རྒྱུད་སྨད་མཁན་ཟུར་ཞིག་ལ་ཨོ་གླིང་གཟེངས་རྟགས་ཐོབ།

རྒྱུད་སྨད་མཁན་ཟུར་བཀྲ་ཤིས་ཚེ་རིང་ལགས་ནས་ཨོ་གླིང་ནང་འདས་པའི་ལོ་ངོ་ ༣༠ ལྷག་གི་རིང་མི་མང་ལ་ནང་ཆོས་ངོ་སྤྲོད་དང་ཤེས་ཡོན་གོ་རྟོགས་སྤེལ་བར་ཆེ་བསྟོད་དུ་ཨོ་གླིང་གཞུང་ནས་གཟེངས་རྟགས་ཤིག་འབུལ་གཏན་འཁེལ་འདུག རྒྱུད་སྨད་མཁན་ཟུར་བཀྲ་ཤིས་ཚེ་རིང་ལགས་ཀྱིས། འདས་པའི་ལོ་ངོ་ ༣༠ ལྷག་གི་རིང་ཨོ་གླིང་མི་མང་ལ་ནང་ཆོས་དང་ཤེས་ཡོན་ཐོག་ནས་ཞབས་འདེགས་རྒྱ་ཆེར་ཞུས་དང་ཞུ་བཞིན་པར་བརྟེན། ཨོ་གླིང་གཞུང་གིས་ཆེད་བསྟོད་ངོས་འཛིན་གྱི་གཟེངས་རྟགས་ (Order of Australia medal Zes) ཞེས་པ་འབུལ་གཏན་འཁེལ་ཡོད་འདུག

འདི་གའི་གསར་འགོད་པས་ཞལ་པར་བརྒྱུད་མཁན་ཟུར་བཀྲ་ཤིས་ཚེ་རིང་ལགས་སུ་འབྲེལ་བ་ཞུ་སྐབས། ཞབས་ཞུ་བ་ཨ་ནེ་བཀྲ་ཤིས་ལགས་ནས་མཁན་ཟུར་བཀྲ་ཤིས་ཚེ་རིང་ལགས་ད་ལྟའི་ཆར་ལས་བྲེལ་ཡིན་པ་དང་། གཟེངས་རྟགས་དེ་ནི་ཨོ་གླིང་གཞུང་གིས་སྤྱི་ཚོགས་ནང་ཞབས་ཞུ་གཙོས་པའི་འབུར་དུ་ཐོན་པའི་མི་རྣམས་ལ་སྤྲོད་སྲོལ་ཡོད་པའི་གཟེངས་རྟགས་གལ་ཆེན་ཞིག་ཡིན་སྐོར་སོགས་བརྗོད་བྱུང་།

མཁན་ཟུར་བཀྲ་ཤིས་ཚེ་རིང་ལགས་ནི་ཕྱི་ལོ་ ༡༩༣༧ ལོར་ཁམས་ཏྲེ་ཧོར་དཀར་མཛེས་སུ་ ༡༩༣༧ ལོར་སྐུ་འཁྲུངས་ཤིང་། ཆུང་དུས་ཁང་དམར་དགོན་དུ་ཞུགས། དགུང་གྲངས་ ༡༧ ཐོག་དབུས་སུ་ཕེབས་ཏེ་སེར་བྱེས་གྲྭ་ཚང་དུ་ཞུགས་ཏེ་ངེས་དོན་གྱི་འདུལ་བ་འཛིན་པ་ཆེན་པོ་རྗེ་བཙུན་བྱམས་པ་བརྟན་བཟང་མཆོག་དགེ་རྒན་དུ་བསྟེན། ཕྱི་ལོ་ ༡༩༥༩ ལོར་བཙན་བྱོལ་དུ་ཕེབས་ནས་སྦག་སར་བཞུགས་ནས་སློབ་གཉེར་གནང་། ཕྱི་ལོ་ ༡༩༧༠ ལོར་རྒྱ་གར་ལྷོ་ཕྱོགས་མེ་སོར་སྦེལ་ཀོབ་ཏུ་སྤོས་ནས་སྔར་བཞིན་སློབ་གཉེར་འཕྲོ་བསྐྱངས་པ་དང་། དགེ་ཕྲུག་རྣམས་ལ་དཔེ་ཁྲིད་གནང་། དེ་བཞིན། གྲྭ་ཚང་གི་འཛིན་གྲྭ་ཐོན་ནས་དགེ་ལུགས་རྒྱུགས་སྤྲོད་ཆེན་མོར་ཕེབས་ནས་བཀའ་རམས་དང་། སློབ་དཔོན། ལྷ་རམས་བཅས་ཀྱི་རྒྱུགས་རྣམས་ལེགས་པར་གྲུབ་སྟེ། ཕྱི་ལོ་ ༡༩༨༣ ལོར་ལྷ་རམས་ཨང་རིམ་དང་པོའི་མཚན་གནས་བཞེས། ཕྱི་ལོ་ ༡༩༨༨ ལོར་རྒྱུད་སྨད་གྲྭ་ཚང་དུ་ཊཱིཀྐ་སྐྱོར་རྒྱུགས་དང་། སྔགས་ཀྱི་དམ་འཇོག་དང་དགེ་བསྐོས་བཅས་ལེགས་པར་གྲུབ། ཕྱི་ལོ་ ༡༩༩༠ ལོར་༸གོང་ས་མཆོག་གི་སྐུ་མདུན་དུ་སེ་ར་ཆོས་སྒར་དུ་སྔགས་ཀྱི་རྩོད་རྒྱུགས་ཕུལ་ཏེ་ཨང་རིམ་དང་པོའི་མཚན་གནས་ཐོབ། ཕྱི་ལོ་ ༡༩༩༡ ལོར་ཨོ་གླིང་དུ་ཕེབས་ཏེ། སྤྱན་རས་གཟིགས་ཆོས་ཚོགས་གཙོས་ཆོས་ཚོགས་དུ་མ་ཞིག་ཏུ་རྒྱལ་ཁབ་དང་མི་རིགས་མི་འདྲ་བ་རྣམས་ལ་ལམ་རིམ་དང་བློ་སྦྱོང་ཁྲིད། ཕྱི་ལོ་ ༢༠༠༩ ལོར་རྒྱུད་སྨད་གྲྭ་ཚང་གི་བླ་མར་ཕེབས་པ་དང་ཕྱི་ལོ་༢༠༡༤ ལོར་རྒྱུད་སྨད་ཀྱི་མཁན་པོར་ཕེབས་ཡོད་འདུག

ཨོ་གླིང་གི་གཟེངས་རྟགས་དེ་ད་ལན་བོད་མི་ཞིག་ལ་ཐོབ་པ་ཐེངས་གཉིས་པ་དེ་ཆགས་ཡོད་པ་དང་། ཕྱི་ལོ་ ༢༠༠༧ ཡས་མས་སུ་སྤྱི་ཚོགས་ཞབས་ཞུ་བ་རྣམ་རྒྱལ་ཚེ་རིང་ཞུ་བ་ཞིག་ལ་གཟེངས་རྟགས་དེ་གནང་ཡོད་པ་དང་། གཟེངས་རྟགས་དེ་ཨོ་གླིང་གི་མི་སེར་ཡིན་མིན་ལ་ཁྱད་པར་མེད་པར་ཨོ་གླིང་གཞུང་གིས་མི་སྣ་བྱས་རྗེས་ཅན་དང་གཞན་ཕན་གྱི་ལས་དོན་སྒྲུབ་མཁན་རྣམས་ལ་འབུལ་སྲོལ་ཡོད་པ་ཞིག་རེད་འདུག

གསར་འགོད་པ། སྐལ་བཟང་སྦྱིན་པ།