རྒྱ་རིགས་འབྲེལ་མཐུད་ཚོགས་འདུའི་ཐོག་སྲིད་སྐྱོང་བློ་བཟང་སེང་གེ་མཆོག་ནས་རྒྱ་མི་དང་མཉམ་དུ་སྐད་ཆ་བཤད་ནས་བོད་བདེན་མཐའ་གསལ་དགོས་པས་རྒྱ་རིགས་མི་མང་དང་འབྲེལ་བ་བྱ་རྒྱུ་གལ་ཆེན་པོ་ཡིན་སྐོར་གསོངས་སོང་།
དེ་རིང་སྔ་དྲོའི་ཆུ་ཚོད་ ༩ སྟེང་། བཞུགས་སྒར་ཉེ་འཁྲིས་ཀྱི་དབུས་སྣེ་ལེན་ཁང་གི་ཚོགས་ཁང་ནང་། ཉིན་གསུམ་རིང་གི་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་རྒྱ་རིགས་ལས་དོན་དང་འབྲེལ་བའི་ཚུགས་འདུ་ཐེངས་ལྔ་པ་དབུ་འཛུགས་གནང་སོང་བ་དང་། ཚོགས་ཐོག་ཏུ་སྲིད་སྐྱོང་བློ་བཟང་སེང་གེ་མཆོག་གི་དབུས་བདེ་སྲུང་བཀའ་བློན་འཕགས་པ་ཚེ་རིང་མཆོག་དང་། རྒྱ་རིགས་བོད་དོན་རྒྱབ་སྐྱོར་བ་སྐུ་ཞབས་ཞ་མིན་ལགས། དེ་བཞིན་ཕྱི་དྲིལ་དྲུང་ཆེ་དྭགས་པོ་བསོད་ནམས་ནོར་བུ་ལགས་དང་། དྲིལ་བསྒྲགས་དྲུང་ཆེའི་ཚད་མཉམ་ཤར་གླིང་ཟླ་སྒྲོན་ལགས། དེ་བཞིན་ཨོ་སི་ཊོ་ལི་ཡ་དང་ཐའེ་ཝན། ཨ་རི་སོགས་རྒྱལ་ཁབ་ ༢༠ ནས་ཕེབས་པའི་རྒྱ་རིགས་འབྲེལ་མཐུད་པ་ཁྱོན་ ༥༠ དང་འབྲེལ་ཡོད་ལས་བྱེད་ཁག་ཅིག་བཅས་འཛོམས་འདུག
ཕྱི་དྲིལ་དྲུང་ཆེ་དྭགས་པོ་བསོད་ནམས་ནོར་བུ་ལགས་ཀྱིས་རྒྱ་རིགས་ལས་དོན་དང་འབྲེལ་བའི་ཚོགས་འདུ་ཐེངས་ལྔ་པའི་སྐོར་ངོ་སྤྲོད་གནང་སྐབས། ད་ལན་གྱི་ཚོགས་འདུ་འདི་ནི་ཕྱི་དྲིལ་རྒྱ་སྐད་ཚན་པའི་ཕྱག་ལས་གནང་ཕྱོགས་སྐོར་གྱི་ཚོགས་འདུ་ཚོགས་ཐེངས་ལྔ་པ་ཆགས་ཡོད་པ་རེད། ལོ་ཤས་གོང་ནས་ཕྱི་དྲིལ་ལས་ཁུངས་སུ་རྒྱ་སྐད་ཚན་པ་ཡོད་པ་དང་། རྒྱ་སྐད་ཚན་པས་རྒྱ་རིགས་རྣམས་དང་འབྲེལ་བ་བྱས་ཏེ་བོད་དོན་སྐོར་ངོ་སྤྲོད་བྱེད་ཀྱི་ཡོད། ཕྱི་ལོ་ ༢༠༠༨ ཀྱི་རྗེས་སུ་རྒྱ་ནག་གཞུང་གིས་བོད་ཁུལ་དུ་ཚད་ལས་བརྒལ་བའི་མནར་གཅོད་དང་གདུག་རྩུབ་བཏང་ཞིང་། རྒྱལ་སྤྱིའི་སྟེང་བོད་དོན་འཁྱོག་བཤད་སྣ་ཚོགས་བྱེད་ཀྱི་ཡོད་པ་རེད། ཡིན་ནའང་༧གོང་ས་མཆོག་ནས་རྒྱ་ནག་གཞུང་དང་འབྲེལ་བ་དེ་ཙམ་མ་བྱུང་ཡང་། བོད་རྒྱ་མི་རིགས་གཉིས་བར་ལོ་ངོ་སྟོང་ཕྲག་སྔོན་ནས་འབྲེལ་བ་ཡོད་སྟབས། རྒྱ་ནག་གཞུང་གི་ངོས་ནས་མི་རིགས་གཉིས་བར་འཁོན་འཛིན་ཡོང་ཐབས་བྱས་ཀྱང་། དུས་ཚོད་གཉན་འཕྲང་ཅན་གྱི་སྐབས་སུ། ང་ཚོའི་ངོས་ནས་རྒྱ་མི་རིགས་དང་འཆམ་མཐུན་ཐོག་གནས་དགོས་པ་ཧ་ཅང་གལ་ཆེན་པོ་རེད་ཅེས་གསུངས་པ་བཞིན། ང་ཚོས་ཨ་རི། ཨོ་སི་ཊོ་ལི་ཡ། ཡུ་རོབ་སོགས་རྒྱ་རིགས་ཡོད་སའི་རྒྱལ་ཁབ་ཁག་ནང་བོད་རྒྱ་འབྲེལ་མཐུད་པ་བཙུགས་ཡོད། བོད་རྒྱ་འབྲེལ་མཐུད་པ་དང་རྒྱ་སྐད་ཚན་པའི་ངོས་ནས་ཕྱི་སྡོད་རྒྱ་རིགས་སློབ་ཕྲུག མཁས་པ། རྩོམ་པ་པོ་སོགས་ལ་འབྲེལ་བ་བྱེད་ཀྱི་ཡོད། དེང་སྐབས་རྒྱ་ནག་ནས་རྒྱ་མི་མང་པོ་ཞིག་འཛམ་གླིང་གི་ཡུལ་ཕྱོགས་གང་སར་ཡོང་གི་ཡོད་པ་དང་། རྒྱ་རིགས་མང་པོ་ཞིག་གིས་རྒྱ་ནག་གཞུང་གིས་བོད་དོན་སྐོར་འཁྱོག་བཤད་གང་བྱས་པ་དེ་མ་གཏོགས་དངོས་ཡོད་གནས་སྟངས་གང་ཡིན་པ་དེ་ཤེས་ཀྱི་མེད་པས། ང་ཚོ་ཕྱི་དྲིལ་རྒྱ་སྐད་ཚན་པ་དང་རྒྱ་བོད་འབྲེལ་མཐུད་པ་ཚོས་རྒྱ་རིགས་ཚང་མར་འབྲེལ་བ་འཛིན་རྒྱུ་ཁག་པོ་ཡིན་སྟབས། ང་ཚོས་རྒྱ་རིགས་ཚོར་འབྲེལ་བ་བྱེད་པའི་ཐབས་ལམ་སྐོར་ལ་ཚོགས་འདུ་འཚོགས་ཀྱི་ཡོད། ཐེངས་འདིའི་ཚོགས་འདུའི་ཐོག་རྒྱ་སྐད་ཚན་པ་དང་རྒྱ་བོད་འབྲེལ་མཐུད་པ་ཚོས་རྒྱ་རིགས་ཚོ་དང་འབྲེལ་ལམ་ཇི་ལྟར་འཛིན་དགོས་པ་དང་། དེ་སྔར་འབྲེལ་བ་ཡོད་པ་དེ་ཡར་རྒྱས་ཇི་ལྟར་གཏོང་དགོས་པ། དེ་བཞིན་འབྲེལ་ཡོད་རྒྱ་རིགས་ཚོས་རྒྱ་ནག་ནང་བོད་དོན་ཁྱབ་སྤེལ་གཏོང་ཐབས་སྐོར་ལ་གོ་བསྡུར་བྱ་རྒྱུ་རེད། ཅེས་བརྗོད་སོང་།
རྒྱ་རིགས་འབྲེལ་མཐུད་ལས་དོན་གལ་ཆེན་དུ་རྩི་ཡི་ཡོད་སྐོར་སྲིད་སྐྱོང་མཆོག་གིས། ༧གོང་ས་མཆོག་ནས་དུས་རྒྱུན་བཀའ་སློབ་གནང་བཞིན་པ་ལྟར། ང་ཚོའི་བདེན་པའི་འཐབ་རྩོད་དེ་རྒྱ་མི་དང་མཉམ་དུ་སྐད་ཆ་བཤད་ནས་བདེན་མཐའ་གསལ་དགོས་སྟབས། ང་ཚོས་རྒྱ་རིགས་མི་མང་དང་མཉམ་དུ་འབྲེལ་བ་བྱ་རྒྱུ་དེ་གལ་ཆེ་ཤོས་ཆགས་ཡོད་པ་རེད། ང་ཚོས་རྒྱ་རིགས་མི་མང་གང་མང་མང་ལ་སྙོབ་ཐུབ་དགོས་ཀྱི་ཡོད་དུས། གཞི་རྩའི་དོན་གཅོད་ཁག་ནང་རྒྱ་རིགས་འབྲེལ་མཐུད་པ་དང་ལས་བྱེད། རྒྱ་ཡིག་ཚན་པའི་ལས་ཁུངས་སོགས་ཡོད་ཀྱང་། འདས་པའི་ལོ་ངོ་བདུན་རིང་ང་རང་ལ་ཉམས་མྱོང་ག་རེ་ཡོད་པ་དེ་རྣམ་པ་ཚོ་ཚང་མས་མཁྱེན་གསལ་རེད། ཧ་ཝར་ཊི་གཙུག་ལག་སློབ་ཆེན་ནང་ཡོད་དུས་ནས་ང་རང་རྒྱ་རིགས་ཚོར་ཐུག་འཕྲད་བྱ་རྒྱུར་མོས་འདུན་ཞེ་དྲགས་ཡོད་ལ། ཧ་ལམ་བཙན་བྱོལ་བོད་མིའི་ནང་རྒྱ་རིགས་ཚོར་ཐུག་འཕྲད་བྱེད་མཁན་ཐོག་མ་དང་ཐུག་འཕྲད་བྱེད་ཐེངས་མང་ཤོས་དེ་ང་རང་ཆགས་ཀྱི་ཡོད། རྒྱ་རིགས་འབྲེལ་མཐུད་པ་རྣམས་ཀྱིས་ཀྱང་གང་ཐུབ་ཅི་ཐུབ་ཀྱིས་རྒྱ་རིགས་ཚོར་འབྲེལ་བ་གནང་གི་ཡོད་པ་རེད་ལ་སྙོབ་ཀྱང་ཐུབ་ཀྱི་ཡོད་པ་རེད། ཡིན་ནའང་ལས་བྱེད་བཞི་ལྔ་ཡིས་འབྲེལ་བ་གནང་བ་ཙམ་གྱིས་ཡོང་གི་མེད་པ་དང་། རྒྱ་རིགས་འབྲེལ་མཐུད་པ་ཇེ་མང་ལ་གཏོང་དགོས་སྟབས། སྤྱིར་ང་ཚོས་ཨ་རི་དང་ཡུ་རོབ་སོགས་ནས་རྒྱ་སྐད་ཤེས་མཁན་གཞོན་སྐྱེས་ ༡༠ རེ་བཅས་ཁྱོན་རྒྱ་རིགས་འབྲེལ་མཐུད་པ་ ༥༠ ལྷག་ཡོང་རྒྱུ་དང་། དེ་དག་ལ་མཐུན་རྐྱེན་ཆ་ཚང་སྦྱོར་རྒྱུ། འདི་གར་ཉིན་གཉིས་གསུམ་རིང་ཚོགས་འདུ་ཚོགས་ནས་གོ་སྐབས་ཆ་ཚང་ཞིག་སྤྲོད་ཐུབ་པ་ཡིན་ན། འབྲེལ་མཐུད་པ་ལྔ་བཅུ་བརྒྱུད་ནས་རྒྱ་མིར་འབྲེལ་བ་གནང་མཁན་གཞོན་སྐྱེས་ལྔ་སྟོང་ནས་ལྔ་ཁྲི། དེ་ནས་འབུམ་ལྔ་དང་ས་ཡ་ལྔ་བཅས་ཀྱིས་རྒྱ་མིར་སྙོབ་ཐུབ་ཀྱི་ཡོད་པ་རེད། དེར་བརྟེན་ང་ཚོས་རྒྱ་རིགས་འབྲེལ་མཐུད་པ་མང་རུ་གཏོང་ཐུབ་པར་འབད་བརྩོན་དང་རེ་བ་རྒྱག་གི་ཡོད། ཡིན་ནའང་ད་ལན་ཨ་རི་མ་གཏོགས་ཡུ་རོབ་དང་ཨོ་སི་ཊོ་ལི་ཡ་ནས་མང་པོ་ཞིག་བཅར་ཐུབ་མི་འདུག མ་འོངས་པར་རྒྱ་རིགས་ལས་དོན་དང་འབྲེལ་བའི་ཟབ་སྦྱོང་དང་ཚོགས་འདུ་མུ་མཐུད་འཚོགས་རྒྱུ་ཡིན་པས། འབྲེལ་མཐུད་པ་ཚོ་བརྒྱུད་ནས་རྒྱ་སྐད་ཤེས་མཁན་གཞོན་སྐྱེས་གང་མང་མང་མཉམ་ཞུགས་ཐུབ་པའི་རེ་བ་དང་འབོད་སྐུལ་ཞུ་རྒྱུ་ཡིན་ལ། རྒྱ་ཡིག་ཤེས་མཁན་ཚོས་རྒྱ་རིགས་འབྲེལ་མཐུད་པ་དང་དོན་གཅོད་ཁག་ལ་འབྲེལ་བ་གནང་རོགས། ཞེས་གསུངས་སོང་།
ཡང་ཁོང་གིས། ད་ལོའི་ཚོགས་འདུར་བཅར་མཁན་མང་ཤོས་བོད་ནང་དུ་འཚོར་ལོངས་བྱུང་བ་ཡིན་པ་དང་། ན་ནིང་གི་ཚོགས་བཅར་བ་མང་ཤོས་རྒྱ་གར་ནང་འཚར་ལོངས་བྱུང་བ་རེད། རྒྱ་གར་ནང་འཚར་ལོངས་བྱུང་བ་ཚོ་ལས་བོད་ནང་ནས་འཚར་ལོངས་བྱུང་བ་ཚོས་རྒྱ་རིགས་ཚོར་བཀའ་མོལ་གནང་རྒྱུ་ཅུང་སླ་བོ་ཡོད་པ་རེད། གང་ཡིན་ཟེར་ན། རྒྱ་རིགས་ཚོ་དང་མཉམ་དུ་འབྲེལ་བ་འཛིན་པ་དང་བཀའ་མོལ་གནང་སྐབས། བོད་ནང་གི་དངོས་ཡོད་གནས་སྟངས་དང་བོད་ཀྱི་རྒྱལ་རབས་ལོ་རྒྱུས་ཀྱི་ཁུངས་སྣེ་ཡག་པོ་ཞིག་བཤད་རྒྱུ་མེད་ཚེ། རྒྱ་ནག་གཞུང་གིས་རྒྱ་རིགས་ཚོར་སློབ་གསོ་ཡག་ཐག་ཆོད་སྤྲད་ཡོད་སྟབས། རྒྱ་རིགས་ཚོ་དང་མཉམ་དུ་བཀའ་མོལ་གནང་རྒྱུ་ལས་སླ་བོ་མི་འདུག་ལ། ལྷག་པར་དུ་ང་ཚོར་རྒྱ་སྐད་ཤེས་མཁན་མང་པོ་མེད་དུས། དབྱིན་སྐད་ཐོག་ནས་ཕན་ཚུན་བར་གོ་བརྡ་མ་འཕྲོད་པའི་དཀའ་ལས་ཞེ་དྲགས་འདུག ང་རང་གི་མྱོང་ཚོར་ཞུས་ན། རྒྱ་རིགས་ཚོ་དང་མཉམ་དུ་སྐད་ཆ་བཤད་མཁན་ཚོས། དོན་གཅོད་ཁག་བརྒྱུད་ནས་ཟབ་སྦྱོང་དང་སློབ་སྦྱོང་ཡག་པོ་བྱས་ན་མ་གཏོགས་རྒྱ་མི་དང་མཉམ་དུ་སྐད་ཆ་བཤད་རྒྱུ་ཧ་ཅང་ཁག་པོ་འདུག དེ་བཞིན། ང་ཚོས་འདི་ག་ཕྱི་དྲིལ་རྒྱ་ཡིག་སྡེ་ཚན་གྱི་ (西藏通讯) ནང་རྒྱ་ནག་དང་འབྲེལ་བའི་གནས་ཚུལ་དང་རྩོམ་ཡིག་གང་མང་མང་ཕྱོགས་སྒྲིག་བྱ་རྒྱུར་འབད་བརྩོན་བྱེད་ཀྱི་ཡོད་པས། རྒྱ་ཡིག་ཤེས་མཁན་ཚོས་རྒྱ་ནག་དང་འབྲེལ་བའི་གནས་ཚུལ་གསར་པ་དང་རྩོམ་ཡིག་གསར་པ་ཡོད་ན། ཕྱི་དྲིལ་ལས་ཁུངས་རྒྱ་ཡིག་སྡེ་ཚན་དང་རྒྱ་རིགས་འབྲེལ་མཐུད་པར་གཏོང་རོགས། མ་འོངས་པར་བོད་དོན་ཞིབ་འཇུག་བྱེད་དུ་ཡོང་མཁན་ཡོད་ཚེ། གནས་ཚུལ་ཆ་ཚང་དྲ་རྒྱ་གཅིག་གི་ནང་སྤུངས་བཞག་པ་ཡིན་ན། ཞིབ་འཇུག་གནང་མཁན་ཚོར་སྟབས་བདེ་པོ་དང་ཕན་ཐོགས་ཡོད་པ་རེད། ཅེས་གསུངས་སོང་།
དྲི་བ་དྲིས་ལན་སྐབས་སུ་བོད་རྒྱ་འབྲེལ་མོལ་སྐོར་ལ་སྲིད་སྐྱོང་མཆོག་གིས། གཞུང་འབྲེལ་བོད་རྒྱ་འབྲེལ་མོལ་ལས་རིམ་དེ་འགྲོ་བཞིན་ཡོད། བོད་རྒྱ་འབྲེལ་མོལ་ལས་དོན་ཚོགས་ཆུང་ཚོགས་ཚར་བ་རེད། དེའི་ནང་དུ་ཁ་གསལ་བོའི་གནས་ཚུལ་སྐོར་ལ་བགྲོ་གླེང་བྱས་པ་ཡིན། དེ་ཡང་གཞུང་གི་འགྲོ་སྟངས་ཡིན་སྟབས་ག་རེ་བཤད་དགོས་མིན་དང་ག་ཚོད་གྲོས་བསྡུར་བྱེད་དགོས་མིན་ལ་གོ་རིམ་ཡོད་པ་རེད། རྒྱ་ནག་གཞུང་དང་༧གོང་ས་མཆོག་གི་སྐུ་ཚབ་དང་མཉམ་དུ་བཀའ་མོལ་གནང་རྒྱུ་དེ་ང་ཚོས་གལ་ཆེན་པོར་རྩི་ཡི་ཡོད། དེ་སྔ་འབད་བརྩོན་གནང་ཡོད་པ་རེད་ལ་ད་ཆར་ཡང་འབད་བརྩོན་གནང་གི་ཡོད། བོད་རྒྱ་འབྲེལ་མོལ་དེ་༧གོང་ས་མཆོག་ནས་གསུང་གི་ཡོད་པ་རེད་ལ་ང་ཚོས་ཀྱང་བཤད་བསྡད་ཡོད། ང་ཚོས་རྒྱ་རིགས་ཚོང་པ་དང་ནང་པ་བོད་ལ་ཤ་ཞེན་ཡོད་མཁན་དེ་འདྲར་ཐུག་འཕྲད་བྱེད་ཀྱི་ཡོད། ཆ་བཞག་ན། ཚོང་པ་གོ་ཝིན་ཀེ་ཁོ་རང་གིས་༧གོང་ས་མཆོག་དང་མཇལ་འཕྲད་གནང་མྱོང་ཡོད་པ་དང་། ༧གོང་ས་མཆོག་ཕར་གདན་འདྲེན་ཞུ་རྒྱུར་འབད་བརྩོན་གནང་བ་རེད། ཡིན་ནའང་ལམ་ལྷོང་མ་བྱུང་བ་དེ་རྒྱ་ནག་ནང་གི་ཆབ་སྲིད་པ་ཚོས་འགོག་རྐྱེན་བཟོས་པ་རེད། དེ་ཡོངས་གྲགས་རེད། གོ་ཝིན་ཀེས་ཕྱི་ལོ་ ༢༠༡༣ དང་ ༢༠༡༤ ནང་༧གོང་ས་མཆོག་དང་མཇལ་འཕྲད་ཐེངས་གསུམ་ལ་གནང་བ་རེད། ཡིན་ནའང་ཕྱི་ལོ་ ༢༠༡༥ ནས་མཇལ་འཕྲད་གནང་ཐུབ་མེད་པ་རེད། ཁོ་རང་ལ་མཚོན་ན་ང་ཚོའི་དཔེ་མཚོན་གཅིག་ཆགས་བསྡད་ཡོད་པ་རེད། དེ་བཞིན་ང་ཚོས་བོད་རྒྱའི་བར་འབྲེལ་བ་མུ་མཐུང་གནང་བསྡད་ཡོད། ཞི་ཅིན་ཕིན་གྱི་ལས་ཡུན་དང་པོའི་ནང་བོད་དོན་དཀའ་རྙོག་དང་གནད་དོན་ཆེ་བའི་སྒང་ལ་ལག་པ་འཆང་གི་ཡོད་མེད་དོགས་པ་ཡོད། རྒྱ་ནག་གི་འོས་བསྡུ་དང་སྲིད་འཛིན་གྱི་འགྲོ་སྟངས་དེ་ག་རང་ཆགས་ཀྱི་ཡོད་པ་རེད། ཨ་རི་ཡིན་ནའང་སྲིད་འཛིན་ཨོ་བྷ་མའི་ལས་ཡུན་གཉིས་པའི་སྐབས་ཨེ་རན་དང་མཉམ་དུ་རྡུལ་མཚོན་གྲོས་ཆིངས་བཞག་པ་དང་། དེ་འདྲ་བའི་དཀའ་རྙོག་ཆེ་བའི་གནད་དོན་ཁག་ཚང་མ་ལས་ཡུན་གཉིས་པའི་སྐབས་སུ་ལག་པ་འཆང་བ་རེད། སྔོན་ཆད་བོད་རྒྱ་འབྲེལ་མོལ་བྱུང་སྟངས་དེ་ཡང་ཅང་ཙེ་མིན་གྱི་ལས་ཡུན་གཉིས་པའི་སྐབས་སུ་བྱུང་བ་རེད། ལས་ཡུན་གཉིས་པ་ཚར་གྲབས་ཡོད་སྐབས། ༧གོང་ས་མཆོག་གི་སྐུ་ཚབ་དང་མཉམ་དུ་ཐུག་འཕྲད་བྱ་རྒྱུ་མགོ་བརྩམས་པ་རེད། ཏུན་ཞོ་ཕིན་ཡིན་ན་ཡང་རིག་གནས་གསར་བརྗེའི་རྗེས་སུ་ཁོ་རང་ལ་དབང་ཆ་ཆ་ཚང་རག་པ་དང་གཞི་ནས་བོད་མིའི་སྒྲིག་འཛུགས་ཀྱི་སྐུ་ཚབ་དང་ཐུག་འཕྲད་བྱུང་བ་རེད། འཛམ་གླིང་ཡོངས་ཀྱི་སྲིད་འཛིན་ཚང་མའི་འགྲོ་སྟངས་དེ་དབང་ཆ་ཚང་རག་པའི་རྗེས་སུ་དཀའ་རྙོག་ཆེ་ཁག་ལ་ལག་པ་འཆང་གི་ཡོད་པ་རེད། དེ་ཡིན་དུས་ཞི་ཅིན་ཕིན་གྱི་ལས་ཡུན་གཉིས་པའི་སྐབས་སུ། ཁོས་དཀའ་རྙོག་སེལ་འདོད་ཡོད་ཚེ། རྒྱ་ནག་གི་དཀའ་རྙོག་མང་པོའི་གྲས་ནས་སེལ་སླ་ཤོས་དེ་བོད་དོན་ཆགས་ཀྱི་ཡོད་པ་རེད། ཉིན་ཁ་ཤས་རྗེས་སུ་རྒྱ་ནག་ཏང་གི་ཚོགས་ཆེན་ཐེངས་ ༡༩ འཚོགས་ཀྱི་རེད། ཞི་ཅིན་ཕིན་ནི་སྔར་བཞིན་སྲིད་འཛིན་ལ་གནས་རྒྱུ་ཡིན་པ་ཡོངས་གྲགས་རེད། དེའི་ནང་དུ་ཁོ་རང་ལ་རྒྱབ་སྐྱོར་ཡོད་པའི་མི་སྣ་ག་ཚོད་སླེབས་ཡོད་པ་དང་། ཆབ་སྲིད་གྲོས་ཚོགས་ཀྱི་འགན་འཛིན་སུ་ཞིག་ཆགས་ཀྱི་འདུག དེ་དག་ཚང་མ་འཐབ་ཕྱོགས་གཅིག་གྱུར་དང་ཐད་ཀར་འབྲེལ་བ་ཡོད་དུས། འཐབ་ཕྱོགས་གཅིག་གྱུར་ནང་གི་ལས་བྱེད་འཕོ་འགྱུར་ག་འདྲ་འགྲོ་ཡི་འདུག བོད་རང་སྐྱོང་ལྗོངས་གཙོས་པའི་ཁམས་དང་ཨ་མདོའི་ནང་བོད་པ་དང་རྒྱ་རིགས་ལས་བྱེད་སུ་སུ་ཡོང་གི་འདུག དེ་དག་སུ་ཞིག་གི་ཕྱོགས་གཏོགས་རེད། ཁོ་ཚོ་གུ་ཡངས་ཅན་གྱི་བསམ་བློ་འཁུར་མཁན་རེད་དམ། དེ་དག་ཚང་མར་ང་ཚོས་རྟོག་ཞིབ་བྱ་དགོས་ཀྱི་ཡོད་པ་རེད། རྟོག་ཞིབ་བྱས་པ་བརྒྱུད་ནས་ང་ཚོས་གང་ལ་གང་འཚམས་ཚོད་དཔག་ཐུབ་ཀྱི་རེད་ལ། ཕལ་ཆེར་ཕྱི་ལོ་ ༢༠༡༩ ནས་རྒྱ་ནག་གཞུང་ངོས་ནས་བོད་རྒྱ་འབྲེལ་མོལ་ཡོང་ཐུབ་པ་རེད་དམ་མ་རེད་གསལ་བོར་ཤེས་ངེས་རེད། ང་ཚོས་དེ་དག་ཚང་མར་རྟོག་ཞིབ་ཀྱིས་འབད་བརྩོན་ཞུས་བསྡད་ཡོད། ཅེས་གསུངས་སོང་།
གསར་འགོད་པ། པདྨ་རྒྱལ།
རྒྱ་སྐད་ཤེས་པ་ཙམ་གྱི་བོད་རྒྱ་གཉིས་ལྕོག་རྩེའི་སྟེང་གྲོས་མོལ་ལ་འགུག་ཐུབ་མིན་མི་ཤེས་ཀྱང་གལ་ཆེ་ཤོས་དེ་བོད་རྒྱའི་གནད་དོན་དེ་ཆབ་སྲིད་ལ་ཐུག་ཡོད་ན་བོོད་རྒྱ་གཉིས་ལྕོག་རྩེའི་སྟེང་གྲོས་མོལ་ཐུབ་པའི་ཆབ་སྲིད་མི་སྣ་གསོ་སྐྱོང་བརྒྱུད་ནས་འགྲོ་དགོས་པ་ལས་རྒྱ་སྐད་ཤེས་པ་ཙམ་གྱི་བོད་རྒྱའི་དཀའ་སྙོགས་སེལ་ཐུབ་པའི་རེ་བ་ནམ་ཡང་བྱ་མི་ཉན་པ་ནི་བོད་རྒྱའི་གནད་དོན་དེ་བོད་རྒྱ་གཉིས་སྐད་བརྡ་མ་འཕྲོད་ནས་ལྷག་པ་མིན་པ་ཆབ་སྲིད་ཀྱི་གནད་དོན་འོག་ཏུ་མི་ལོ་བཅུ་ཕྲག་དྲུག་ལ་ཉེ་བའི་དུས་ཚོད་རྫོགས་ཡོད་པ་ནས་གསལ་པོ་ཤེས་ཐུབ་པ་མ་རེད་དམ་།