ཐེམ་སྤང་བཀའ་རྒྱར་བརྩི་སྲུང་མ་བྱས་པར་སྐྱེས་པ་འགའ་བྷག་སུའི་འབབ་ཆུའི་འགྲམ་དུ་ཕྱིན་ཏེ་སྐྱེས་པ་གཅིག་ཆུའི་ནང་བྱིང་ནས་རྐྱེན་འདས་སུ་ཕྱིན།
ཁ་སང་དགོང་མོར་དྷ་རམ་ས་ལ་རུ་གནས་སྡོད་རྒྱ་གར་གྱི་སྐྱེས་པ་འགའ་བྷག་སུའི་ལུང་ཁུག་ཏུ་ཕྱིན་ཏེ། ཕོ་གསར་ཞིག་བྷག་སུའི་འབབ་ཆུའི་ནང་བྱིང་ནས་འདས་གྲོངས་སུ་སོང་ཡོད་པ་དང་། དེ་རིང་སྔ་དྲོར་ས་གནས་ཉེན་རྟོག་པས་སྐྱེས་པ་དེའི་ཕུང་པོ་ཆུ་ནས་བཏོན་ཏེ་བརྟག་དཔྱད་ཆེད་སྨན་ཁང་དུ་འཁུར་ཕྱིན་འདུག
འདི་གའི་གསར་འགོད་པས་མེག་གྷན་ས་གནས་ཉེན་རྟོག་ཁང་དུ་ཁ་པར་བརྒྱུད་དེའི་སྐོར་སྐད་ཆ་དྲིས་པར། མདང་དགོང་ས་གནས་ཡུལ་མི་སྐྱེས་པ་འགའ་བྷག་སུའི་འབབ་ཆུའི་འགྲམ་དུ་ཕྱིན་ཏེ་གནས་ཚུལ་ལྷག་ཡོད་པ་དང་། ད་ལྟའི་ཆར་སྐྱེས་པ་དེའི་ཕུང་པོ་བརྟག་དཔྱད་ཆེད་བཏང་ཡོད་སྟབས། ཨ་རག་བཏུང་ནས་ཆུའི་ནང་ལྷུང་བ་ཡིན་མིན་སོགས་ཤེས་རྟོགས་ཐུབ་ཀྱིི་མེད་སྐོར་དང་། ཁོའི་མཉམ་དུ་སྐྱེས་པ་གསུམ་ཙམ་ཡོད་པ་དེ་དག་གིས་ཐེམ་སྤང་བཀའ་རྒྱ་རྩིས་མེད་བཏང་བའི་ངོས་འཛིན་འོག ས་གནས་ཉེན་རྟོག་ཁང་དུ་ཉེས་དོན་ཐོ་འགོད་བྱས་ཡོད་སྐོར་བརྗོད་བྱུང་།
ཉེ་བའི་ལོ་ཤས་ནང་ཡུལ་མི་དང་ཕྱི་རྒྱལ་གྱི་སྤྲོ་འཆམ་པ་བཅས་སྐྱེས་པ་ཁག་ཅིག་གཅིག་རྗེས་གཉིས་མཐུད་དུ་བྷག་སུའི་འབབ་ཆུའི་ནང་བྱིངས་ཏེ་འདས་གྲོངས་སུ་ཕྱིན་ཡོད་པ་རེད།
གསར་འགོད་པ། པ་སངས་ཚེ་རིང་།
text