སུད་སི་མདོ་སྨད་གསེར་གྱི་གཟེངས་རྟགས་ཐེངས་གསུམ་པ་དེ་བོད་མིའི་སྒྲིག་འཛུགས་ནང་མི་ལོ་ ༤༠ ལྷག་རིང་ཞབས་ཞུ་ཞུས་པའི་བཀའ་ཟུར་འབྲོང་ཆུང་དངོས་གྲུབ་མཆོག་ལ་ཕུལ་ཡོད་པ་རེད།
ཟླ་འདིའི་ཕྱི་ཚེས་ ༡༨ ཉིན་ས་གནས་དེའི་ཉིན་གུང་ཆུ་ཚོད་ ༢།༣༠ སྟེང་། སུད་སིའི་རེ་ཀོན་དགོན་དུ་སུད་སི་མདོ་སྨད་གསེར་གྱི་གཟེངས་རྟགས་ཐེངས་གསུམ་པ་བཀའ་ཟུར་འབྲོང་ཆུང་དངོས་གྲུབ་མཆོག་ལ་ཕུལ་བའི་མཛད་སྒོ་ཚོགས་ཡོད་པ་དང་། མཛད་སྒོའི་ཐོག་སྐུ་མགྲོན་གཙོ་བོ་བཀའ་ཟུར་འབྲོང་ཆུང་དངོས་གྲུབ་མཆོག་དང་རེ་ཀོན་དགོན་པའི་མཁན་རིན་པོ་ཆེ་ཐུབ་བསྟན་ལེགས་སྨོན་མཆོག་རྣམ་གཉིས་ཀྱི་དབུས་དགེ་འདུན་པ་རྣམ་པ་དང་། ཡུ་རོབ་སྤྱི་འཐུས་ཟམ་མདོ་བྱམས་པ་གཙོས་སྤྱི་ཟུར་རྣམ། དེ་བཞིན་ཚོགས་པ་སྒྲིག་འཛུགས་ཁག་གི་ཚོགས་གཙོ་དང་སྐུ་ཚབ་རྣམ་པ་བཅས་ཁྱོན་མི་གྲངས་ ༢༠༠ ཙམ་འཛོམས་ཡོད་པ་རེད།
སུད་སི་ས་གནས་མདོ་སྨད་མི་མང་གི་ཚོགས་གཙོ་བསྟན་འཛིན་ཆོས་སྒྲོན་ལགས་ཀྱིས་མཛད་སྒོའི་དབུ་འབྱེད་གཏམ་བཤད་གནང་དོན་སྐབས། གཟེངས་རྟགས་འདི་ནི་སྤྱི་ལོ་ ༢༠༡༣ ལོར་ས་གནས་རྒྱུན་ལས་སྐབས་བརྒྱད་པས་མདོ་སྨད་ཀྱི་ཤེས་ལྡན་པ་དང་རྒན་རབས་པ་མང་པོ་ཞིག་ལ་དགོངས་ཚུལ་བསྡུ་ལེན་གྱིས་དབུ་འཛུགས་གནང་བ་ཞིག་ཡིན་པ་དང་། དེ་ཡང་བོད་ཀྱི་ཉེ་རབས་ལོ་རྒྱུས་ཁྲོད་ཆེས་དཀའ་སྡུག་ཆེ་ཞིང་གཉན་ཕྲེང་གི་དུས་རིམ་ཁྲོད་བོད་བསྟན་སྲིད་མི་རིགས་ལ་མཛད་རྗེས་རླབས་ཆེན་སྐྱོང་མཁན་བོད་ཀྱི་སྲི་ཞུ་བ་ཞིག་ལ་འབུལ་གཏན་ཁེལ་བ་ཞིག་ཡིན་ལ། གཟེངས་རྟགས་འདི་འདྲ་ཞིག་འབུལ་དགོས་པ་ནི་བོད་ཀྱི་སྐྱེས་ཆེན་སྲི་ཞུ་བ་རྣམས་ཀྱིས་སྐུ་ཚེ་ཧྲིལ་བོར་བོད་བསྟན་སྲིད་ཆེད་མཛད་རྗེས་རླབས་ཆེན་བཞག་པ་མི་མང་གིས་ངོས་འཛིན་དང་། མ་འོངས་བོད་ཀྱི་ལོ་རྒྱུས་ཁྲོད་ཁོང་རྣམ་པའི་མཛད་རྗེས་ཡུན་གནས་ཐུབ་པ་དང་མི་རབས་གསར་པ་རྣམས་ལ་མིག་དཔེ་བཟང་པོ་ཞིག་ཏུ་འགྱུར་བའི་ཆེད་ཡིན་པ་བརྗོད་སོང་།
དེ་བཞིན་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ཀྱིས་བཀའ་ཟུར་འབྲོང་ཆུང་དངོས་གྲུབ་མཆོག་གི་མི་ཚེའི་ལོ་རྒྱུས་དང་། ཁོང་གིས་མི་ཚེ་ཧྲིལ་བོར་བོད་མི་རིགས་ཀྱི་བསྟན་སྲིད་ཆེད་དུ་དཀའ་བ་ཁྱད་བསད་དང་ངལ་བ་དང་བླང་གིས་ཕྱག་ལས་ཅི་ལྟ་བུ་ཞིག་གནང་ཡོད་སྐོར་གཏམ་བཤད་གནང་གྲུབ་རྗེས། སྐུ་མགྲོན་གཙོ་བོ་བཀའ་ཟུར་འབྲོང་ཆུང་དངོས་གྲུབ་མཆོག་གིས་གསུང་བཤད་གནང་དོན། གསེར་གྱི་གཟེངས་རྟགས་གནང་ཡུལ་གྱི་གང་ཟག་རང་ལྟ་བུ་ཡིན་ན་དངོས་འབྲེལ་བྱས་རྗེས་རྔོ་ཐོག་པ་འདི་ཡོད་ཅེས་བཤད་རྒྱུ་གང་ཡང་མེད་ལ། དེ་འདྲའི་འོས་བབས་ཤིག་ཀྱང་མིན་སྟབས་སེམས་ནང་མ་བདེ་བ་ཞིག་དང་། ཕྲན་བུའི་འཚེར་སྣང་ཡོང་གི་འདུག ད་བར་ག་རེ་ཞུས་པ་འདི་ནི་གུས་རང་བོད་པ་ཞིག་ཡིན་པའི་ཆ་ནས་ལས་འགན་ཞིག་ཡིན་པ་དང་། དེ་ཡང་ཞུ་འོས་པ་དང་དགོས་པ་ཞིག་ཀྱང་ཡིན། འདས་པའི་ལོ་ངོ་༦༠ ཙམ་རིང་དངོས་འབྲེལ་ཚང་མས་བཙན་བྱོལ་ནང་སྐུ་ལས་ཞེ་དྲག་སྐྱོན་ཡོད་རེད། ལྷག་པར་ཏུ་མི་རབས་རྒན་པ་ཚོས་སྐུ་ལས་བསྐྱོན་པ་འདི་ང་ཚོས་དུས་རྟག་ཏུ་དྲན་དགོས་པ་ཡིན། སུད་སི་མདོ་སྨད་མི་མང་ནས་བོང་བ་གསེར་གཟིགས་ཀྱིས་ཕྲན་ནས་ངོ་ལོ་༤༠ལྷག་རིང་བསྟན་སྲིད་སྤྱི་དང་། ལྷག་པར་དུ་བཀའ་དྲིན་མཚུངས་ཟླ་མ་མཆིས་པ་༧གོང་ས་སྐྱབས་མགོན་རྒྱལ་བ་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཞབས་སྣེར་སྲི་ཞུ་བསྒྲུབ་རྒྱུའི་སྐལ་བཟང་གི་གོ་སྐབས་བྱུང་བ་ནི་འདི་དང་ཕྱི་མའི་རྒྱབ་རྟེན་བསུབ་ཏུ་མེད་པ་ཞིག་ཡིན་སྙམ་པ་ལས་དེ་མིན་བྱས་རྗེས་འབུར་ཐོན་གང་ཡང་མེད། གལ་སྲིད་ཡོད་པའི་དབང་དུ་བཏང་ཡང་དེ་ནི་སྐབས་སོ་སོའི་ལས་རོགས་རྣམ་པའི་རྒྱབ་སྐྱོར་དང་གོང་འོག་ཐུན་མོང་གི་འབད་བརྩོན་ལ་བརྟེན་ནས་བྱུང་བ་ཞིག་ཡིན། ཡིན་ནའང་། ད་རེས་ཕྲན་ལ་གཟེངས་བསྟོད་འདི་འདྲ་གནང་བ་དེར་བཀའ་དྲིན་ཆེ་ཞེས་གསོལ་རས་ཞུས་པ་དང་སྦྲགས། དེ་སྔ་སོ་སོར་མཉམ་དུ་ཕྱག་ལས་གནང་མཁན་འདས་གསོན་ཚང་མའི་ཚབ་ཞུས་ཏེ་གཟེངས་རྟགས་ཞུས་པ་ཞིག་ལ་མང་ཚོགས་ནས་ངོས་འཛིན་གནང་རོགས་ཞེས་གསུངས་སོང་། སྐུ་མགྲོན་རྣམ་པས་གཏམ་བཤད་གནང་རྗེས་ས་གནས་མདོ་སྨད་ཟློས་གར་ཚོགས་པ་གཙོས་ཆོལ་ཁ་གསུམ་གྱི་གཞས་པ་གཞས་མ་རྣམས་ཀྱིས་གཞས་དང་ཞབས་བྲོ་གཟིགས་འབུལ་ཞུས་ཏེ་མཛད་སྒོ་གྲོལ་ཡོད་པ་རེད།
ཐེངས་འདིའི་གཟེངས་རྟགས་འབུལ་ས་བཀའ་ཟུར་འབྲོང་ཆུང་དངོས་གྲུབ་མཆོག་ནི་སྤྱི་ལོ་༡༩༥༦ལོར་བོད་སྟོད་ཁུལ་དུ་འཁྲུངས་ཤིང་༡༩༥༩ལོར་རྒྱ་གར་ནང་སྐྱབས་བཅོལ་ཏུ་ཕེབས། སློབ་གྲྭ་ཆེ་འབྲིང་རིམ་ཐོན་གནང་རྗེས་ཀྱི་༡༩༧༧ལོར་བཅན་བྱོལ་བོད་གཞུང་གི་སྲི་ཞུ་བའི་ཡིག་རྒྱུགས་ནང་ཞུགས་ཏེ། སྤྱི་ལོ་ ༡༩༧༧ལོའི་ཟླ་༦ནས་བདེ་སྲུང་ལས་ཁུངས་སུ་ལོ་གཅིག་རིང་ཚོད་ལྟའི་རྒན་དྲུང་ལས་ཚབ་ཏུ་བསྐོ་བཞག་གནང་། སྤྱི་ལོ་ ༡༩༧༨ ལོ་ནས་བདེ་སྲུང་ལས་ཁུངས་ཀྱི་རྒན་དྲུང་ངོ་མར་བསྐོ་བཞག་གནང་ནས་བཟུང་བདེ་སྲུང་ལས་ཁུངས་ཀྱི་དྲུང་ཆེའི་ལས་ཚབ་དང་བདེ་སྲུང་ལས་ཁུངས་ཀྱི་སྐུ་ཕྱྭ་དང་གསང་བའི་ལས་དོན་གྱི་འགན་བཞེས། སྤྱི་ལོ་༢༠༠༧ལོའི་བཀའ་ཤག་སྐབས་༡༣པའི་སྐབས་ཀྱི་བདེ་སྲུང་བཀའ་བློན་དང་། སྤྱི་ལོ་ ༢༠༡༡ལོའི་བཀའ་ཤག་སྐབས་༡༤པའི་བདེ་སྲུང་བཀའ་བློན། སྤྱི་ལོ་ ༢༠༡༦ལོའི་ཟླ་༥པའི་ཚེས་༣༡ནས་རྒྱལ་ས་ལྡི་ལིའི་སྐུ་ཚབ་དོན་གཅོད་གནང་མུས་བཅས་མི་ལོ་༤༠ ལྷག་རིང་བོད་བསྟན་སྲིད་མི་རིགས་ཆེད་ཕྱག་ལས་རླབས་ཆེན་གནང་མཁན་ཞིག་ཡིན་པ་རེད།
སུད་སི་མདོ་སྨད་གསེར་གྱི་གཟེངས་རྟགས་འདི་ནི་སྤྱི་ལོ་ ༢༠༡༣ལོར་འབུལ་འགོ་བཙུགས་པ་ཞིག་ཡིན་པ་དང་། ཐེངས་དང་པོར་བཀའ་བློན་ཁྲི་ཟུར་དང་སྐུའི་གཅེན་པོ་བཀའ་ཟུར་རྒྱལ་ལོ་དོན་གྲུབ་མཆོག་ལ་ཕུལ་ཡོད་པ་དང་། གཉིས་པ་བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་མཆོག་ལ་ཕུལ་ཡོད་པ་རེད།
ཡུམ་སྐྱབས་ལགས་ཀྱིས་གནས་ཚུལ་མཁོ་སྒྲུབ་གནང་།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
རླབས་ཆེན་མི་སྣའི་བྱས་པར་ངོས་འཛིན་གཟེངས་རྟགས་གནང་བ་ནི་ཞེ་དྲག་འོས་ཤིང་འཚམས་པ། དོན་ལ་གནས་པ། དུས་ལ་བབས་པ་ཞིག་རེད། རྣམ་དཔྱོད་ཅན་གྱི་གངས་ཅན་པ་མདོ་སྨད་རྣམས་ལ་ཐུགས་རྗེ་ཆེ་ཞུ།
སྐོུ་འབྲོང་ཆུང་དངོས་གྲུབ་མཆོག་མི་མང་གི་ཐུགས་འདུན་ནམ་ཡང་ཆུད་ཟོས་སུ་མི་གཏོང་མཁན། ཡིད་ཆེས་བློ་གཏོད་ཞུ་ཆོག་ས། དེ་དེ་བཞིན་སྒང་གི་ཆེས་མཐོའི་དཔོན་རིགས་ཚོས་ཐུགས་རེ་ཡོངས་སུ་གཏོད་ས་ཡིན་པ། ད་ཐེངས་གསལ་པོ་ཆགས་སོང་། མི་མང་གི་མངོན་འདོད་ཡིན་ཕྱིན། རང་ཉིད་ཆེ་མདོག་མི་སྟོན་པར། གཟེངས་རྟགས་དེ་བཞེས་པར་དངོས་སུ་ཕེབས་ཤིང་། ཟབ་རྒྱས་དུས་ལ་སྨན་པའི་བཀའ་སློབ་གནང་འདུག་པས། གཙོ་བོའི་གཙོ་བོ་སྐོུ་ཁོང་ལ་བཀའ་དྲིན་ཆེ་ཞུ་དགོས་པ་རེད། ཁོང་གིས་གཟེངས་རྟགས་དེ་བཞེས་པས་གཟེངས་རྟགས་ཀྱི་ཆེ་མཐོང་གོང་དུ་སྤེལ་སོང་། བཀའ་དྲིན་ཆེ། ཐུགས་རྗེ་ཆེ།
སྐུ་ངོ། འབྲོང་ཆུང་མཆོག་ནི། སྤྲེལ་ལད་ལ་མི་དགྱེས་ཤིང་། ཞལ་སྙན་མོ་ཁོ་ནས་ལག་ལེན་མེད་པའི་རིགས་མིན་པ། ཕྱོགས་ཞེན་དང་ཕྱོགས་རིས་ཀྱི་ན་ཚ་ཁྱོན་ནས་མེད་པ། བཟང་ངན་གཉིས་མཉམ་འཁྲིད་ལ་ནུས་པ་ལྡན་ཞིང་། མཐར་ངན་པ་ཡང་བཟང་པོར་བསྒྱུར་ནུས་པ། བག་འཁུམས་དང་སྡར་མའི་གཤིས་ཀ་མེད་པ། རྒྱས་སྤྲོས་མེད་ཅིང་དགོས་སར་གཏོང་ཕོད་པ། བོད་ཀྱི་རྩ་དོན་ལ་ཐུག་དུས་བློ་ཁོག་ཆེ་ཞིང་སུ་ལའང་ཁ་གཏད་གཅོག་ནུས་པ། ཁ་གཏད་བཅག་པ་དེ་ཡང་བབ་བརླིང་བརྟན་གསུམ་དང་ལྡན་པ། སྒུལ་མི་ཚུགས་པ། གཞོམ་བཤིག་མི་ནུས་པ། ངང་རྒྱུད་ཤིན་ཏུ་རིང་ལ། བསྟོད་སྨད་སོགས་ཕྱི་རོལ་གྱི་འགྱུར་བས་རང་ལ་གཡོ་འགུལ་གཏོང་མི་ནུས་པར་ཕར་ཞིབ་འཇུག་གི་རིག་རྩལ་ཕུན་སུམ་ཚོགས་པ་དང་ལྡན་པ། མདོར་ན་བོད་ཀྱི་དཀའ་ངལ། བོད་ཀྱི་ནུས་པ། བོད་ལ་ཚུར་རྒོལ་བྱེད་མཁན་བཅས་ཚང་མའི་ཕྱི་ནང་གསང་གསུམ་ལ་རྒྱུས་མངའ་ཤིན་ཏུ་ཟབ་པས། ཁོང་ལྟ་བུའི་མེད་ཐབས་མེད་པའི་སྐྱེས་བུ་རླབས་ཆེན་ཞིག་ལ་གསེར་གྱི་གཟེངས་རྟགས་ཕུལ་བ་ནི། རིས་སུ་མ་ཆད་པའི་བོད་མི་ཡོངས་དགའ་བ་སྐྱེ་བའི་གནས་སུ་གྱུར་བ་བརྗོད་ག་ལ་དགོས། ཚང་མར་ཐུགས་རྗེ་ཆེ་ཞུ། སྐོུ་འབྲོང་ཆུང་། སྐུ་ཚེ་བརྟན། མཛད་འཕྲིན་རྒྱས་པར་སྨོན།།
ཁ་བརྡ་ལས་བཤུས།
མཚམས་འདྲི་ཞུ་།