འཛམ་གླིང་ལ་འབྲུ་རིགས་དང་བཟའ་བཅའི་དཀའ་ངལ་ཡོང་རྒྱུ་རེད།

འཛམ་གླིང་མཉམ་འབྲེལ་རྒྱལ་ཚོགས་ཀྱི་ཞིང་ལས་དང་བཟའ་བཅའ་ལྷན་ཚོགས་གཙོའི་རྒྱལ་སྤྱིའི་འབྲུ་རིགས་ཆེད་མཁས་པ་ཚོས་ཏོག་དབྱིབས་ནད་ཡམས་ཀྱི་རྐྱེན་གྱིས་འཛམ་གླིང་མི་མང་ལ་བཟའ་བཅའི་དཀའ་ངའ་འཕར་མ་ཞིག་འཕྲད་རྒྱུ་ཡིན་པའི་ཉེན་བརྡ་བཏང་།ཕྱི་ཟླ་ ༣ ཚེས་ ༣༠ ཉིན། དབྱིན་ཡུལ་གྱི་ལྟ་སྲུང་(The Guardian)གསར་ཁང་གཙོའི་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་སྤེལ་བའི་གནས་ཚུལ་ལྟར་ན། འཛམ་གླིང་མཉམ་འབྲེལ་རྒྱལ་ཚོགས་ཀྱི་ཞིང་ལས་དང་བཟའ་བཅའ་ལྷན་ཚོགས་གཙོའི་རྒྱལ་སྤྱིའི་འབྲུ་རིགས་ཆེད་མཁས་པ་ཚོས་ཏོག་དབྱིབས་རིམས་ནད་རྐྱེན་གྱིས། འཛམ་གླིང་ཡོངས་སུ་འབྲུ་རིགས་དང་བཟའ་བཅས་མི་འདང་བའི་དཀའ་ངལ་འཕྲད་རྒྱུ་ཡིན་སྐོར་བརྗོད་བཞིན་ཡོད་པ་དང་། སི་པན་དང་འཇར་མན་སོགས་ཀྱི་ཞིང་བ་ཚོས་ད་ལྟ་ནས་ཟས་རིགས་དང་སྔོ་ཚལ་སོགས་གསར་པ་མཁོ་འདོན་མི་ཐུབ་པའི་དཀའ་ངལ་གནས་སུ་ལྷུང་ཡོད་པའི་ཉེན་བརྡ་བཏང་ཡོད་འདུག

མཉམ་འབྲེལ་རྒྱལ་ཚོགས་ཀྱི་ཞིང་ལས་དང་བཟའ་བཅའ་ཚན་པས། ད་ལྟའི་ཆར་ཏོག་དབྱིབས་རིམས་ནད་རྐྱེན་གྱིས་འཛམ་གླིང་ཡོངས་སུ་ཟས་རིགས་དབོར་འདྲེན་གྱི་འཁོར་སྐྱོད་ཐད་ཤུགས་རྐྱེན་ཆེན་པོ་ཐེབས་བཞིན་ཡོད་པ་མ་ཟད། རྒྱལ་ཁབ་མང་པོའི་ནང་ཁྱིམ་སྡོད་བཀའ་བརྒྱའི་འོག་ཞིང་ལས་དང་འབྲུ་རིགས་འདེབས་འཛུགས་མཚམས་འཇོག་བྱེད་པ་དང་། ཟས་རིགས་ལས་སྣོན་གྱི་བཟོ་གྲྭ་མང་པོས་ལས་མཚམས་བཞག་པ་སོགས་ཀྱིས་འཛམ་གླིང་སྤྱིའི་ཟས་རིགས་འཁོར་སྐྱོད་ལ་ཤུགས་རྐྱེན་ཐེབས་ཡོད་པས། མ་འོངས་ཕྱི་ཟླ་ ༤ དང་༥ ནང་འཛམ་གླིང་ཡོངས་སུ་བཟའ་བཅའ་དང་འབྲུ་རིགས་ཀྱིས་མ་འདང་བའི་དཀའ་ངལ་འཕྲད་རྒྱུ་ཡིན་པ་མངོན་གསལ་ཡིན་སྐོར་བརྗོད་འདུག

དེ་བཞིན་ཟླ་འདིའི་ཕྱི་ཚེས་ ༢༧ ཉིན། མཉམ་འབྲེལ་རྒྱལ་ཚོགས་ཟས་རིགས་བདེ་འཇགས་ལྷན་ཚོགས་ཀྱིས་ཀྱང་། ཏོག་དབྱིབས་རིམས་ནད་རྐྱེན་གྱིས་རྒྱལ་ཁབ་ཕན་ཚུན་གྱི་རྒྱལ་མཚམས་བཀག་འགོག་ཤུགས་ཆེན་བྱེད་བཞིན་པས། མི་རིང་བར་ཟས་རིགས་འཁོར་སྐྱོད་ལ་དཀའ་ངལ་དང་མི་འབོར་མང་བ་དང་འབྲུ་རིགས་མཁོ་འདོན་ཉུང་བའི་རྒྱལ་ཁབ་ཁག་ནང་དཀའ་ངལ་འཕྲད་རྒྱུ་ཡིན་པའི་ཉེན་བརྡ་བཏང་ཡོད་པ་མ་ཟད། མཉམ་འབྲེལ་རྒྱལ་ཚོགས་འཕྲོད་བསྟེན་ལྷན་ཚོགས་ཀྱིས་འབྲུ་རིགས་ཞལ་འདེབས་འབུལ་སའི་ཐེབས་རྩ་ཁང་བཙུགས་ཏེ། རྒྱལ་ཁབ་དང་ཚོགས་སྡེ་ཁག་གིས་འབྲུ་རིགས་ཞལ་འདེབས་ཡོང་བའི་འབོད་སྐུལ་ཞུ་བཞིན་ཡོད་འདུག

རྒྱལ་སྤྱིའི་ཟས་རིགས་ཆེད་མཁས་པ་ཚོས་རྒྱ་ནག་ནང་མི་འབོར་མང་བ་དང་རྒྱ་ནག་གི་འབྲུ་རིགས་དང་བཟའ་བཅའི་རིགས་མང་པོ་ཞིག་ཕྱིའི་རྒྱལ་ཁབ་ཁག་ནས་ནང་འདྲེན་བྱེད་བཞིན་ཡོད་སྟབས།  ཏོག་དབྱིབས་རིམས་ནད་ཀྱིས་ཡུན་རིང་རྒྱལ་ཁབ་ཁག་གི་ཚོང་ལས་ལ་ཤུགས་རྐྱེན་ཐེབས་པ་ཡིན་ན། རྒྱ་ནག་གི་མི་འབོར་དུང་ཕྱུར་ ༡།༧ དང་རྒྱ་ནག་གིས་མཁོ་འདོན་བྱེད་བཞིན་པའི་རྒྱལ་ཡོངས་འབྲུ་རིགས་ཀྱི་ཚད་གཞིའི་བར་ཧེ་བག་ཆེན་པོ་ཡོད་པས། རྒྱ་ནག་ནང་འབྲུ་རིགས་ཐད་དཀའ་ངལ་འཕྲད་རྒྱུ་ཡིན་པ་མ་ཟད། བཟའ་འབྲུའི་རིགས་ཉུང་རུ་ཕྱིན་པ་དང་བསྟུན་རྒྱལ་སྤྱི་དང་རྒྱ་ནག་ནང་ལ་བཟའ་བཅའི་གོང་ཚད་འཕར་ཏེ། རྒྱ་ནག་གི་མི་གྲངས་འབོར་ཆེན་ལ་བཟའ་ཆས་ཀྱི་དཀའ་ངལ་འབྱུང་རྒྱུ་ཡིན་སྐོར་བརྗོད་འདུག

གནད་དོན་དེའི་ཐད་རྒྱ་ནག་ཧྲང་ཧེ་ཐོང་ཅི་(Tongji University)གཙུག་ལག་སློབ་གྲྭའི་དཔལ་འབྱོར་སློབ་དཔོན་ཁྲིན་ཀོ་ཆཱན(Cheng Guoqian)ཟེར་བ་ཞིག་གིས། གལ་ཏེ་དུས་ཡུན་ཐུང་ཐུང་ནང་འཛམ་གླིང་ཁྱོན་ཡོངས་སུ་ཏོག་དབྱིབས་རིམ་ནད་བཀག་འགོག་མ་ཐུབ་པ་ཡིན་ན། འཛམ་གླིང་རྒྱལ་ཁབ་ཁག་ཡོངས་སུ་བཟའ་བཅའི་དཀའ་ངལ་ཤུགས་ཆེན་འཕྲད་རྒྱུ་ཡིན་པ་མ་ཟད། རྒྱ་ནག་གཙོའི་རྒྱལ་ཁབ་ཁ་ཤས་ནང་ཟས་རིགས་བདེ་འཇགས་དང་གོང་ཚད་སོགས་ཀྱི་ཐད་ནས་མི་མང་ཁྲོད་དཀའ་ངལ་ཆེན་པོ་ཞིག་འཕྲད་རྒྱུ་ཡིན་སྐོར་བརྗོད་འདུགགཞན་འདས་པའི་ཉིན་ཤས་ནས་བཟུང་སི་པན་དང་འཇར་མན་སོགས་ཡུ་རོབ་རྒྱལ་ཁབ་ཁག་གི་ནང་ཞིང་པ་ཚོས་ཟས་རིགས་དང་སྔོ་ཚལ་གསར་པ་རིགས་མཁོ་འདོན་མི་ཐུབ་པར་གྱུར་ཡོད་པའི་དཀའ་ངལ་བྱུང་གི་ཡོད་པ་དང་། དེ་རིང་ནས་ཨེ་ཤ་ཡའི་(Food Industry Asia)བཟའ་བཅའ་བཟོ་ལས་ཁང་དང་། ལྷོ་ཤར་ཨེ་ཤ་ཡའི་(ASEAN)རྒྱལ་ཁབ་ཁག་གི་ལྷན་ཚོགས་སོགས་ཀྱིས་ཏོག་དབྱིབས་རིམས་ནད་རྐྱེན་གྱིས། ཨེ་ཤ་ཡའི་ནང་བཟའ་བཅའི་ཚོང་ལས་འཁོར་སྐྱོད་ཐད་ཤུགས་རྐྱེན་ཐེབས་ཏེ་ཟས་རིགས་ཐད་དཀའ་ངལ་འཕྲད་རྒྱུ་ཡིན་པའི་ཉེན་བརྡ་བཏང་ཡོད་འདུག

རྒྱ་ནག་ལྷོ་ཕྱོགས་ཞོགས་པའི་ཆ་འཕྲིན་གསར་ཁང་གིས་སྤེལ་བའི་གནས་ཚུལ་ནང། ཝེ་ཐི་ནམ་རྒྱལ་ཁབ་ནི་འཛམ་གླིང་གི་འབྲས་ཐོན་སྐྱེད་བྱེད་མཁན་རྒྱལ་ཁབ་ཆེ་ཤོས་གཉིས་པ་ཡིན་ན་ཡང་། ཉིན་ཤས་སྔོན་ཝེ་ཐི་ནམ་ནང་འབྲུ་རིགས་སོགས་ཀྱི་དཀའ་ངལ་ཡོང་བར་དོགས་ནས་འབྲས་སོགས་ཕྱིར་འདྲེན་བྱེད་མཚམས་བཞག་ཡོད་པ་དང་། གཞན་ཕྱི་ཚེས་ ༣༠ ཉིན་ནས་ཧོང་ཀོང་དང་ཐའེ་ལན་ཊི་སོགས་ཚོང་ཁང་ཆེན་པོ་ཁག་གི་ནང་འབྲུ་རིགས་དང་སྒོང་ང་སོགས་རྒྱུན་སྤྱོད་ཟས་རིགས་མང་པོ་ཞིག་བཙོང་ཚར་དེ་སྟོང་པར་ཆགས་ཡོད་སྐོར་བརྗོད་ཡོད་པ་དང་། དེ་བཞིན་ཨ་ཧྥེ་རི་ཁའི་རྒྱལ་ཁབ་ཁག་ཅིག་གཙོའི་ཨེ་ཤ་ཡའི་ནང་འདི་ལོར་འབུ་ཆ་ག་པའི་གནོད་འཚེ་ཐེབས་ཏེ། ཞིང་ལས་དང་འབྲུ་རིགས་ལ་གནོད་པ་ཤུགས་ཆེན་ཐེབས་ཡོད་པ་མ་ཟད། ཞིང་པ་མང་པོས་ཞིང་ལས་གཉེར་མ་ཐུབ་པའི་གནས་སྟངས་སོགས་བྱུང་ཡོད་པས་འབྲུ་རིགས་ཐད་ནས་དཀའ་ངལ་ལྷག་མ་ཞིག་འབྱུང་རྒྱུ་ཡིན་པའི་ཚོད་དཔག་བྱེད་བཞིན་ཡོད་འདུག

གསར་འགོད་པ། སངས་རྒྱས་དཀོན་མཆོག