༧གོང་ས་མཆོག་གིས་ན་གཞོན་ཞི་བདེ་འཛུགས་སྐྲུན་པ་རྣམས་ལ་ང་ཚོས་འདི་ནས་ཆོས་ལུགས་སོགས་བཤད་ཀྱི་མེད་པར་སྤྱིར་བཏང་བ་སྟེ། ཚང་མར་ལུས་པོའི་འཕྲོད་བསྟེན་བཟང་པོ་དང་བདེ་སྐྱིད་ལྡན་པའི་མི་ཚེ་ཞིག་དགོས་ཀྱི་ཡོད་སྐོར་བཤད་ཀྱི་ཡོད་པ་རེད་ཅེས་གསུངས།
དེ་རིང་སྔ་དྲོའི་ཆུ་ཚོད་ ༩ ཙམ་ཐོག བཞུགས་སྒར་དྷ་སའི་རྒྱལ་བའི་ཕོ་བྲང་དུ་ཨ་རིའི་ཞི་བདེ་ལྟེ་གནས་ཁང་གི་གོ་སྒྲིག་འོག ༧གོང་ས་རྒྱལ་བ་རིན་པོ་ཆེ་མཆོག་ནས་དཀའ་རྙོག་ཅན་གྱི་རྒྱལ་ཁབ་ ༡༡ ནས་ཕེབས་པའི་ན་གཞོན་ཞི་བདེ་འཛུགས་སྐྲུན་པ་ ༢༦ དང་ལྷན། དྲག་སྤྱོད་དང་བློ་འཚབ་རང་བཞིན་གྱི་གནས་སྟངས་ལ་གདོང་ལེན་བྱེད་ཕྱོགས་ཐད་ཉིན་གཉིས་རིང་གི་བགྲོ་གླེང་དབུ་འཛུགས་གནང་སོང་།
བགྲོ་གླེང་དབུ་འཛུགས་སྐབས་༧གོང་ས་མཆོག་གིས། ངོས་ཀྱིས་མི་ཞིག་མཐོང་མ་ཐག་ང་ཚོ་ནི་འགྲོ་བ་མི་ཡིན་པ་གཅིག་མཚུངས་ཡིན་པ་ཚོར་གྱི་འདུག གཞན་གྱི་ཆོས་ལུགས་དང་རྒྱལ་ཁབ་གང་ནས་ཡིན་པ་ནི་གནད་དོན་ཕལ་བ་རེད། ནམ་རྒྱུན་བྱིས་པ་ཚོ་མཉམ་དུ་རྩེད་མོ་རྩེ་དུས་ཁོ་ཚོའི་གཞན་དེའི་རྒྱབ་ལྗོངས་ཀྱི་གནས་ཚུལ་ལ་དོ་སྣང་བྱེད་ཀྱི་མེད་པ་རེད། ང་ཚོས་ཆོས་ལུགས་དང་རྒྱལ་ཁབ། ཤ་མདོག་སོགས་ཀྱི་ཁྱད་པར་ལ་དམིགས་བཀར་གྱིས་དོ་སྣང་སྤྲད་པ་ལ་བརྟེན་ནས་ཕན་ཚུན་གྱི་མི་འདྲ་བའི་ཆ་དེ་ཆེ་རུ་གཏོང་བ་དང་དཀའ་རྙོག་མང་དུ་སྐྲུན་གྱི་ཡོད་པས། དེ་འདྲའི་གནས་སྟངས་སྐབས་ཐབས་ལམ་ནི་བསམ་བློ་གཏིང་ཟབ་དུ་བཏང་ནས་ང་ཚོ་འགྲོ་བ་མི་ཡིན་པ་གཅིག་མཚུངས་ཡིན་པ། སེམས་མྱོང་དང་ཕྱི་ལུས་པོའི་ཆ་ནས་ཚང་མ་གཅིག་མཚུངས་ཡིན་པའི་བསམ་བློ་གཏོང་དགོས་རྒྱུ་དེ་རེད། ངོས་ཀྱིས་འགྲོ་བ་མི་དུང་ཕྱུར་བདུན་ཅུ་ཚང་མ་གཅིག་མཚུངས་ཡིན་པའི་འདུ་ཤེས་དེ་ཁྱབ་སྤེལ་གཏོང་ཐབས་བྱེད་ཀྱི་ཡོད། ཅེས་གསུངས་སོང་།
དྲི་བ་དྲིས་ལན་སྐབས། འབར་མ་སྲིད་གཞུང་དང་ན་གཞོན་བར་དང་། དེ་བཞིན་ཆོས་ལུགས་ཕན་ཚུན་བར་ལ་འབྲེལ་མཐུད་པའི་ཕྱག་ལས་གནང་བཞིན་པའི་འབར་མའི་ན་གཞོན་ཞིག་གིས། འདས་པའི་དུས་ཡུན་རིང་པོ་ཞིག་ནང་འབར་མའི་གྲངས་ཉུང་མི་རིགས་དང་དམག་གི་སྲིད་གཞུང་བར་ལ་དཀའ་རྙོག་ཆེན་པོ་འཕྲད་དེ་ད་ལྟའང་སེལ་ཐུབ་མེད་པ་མ་ཟད། ཆོས་ལུགས་མི་འདྲ་བའི་བར་ལའང་རྩོད་རྙོག་དུ་མ་འབྱུང་བཞིན་ཡོད་པ་དང་། རང་ཉིད་ཀྱི་ལྟ་ཚུལ་ལྟར་སྤྱི་ཚོགས་འདྲ་མིན་བར་གྱི་དཀའ་རྙོག་ཕལ་ཆེ་བ་ཁྲོ་བ་དང་སྡང་བའི་ཚིག་ (hate speech) དང་འཁྱལ་གཏམ་གྱི་རྐྱེན་པས་འབྱུང་བཞིན་ཡོད་སྟབས། ཆོས་ལུགས་དང་སྤྱི་ཚོགས་ཕན་ཚུན་བར་སྡང་བའི་ཚིག་དང་འཁྱལ་གཏམ་མི་ཡོང་བ་ཞིག་ག་འདྲ་གནང་ཐུབ་མིན་སྐོར་བཀའ་འདྲི་ཞུས་པར་༧གོང་ས་མཆོག་གིས། འབར་མའི་ནང་གི་ནང་པ་དང་ཁ་ཆེ་བའི་བར་ལ་ཐོག་མའི་རྩོད་རྙོག་བྱུང་སྐབས། ངོས་རང་ཨ་རིའི་རྒྱལ་ས་ཝ་ཤིན་ཊོན་དུ་ཡོད། དེ་དུས་ངོས་རང་གིས་ནང་པ་ཚོར་ཁ་ཆེ་བ་རེ་རེའི་ཕྲག་པའི་སྟེང་སྟོན་པ་བཅོམ་ལྡན་འདས་བཞུགས་ཏེ་ཁོང་ཚོར་སྲུང་སྐྱོབ་བྱེད་ཀྱི་ཡོད་པ་བསམ་དགོས་སྐོར་བརྗོད་ཡིན། དེ་བཞིན་སྐབས་འགར་ངོས་རང་གིས་ལྕམ་ཨང་སན་སུའུ་ཀེ་ (Aung San Suu Kyi) དང་ཐུག་འཕྲད་བྱེད་སྐབས། ཁོང་མོར་དེའི་ཐད་ཕྱག་ལས་གནང་དགོས་སྐོར་བརྗོད་པ་ཡིན། དེ་དུས་ཁོང་མོས་དཀའ་རྙོག་དེའི་ནང་འབར་མའི་དམག་གི་མགོ་འཁྲིད་ཚུད་ཡོད་སྟབས། གནས་སྟངས་ཅུང་ཁག་པོ་ཡིན་སྐོར་བརྗོད་བྱུང་། ངོས་ཀྱི་བསམ་ཚུལ་ནི། ད་ལྟ་ང་ཚོས་མིའི་རིགས་ཀྱི་གཞི་རྩའི་གནས་བབ་ཀྱི་ཐོག་ནས་བསམ་བློ་གཏོང་དགོས་ཀྱི་རེད་བསམ་དགོས་ཀྱི་འདུག བློ་སྤོབས་སྐྱེ་འོས་པ་ཞིག་ལ་དེང་སྐབས་ཚན་རིག་པས་ང་ཚོ་སྤྱི་ཚོགས་ཀྱི་སེམས་ཅན་ཞིག་ཡིན་པ་དང་། སྤྱི་ཚོགས་སེམས་ཅན་ཞིག་ཡིན་པའི་ཆ་ནས་སྒེར་གྱི་འཚོ་གནས་དེ་རང་གི་སྤྱི་ཚོགས་ལ་བརྟེན་ནས་ཡོད་པ་དང་། གཞི་རྩའི་ཆ་ནས་ང་ཚོ་སྤྱི་ཚོགས་སེམས་ཅན་ཞིག་ཡིན་སྟབས། མིའི་རིགས་ཀྱི་གཞི་རྩའི་རང་བཞིན་ནི་བྱམས་བརྩེ་ཡིན་ལ། དངོས་ཡོད་ལག་ལེན་གྱི་ཐོག་ནས་ཀྱང་བྱམས་བརྩེའི་བསམ་བློ་ལྡན་མཁན་ཞིག་ཡིན་ན་རང་ཤུགས་ཀྱིས་ཕྱི་ལུས་པའི་འཕྲོད་བསྟེན་ཡང་ལེགས་པ་ཡོད། ཁྲོ་བ་དང་རེ་དོགས་ཀྱིས་ཁེངས་པའི་སེམས་དེ་ནི་འཕྲོད་བསྟེན་ལ་ཧ་ཅང་གནོད་ཚབས་ཆེན་པོ་རེད། ང་ཚོས་འདི་ནས་ཆོས་ལུགས་དང་སངས་རྒྱས་བཅོམ་ལྡན་འདས། ཡེ་ཤུའི་སྟོན་པ་མ་ཤི་ཀ་སོགས་ཀྱི་སྐོར་བཤད་ཀྱི་མེད། ང་ཚོས་ཆེས་སྤྱིར་བཏང་བ་སྟེ། ཚང་མར་ལུས་པོའི་འཕྲོད་བསྟེན་བཟང་པོ་དང་བདེ་སྐྱིད་ལྡན་པའི་མི་ཚེ་ཞིག་དགོས་ཀྱི་ཡོད་སྐོར་བཤད་ཀྱི་ཡོད། ཅེས་གསུངས་སོང་།
ཡང་ཏུ་ནི་ཤི་ཡ་ནས་ཡིན་པའི་ན་གཞོན་ཞིག་གིས་ཏུ་ནི་ཤི་ཡའི་ནང་གི་དཀའ་ངལ་དང་འབྲེལ་ནས་གཞུང་གིས་ཟུར་འཕུད་བྱས་པའི་མང་ཚོགས་ཁྲོད་དུ་རང་གི་རྒྱལ་ཁབ་ལ་ཞེ་འཁོན་དང་རེ་བ་ཟད་པའི་རྣམ་པ་ཤུགས་ཆེན་པོ་ཡོད་པས། ཁོང་ཚོར་རང་གི་རྒྱལ་ཁབ་ལ་རེ་བ་སླར་གསོ་ཡོང་རྒྱུར་རོགས་རམ་ཇི་ལྟར་བྱ་དགོས་མིན་བཀའ་འདྲི་ཞུས་པར་༧གོང་ས་མཆོག་གིས། ཕྲུ་གུ་རྣམས་ལོ་ན་ལྔ་དང་དྲུག་ལ་སོན་དུས་ཁོ་ཚོས་རང་གི་རྩེད་རོགས་དེ་རྒྱལ་ཁབ་གང་གི་མི་རིགས་ཡིན་པ་དང་། ཆོས་ལུགས་གང་གི་རྗེས་འབྲང་བ་ཡིན་མིན་ཐད་སྣང་འཇོག་མི་བྱེད་པར་མཉམ་དུ་རྩེད་མོར་རོལ་གྱི་ཡོད། ཡིན་ན་ཡང་། ཕྲུ་གུ་རྣམས་སློབ་གྲྭ་འགྲིམ་མགོ་བཙུགས་པ་དང་རིམ་པས་ཁོ་ཚོར་མི་རིགས་དང་། ཆོས་ལུགས། དཔལ་འབྱོར་ཡག་སྡུག་གི་དབྱེ་འབྱེད་ཀྱི་བསམ་བློ་དེ་ཡོང་གི་ཡོད་པ་དང་། དེ་ནི་གཙོ་བོ་སློབ་གྲྭའི་ནང་མི་ཀུན་གཅིག་མཚུངས་ཡིན་པའི་གཞི་རྩའི་རང་བཞིན་དེར་སྣང་མེད་ཀྱིས། དེ་ལས་ལྡོག་སྟེ་གལ་གནད་དེ་ཙམ་མེད་པའི་དབྱེ་འབྱེད་རང་བཞིན་གྱི་གནད་དོན་ལ་ཤུགས་སྣོན་བརྒྱབས་པའི་རྐྱེན་གྱིས་ཡིན་སྐོར་དང་། འཛམ་གླིང་ས་ཁུལ་འདྲ་མིན་ནང་དཀའ་ངལ་འབྱུང་བཞིན་པ་དེའི་གཞི་རྩ་ནི་སློབ་གསོ་ཡིན་པ་དང་། ལྷག་པར་དཀའ་རྙོག་ཡོད་པའི་རྒྱལ་ཁབ་ཕལ་ཆེ་བའི་ནང་ད་ལྟའི་སློབ་གསོའི་ལམ་ལུགས་དང་། དེར་བསྒྱུར་བཅོས་གཏོང་དགོས་པའི་ཐད་གླེང་སློང་གང་ཡང་བྱེད་ཀྱི་མེད་པ་དང་། ད་ལྟ་ཡོད་པའི་དཀའ་ངལ་ཕལ་ཆེ་བ་ནི་ད་ལྟའི་ཤེས་ཡོན་ལམ་སྲོལ་དེ་ཕྱིའི་དངོས་པོ་ལས་ནང་བསམ་བློའི་རིན་ཐང་ལ་དོ་སྣང་མ་བྱས་པའི་རྐྱེན་གྱིས་བྱུང་བ་ཞིག་ཡིན་སྐོར་སོགས་གསུངས་སོང་།
ཐེངས་འདིར་༧གོང་ས་མཆོག་དང་ལྷན་དུ་འཛམ་གླིང་གི་ས་ཁུལ་འདྲ་མིན་ནང་བྱུང་བཞིན་པའི་མི་རིགས་དང་། ཆོས་ལུགས། འཚོ་བ། སྤྱི་ཚོགས་ཀྱི་གྲལ་རིམ། དྲག་སྤྱོད་པ། གཞན་ཡང་སྤྱི་དམངས་དང་སྲིད་གཞུང་བཅས་ཀྱི་བར་གྱི་དཀའ་རྙོག་ཐད་དགོངས་ཚུལ་བརྗེ་རེས་ཀྱི་ལས་རིམ་ནང་ཞུགས་པའི་ན་གཞོན་ཞི་བདེ་འཛུགས་སྐྲུན་པ་རྣམས་ཀྱིས་རང་གི་མྱོང་བ་གཞིར་བཞག་གི་ཐོག་ནས། སོ་སོའི་རྒྱབ་ཁབ་ཀྱི་དཀའ་ངལ་དང་འབྲེལ་ནས་རང་ཉིད་སྒེར་ངོས་ནས་དེར་གདོང་ལེན་ཇི་ལྟར་བྱེད་ཀྱི་ཡོད་མེད་དང་། ༧གོང་ས་མཆོག་ནས་དཀའ་རྙོག་དེ་དག་སེལ་ཐབས་ཐད་ག་རེ་དགོངས་ཀྱི་ཡོད་མེད་སོགས་ཀྱི་ཐོག་ལ་བཀའ་བསྡུར་གནང་ཡོད་པ་དང་། མཇུག་ཏུ་༧གོང་ས་མཆོག་ནས་ད་ལྟ་ཨ་ཧྥེ་རི་ཁ་ཁུལ་དང་ལྷོ་ཨ་མེ་རི་ཁའི་ཁུལ་གྱི་རྒྱལ་ཁབ་མང་པོའི་ནང་དཀའ་ངལ་འཕྲད་བཞིན་ཡོད་སྟབས། ན་གཞོན་ཞི་བདེ་འཛུགས་སྐྲུན་པ་རྣམས་ཀྱིས་དུས་ནམ་ཡང་ཆོད་སེམས་བརྟན་པོ་བྱ་རྒྱུ་གལ་ཆེན་ཡིན་ལ། ནམ་ཡང་བདེན་པར་ཡིད་ཆེས་བྱ་དགོས་པ་དང་། ལས་ཀ་བྱེད་སྐབས་དྲང་པོ་དྲང་བཞག་གི་ཐོག་ནས་བྱས་ཚེ་རང་ཉིད་ལ་བདེན་པའི་སྟོབས་ཤུགས་ཤིག་ཡོང་ངེས་ཡིན་སྐོར་གསུངས་སོང་།
གསར་འགོད་པ། པ་སངས་ཚེ་རིང་། ཀླུ་མགོན་ཐར།
