་ཚང་མ་ཚོགས་སྡེ་གཅིག་གི་མི་མང་ཡིན་པས་ང་ཚོར་དགོས་པ་དེ་ཚང་མ་མཉམ་དུ་མདུན་བསྐྱོད་བྱ་རྒྱ་དང་། མདུན་བསྐྱོད་བྱེད་པའི་ལམ་ཁ་ཁོ་ན་དེ་དམངས་གཙོ་དང་ཞི་བདེ་ཡིན་པ་རེད། ཅེས་བརྗོད་པར་བརྟེན། ཁ་སང་སི་པིན་གྱི་སྲིད་བློན་མཱ་རི་ཡ་ནོ་རཱ་ཇོ་(Mariano Rajoy) ལགས་ཀྱིས། གྲོས་ཚོགས་ནང་གནད་དོན་དེའི་སྐོར་ལ་ཛ་དྲག་ཚོགས་འདུ་ཚོགས་དགོས་པ་དང་། དཀའ་ངལ་དེ་འཕྲལ་དུ་སེལ་དགོས་པའི་བཀའ་བཏང་ཡོད་འདུག
ཁཱ་ཐ་ལོ་ནེ་ཡཱ་ནི་སི་པན་རྒྱལ་ཁབ་ཀྱི་བྷར་སི་ལོ་ནཱ་(Barcelona)དང་། གྷེ་རོ་ནཱ་(Girona)། ཊཱ་རཱ་གྷོ་ནཱ་(Tarragona)སོགས་མངའ་སྡེ་ཆེན་པོ་གསུམ་གྱིས་གྲུབ་ཡོད་པ་དང་། བྷར་སི་ལོ་ནཱ་ནི་ས་གནས་ཆེ་ཤོས་དང་ཁཱ་ཐ་ལོ་ནེ་ཡཱའི་ས་གནས་སྲིད་གཞུང་གི་རྒྱལ་སའང་ཡིན་འདུག ས་ཆ་དེ་ནི་ཡུ་རོབ་ཀྱི་བཟོ་ལས་དང་ཚོང་གཉེར་གྱི་ལྟེ་བ་ཡིན་པ་མ་ཟད། སི་པིན་ནང་གི་ཡུལ་སྐོར་སྤྲོ་འཆམ་པའི་ལྟེ་བ་ཞིག་ཀྱང་ཆགས་ཡོད་པ་རེད། ཡུལ་དེའི་ལྷོ་བྱང་ས་ཁུལ་གྱི་མི་མང་ཚོས་དུས་ཡུན་རིང་པོ་ནས་སི་པིན་ནས་ལོགས་སུ་གྱེས་འདོད་ཀྱི་འཐབ་རྩོད་བྱས་ཡོད་པ་དང་། ཁོ་ཚོར་རང་གི་སྐད་ཡིག་རིག་གཞུང་དང་ཡུལ་སྲོལ་གོམས་གཤིས་སོགས་ཡོད་པའི་ལོ་རྒྱུས་ཡུན་རིང་ཡོད་པའི་མི་རིགས་ཤིག་ཆགས་ཡོད་འདུག
ཁཱ་ཐ་ལོ་ནེ་ཡཱ་དེ་༡༦༣༥ ནས་ ༡༦༥༩ བར་ཧྥ་རན་སིའི་དབང་བསྒྱུར་འོག་ཡོད་ཀྱང་། རྗེས་སུ་སི་པིན་གྱིས་ ༡༦༥༩ ལོའི་ཕེ་རེ་ནཱེ་སི་(Pyrenees)ཆིངས་ཡིག་འོག་ནས་ཁཱ་ཐ་ལོ་ནེ་ཡཱར་བསྐྱར་དུ་དབང་བསྒྱུར་བྱས་རྗེས་ཧྥ་རན་སི་དང་སི་པིན་གྱི་དམག་འཁྲུག་མཚམས་བཞག ཕྱི་ལོ་༡༩༣༡ ནས་ ༡༩༣༩ ལོའི་བར་སི་པིན་དམངས་གཙོ་དང་སྤྱི་མཐུན་ཚོགས་པ་ཆགས་རྗེས་ཁཱ་ཐ་ལོ་ནེ་ཡཱ་ལ་སི་པིན་འོག་ནས་རང་སྲིད་རང་སྐྱོང་བྱས་ཏེ་བསྡད་ཡོད་པ་རེད།
གསར་འགོད་པ། སངས་རྒྱས་དཀོན་མཆོག
༄༅། གང་ལེགས་བྲིས་གནང་འདུག་པ་་་་བཀྲིས་བདེ་ལེགས་ཡོད།
བོད་ལྗོངས་འདི་ཡང་མི་རིང་པར་རང་ཡུལ་རང་ཐོབ་ཡོང་བའི་རེ་སྨོན་ཡོད།