ཝར་གེ་ཐེབས་རྩ་ (Varkey Foundation) ཡིས་རྒྱ་གར་གྱི་དགེ་རྒན་རཱན་ཇི་སིན་ཌི་སཱལ་ (Ranjitsinh Disale) ལགས་ལ་ཨ་སྒོར་ས་ཡ་གཅིག་ཅན་གྱི་གོ་ལའི་དགེ་རྒན་གྱི་གཟེངས་རྟགས་གནང་བར་༧གོང་ས་རྒྱལ་བ་རིན་པོ་ཆེ་མཆོག་ནས་འཚམས་འདྲི་མཛད་འདུག
ཁ་སང་ཕྱི་ཚེས་ ༤ ཉིན། ༧གོང་ས་རྒྱལ་བ་རིན་པོ་ཆེ་མཆོག་ནས་ཉེ་ལམ་རྒྱ་གར་གྱི་དགེ་རྒན་རཱན་ཇི་སིན་ཌི་སཱལ་ (Ranjitsinh Disale) ལགས་ལ་གོ་ལའི་དགེ་རྒན་གྱི་གཟེངས་རྟགས་ (Global Teacher Prize) ཐོབ་པར་འཚམས་འདྲིའི་གསུང་འཕྲིན་ཞིག་གནང་ཡོད་པ་དང་། གསུང་འཕྲིན་ནང་༧གོང་ས་རྒྱལ་བ་རིན་པོ་ཆེ་མཆོག་གིས། བྱིས་པར་སློབ་གསོ་སྤྲོད་པ་དང་ལྷག་པར་དུ་ཉམ་ཐག་དང་མཁོ་ངེས་ཅན་གྱི་བྱིས་པར་སློབ་གསོ་སྤྲོད་པ་ནི་ཕྱོགས་གཅིག་ནས་ཁོང་ཚོ་མི་སྒེར་རེ་རེར་རོགས་རམ་བྱེད་ཐབས་ཡག་ཤོས་དང་། འཛམ་གླིང་འདི་སྔར་ལས་ལྷག་པ་ཞིག་བསྐྲུན་ཐབས་ཡག་ཤོས་དེ་ཡིན་སྐོར་གསུངས་འདུག
ཡང་གསུང་འཕྲིན་ནང་། ཁྱེད་ཀྱིས་ཕྱག་ལས་གནང་སྟེ་གོ་སྐབས་ཐོབ་ཀྱི་མེད་པའི་བུ་མོ་རྣམས་སློབ་གྲྭར་གཏོང་ཐབས་བྱེད་པ་མ་ཟད། འཛམ་གླིང་གི་རྒྱལ་ཁབ་ ༨༣ ཙམ་གྱི་བྱིས་པར་དྲ་ཐོག་བརྒྱུད་སོ་སོའི་སྐད་ཡིག་ཐོག་ཚན་རིག་གི་སློབ་ཚན་རྣམས་ཁྲིད་ཐབས་སུ་བསླབ་གཞི་སོགས་མཁོ་སྒྲུབ་གནང་བ་དང་། ཁྱེད་ཀྱི་ལས་གཞི་འདི་ཡིས་འཛམ་གླིང་གི་རྩོད་རྙོག་ཆེ་བའི་ས་ཁུལ་གྱི་གཞོན་སྐྱེས་རྣམས་ཕན་ཚུན་དབར་འབྲེལ་ཐག་འཛུགས་བཞིན་པ་ནི་སྙིང་རྗེ་ལག་བསྟར་བྱེད་པའི་དཔེ་མཚོན་གསོན་པོ་དེ་རེད། ཅེས་དང་། ཁྱེད་ཀྱིས་ང་ཚོའི་མཉམ་དུ་འགྱུར་བ་ཞིག་གཏོང་ཐུབ་ལ། ང་ཚོས་འཛམ་གླིང་འདི་སྔར་ལས་ལྷག་པའི་གནས་ཁྱིམ་ཞིག་ཏུ་བསྒྱུར་ཐུབ། ཅེས་གསུངས་པ་དེ་ནི་ཧ་ཅང་བདེན་པ་རེད། ཁྱེད་ཀྱི་མིག་དཔེར་འོས་པའི་ཞབས་ཞུ་ཡིས་གཞན་ལ་བློ་སྤོབས་སྦྱིན་ཏེ་ཁོང་ཚོ་ཁྱེད་ཀྱི་རྗེས་སུ་འཇུག་ངེས་པ་རེད། ཅེས་གསུངས་འདུག
ཁ་སང་ཕྱི་ཚེས་ ༤ ཉིན་ཝར་གེ་ཐེབས་རྩ་ (Varkey Foundation) ཡིས་ཨ་སྒོར་ས་ཡ་གཅིག་ཅན་གྱི་གོ་ལའི་དགེ་རྒན་གྱི་གཟེངས་རྟགས་དེ། རྒྱ་གར་གྱི་མ་ཧཱ་ར་ཤི་ཊ་ (Maharashtra) མངའ་སྡེའི་རྟག་ཏུ་ཆུ་ལོག་གི་ཉེན་ཁ་ཆེ་བའི་ཛི་ལ་པ་རེ་ཤཱ་དམའ་རིམ་སློབ་གྲྭའི་ (Zilla Parishad Primary School) ནང་དགེ་རྒན་གྱི་བྱ་བ་གཉེར་བཞིན་པའི་དགེ་རྒན་རཱན་ཇི་སིན་ཌི་སཱལ་ (Ranjitsinh Disale) ལགས་ལ་སྤྲད་པ་དྲ་ཐོག་ནས་མཛད་སྒོ་ཞིག་འཚོགས་ཡོད་པ་དང་། ཁོང་གིས་རང་ཉིད་ཀྱི་གཟེངས་རྟགས་དེའི་དངུལ་གྱི་ཕྱེད་ཀ་གཟེངས་རྟགས་དེའི་འོས་ཁོངས་སུ་ཞུགས་མཁན་རྣམས་ལ་བགོས་ཡོད་འདུག
འདི་ལོའི་ལོ་མགོ་ནས་བཟུང་རྒྱ་ནག་ནས་མཆེད་པའི་ཏོག་དབྱིབས་གཉན་རིམས་འཛམ་གླིང་གང་སར་ཁྱབ་གདལ་དུ་ཕྱིན་པ་དང་། ནད་ཡམས་དེ་འགོས་ཁྱབ་ཆེ་རུ་མི་འགྲོ་ཆེད་འཛམ་གླིང་ཁྱོན་ཡོངས་སུ་འགྲོ་འོང་བཀག་རྒྱ་བསྡམས་པའི་འོག་སློབ་གྲྭ་ཁག་སྒོ་རྒྱག་དགོས་བྱུང་སྟབས། སློབ་གྲྭ་སོ་སོའི་དུས་རྒྱུན་གྱི་སློབ་ཁྲིད་རྣམས་དྲ་ཐོག་ཏུ་བྱེད་ཀྱི་ཡོད་ནའང་། རྩོད་རྙོག་ཆེ་བའི་ཁུལ་དག་དང་ཁྱིམ་ཚང་གི་གནས་བབ་ཞན་པའི་ས་ཁུལ་གྱི་བྱིས་པ་རྣམས་ལ་དྲ་བའི་མཐུན་རྐྱེན་ཞན་པ་སོགས་ཀྱི་དབང་གིས་དགེ་རྒན་རཱན་ཇི་སིན་ཌི་སཱལ་ (Ranjitsinh Disale) སོགས་ཀྱིས་དྲ་བའི་མཐུན་རྐྱེན་སྤྲད་དེ་སློབ་ཁྲིད་བྱེད་བཞིན་པ་དང་། དབྱིན་ཡུལ་གྱི་དགེ་རྒན་ (Jamie Frost) ལགས་ཀྱིས་དྲ་ཐོག་ནས་གྲངས་རིག་བསླབ་གཞིའི་དྲ་ཚིགས་ཤིག་སྒོ་འབྱེད་བྱས་ཏེ། དྲ་ཐོག་ནས་སློབ་གཉེར་བྱེད་མཁན་དག་ལ་མཐུན་རྐྱེན་བསྐྲུན་པར་བརྟེན། ཝར་གེ་ཐེབས་རྩ་ (Varkey Foundation) ཡིས་ཁོང་ལའང་ཏོག་དབྱིབས་སྐབས་ཀྱི་དཔའ་བོ་ (Covid Hero) ཞེས་པའི་ཨ་སྒོར་ཁྲི་ ༥ མ་ཟིན་ཙམ་གྱི་དམིགས་བསལ་གྱི་གཟེངས་རྟགས་ཤིག་སྤྲད་ཡོད་འདུག
གསར་འགོད་པ། ཀླུ་མགོན་ཐར།
