ཕྱི་ལོ་ ༢༠༡༧ ཟླ་བ་ ༡༢ ཚེས་ ༡༠ ཉིན། སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་དེ་མི་ལོ་ ༢༨ འཁོར་བའི་དགའ་སྟོན་གྱི་ཉིན་མོར་དགའ་ལྡན་ཤར་རྩེ་གྲྭ་ཚང་གི་གོ་སྒྲིག་འོག་གཞུང་འབྲེལ་མཛད་སྒོ་ཟབ་རྒྱས་ཞུས་པ།
༄༅། །དེ་ཡང་ལྷར་བཅས་སྲིད་ཞིའི་གཙུག་རྒྱན། སྐྱེ་འགྲོ་ཡོངས་ཀྱི་མ་འདྲིས་པའི་མཛའ་བཤེས། ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག འཛམ་གླིང་ཞི་བདེའི་དེད་དཔོན་ཆེན་པོ། འཕགས་མཆོག་འཇིག་རྟེན་དབང་ཕྱུག་སྡོམ་བརྩོན་ངུར་སྨྲིག་གར་གྱི་རྣམ་པར་རོལ་པ། ༸གོང་ས་ལྷ་མིའི་རྣམ་འདྲེན་༸སྐྱབས་མགོན་༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གི་བཀའ་དྲིན་རྗེས་སུ་དྲན་པའི་སྒོ་ནས་སྒོ་གསུམ་གུས་ཕྱག་སྔོན་དུ་བཏང་སྟེ། མགོན་པོ་གང་ཉིད་ལ་སྤྱི་ལོ་ ༡༩༨༩ ལོར་འཛམ་གླིང་ནང་ཆེས་སྙན་གྲགས་ཆེ་བའི་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་དེ་མི་ལོ་ ༢༨ འཁོར་བའི་དགའ་སྟོན་གྱི་དུས་ཆེན་གྱི་ཉིན་མོར་གཞིས་བྱེས་བོད་མི་ཡོངས་དང་། དྲང་བདེན་དང་ཞི་བདེར་དགའ་བའི་འཛམ་གླིང་མི་མང་ཡོངས་ལ་དགའ་ལྡན་ཤར་རྩེ་གྲྭ་ཚང་ནས་མཛའ་བརྩེའི་འཚམས་འདྲི་བཀྲ་ཤིས་བདེ་ལེགས་ཞུ།
ཟླ་འདིའི་ཚེས་ ༡༠ སྔ་དྲོའི་ཕྱག་ཚོད་ ༧/༣༠ ཐོག རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་གཞིས་སྤྱིའི་ནོར་བུ་རིར་གཞུང་འབྲེལ་མཛད་སྒོར་གདན་ས་ཆོས་སྒར་ཁག་གི་སྐྱབས་གནས་མཁན་རིན་པོ་ཆེ་རྣམ་པ་དང་དགེ་སྐོས། ཕྱག་མཛོད་རྣམ་པ་དང་། སྐུ་མགྲོན་གཙོ་བོ་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ RK Krimey མཆོག་དང་། ཕྱོགས་བཞུགས་བོད་མི་མང་སྤྱི་འཐུས། ས་འཐུས་ཚོགས་གཙོ། ས་གནས་འགོ་འཛིན། རང་བདེན་ཚོགས་གཙོ་སོགས་གཞུང་འབྲེལ་དང་གཞུང་འབྲེལ་མིན་པའི་ཚོགས་པ་ཁག་དང་། སེར་སྐྱ་མི་མང་ཚང་འཛོམས་ཀྱིས། ༸རྒྱལ་བའི་སྐུ་དཔར་མཐོང་གྲོལ་རིན་པོ་ཆེ་དུང་རྒྱ་སྤོས་སྣེས་སྔོན་བསུས་ཏེ་བཞུགས་ཁྲིར་བཞུགས་སུ་གསོལ་བ་དང་། མཎྜལ་རྟེན་གསུམ་འདེགས་འབུལ་ཞུས་རྗེས། དགའ་ལྡན་ཤར་རྩེ་གྲྭ་ཚང་ནས་སེར་སྐྱ་མི་མང་ཡོངས་ལ་གསོལ་ཇ་དང་བཞེས་བག གྲོ་མ་འབྲས་སིལ་བཅས་ཞུས་པ་དང་། དགའ་ཤར་གྲྭ་ཚང་གི་དབུ་མཛད་ཆེན་མོ་ལགས་ནས་ཞལ་འདོན་དབུ་བསྐུལ་གནང་སྟེ་བོད་ལྗོངས་ལྷ་སྲུང་འཕྲིན་བསྐུལ་དང་། སྐུ་རླུང་དར་འཛུགས་དང་བསངས་གསོལ་གསུང་ཆོག་ཟབ་རྒྱས་ཞུས་རྗེས། སྐུ་ངོ་གཞིས་འགོ་མཆོག་དང་། ས་འཐུས་ཚོགས་གཙོ། ཕྱོགས་བཞུགས་བོད་མི་མང་སྤྱི་འཐུས། སྐུ་མགྲོན་གཙོ་བོ་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་བཅས་ཀྱིས་དུས་ཆེན་དང་འབྲེལ་བའི་གསུང་བཤད་དང་། བོད་སློབ་འཛིན་ཚོགས་ནས་དགེ་རྒན་དང་སློབ་ཕྲུག་ཁག་ཅིག་ལ་ལེགས་སྐྱེས་གསོལ་རས་དང་ཕྱག་ཁྱེར་གསོལ་སྩལ་གནང་བ་སོགས་མཛད་སྒོ་ཟབ་རྒྱས་སྲུང་བརྩི་ཞུས།
ལོ་ལྟར་མཛད་སྒོ་འདོད་རྒུ་གླིང་གཞིས་སྤྱི་མི་མང་ཚོགས་ཁང་དུ་འཚོགས་ཀྱི་ཡོད་ཀྱང་། འདི་ལོ་ཟླ་འདིའི་ཚེས་ ༡༡ ཉིན་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་འདི་ག་གཞིས་ཆགས་སུ་ཞབས་སོར་བཀའ་དྲིན་ཆེ་གཏན་འཁེལ་བར་ས་གནས་སྐུ་ཕྱྭའི་ཉེན་སྲུང་སླད་རྒྱ་གར་མངའ་སྡེ་གཞུང་གི་སྐོར་སྲུང་མི་མང་རུ་ཁག་ཆེད་གཞིས་སྤྱི་ཚོགས་ཁང་དུ་སྡོད་གནས་གོ་སྒྲིག་ཞུ་དགོས་པར་བརྟེན། འདི་ལོའི་མཛད་སྒོ་གཞིས་སྤྱིའི་ནོར་བུར་རིར་འཚོག་རྒྱུར། གོ་སྒྲིག་མཐུན་འགྱུར་ཆ་ཚང་དགའ་ལྡན་ཤར་རྩེ་གྲྭ་ཚང་ནས་ཞུ་དགོས་བཀའ་གསལ་ཕེབས་དགོངས་བཞིན། སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ལ་ཨ་རིའི་གྲོས་ཚོགས་ཀྱི་གསེར་གྱི་གཟེངས་རྟགས་འབུལ་བཞེས་ཀྱི་དུས་ཆེན་མཛད་སྒོ་ལོ་ལྟར་གཞིས་སྤྱིའི་ནོར་བུ་རིར་དགའ་ལྡན་ཤར་རྩེ་གྲྭ་ཚང་གིས་གོ་སྒྲིག་ཞུ་མུས་བཞིན། འདི་ལོའི་ཞི་བདེའི་གཟེངས་རྟགས་ཀྱི་དུས་ཆེན་མཛད་སྒོ་དེ་ཡང་གོ་སྒྲིག་ཟབ་རྒྱས་ཞུས།
ལྷར་བཅས་སྲིད་ཞིའི་གཙུག་རྒྱན་༸གོང་ས་༸སྐྱབས་མགོན༸རྒྱལ་དབང་ཡིད་བཞིན་ནོར་བུ་མཆོག་ནི། སྔོན་བསྐལ་པ་དཔག་ཏུ་མེད་པའི་སྔ་རོལ་ནས་སྲས་བཅས་རྒྱལ་བ་རྒྱ་མཚོའི་སྤྱན་སྔར་ཐུགས་བསྐྱེད་དམ་བཅའ་ཇི་ལྟར་མཛད་པ་བཞིན། སྐུ་གསུང་ཐུགས་ཀྱི་མཛད་པ་མཐའ་དག་འགྲོ་བ་ཡོངས་ཀྱི་བདེ་དོན་ཆེད་གཏོང་གནང་གི་རླབས་ཆེན་ཀུན་ཕན་མཛད་འཕྲིན་གྱི་རྟ་བདུན་དབང་པོའི་དཀྱིལ་འཁོར་འབུམ་ཕྲག་ལྷམ་མེ། ལྷན་ནེ། ལྷང་ངེར་གསལ་ཞིིང། ཁྱད་པར་དེང་ཕྱི་དངོས་པོའི་དཔལ་ཡོན་ཡར་རྒྱས་ཚད་མཐོར་ཕྱིན་ཀྱང་། འདོད་རྔམ་དང་འགྲན་རྩོད་ཕྲག་དོག་སོགས་ཀྱི་གཞན་དབང་དུ་སོང་སྟེ། མི་རྣམས་སེམས་ཀྱི་བདེ་སྐྱིད་འཚོལ་བའི་ཤེས་རབ་ཀྱི་མིག་དང་བྲལ་བར་གྱུར་པ་ན། མགོན་པོ་མཆོག་ནས་འགྲོ་བ་ཀུན་ལ་ཁྱབ་པའི་བྱམས་བརྩེ་དང་། མིའི་སེམས་ལ་བག་ཕེབས་དང་སྤྲོ་སྣང་རབ་ཏུ་སྟེར་བའི་བཅོས་མིན་ཞལ་རས་དགྱེས་བརྩེའི་འཛུམ་མདངས་དང་། བཞད་སྒྲ་བཅས་འཛམ་གླིང་གི་ཡུལ་གྲུ་གང་སར་ཞབས་ཀྱིས་བཅགས་ཏེ། དུས་ཀྱི་དགོས་མཁོ་དང་འཚམ་པའི་རྩ་ཆེའི་ལམ་སྟོན་ཟབ་མོ་བསྩལ་གནང་གིས་འགྲོ་བ་མི་རྣམས་ཀྱི་སེམས་ལ་རེ་བའི་འོད་སྣང་སྦྱིན་བཞིན་ཡོད་ལ། ལྷག་པར་ཡང་ཁོང་གིས་སེམས་ཁམས་རིག་པ་དང་རྟེན་འབྱུང་གི་ལྟ་བ་ཟུང་དུ་འབྲེལ་བའི་ནང་པའི་ཁྱད་དུ་འཕགས་པའི་གཅེས་ནོར་ཁག་དང་དེང་རབས་ཚན་རིག་བར་གོ་བསྡུར་ཡང་ཡང་མཛད་བཞིན་པ་བཅས་ནི། ནང་པའི་ཚན་རིག་དང་དེང་རབས་ཚན་རིག་གཉིས་ཟུང་འབྲེལ་གྱིས་སེམས་ཁམས་ཚན་རིག་གི་ཁྱབ་ཁོངས་རྒྱ་སྐྱེད་བཏང་སྟེ། དུས་རབས་འདི་དང་འབྱུང་འགྱུར་གྱི་དུས་རབས་ནང་འགྲོ་བ་མིའི་རིགས་རྣམས་བདེ་སྐྱིད་ལྡན་པ་དང༌། མིའི་སྤྱི་ཚོགས་བྱམས་བརྩེ་ལྡན་པ་ཞིག་བསྐྲུན་རྒྱུར་འབད་བརྩོན་དང་མཛད་ཁུར་ལྷག་པར་བཞེས་བཞིན་ཡོད།
སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ཕྱི་ལོ་ ༡༩༥༦ ལོར་རྒྱ་གར་དུ་སྟོན་པ་མྱང་འདས་དུས་ཆེན་མཛད་སྒོར་ཆིབས་སྒྱུར་གནང་སྐབས། Banaras Hindu University ཞེས་པའི་གཙུག་ལག་སློབ་ཆེན་གྱིས་༸རྒྱལ་བ་༸པཎ་ཆེན་རྣམ་གཉིས་ལ་ཆེ་བསྟོད་ཕྱག་འཁྱེར་“Doctor of Letters”ཞེས་པ་རེ་ཕུལ་བ་ནི་ཕྱག་འཁྱེར་འབུལ་བཞེས་ཀྱི་ཐོག་མ་དེ་ཡིན། ༸གོང་ས་མཆོག་བཙན་བྱོལ་དུ་ཕེབས་ནས་ཐོག་མར་ཕུལ་བའི་གཟེངས་རྟགས་ནི། ཕྱི་ལོ་ ༡༩༥༩ ལོར་ཧྥེའི་ལེའི་པིན་(Philippines) ནས་ཕུལ་བའི་“Ramon Magsaysay Award”ཞེས་པའི་རྟགས་མ་དེ་ཡིན་ཞིང་། དེ་ནས་ད་བར་གཟེངས་རྟགས་གྲངས་ ༡༧༠ ལྷག་འབུལ་བཞེས་མཛད་ཡོད་ཅིང་། འདི་ལོ་གཅིག་པུར་མཚོན་ནའང་ཨིན་ཡུལ་དང་། འཇར་མི་ནི། ཨི་ཊ་ལི། ལ་ཏིཝི་ཡ་བཅས་ཡུ་རོབ་རྒྱལ་ཁབ་ཁག་དང་། ཨ་རི། རྒྱལ་ས་ལྡི་ལིས་གཙོས་རྒྱ་གར་གྱི་གྲོང་ཁྱེར་ཁག་ཏུ་རླབས་ཆེན་གྱི་མཛད་འཕྲིན་བསྐྱངས་ཏེ་འཚེ་མེད་ཞི་བའི་དེད་དཔོན་གྱི་གཟེངས་རྟགས་དང་། ཆེ་བསྟོད་ཕྱག་ཁྱེར། ཆེ་བསྟོད་མི་སེར་གྱི་མཚན་གནས་སོགས་གཟེངས་རྟགས་གྲངས་བཅུ་ལྷག་འབུལ་ལམ་ཞུས་པར་དགྱེས་བཞེས་མཛད་ཡོད།
ཡུལ་གྲུ་དེ་དག་ཏུ་ཆིབས་སྒྱུར་སྐབས་བཀའ་སློབ་བསྩལ་བར་འགྲོ་བ་མིའི་རྩོད་རྙོག་རྐྱེན་པས་འཚེ་བ་བརྒྱུད་མི་མང་ས་ཡ་མང་པོའི་ཚེ་སྲོག་ཤོར་བ་མ་ཟད། འཛམ་གླིང་གི་དཔལ་འབྱོར་དང་ཁོར་ཡུག་གི་གནས་སྟངས་ཀྱང་ཉམས་ཆག་འགྲོ་བཞིན་ཡོད། ང་ཚོས་དུས་རབས་ཉེར་གཅིག་འདི་བཞིན་བཟོད་བསྲན་དང་གྲོས་མོལ་གྱི་ལམ་ནས་དཀའ་ངལ་སེལ་ཐབས་བྱེད་དགོས་པའི་དུས་རབས་ཤིག་ཆགས་རྒྱུར་འབད་བརྩོན་གནང་དགོས། དེ་ལྟར་ཡོང་བར་ཤེས་ཡོན་ནི་ཧ་ཅང་གལ་ཆེན་པོ་ཆགས་ཡོད། དེང་དུས་ཤེས་ཡོན་ལམ་ལུགས་ནང་འགྲོ་བ་མིའི་གཤིས་རྒྱུད་དང་འབྲེལ་བའི་བཟང་པོའི་རིན་ཐང་གོང་མཐོར་གཏོང་རྒྱུའི་ཐད་མ་འདང་བའི་ཆ་ཞིག་ཡོད་པར་བརྟེན། དེང་དུས་ཤེས་ཡོན་ལམ་ལུགས་ནང་བཟང་སྤྱོད་གོང་མཐོར་གཏོང་རྒྱུ་དང་། མང་ཚོགས་ནས་བྱམས་བརྩེ་ཉམས་ལེན་དང་། འགྲོ་བ་མི་གཅིག་གྱུར་གྱི་འདུ་ཤེས་འཛིན་དགོས་པ་དང་། སེམས་ཀྱི་ཞི་བདེ་ཡོང་ཁུངས་ངོ་མ་ནི་བྱམས་བརྩེ་དང་སྙིང་རྗེ་ཡིན་སྐོར་ལམ་སྟོན་དང་འབོད་སྐུལ་གནང་ཡོད།
ནོ་སྦེལ་ཞི་བདེའི་གཟེངས་རྟགས་ལ་མཚོན་ན། ཕྱི་ལོ་ ༡༩༨༩ ལོར་ (NOBEL PEACE PRIZE) ཞེས་གླིང་བཞིའི་ཁྱོན་ལ་སྙན་པར་གྲགས་པའི་ནོར་སྦེལ་ཞི་བདེའི་གཟེངས་རྟགས་༸གོང་ས་མཆོག་ལ་འབུལ་རྒྱུ་ཐུགས་གཏན་འཁེལ་སྐབས་ནོ་སྦེལ་ཞི་བདེའི་གཟེངས་རྟགས་ལྷན་ཚོགས་ཀྱིས་འཛམ་གླིང་ཡོངས་ལ་གསལ་བསྒྲགས་གནང་བའི་ནང་གསལ་ལྟར། ༸གོང་ས་སྐྱབས་མགོན་ཆེན་པོ་མཆོག་གིས་བོད་རྒྱའི་དཀའ་རྙོག་ཐད་ཕན་ཚུན་བཟོད་སྒོམ་དང་། གུས་བརྩི་ལྡན་པའི་མཛད་ཕྱོགས་ཁོ་ན་གནང་ཞིང་། བོད་མི་རིགས་ཀྱི་རིག་གཞུང་དང་ལོ་རྒྱུས་ཀྱི་ཤུལ་རྒྱུན་བཟང་པོ་རྣམས་གཅེས་སྲུང་དང་རྩ་མེད་དུ་མི་འགྲོ་བའི་བདག་གཅེས་གནང་བའི་ཐོག །འཛམ་གླིང་ཞི་བདེ་དང་། རྒྱལ་སྤྱིའི་འཁྲུག་རྩོད་ཁག་ཞི་ཐབས། འགྲོ་བ་མིའི་བཟང་སྤྱོད་གོང་སྤེལ། ཆོས་ལུགས་མཐུན་སྒྲིལ། ཁོར་ཡུག་སྲུང་སྐྱོབ། འགྲོ་བ་མིའི་ཐོབ་ཐང་གི་འགན་ཁུར། མིའི་རིགས་སྤྱི་ལ་འཕྲད་བཞིན་པའི་ཐུན་མོང་གི་དཀའ་ངལ་སེལ་ཐབས་བཅས་ལ་སྨན་པའི་རླབས་ཆེན་གྱི་མཛད་འཕྲིན་བགྲང་ལས་འདས་པ་ཞིག་བསྐྱངས་དང་སྐྱོང་བཞིན་ཡོད་པར་འཛམ་གླིང་མི་མང་ནས་ཆེ་མཐོང་དང་གུས་བརྩི་རྒྱབ་སྐྱོར་མཚོན་སླད་གཟེངས་རྟགས་འབུལ་ལམ་ཞུས་པ་ཞིག་ཡིན།
ཐེངས་དེའི་གཟེངས་རྟགས་འོས་མིའི་ཁོངས་སུ་ཨུ་རུ་སུའི་སྲིད་འཛིན་མེ་ཀར་གྷོར་པཱ་ཇོབ་དང་། ཨ་རིའི་སྲིད་འཛིན་ཟུར་པ་རོ་ནལ་རི་གྷན། ལྷོ་ཨཧྤི་ཀའི་རྒྱལ་གཅེས་དབུ་འཁྲིད་ནལ་སན་མན་ཌ་ལཱ། འབར་མའི་དམངས་གཙོ་དབུ་ཁྲིད་ཨང་སཱན་སའོ་ཇཱི་སོགས་འཛམ་གླིང་ནང་སྙན་གྲགས་ཆེ་བའི་མི་སྣ་བདུན་ཅུ་དོན་དྲུག་དང་། ཚོགས་སྡེ་ཉི་ཤུ་རྩ་ལྔ་བཅས་ཡོད་པའི་ཁྲོད་ནས་དུས་རབས་འདིའི་ནང་སུས་ཀྱང་འགྲན་དུ་མེད་པའི་༸གོང་ས་སྐྱབས་མགོན་ཆེན་པོ་མཆོག་གསེར་རིའི་དབུས་ན་ལྷུན་པོ་དང་། རྒྱུ་སྐར་དབུས་ཀྱི་ཉ་རྒྱས་ཟླ་བ་བཞིན་རྩོད་མེད་ཀྱི་འཛམ་གླིང་ཞི་བདེའི་དེད་དཔོན་ཆེན་མོར་མངའ་གསོལ་ཞུས་པ་ནས་ཁོང་ཉིད་འཛམ་གླིང་ནང་གུས་བཀུར་དང་དགའ་མོས་ཆེ་ཤོས་ཞུ་ཡུལ་དང་། ཞི་བདེ་དང་བྱམས་བརྩེའི་མཚོན་རྟགས་སུའང་ངོས་འཛིན་ཞུ་བཞིན་ཡོད། ༸གོང་ས་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་པ་དེས་གཟེངས་རྟགས་ཀྱི་རིན་ཐང་དང་ཆེ་མཐོང་ཡང་སྔར་ལྷག་གོང་མཐོར་སོང་ཡོད།
༸རྒྱལ་དབང་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་རྒྱུའི་གསལ་བསྒྲགས་བྱས་མ་ཐག་ཨ་རིའི་གྲོས་ཚོགས་གོང་འོག་གཉིས་ཀྱིས་འཚམས་འདྲི་ཞུ་བའི་གྲོས་ཆོད་(ཨང་ ༧༥དང་། ཨང་ ༢༠༩) གཉིས་བཞག་གནང་བ་དང་། རྒྱ་གར་གྱི་སྲིད་འཛིན་ཨར་བན་ཀཏྲ་རཱ་མཱན་མཆོག་གི་འཚམས་འཕྲིན་ནང་། ༸གོང་ས་མཆོག་གིས་དུས་རྟག་ཏུ་འཚེ་བ་ཡོངས་སུ་སྤངས་པའི་སྒོ་ནས་ཞི་མཐུན་གྱི་ཐབས་ལམ་ཟབ་མོ་ཁོ་ནར་འཇུག་པའི་རྒྱ་ཁྱབ་ཀྱི་མཛད་ཇུས་ཡང་དག་པ་ཞིག་ཕྱག་ལེན་དུ་བསྟར་གནང་བ་དང་། ལྷག་པར་ས་སྟེང་གི་སྐྱེ་འགྲོ་ཀུན་ལ་བྱམས་པ་དང་། བརྩེ་བ་ཁོ་ན་ཕྱག་བཞེས་བསྐྱངས་པའི་ཁྱད་ཆོས་བཟང་པོ་རྣམས་མང་མོས་ངོས་འཛིན་ཞུས་ཏེ། ད་རེས་འཛམ་གླིང་ཞི་བདེའི་གཟེངས་བསྟོད་བྱ་དགའ་སྙན་གྲགས་ཆེ་ཤོས་དེ་འབུལ་ལམ་ཞུས་པ་རེད། ཅེས་འཁོད་པ་སོགས་འཛམ་གླིང་ཞི་བདེར་དགའ་བའི་རྒྱལ་ཁབ་ཁག་གི་དབུ་ཁྲིད་དང་། སྙན་གྲགས་ཅན་གྱི་མི་སྣ། ཆོས་ལུགས་ཁག་གི་དབུ་ཁྲིད་སོགས་ཀྱིས་བླ་ན་མེད་པའི་ཆེ་བསྟོད་དང་། བསྔགས་བརྗོད། འཚམས་འདྲི་ཞུས་པའི་འཕྲིན་བཟང་གི་སྙན་པ་འཛམ་གླིང་ཀུན་ཏུ་བསྒྲགས་པ་མ་ཟད། རྒྱལ་ཁབ་ཁག་གི་བརྙན་འཕྲིན་དང་རླུང་འཕྲིན། གསར་ཤོག་སོགས་གསར་འགྱུར་བརྒྱུད་ལམ་ཁག་གིས་བསྟོད་དབྱངས་ཀྱི་རྔ་སྒྲ་བར་མེད་དུ་བསྒྲགས་པ་སོགས་ཀྱིས་བོད་དང་། བོད་མིའི་ཆོས་དང་རིག་གཞུང་། བོད་ཀྱི་བདེན་དོན་དེ་རྒྱལ་སྤྱིའི་གར་སྟེགས་སྟེང་སྐུལ་འདེད་ཀྱི་གོམ་སྟབས་གསར་པ་ཞིག་ལ་བསྒྱུར་གནང་མཛད།
༸མགོན་པོ་མཆོག་གི་གཞན་ཕན་གྱི་མཛད་འཕྲིན་སྤྱི་དང་། ཁྱད་པར་དུས་རབས་འདིའི་འགྲོ་བ་མིའི་བདེ་སྡུག་དང་། བསམ་བློ། ཁོར་ཡུག་གི་གནས་སྟངས་བཅས་ལ་དགོངས་བཞེས་བླ་མེད་ཀྱིས་འགྲོ་བ་མིའི་རིགས་ཀྱི་བཟང་སྤྱོད་ཀྱི་རིན་ཐང་གོང་མཐོང་གཏོང་རྒྱུ་དང། འཛམ་གླིང་གི་ཆོས་ལུགས་ཁག་ནང་ཁུལ་ཕན་ཚུན་མཐུན་ལམ་གོང་འཕེལ་དུ་གཏོང་རྒྱུ། བོད་མིའི་ཆོས་དང་རིག་གཞུང་ཁོར་ཡུག་དང་བཅས་པར་སྲུང་སྐྱོབ་བྱ་རྒྱུས་མཚོན་མདོར་ན་རྟེན་འབྱུང་གི་ལྟ་བ་དང་གཞན་ཕན་སྙིང་རྗེ་ཟུང་དུ་འཇུག་པའི་ལམ་བཟང་དེ་ཉིད་གང་ཉིད་ཀྱི་ཉམས་བཞེས་ཀྱི་ཐུགས་དམ་གྱི་མཐིལ་དུ་མཛད་ཅིང་། གཞན་ལའང་འཆད་སྤེལ་གཙོ་བོར་མཛད་པ་སོགས་གསང་གསུམ་གྱི་མཛད་འཕྲིན་གཞལ་དུ་མེད་པ་བསྐྱངས་དང་སྐྱོང་བཞིན་པ་བཅས་ལ་འཛམ་གླིང་ཁྱོན་གྱི་རྒྱལ་ཁབ་དང་ཚོགས་སྡེ་ཁག་འདྲ་མིན་ནས་ཆོས་དང་། རིག་གཞུང་། ཚན་རིག ལྟ་གྲུབ། སེམས་ཁམས་རིག་པ་སོགས་སྡེ་ཚན་སྣ་ཚོགས་པའི་སྒོ་ནས་ཆེ་བསྟོད་དང་གཟེངས་རྟགས། ཕྱག་འཁྱེར། མཚན་གནས་སོགས་བགྲང་གིས་མི་ལང་བ་ཕུལ་ཏེ་དེང་འཛམ་གླིང་ནང་མཚན་སྙན་ཆེ་ཤོས་སུ་གྱུར་ཡོད།
མཐའ་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཞབས་པད་བསྐལ་བརྒྱར་བརྟན་ཅིང༌། ཐུགས་བཞེད་མཐའ་དག་ལྷུན་གྱིས་འགྲུབ་པ་དང༌། འཛམ་གླིང་སྐྱེ་འགྲོ་ཡོངས་ལ་ཞི་བདེ་དང་། བོད་དོན་བདེན་མཐའ་མྱུར་དུ་གསལ་ཏེ་གཞིས་བྱེས་མཉམ་འཛོམས་ཡོང་བའི་སྨོན་འདུན་ཞུ་རྒྱུ་བཅས། རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་དགའ་ལྡན་ཤར་རྩེ་ཐོས་བསམ་ནོར་གླིང་གྲྭ་ཚང་ནས། མཁན་མིང་འཛིན་པ་དགེ་བཤེས་བྱང་ཆུབ་སངས་རྒྱས་ཀྱིས་ཕྱི་ལོ་ ༢༠༡༧ ཟླ་ ༡༢ ཚེས་ ༡༠ ལ།། །།
