ཨ་རིས་རྒྱ་ནག་གི་ཚོང་ཟོག་བཀག་སྡོམ་གྱི་བཀའ་ཁྱབ་དྲུག་པ་བཏང་།

རྒྱ་ནག་གིས་ཤར་ཊུར་ཀི་སི་ཐན་ཁུལ་གྱི་ཡུ་གུར་མི་རིགས་གཙོས་པའི་ཁ་ཆེའི་གྲངས་ཉུང་མི་རིགས་རྣམས་ངལ་རྩོལ་བཙན་བཀོལ་བྱེད་བཞིན་པར་ངོ་རྒོལ་ཆེད་ཨ་རིས་ཚོང་ཟོག་བཀག་སྡོམ་གྱི་བཀའ་ཁྱབ་ཐེངས་དྲུག་པ་བཏང་འདུགདེ་རིང་ཨ་རིའི་སི་ཨེན་ཨེན་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་ཕྱི་ཚེས་ ༢ ཉིན་བསྐྱར་དུ་སྲིད་འཛིན་ཊོམ་ཕུ་མཆོག་གི་འཛིན་སྐྱོང་གིས། ཤར་ཊུར་ཀི་སི་ཐན་ནས་བཙན་བཀོལ་ངལ་རྩོལ་བརྒྱུད་ཐོན་སྐྱེད་བྱས་པའི་སྲིན་བལ་གྱི་ཚོང་ཟོག་རྣམས་ཨ་རིར་ནང་འདྲེན་མི་ཆོག་པ་བཟོས་སྟེ། རྒྱ་ནག་གིས་ཤར་ཊུར་ཀི་སི་ཐན་ཁུལ་གྱི་ཡུ་གུར་མི་རིགས་གཙོས་པའི་ཁ་ཆེའི་གྲངས་ཉུང་མི་རིགས་ཐོག་དྲག་གནོན་གྱི་སྲིད་བྱུས་སྤེལ་བཞིན་པར་ངོ་རྒོལ་གྱི་བཀའ་ཁྱབ་ཐེངས་དྲུག་པ་དེ་ཡིན་འདུག

ཁ་སང་ཨ་རིའི་བདེ་སྲུང་ལྷན་ཁང་གི་དྲུང་ཆེ་གཞོན་པ་ཀེན་ཁུ་ཆི་ན་ལི་ (Ken Cuccinelli) ཡིས། ཚོང་ཟོག་སྟེང་འཁོད་པའི་རྒྱ་ནག་ནས་བཟོས་ཞེས་པའི་ཡིག་འབྲུ་དེས་རྒྱལ་ཁབ་ཀྱི་ཁུངས་ཙམ་སྟོན་གྱི་མེད་པར། དེ་ནི་ཉེན་ཁའི་བརྡ་ཞིག་རེད། ཁྱེད་ཀྱིས་དྲིན་གཟོའི་ཉིན་མོར་(Thanksgiving day) རང་གི་ནང་མི་དང་གྲོགས་པོའི་ཆེད་དུ་ཉོ་བཞིན་པའི་སྲིན་བལ་དེ་དག གལ་ཏེ་རྒྱ་ནག་ནས་དབོར་འདྲེན་བྱས་པ་ཞིག་ཡིན་ཚེ། དེ་ནི་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་བཏང་ནས་བཙན་བཀོལ་ངལ་རྩོལ་པ་རྣམས་ཀྱིས་བཟོས་པ་ཞིག་ཡིན་སྲིད། ཅེས་བརྗོད་འདུག

འཛིན་སྐྱོང་གི་བཀའ་ཁྱབ་གཞིར་བཟུང་ཨ་རིའི་སྒོ་ཁྲལ་དང་ས་མཚམས་སྲུང་སྐྱོབ་ལས་ཁུངས་ (US Customs and Border Protection) གྱིས་ཤར་ཊུར་ཀི་སི་ཐན་ནས་འབྱོར་བའི་སྲིན་བལ་གྱི་ཚོང་ཟོག་ཚང་མ་ཨ་རིའི་གྲུ་ཁར་བཀག་སྐྱིལ་བྱས་ཏེ། བཟོ་ཚོང་ཁང་ཚོར་ཚོང་ཟོག་ཕྱིར་སློག་བྱ་རྒྱུའམ། ཡང་ན་ཚོང་ཟོག་རྣམས་བཙན་བཀོལ་ངལ་རྩོལ་བརྒྱུད་ཐོན་སྐྱེད་བྱས་མེེད་པ་བདེན་དཔང་བྱེད་དགོས་ཀྱི་ཡོད་འདུག ཨ་རིའི་ལས་ཁུངས་འདིས་འདི་ལོར་འཛམ་གླིང་ཁྱོན་ཡོངས་ནང་ཚོང་ཟོག་བཀག་སྐྱིལ་གྱི་བཀའ་ཁྱབ་ཐེངས་ ༡༣ བཏང་བའི་ཁྲོད་ནས་ ༨ ནི་ཤར་ཊུར་ཀི་སི་ཐན་ནས་ཐོན་པའི་ཚོང་ཟོག་ལ་དམིགས་པ་ཞིག་ཡིན་འདུག འདི་ལོའི་ཕྱི་ཟླ་ ༧ པའི་ནང་ལས་ཁུངས་དེས་རྒྱལ་ཕྱི་ནང་གི་བཟོ་ཚོང་ཁང་ལ་ཡོངས་ཁྱབ་ཀྱི་ལམ་སྟོན་ཞིག་བཏང་བའི་ནང་། རྒྱ་ནག་གཞུང་གིས་ཡུ་གུར་བ་གཙོས་པའི་ཆོས་ལུགས་སྡེ་ཁག་གི་གྲངས་ཉུང་མི་རིགས་ཐོག་དྲག་གནོན་གྱི་སྲིད་བྱུས་ལག་བསྟར་བྱེད་བཞིན་ཡོད་པ་དང་། ལྷག་པར་དུ་ཤར་ཊུར་ཀི་སི་ཐན་ཁུལ་དུ་བཙན་བཀོལ་ངལ་རྩོལ་ཐབས་བྱུས་ལག་བསྟར་བྱེད་བཞིན་ཡོད་པའི་ཉེན་བརྡ་བཏང་ཡོད་པ་རེད།

ཕྱི་ལོ་ ༢༠༡༧ ལོར་མགོ་འཛུགས་པའི་ཨ་རྒྱའི་ཚོང་དམག་ཐོག ཉེ་བའི་ལོ་ཤས་ནང་རྒྱ་ནག་གཞུང་གིས་ཤར་ཊུར་ཀི་སི་ཐན་ཁུལ་གྱི་ཡུ་གུར་གཙོས་པའི་ཁུལ་དེའི་ཁ་ཆེ་གྲངས་ཉུང་མི་རིགས་རྣམས་བསྒྱུར་བཀོད་ཁང་དུ་བཀག་ཉར་བྱེད་ཀྱི་ཡོད་པ་མ་ཟད། བཙོན་པ་རྣམས་རྒྱ་ནག་གི་བཟོ་གྲྭ་ཁག་ཏུ་བཙན་དབང་གིས་ངལ་རྩོལ་བྱེད་དུ་འཇུག་གི་ཡོད་པའི་གནས་ཚུལ་རིམ་པར་ཐོན་པ་དང་བསྟུན། ཨ་རིས་ཤར་ཊུར་ཀི་སི་ཐན་ཁུལ་གྱི་རྒྱ་རིགས་མགོ་འཁྲིད་ཚོར་དཔལ་འབྱོར་ཉེས་ཆད་གཅོད་རྒྱུའི་ཐབས་བྱུས་ཐོག་ནས་རྒྱ་ནག་ལ་གནོན་ཤུགས་སྤྲོད་ཐབས་བྱས་ཡོད་ལ། རྒྱལ་སྤྱིའི་གྱོན་ཆས་དང་རླངས་འཁོར་གྱི་བཟོ་གྲྭ་མང་པོས་ཀྱང་རང་གི་ཚོང་ཟོག་ནང་ཤར་ཊུར་ཀི་སི་ཐན་གྱི་བཙན་བཀོལ་ངལ་རྩོལ་པའི་རྔུལ་ཁྲག་འདྲེས་མེད་པའི་གསལ་བཤད་ཡང་དང་བསྐྱར་དུ་བྱེད་དགོས་འཁེལ་ཡོད་པ་རེད།

གཞན་ཡང་། ཁ་སང་ཨ་རིའི་གྲོས་ཚོགས་འོག་མས་ཕྱིའི་བཟོ་ཚོང་ཁང་རྣམས་ལ་འགན་འཁུར་དུ་འཇུག་རྒྱུའི་ཁྲིམས་འཆར་ (Holding Foreign Companies Accountable Act) ཞེས་པ་དེ་གཏན་འབེབ་གནང་ནས་སྲིད་འཛིན་ཊོམ་ཕུ་མཆོག་ལ་བཏང་ཡོད་འདུག གལ་ཏེ་ཁྲིམས་འཆར་དེ་ཁྲིམས་ཡིག་ཅིག་ཏུ་གཏན་འབེབ་བྱུང་ཚེ། ཨ་རིའི་ནང་ཚོང་དོན་གཉེར་མཁན་གྱི་ཕྱིའི་བཟོ་ཚོང་ཁང་རྣམས་ཀྱིས་ངེས་པར་དུ་ཨ་རིའི་གཞུང་ལ་ཞིབ་འཇུག་གི་ཆེད་དུ་རང་གི་རྩིས་ཁྲ་མཁོ་སྤྲོད་བྱེད་དགོས་ཀྱི་ཡོད་འདུག ཁྲིམས་འཆར་དེ་ནི་རྒྱ་ནག་གི་བཟོ་ཚོང་ཁང་དག་ལ་དམིགས་པ་ཞིག་ཡིན་འདུག ད་བར་རྒྱ་ནག་གི་བཟོ་ཚོང་ཁང་མང་པོས་རྒྱལ་ཁབ་ཀྱི་གསང་བ་སྲུང་སྐྱོབ་ཀྱི་ཁྲིམས་ཡིག་ལ་ཁ་གཡར་ཏེ་ཨ་རིའི་འབྲེལ་ཡོད་ལས་ཁུངས་ལ་རྩིས་ཁྲ་གསལ་པོ་སྟོན་གྱི་མེད་པ་ཀྱང་། ད་ལན་གྱི་ཁྲིམས་ཡིག་དེ་གཏན་འབེབ་བྱུང་ན་རྩིས་ཁྲ་མ་སྤྲད་ཚེ་ཨ་རིའི་ནང་ཚོང་དོན་གཉེར་མི་ཆོག་པ་བཟོ་རྒྱུ་ཡིན་འདུག

གསར་འགོད་པ། པ་སངས་ཚེ་རིང་།