ལོ་ངོ་༦༠ རྗེས་སུ་འབྲས་བུ་ཅི་ཞིག་བྱུང་ཡོད་དམ།

ནམ་མཁའ། ཡུ་རོབ།

གོང་གི་རྩོམ་བྱང་འདི་དྲི་བ་ཞིག་ཡིན་པ་རྩོམ་ཐུང་འདི་ཀློག་མཁན་ཚོས་ཤེས་མོད། འོན་ཀྱང་དྲི་བ་འདི་ཅི་ཞིག་ལ་འགོད་དགོས་མིན་ནི་ལམ་སེང་ཡིད་ལ་ཤར་ཐུབ་མིན་ཐེ་ཚོམ་རེད།  བོད་རྒྱ་གྲོས་མོལ་གྱི་འབྲས་བུ་ཁོ་ན་ལ་དམིགས་མཁན་ཚོས་འབྲས་བུ་ཅི་ཡང་བྱུང་མི་འདུག་སྙམ་སྲིད། ཡིན་ན་ཡང་། དེ་རིང་འདིར་བོད་རྒྱ་གྲོས་མོལ་ལ་འབྲས་བུ་བྱུང་ཡོད་མེད་སྐོར་ནས་དྲི་བ་བཏང་བ་མ་ཡིན་པར། ༧གོང་ས༧མཆོག་གཙོས་བོད་མི་ཆིག་འབུམ་ཡས་མས་ཙམ་བཙན་བྱོལ་དུ་འབྱོར་ནས་འབྲས་བུ་ཅི་ཞིག་བྱུང་ཡོད་མེད་སྐོར་ནས་ཡིན། རྒྱུ་མཚན་ནི། ཕྱི་རྒྱལ་ཡུལ་གྲུ་ཁག་ཏུ་ཡོད་པའི་བོད་རིགས་ཤེས་ཡོན་ཡོད་མེད་གཉིས་ཀྱི་བོད་མི་བཙན་བྱོལ་པ་མང་པོ་ཞིག་གིས། བཙན་བྱོལ་གཞུང་ལ་བལྟ་ཡ་ཅི་ཡང་ཡོད་པ་མ་རེད། ཁོང་ཚོར་ནུས་པ་ག་རེ་ཡོད་པ་རེད་ཅེས་བཤད་བཞིན་པ་ཕྲན་གྱིས་དངོས་སུ་ཐོས་མྱོང་ཡོད།ཡིན་ན་ཡང་། ཕྱི་ལོ་  ༡༩༥༩ ལོར་༧གོང་ས༧མཆོག་གཙོས་བོད་མི་བཙན་བྱོལ་བ་མང་པོ་ཞིག་ཧི་མ་ལ་ཡའི་ཕར་རྒྱབ་ནས། རྒྱ་གར་ས་ཐོག་ཏུ་མ་འབྱོར་བའི་གོང་རྒྱ་གར་ནང་དུ་འཛུལ་འཇུག་མིན་མི་ཤེས་སྟབས། གལ་སྲིད་རྒྱ་གར་གཞུང་གིས་སྐྱབས་བཅོལ་དུ་ཡོང་གི་མ་བཅུགས་ཚེ། འབྲུག་རྒྱལ་ཁབ་ནང་འཛུལ་ཆོག་པའི་རེ་བ་བརྒྱབས་ཏེ། བོད་མི་འགའ་འབྲུག་ལ་བཏང་བའི་གནས་ཚུལ་སོགས་༧གོང་ས༧མཆོག་གིས་བཀའ་གནང་བ་ལྟར། ཉིན་མོ་དེ་ནས་བཟུང་རང་ཡུལ་བཙན་འཕྲོག་བྱས་ཏེ། མི་ཡུལ་དུ་བཙན་བྱོལ་བ་བྱས་ནས་ཉིན་དང་ཟླ་བ་དྲུག་བཅུ་མ་ཡིན་པར་ལོ་ངོ༦༠འཁོར་བའི་དེ་རིང་གི་ཉིན་མོ།  ང་ཚོས་ཁ་ཕྱིར་འཁོར་ནས་གྲུབ་འབྲས་ཅི་ཞིག་བྱུང་མིན་ལ་བལྟ་རྒྱུ་ཡིན།

གོང་དུ་ཞུས་པ་ལྟར་ཕྱི་ལོ་ ༡༩༥༩ ལོར་རྒྱ་གར་ནང་དུ་ས་མཚམས་ནས་འཛུལ་ཆོག་མིན་གྱི་ཐེ་ཚོམ་ནས་འགོ་བརྩམས་ཏེ། ལོ་ངོ་༦༠རྗེས་ཀྱི་དེ་རིང་གི་ཉིན་མོ་༼བོད་tibet༽ཟེར་བའི་མིང་ཚིག་འདི་འཛམ་གླིང་གི་སྡིངས་ཆའི་སྒང་ན་གནས་རིམ་གང་དུ་སླེབས་ཡོད་མེད་ཤེས་དགོས་པ་དེ་རེད། ཡིན་ན་ཡང་། ལོ་ངོ་༦༠རིང་གི་གྲུབ་འབྲས་ཆ་ཚང་ཞིག་འབྲི་དགོས་ཚེ། དེབ་རྒན་འགའ་བྲིས་ན་མ་གཏོགས་རྩོམ་ཐུང་ཞིག་གི་ནང་བྲིས་མི་ཚར་བ་དངོས་ཡོད་གནས་ཚུལ་རེད། འོན་ཏེ། བལྟ་རྒྱ་དང་ཐོས་རྒྱ་གཉིས་ཀ་ཆུང་ཡང་། ཕྲན་གྱིས་གང་མཐོང་བ་དང་ཐོས་པ་རྣམས་མདོར་བསྡུས་ཞིག་འདིར་བཀོད་དེ། ༧གོང་ས་༧མཆོག་གཙོ་བྱས་བའི་སྐབས་དེའི་མི་རབས་རྒན་པ་རྣམས་ལ་ཐུགས་རྗེ་ཆེ་ཞེས་ཁ་བཏགས་དཀར་པོ་ཞིག་གི་ཚབ་ཏུ་འབུལ་གྱི་ཡོད།  ཕྱི་ལོ་ ༡༩༥༩ ཟླ་ ༣ ཚེས་ ༣༡ ཉིན་རྒྱ་གར་ས་ཐོག་ཏུ་བཙན་བྱོལ་དུ་འབྱོར་དུས། ས་དང་གནམ་མ་གཏོགས་ངོ་ཤེས་ཅི་ཡང་མེད་པའི་རྒྱུས་མེད་ཀྱི་ལུང་པ་ཞིག་ཏུ་བསླེབས་ཏེ། དང་པོ་སྲོག་འགོ་ཐོན་ཙམ་ཞིག་མ་གཏོགས། མ་འོངས་བའི་འབྲས་བུ་ཅི་ཞིག་འབྱུང་མིན་དང་། བོད་ཀྱི་གནད་དོན་སྐོར་ལ་ཅི་ཞིག་བྱེད་དགོས་མིན་སོགས་ལ་སྔོན་ནས་འཆར་གཞི་ལྡན་པ་ཞིག་ཡོད་པ་མ་རེད་ཅེས་བཀའ་སློབ་ཡོངས་གྲགས་ཀྱིས་གསུངས་པ་ལྟར། ཕྱི་ལོ་ ༡༩༥༩ ལོའི་ཕྱི་ཟླ་བཞི་བའི་ནང་མ་སུ་རིར་འབྱོར་བའི་མཚམས་སུ། འཛམ་གླིང་གི་གསར་འགོད་པ་ཚོས་༼བོད་གཞུང་༽ཡོད་མེད་ཀྱི་དྲི་བ་བཏོན་པའི་སྐབས། ང་དང་ངའི་བཀའ་བློན་ཡོད་ས་ལ་ངོས་ཀྱི་མི་དམངས་ཀྱིས་བོད་གཞུང་ལ་ངོས་འཛིན་བྱེད་ཀྱི་ཡོད་པ་རེད། ཅེས་གསར་འགོད་པར་ལན་བསྐྱོན་པའི་ཕྱི་ཉིན། ལྡི་ལི་གསར་བའི་རྒྱ་གར་རླུང་འཕྲིན་ཁང་གིས་རྒྱ་གར་ལུང་པ་ལ་བོད་གཞུང་ཟེར་བ་ཞིག་ཡོད་པ་མ་རེད་ཅེས་ལན་འདེབས་གནང་བའི་སྐོར། བཙན་བྱོལ་ནང་གི་རང་དབང་བོད་བསྒྱུར་ཐེངས་དང་པོ་ནང་བཀོད་ཡོད་པ་ལྟར།

དེའི་ཉིན་ཤས་རྗེས་སུ། སྐབས་དེའི་རྒྱ་གར་གྱི་སྲིད་བློན་ནེ་རཱོ་ཆེད་མངགས་༧གོང་ས༧མཆོག་ལ་མཇལ་བཅར་དུ་ཕེབས་པའི་སྐབས། རྒྱ་གར་གྱི་སྲིད་བློན་ནེ་རཱོ་ཡང་ཁོང་ཁྲོའི་ངང་མདུན་ཅོག་སྟེང་ཁུ་ཚུར་གྱིས་གཞུ་ཞོར་བོད་གཞུང་ཟེར་བ་ཞིག་ད་ལྟ་རྒྱ་གར་ལུང་པ་ལ་ག་བ་ཡོད་པ་རེད་ཅེས་བཀའ་བཀྱོན་གནང་བའི་སྐོར་དེབ་དེའི་ནང་། ༧གོང་ས༧མཆོག་གིས་བྲིས་གནང་ཡོད་པ་མི་མང་པོ་ཞིག་གིས་མཐོང་ཡོད་ངེས་རེད། སྐབས་ཐོག་དེར་༧གོང་ས༧མཆོག་བོད་རྩིས་བྱས་ན་དགུང་ལོ་ ༢༥ ཕེབས་ཙམ་རེད། རྒྱ་དམར་གྱིས་བོད་ལུང་པ་བཙན་འཕྲོག་བྱས་ཏེ། རྒྱ་གར་ནང་སྐྱབས་བཅོལ་དུ་སླེབས་ནས་རེ་བ་རྒྱ་གར་གཞུང་ལ་བཅོལ་ཡོད་མོད། འོན་ཀྱང་རྒྱ་གར་གཞུང་གིས་ཐ་ན་མིང་ཚིག་ཅིག་བེད་སྤྱོད་གཏོང་སྟངས་ཡང་། རང་དབང་མེད་པར་བཀའ་བཀྱོན་ཁུར་དགོས་པའི་གནས་སྟངས་འདི་འདྲ་ཞིག་གི་འོག་ནས་འགོ་བརྩམས་ནས་ཡོང་པ་རེད། རྒྱ་གར་གྱི་སྲིད་བློན་ནེ་རཱོ་ཡིས་༧གོང་ས༧མཆོག་ལ་བཀའ་གྱོན་གཏོང་བའི་ཉིན་མོ་དེར། ༧གོང་ས༧མཆོག་དང་མཐའ་འཁོར་གྱི་བོད་མི་ཚོའི་སེམས་སུ་དཀའ་སྡུག་ཅི་འདྲ་ཞིག་འཕྲད་ཡོད་དམ། འདི་ནི་ང་ཚོ་གཞོན་སྐྱེས་མང་པོ་ཞིག་གིས་སོར་མོ་བྲང་ལ་བཞག་ནས། ཁྱེད་རང་སྐབས་དེའི་༧གོང་ས༧མཆོག་གཙོ་བྱས་པའི་མཐའ་འཁོར་གྱི་བོད་མི་ཞིག་ཡིན་པའི་འདུ་ཤེས་བཟུང་སྟེ། རང་གིས་རང་ཉིད་ལ་གཏོང་དགོས་པའི་དྲི་བ་ཞིག་རེད།  དཔེར་ན། བོད་ལུང་པ་ཤོར་ནས་རྒྱལ་གཅེས་དཔའ་བོ་དཔའ་མོ་ཚོའི་ཕུང་པོ་ཡང་གྲང་མོ་ཆགས་མེད་པའི་དུས། འུ་ཐུག་ནས་རྒྱ་གར་དུ་ཡོང་སྟེ་རེ་བ་རྒྱག་ས་ཞིག་བཙལ་ཡང་། རེ་བ་རྒྱག་ས་དེའི་མིང་ཚིག་ཞིག་བེད་སྤྱོད་གཏོང་སྟངས་ལ་ཡང་བཀའ་བཀྱོན་བཏང་སྟེ། མདུན་ཅོག་ཡང་བཅོག་ལ་ཁད་བྱས་ཀྱང་མགོ་བོ་སྒུར་ནས་སྡོད་ཡ་མ་གཏོགས་ཅི་ཡང་བྱེད་ཐབས་མེད་པ་རེད།  ཐ་ན་འུ་ཐུག་སྟེ་ངུ་འདོད་ཀྱང་མིག་ཆུ་མི་ཡོང་བའི་དུས་ལ་བསླེབས་ཀྱང་། ༧གོང་ས༧མཆོག་གཙོ་བྱས་བའི་མི་རབས་རྒན་པ་ཚོའི་སྙིང་སྟོབས་མ་ཞུམ་པར། དཀའ་ངལ་རེ་རེ་ལ་གདོང་ལེན་བྱས་ཏེ། ཧི་མ་ལ་ཡའི་རི་འདབས་ཀྱི་གྲོང་གསེབ་ཁུག་ཀྱོག་ཅིག་ནས་བཙན་བྱོལ་གཞུང་གསར་འཛུགས་བྱས་པ་རེད།བོད་མི་རྣམས་རྒྱ་གར་དུ་བཙན་བྱོལ་ལ་འབྱོར་མ་ཐག  བོད་མི་མང་པོ་ཞིག་མྰ་ན་ལའི་ལམ་བཟོ་ལ་བཏང་སྟབས། སྐབས་དེར་ཕྲུ་གུ་ཚོ་རྡོ་ཕ་བོང་ལ་བཏགས་ཏེ་ལམ་བཟོའི་ལས་ཀ་བྱས་བའི་འདྲ་པར་སོགས་དེང་སང་དངོས་སུ་མཐོང་རྒྱུ་ཡོད་པ་དེ། རྒྱ་གར་ལྷོ་ཕྱོགས་སོགས་སུ་གཞིས་ཆགས་མ་བཙུགས་པའི་གོང་རེད། སྐབས་ཐོག་དེར་༧གོང་ས༧མཆོག་གཙོ་བྱས་པའི་མི་རབས་རྒན་པ་ཚོའི་མ་འོངས་ཕུགས་རྒྱང་རིང་བའི་ཐུགས་བསམ་བཞེས་ཏེ། བོད་མི་ཁེར་གཙང་སྡོད་སའི་གཞིས་སྒར་འཛུགས་ཆོག་པའི་རེ་བ་རྒྱ་གར་གཞུང་ལ་ཞུས་ནས། བོད་མི་བཙན་བྱོལ་བ་ཆིག་འབུམ་ཙམ་རྒྱ་གར་ལྷོ་ཕྱོགས་གཙོ་བྱས་པའི་རྒྱ་བལ་འབྲུག་གསུམ་སོགས་ས་གནས་མི་འདྲ་བ་མང་པོ་ཞིག་ལ་བཏང་བ་རེད། གལ་སྲིད་སྐབས་དེར་༧གོང་ས༧མཆོག་གིས་དབུ་ཁྲིད་པའི་མི་རབས་རྒན་པ་ཚོས། མ་འོངས་ཕུགས་རྒྱང་རིང་པོར་ཐུགས་བསམ་མ་བཞེས་བར། འཛམ་གླིང་གི་མི་གྲངས་མང་ཤོས་ཨང་གཉིས་པ་རྒྱ་གར་གྱི་མི་སེར་ནང་འདོད་མོས་ལྟར་འགྲོ་རུ་བཅུགས་ཡོད་ཚེ། རྒྱ་མཚོའི་ནང་ཆུ་ཡི་ཐིག་པ་གཅིག་ལྷུང་བ་ལྟར། དེ་རིང་བོད་མི་བཙན་བྱོལ་བ་ཆིག་འབུམ་ཡས་མས་བཙལ་ན་རྙེད་ཀྱི་ཡོད་པ་མ་རེད།

དེ་ལྟ་ན་ཡང་། ༧གོང་ས༧མཆོག་གཙོ་བྱས་པའི་མི་རབས་རྒན་པ་ཚོས། དེ་རིང་ལས་སང་ཉིན་གཙོ་བོ་བཟུང་ནས། མིག་སྔར་གྱི་དཀའ་སྡུག་གི་ས་བོན་ལ་སང་ཉིན་གྱི་འབྲས་བུ་མེ་ཏོག་བཞད་པའི་ཕུགས་བསམ་བཅིངས་ཏེ།  རྒྱ་གར་ལྷོ་ཕྱོགས་གཙོ་བྱས་བའི་རྒྱ་བལ་འབྲུག་གསུམ་ནང་བོད་མི་ཁེར་སྡོད་གཞི་སྒར་བཙུགས་པ་རེད། རྒྱ་གར་ལྷོ་ཕྱོགས་ལྟ་བུར་མཚོན་ནས་བཤད་ན། བོད་མིའི་གཞིས་སྒར་སྡོད་ཆོག་ཆོག་གི་ས་གནས་ཞིག་མིན་ལ། ས་ཁུལ་དེ་དག་ནི་ནགས་ཚལ་སྟུག་པོའི་རྫོང་ཞིག་ཡིན་པ་མ་ཟད་ཚ་བ་ཆེ་བའི་ས་ཁུལ་དག་རེད། འཛམ་གླིང་མཐོ་སྒང་ནས་ཡོང་བའི་མི་རྣམས་ཚ་བ་ཤིན་ཏུ་ཆེ་བའི་ས་ཁུལ་ཞིག་ཏུ་བཏང་ཡང་། དེ་མ་ཡིན་པའི་ས་ཁུལ་རན་པ་ཞིག་ལ་འགྲོ་བའི་གདམས་གསེས་བྱེད་དབང་མེད་པ་རེད།
རྒྱུ་མཚན་ནི། རང་གི་བོད་ལུང་པ་ཤོར་ནས་རྒྱ་གར་ལུང་པ་ལ་གནས་ཚང་གཡར་དུ་ཡོང་མཁན་ཡིན་པས། གནས་བདག་གིས་གང་ལ་བཞག་ན་དེ་ལས་མི་འདུག་ཐབས་མེད་ལྟ་བུ་ཞིག་ཏུ་གྱུར་ཡོད། དེ་ལྟར་ཡིན་ཡང་། བོད་མི་གཞིས་བྱེས་གཉིས་ཀྱིས་ཤེས་དགོས་པ་ཞིག་ལ། འཛམ་གླིང་སྟེང་ང་ཚོ་ལ་ཆེས་ཤིན་ཏུ་བཀའ་དྲིན་ཆེ་བའི་ལུང་པ་ཞིག་ཡོད་པ་ནི་རྒྱ་གར་ཡིན་པ་དེ་རེད། གལ་སྲིད་རྒྱ་གར་གཞུང་གིས་རྒྱ་དམར་གྱིས་གང་བཤད་ལ་ཉན་ཏེ། བཙན་བྱོལ་གཞུང་ཞིག་གསར་འཛུགས་བྱེད་དུ་བཅུགས་མེད་ཚེ། གཞི་ལུས་མི་དམངས་ཀྱི་སྙིང་སྟོབས་ལ་ཞུམ་པ་མེད་ཀྱང་། རེ་ལྟོས་བྱེད་ས་ཞིག་མེད་པ་མ་ཟད། བཙན་བྱོལ་བོད་མི་ཚོས་ཀྱང་ཆོས་དང་བོད་རང་གི་སྐད་ཡིག་སོགས་རིག་གཞུང་རྒྱུན་འཛིན་བྱེད་ཐུབ་མིན་དང་། ཐ་ན་བོད་ནང་གི་བོད་མི་ཚོའི་མགྲིན་ཚབ་བྱས་ཏེ། བོད་ནང་གི་དཀའ་སྡུག་གི་གནས་སྟངས་ཡང་འཛམ་གླིང་གི་སྡིངས་ཆའི་སྟེང་བསྐྱལ་ཐུབ་ཡོད་མེད་ཀྱང་བཤད་དཀའ་བ་ཞིག་རེད་སྙམ། དེས་རྐྱེན་རྒྱ་གར་གཞུང་དམངས་གཉིས་ཀ་བཀའ་དྲིན་ཆེན་པོ་རེད་ཟེར་གྱི་ཡོད།

གང་ལྟར་ཡང་། ༧གོང་ས༧མཆོག་གིས་དབུ་ཁྲིད་པའི་མི་རབས་རྒན་པ་ཚོའི་དཀའ་སྡུག་གི་སེམས་པ་སྙིང་སྟོབས་དང་ཕུགས་བསམ་གྱི་ངོ་བོར་བསྒྱུར་ཏེ། ཐོག་མར་རས་གུར་ནང་གཞིས་སྡོད་བྱས་ཏེ་ཤིང་ནགས་གཅོད་འབྲེགས་བྱས་ནས། སྡོད་ཁང་དང་ས་ཞིང་ཞིག་ཏུ་བསྒྱུར་པས་དེང་སང་ཞིང་ལས་བྱེད་སའི་ཞིང་ས་སྣུམ་པོ་དེ་དག་ནི། ༡༩༥༩དང་༦༠སྔོན་བོད་མི་བཙན་བྱོལ་པ་མ་སླེབས་པའི་བར་དུ་ནགས་ཚལ་སྟུག་པོའི་རྫོང་ཞིག་ཡིན་པ་ང་ཚོའི་མི་རབས་གཉིས་པ་ཚོས་ཤེས་དགོས་ཞིང་། ཚ་བའི་ལུང་པའི་ནང་ཤིང་ནགས་གཅོད་འབྲེག་སྐབས། སྔོན་བོད་ལུང་པ་ལ་གོམས་འདྲིས་མེད་པའི་ཟས་རིགས་ལོངས་སྤྱོད་དགོས་པ་མ་ཟད། རྒྱ་གར་གྱི་སྐྱོབ་གསོ་ཁོ་ན་ལ་བརྟེན་དགོས་སྟབས། དྲོད་ཁོག་མ་ལྟོགས་ཙམ་ཞིག་ལས་དེང་སང་བཞིན་བཟའ་བཏུང་འབེལ་འབེལ་ལྷུག་ལྷུག་གི་དུས་ཤིག་ག་ལ་ཡིན།

འདི་འདྲའི་ཚ་གྲང་ལྟོགས་གསུམ་གྱི་རྔུལ་ཆུ་ས་ལ་འཐོར་བའི་འབྲས་བུ་ལ། ཕྱི་ལོ་ ༡༩༥༩ཡར་སྔོན་བོད་ཟེར་བའི་མིང་ཚིག་འདི་ཐོས་མྱོང་མེད་པའི་རྒྱལ་ཁབ་ཚོས་ཀྱང་། དེང་སང་བོད་ཟེར་བའི་མིང་ཚིག་འདི་རིན་ཐང་ཅན་ཞིག་ཏུ་བརྩི་བཞིན་ཡོད་པ་མ་ཟད།  སྟོབས་ཆེན་རྒྱལ་ཁབ་མང་པོའི་གྲོས་ཚོགས་འཐུས་མི་དང་། དེ་སྔ་ཕྱི་ལོ་ ༡༩༥༩ ཡར་སྔོན་བོད་དང་འབྲེལ་བ་ཁྱོན་ནས་མེད་པའི་རྒྱལ་ཁབ་ཀྱི་སྲིད་འཛིན་ཟུར་པ་སོགས་ཆེད་མངགས་རྡ་རམ་ས་ལར་ཡོང་སྟེ། ༧གོང་ས༧མཆོག་དང་བཙན་བྱོལ་བོད་མིའི་སྒྲིགས་འཛུགས་ལ་མཇལ་འཕྲད་གནང་ནས་བོད་ཀྱི་བདེན་དོན་ལ་རྒྱབ་སྐྱོར་བྱེད་ཀྱི་ཡོད་པ་རེད། རྡ་རམ་ས་ལ་ནི་ཧི་མ་ལ་ཡའི་རི་འདབས་ཀྱི་རྒྱ་གར་གྱི་གྲོང་གསེབ་ཁུག་ཀྱོག་ཅིག་ཡིན་མོད། འོན་ཀྱང་དེང་འཛམ་གླིང་སྟེང་ཆེས་སྐད་གྲགས་ཆེ་བའི་ས་གནས་ཞིག་ཏུ་གྱུར་ཏེ། འཛམ་གླིང་གི་ཡུལ་སྐོར་བྱེད་སའི་གནས་ཤིག་ཏུ་གྱུར་ཡོད་པ་རེད། འདི་འདྲའི་ས་གནས་ཤིག་ཏུ་ཅི་ལྟར་གྱུར་བ་རེད་དམ། འདི་འདྲའི་ས་གནས་སྐད་གྲགས་ཅན་ཞིག་ཏུ་གྱུར་དོན་གཙོ་བོ་ནི། འཛམ་གླིང་སྟེང་ཆེས་ཤིན་ཏུ་བརྩི་བཀུར་ཞུ་ཡུལ་དུ་གྱུར་བའི་༧གོང་ས༧མཆོག་གི་བཞུགས་སྒར་དང་། ༧གོང་ས༧མཆོག་དང་འཕྱར་གྲུ་མཉམ་འདེགས་བྱེད་མཁན་མི་རབས་རྒན་པ་ཚོས་བཙུགས་པའི་བཙན་བྱོལ་བོད་མིའི་སྒྲིག་འཛུགས་ཡོད་སའི་གནས་ཡིན་པའི་རྒྱུ་མཚན་གྱིས་རེད།

དེ་ལྟ་ན་ཡང་། བཙན་བྱོལ་བོད་མིའི་སྒྲིག་འཛུགས་འདི་༧གོང་ས༧མཆོག་གིས་དབུ་ཁྲིད་པའི་མི་རབས་རྒན་པ་ཚོས། ལས་སླ་བོ་ཞིག་གི་སྒོ་ནས་བཙུགས་པ་མ་ཡིན་པ་གོང་དུ་ཞུས་པ་ལྟར། རྒྱ་ནག་སྲིད་གཞུང་གིས་བོད་ལུང་པ་རྒྱ་ནག་གི་མངའ་ཁོངས་ཡིན་པས་བཅིངས་གྲོལ་བཏང་བ་ཡིན་ཞེས། འཛམ་གླིང་སྟེང་རྫུན་སྒྲོགས་གང་ཐུབ་བྱེད་བཞིན་པ་ལྟར། རྒྱ་གར་གྱི་སྲིད་བློན་ནེ་རོ་ཡིས་དབུ་ཁྲིད་པའི་ཁྱིམ་མཚེས་རྒྱལ་ཁབ་རྒྱ་གར་གྱིས་ཀྱང་བོད་རྒྱ་ནག་གི་ཁོངས་གཏོགས་ཡིན་པར་ངོས་འཛིན་བྱས་སྟབས། བཙན་བྱོལ་གཞུང་གིས་ལས་འགུལ་གང་ཞིག་སྤེལ་ཀྱང་། རྒྱ་གར་སྲིད་གཞུང་ལ་ཕོག་ཐུག་དང་རྒྱ་གར་གྱི་ཁྲིམས་དང་མི་འགལ་བར་བྱེད་དགོས་ཀྱི་ཡོད། དཔེར་ན། དབྱིན་ཡིག་སྟེང་༼CENTRAL TIBETAN ADIMISTRATION༽ཅེས་འབྲི་དགོས་པ་ལས། བཙན་བྱོལ་བོད་གཞུང་ཞེས་པའི་མིང་འདི་བོད་ཡིག་ནང་བྲིས་ཡོད་ཀྱང་།  དབྱིན་ཡིག་ནང་བྲིས་ཆོག་གི་མེད་པ་རེད། འདི་འདྲའི་གནས་སྟངས་ཞིག་གི་འོག་ནས་གོམས་པ་རིམ་སྤོས་ཀྱིས། བོད་མི་རང་ལ་ས་ལག་མཐིལ་སྤར་མོ་གང་ཡང་མེད་པའི་མིའི་ལུང་པ་ཞིག་ལ།  བོད་མི་ཁེ་གཙང་སྡོད་སའི་གཞིས་སྒར་དང་དེང་དུས་ཀྱི་ཤེས་ཡོན་སློབ་སའི་སློབ་གྲྭ།  བོད་ཀྱི་མི་རིགས་ཀྱི་སེམས་གཏིང་ལ་ཐིམ་པའི་ནང་ཆོས་སློབ་གཉེར་བྱེད་སའི་དགོན་པ་སོགས་གསར་དུ་བཙུགས་པ་རེད།ཕྱི་ལོ་ ༡༩༦༠ ལོའི་ཟླ་ ༢ ཚེས་ ༣ ཉིན་རྡོ་རྗེ་གདན་ནས་བོད་ཆོལ་ཁ་གསུམ་གྱིས་མ་གྲོས་གཅིག་མཐུན་གྱི་སྒོ་ནས་༧གོང་ས༧མཆོག་ལ་བརྟན་བཞུགས་ཕུལ་བ་དང་འབྲེལ། བླང་དོར་མནའ་གན་མཐུ་མོ་ཆེ་འབུལ་སྐབས། ༧གོང་ས༧མཆོག་གིས་ཀྱང་བཀའ་སློབ་ཕེབས་དོན་ལ། བོད་འདི་སྔར་ལྟར་མ་ཡིན་པར་བོད་ཆོས་སྲིད་གཉིས་ལྡན་གྱི་མང་གཙོའི་གཞུང་ཞིག་དགོས་པ་གལ་ཆེ་བར་བརྟེན། ཆོས་བརྒྱུད་ཆེན་པོ་བཞི་དང་བོད་ཆོལ་ཁ་གསུམ་ནས་འཐུས་མི་གསུམ་རེ་ཤེས་འཇོན་ཅན་དང་རྒྱལ་ཞེན་ཅན་སོགས་འོས་ཤོག་གི་ལམ་ནས་འདེམས་བསྐོ་བྱེད་དགོས་ཚུལ་གསུངས་པ་ལྟར། དེ་དག་ནས་འཐུས་མི་ ༡༣ འདེམས་ཐོན་བྱུང་པས། འཐུས་མི་དེ་དག་གིས་ཕྱི་ལོ་ ༡༩༦༠ ཟླ་༩ ཚེས་ ༢ ཉིན་༧གོང་ས་༧མཆོག་གི་སྤྱན་སྔར་དམ་འབུལ་ཞུས་བའི་ཉིན་མོ་ནི། བཙན་བྱོལ་བོད་གཞུང་དགའ་ལྡན་ཕོ་བྲང་མང་གཙོ་དབུ་བརྙེས་བའི་ཉིན་དང་པོ་ཡིན་ལ། བོད་སིལ་བུར་འཐོར་བ་ནས་བཟུང་ཡང་བསྐྱར་བོད་ཆོལ་ཁ་གསུམ་གཅིག་ཏུ་སྒྲིལ་བའི་ཉིན་དང་པོ་ཡང་ཡིན་ཞེས་ཟེར་ཆོག  ཉིན་དེ་ནས་བཟུང་༧གོང་ས༧མཆོག་གིས་བོད་མིའི་རྩ་ཁྲིམས་ཟིན་བྲིས་བཀོད་གནང་བའི་འོག་ནས། བཙན་བྱོལ་བོད་མི་ཡོངས་འཚར་ལོངས་བྱུང་སྟེ། དེང་སང་བཙན་བྱོལ་བོད་གཞུང་མང་གཙོ་ཚད་ལྡན་ཞིག་གི་ལམ་དུ་སྐྱོད་བཞིན་པ་འདི་ནི། ཕྱི་ལོ་ ༡༩༥༩ ལོར་བཙན་བྱོལ་དུ་ཕེབས་པའི་༧གོང་ས༧མཆོག་གིས་དབུ་ཁྲིད་པའི་མི་རབས་རྒན་པ་ཚོས་སྐུ་དྲིན་ཡིན་པས། ཕྲན་གྱིས་༧གོང་ས༧མཆོག་གཙོ་བྱས་བའི་མི་རབས་རྒན་པ་རྣམས་ལ། ཁ་བཏགས་དཀར་པོ་ཞིག་ཚབ་ཏུ་ལག་ཟུང་ཐལ་མོ་སྦྱར་སྟེ་ཐུགས་རྗེ་ཆེ་ཞུ་གི་ཡོད།