རྒྱ་ནག་གཞུང་གིས་དབྱིན་ཡུལ་གཞུང་ལ་ཏོག་དབྱིབས་ནད་ཡམས་ཀྱི་གནོད་སྐྱོན་གུན་གསབ་ཏུ་དབྱིན་སྒོར་ཐེར་འབུམ་ ༣༥༡ སྤྲོད་དགོས་པའི་དགོས་འདུན་བཏོན་འདུག
རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། དབྱིན་ཡུལ་ནང་ཕྱི་སྲིད་དང་དམངས་གཙོ། འགྲོ་བ་མིའི་ཐོབ་དང་རང་དབང་སོགས་ཀྱི་ལས་དོན་གཉེར་བཞིན་པའི་(Henry Jackson)ཚོགས་པས། ཏོག་དབྱིབས་ནད་དུག་གི་གུན་གསབ་ ཅེས་པའི་ཞིབ་འཇུག་སྙན་ཐོ་ཞིག་བཏོན་ཏེ། རྒྱ་ནག་གཞུང་གིས་ད་སྔ་བར་དབྱིན་ཡུལ་གཞུང་ལ་ནད་གཞི་འདིའི་འོག དབྱིན་སྒོར་ཐེར་འབུམ་ ༣༥༡ གི་གུན་གསབ་ངེས་པར་དུ་སྤྲོད་དགོས་པ་མ་ཟད། རྒྱ་ནག་གཞུང་མཉམ་འབྲེལ་རྒྱལ་ཚོགས་དང་རྒྱལ་སྤྱིའི་ཁྲིམས་ཁང་སོགས་ཀྱི་ནང་ཁྲིམས་གཏུག་བྱ་རྒྱུ་ཡིན་སྐོར་རྗོད་བཞིན་འདུག
སྙན་ཐོའི་ནང་། རྒྱལ་སྤྱིའི་འཕྲོད་བསྟེན་སྒྲིག་འཛུགས་འོག་ཁྲིམས་མཐུན་ངང་གནས་པའི་རྒྱལ་ཁབ་ཅིག་ཡིན་ཚེ། རྒྱལ་ཁབ་གང་དེའི་ནང་ནད་ཡམས་སོགས་འཕྲོད་བསྟེན་དང་འབྲེལ་བའི་གནས་ཚུལ་ཚབས་ཆེན་རིགས་ག་རེ་བྱུང་ཡང་གནས་ཚུལ་ཆ་ཚང་རྒྱལ་སྤྱིའི་འཕྲོད་བསྟེན་སྒྲིག་འཛུགས་ལ་ཞུ་དགོས་ཀྱི་ཡོད། དེར་བརྟེན། རྒྱ་ནག་གཞུང་གིས་ཏོག་དབྱིབས་ནད་དུག་གི་འགན་ཆ་ཚང་འཁུར་དགོས་ཀྱི་ཡོད། ཅེས་བརྗོད་ཡོད་པ་དང་། གལ་སྲིད་རྒྱ་ནག་གཞུང་གིས་ཏོག་དབྱིབས་ནད་དུག་གི་འགན་ཆ་ཚང་མ་འཁུར་ཚེ། རྒྱ་ནག་གཞུང་གིས་རྒྱལ་སྤྱིའི་སྒྲིག་འཛུགས་དང་ཁྲིམས་ཁང་སོགས་བརྒྱུད་དབྱིན་ཡུལ་གཞུང་ལ་དབྱིན་སྒོར་ཁྲག་ཁྲིག་མང་པོ་སྤྲོད་དགོས་འཁེལ་གྱི་ཡོད་སྐོར་བརྗོད་འདུག
ད་ལྟའི་ཆར་དབྱིན་ཡུལ་ནང་ཏོག་དབྱིབས་ནད་དུག་ཁྲོད་མི་གྲངས་ ༤༣༡༣ རྐྱེན་འདས་དང་། ནད་དུག་ཕོག་པའི་མི་གྲངས་ཁྱོན་ ༤༧༨༠༦ བཅས་ཡོད་འདུག་ལ། ལོན་ཌོན་དུ་ཡོད་པའི་མཐོ་སློབ་(Imperial College) ཀྱི་ཏོག་དབྱིབས་ནད་དུག་སྔོན་འགོག་ལས་དོན་གཉེར་མཁན་སློབ་དཔོན་ཆེན་མོ་ནལ་ཧྥར་གྷོ་སན་(Neil Ferguson)ལགས་ཀྱིས། དབྱིན་ཡུལ་ནང་ཏོག་དབྱིབས་ནད་དུག་ཁྲོད་རྐྱེན་འདས་ཀྱི་གྲངས་འབོར་མི་ཁྲི་ ༢ ལྷག་བརྒལ་རྒྱུ་ཡིན་པའི་སེམས་འཚབ་བྱེད་བཞིན་ཡོད་འདུག
ཉེ་སྔོན་ཕྱི་ཟླ་ ༤ ཚེས་ ༡ ཉིན་རྒྱ་གར་བྱང་ཕྱོགས་ཨོ་ཊར(Uttar Pradesh)མངའ་སྡེའི་ལཱ་ཁེམ་པོར(Lakhimpur)གྲོང་ཁྱེར་གྱི་ཁྲིམས་རྩོད་པ་དང་སྤྱི་ཚོགས་ལས་འགུལ་བ་ ༤༠ ལྷག་མཉམ་འབྲེལ་གྱིས་མངའ་སྡེ་དེའི་ས་གནས་ཁྲིམས་ཁང་ལ་རྒྱ་ནག་གི་མཐོ་རིམ་མགོ་འཁྲིད་ཚོས་ཏོག་དབྱིབས་ནད་ཡམས་སྐོར་གྱི་གནས་ཚུལ་སྦས་གསང་བྱས་ཏེ། འཛམ་གླིང་ཡོངས་སུ་ཁྱབ་ཏུ་བཅུག་པ་དང་མི་གྲངས་ས་ཡ་མང་པོའི་ཚེ་སྲོག་ཉེན་ཁར་ལྷུང་ཡོད་པའི་ནག་ཉེས་འོག་རྒྱ་ནག་གི་མགོ་འཁྲིད་ཞི་ཅིན་ཕིན་ཁྲིམས་གཏུགས་བྱས་ཡོད་པ་དང་།
ཕྱི་ཟླ་ ༣ ཚེས་ ༢༤ ཉིན་ཨ་རིའི་ཁྲིམས་རྩོད་པ་ལེ་རེ་ཁལ་མན་ལགས་ཀྱིས་གཙོ་གཉེར་བྱེད་བཞིན་པའི་རང་དབང་ལྟ་ཞིབ་ཚོགས་པ་དང་། ཊག་སཱ་སིའི་ནང་རྟེན་གཞི་བྱས་པའི་(Buzz Photos)ཞེས་པའི་པར་རིས་གསར་ཁང་གཉིས་ཀྱིས། ཏོག་དབྱིབས་ནད་ཡམས་དང་འབྲེལ་རྒྱ་ནག་གཞུང་དང་རྒྱ་ནག་གི་དམག་མི། དེ་བཞིན། ཝུ་ཧན་ནང་གི་རྒྱ་ནག་གི་ཆེས་མཐོའི་ནད་ཡམས་རིག་པ་ཞིབ་འཇུག་ལྟེ་གནས་ཁང་དང་དེའི་འགན་འཛིན་ཧྲི་ཀྲན་ལི། རྒྱ་ནག་གི་སྤྱི་ཁྱབ་དམག་དཔོན་ཁྲིན་ཝི་(Chen Wei)བཅས་ལ་ཏོག་དབྱིབས་ནད་ཡམས་ཁྱབ་སྤེལ་བཏང་བའི་ནག་ཉེས་འོག་ཨ་རིའི་གཞུང་ལ་ཁྲིམས་གཏུག་བྱས་ཡོད་པ་དང་། དེ་བཞིན། ཕྱི་ཟླ་ ༣ ཚེས་ ༡༦ ཉིན་རྒྱ་གར་གྱི་ཤར་ཕྱོགས་བྷི་ཧར་མངའ་སྡེའི་ཁྲིམས་རྩོད་པ་སུ་དྷིར་ཀུ་མཱར་ཨོ་ཇ་(Sudhir Kumar Ojha)ཞེས་པ་ཞིག་གིས། རྒྱ་ནག་གི་སྲིད་འཛིན་ཞི་ཅིན་ཕིན་དང་། རྒྱ་གར་དུ་ཡོད་པའི་རྒྱ་ནག་གི་གཞུང་ཚབ་པ་སིན་ཝེ་ཏུང་གཉིས་ཁྲིམས་གཏུགས་བྱས་ཡོད་པ་དང་། ཕྱི་ཟླ་ ༣ ཚེས་ ༡༧ ཉིན་ཨ་རིའི་ཧྥི་ལོ་རེ་དྷ་མངའ་སྡེའི་བྷོ་ཁཱ་རཱ་ཊོན་(Boca Raton)བྷིར་མན་ཁྲིམས་ལུགས་ཚོགས་(Berman Law Group)པས། རྒྱ་ནག་གཞུང་གིས་ཏོག་དབྱིབས་ཐད་གུན་གསབ་སྤྲོད་དགོས་པའི་དགོས་འདུན་འོག་ཁྲིམས་གཏུགས་བྱས་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
རྒྱ་ནག་དམར་ཤོག་ཚོགས་པའི་གཙོ་འཛིན་གྱིས་གཙོས་དམར་ཤོག་ཚོགས་པའི་ལས་བྱེད་རྣམས་ནས་འཛམ་གླིང་གང་སར་རྒྱ་ནད་ཀྱིས་མནར་བཅུག་པར་རྟེན་དེ་དག་ལ་གུན་གསབ་ངེས་པར་སྤྲད་དགོས། དེ་མིན་ན་འཛམ་གླིང་ཡོངས་རྫོགས་གཅིག་ཏུ་བྱས་ནས་དམག་རྒྱག་དགོས།།