རྒྱ་ནག་གཞུང་གིས་བོད་མཚོ་སྔོན་ཟི་ལིང་གྲོང་ཁྱེར་དུ་བོད་པའི་བུ་མོ་ཚེ་རིང་མཚོ་རང་ཁྱིམ་ནས་འཛིན་བཟུང་བྱས་ཏེ་ཁྲི་ཀ་རྫོང་སྤྱི་བདེ་བཀག་ཉར་ལྟེ་གནས་ཁང་ལ་བཙན་འཁྲིད་ཀྱིས་བཀག་སྐྱིལ་དང་དངུལ་ཆད་བཅད་ཡོད་འདུག
ཚེ་རིང་མཚོ་ལགས་ཀྱིས་ཕྱི་ཕྱོགས་ཀྱི་གསར་ཁང་ཁག་ཅིག་ལ་བརྗོད་པ་ལྟར་ན། འདི་ལོའི་ཕྱི་ཟླ་ ༡༡ ཚེས་ ༡༣ ཉིན་ཚེ་རིང་མཚོ་ལགས་ཟི་ལིང་གྲོང་ཁྱེར་གྱི་རང་ཁྱིམ་དུ་ཉེན་རྟོག་པ་བཅུ་ཡོང་ནས་འཛིན་བཟུང་བྱས་རྗེས་ཁྲི་ཀ་རྫོང་བཀག་ཉར་ཁང་དུ་ཉིན་གྲངས་ ༡༠ རིང་བཅུག་སྟེ། བཙོན་ཁང་དུ་སྡོད་རིང་ཉིན་ལྟར་ཟས་སུ་ཆུ་རྐྱང་དང་རླངས་བཙོས་བག་ལེབ་ཙམ་ལས་མ་སྤྲད་པར་ལྟོགས་སྐོམ་གྱི་མནར་གཅོད་བཏང་ཡོད་པ་མ་ཟད། འཇིགས་སྐུལ་བྱས་ཏེ་ཁོང་མོའི་དམངས་གཙོ་དང་ཁྲིམས་ལ་བཅིང་བའི་ཡིད་ཆེས་བསྒྱུར་ཐབས་བྱས་ཡོད་པ་དང་། མཚོ་སྔོན་ཉེན་རྟོག་ལས་ཁུངས་ཀྱིས་རྟག་ཏུ་ཁོང་མོ་དང་ལོ་ན་ ༨༠ སོན་པའི་ཁོང་མོའི་ཕ་རྒན་སོགས་ཁྱིམ་མི་ཡོངས་ལ་འཇིགས་སྐུལ་བྱེད་ཀྱི་ཡོད་སྐོར་བརྗོད་ཡོད་པ་རེད།
ཁོང་མོ་འཛིན་བཟུང་བྱས་པ་དང་འབྲེལ་ནས་ཕྱི་ཟླ་ ༡༡ ཚེས་ ༡༢ ཉིན་ཁྲི་ཀ་རྫོང་ཉེན་རྟོག་ཁང་གིས་ཚེ་རིང་མཚོ་ལ་ཉེས་འཛུགས་བྱས་པའི་ནང་། ཁོང་མོས་སྐད་འཕྲིན་བརྒྱུད་རྒྱལ་ཁབ་ཀྱི་བདེ་འཇགས་དང་འབྲེལ་བའི་གནས་ཚུལ་སྤེལ་ཏེ་སྤྱི་ཚོགས་ནང་རྙོག་གླེང་བཟོ་ཐབས་བྱེད་ཀྱི་ཡོད་ཚུལ་བཀོད་ཡོད་འདུག
ཡང་ཚེ་རིང་མཚོ་ལགས་ཀྱིས། ཐེངས་འདིར་རྒྱུ་མཚན་གསལ་ཁ་གང་ཡང་མེད་པའི་ཐོག་ནས་ང་འཛིན་བཟུང་བྱས་པ་རེད། ཁོང་ཚོས་རྒྱུན་དུ་ང་འཛིན་བཟུང་བྱེད་འདོད་ཡོད་ནའང་ཁག་འགེལ་ས་ཞིག་རྙེད་གི་མེད་པ་རེད། ད་ཐེངས་ང་ཐའེ་ལན་ཌི་ནས་ཕྱིར་འབྱོར་བ་ནས་བཟུང་ཁོང་ཚོས་འཛིན་བཟུང་བྱེད་རྩིས་ཡོད་པའི་ཚོར་སྣང་ཞིག་བྱུང་། ང་གཱང་ཌའོ་(Guangzhou) ལ་ནད་ཡམས་དང་འབྲེལ་ནས་ཟུར་བཀག་བྱེད་སྐབས་ནས་ཁོང་ཚོས་ང་འཛིན་བཟུང་བྱེད་ཐབས་བྱས་ཡོད་སྲིད་པ་ཞིག་རེད། མཐའ་མར་ཕྱི་ཟླ་ ༡༠ ཚེས་ ༢ ཉིན་ངས་སྐད་འཕྲིན་ནང་གནས་ཚུལ་གཉིས་བཀོད་པ་ལ་བརྟེན་ནས། རྒྱལ་ཁབ་བདེ་འཇགས་ལ་ཁ་གཡར་ཏེ་ཉིན་གྲངས་ ༡༠ རིང་བཀག་ཉར་བྱས་པ་རེད། དོན་དངོས་སུ་དོན་ཚན་གང་ཞིག་རྒྱལ་ཁབ་བདེ་འཇགས་དང་འགལ་ཡོད་པ་ཤེས་ཀྱི་མི་འདུག ཅེས་འགྲེལ་བརྗོད་བྱས་ཡོད་པ་རེད།
ཚེ་རིང་མཚོ་ལགས་རྒྱ་ནག་གཞུང་གིས་འཛིན་བཟུང་བཀག་ཉར་དང་འཇིགས་སྐུལ་བྱས་པ་སོགས་དང་འབྲེལ་ནས་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས། ཚེ་རིང་མཚོ་ཡིས་ཡིད་ཆེས་དང་བློ་སྤོབས་ཆེན་པོས་འགྲོ་བ་མིའི་ཐོབ་ཐང་ལོངས་སུ་སྤྱད་ནས་བོད་ནང་དུ་དམངས་གཙོ་དང་ཁྲིམས་སྐྱོང་གི་འདོད་བློ་དང་འབྲེལ་བའི་ཞི་འབོད་གནང་ཡོད་པ་དང་། རྒྱ་གཞུང་གིས་ཚེ་རིང་མཚོ་བཀག་བསྐྱིལ་གྱིས་ཁྲིམས་འགལ་སྦྱོར་བ་སྤེལ་བཞིན་པར་ངོ་རྒོལ་དང་རྒྱ་ནག་ལ་སྐྱོན་བརྗོད་བྱེད་ཀྱི་ཡོད་པ་མ་ཟད། རྒྱ་ནག་གཞུང་གིས་གཞུང་འབྲེལ་མིན་པའི་བོད་རིགས་ཚོགས་སྡེའི་མགོ་ཁྲིད་བཀག་སྐྱིལ་དང་སུན་གཙེར་གཏོང་བཞིན་པ་མཚམས་འཇོག་དགོས་པ་དང་། རྒྱལ་ཁབ་བདེ་འཇགས་དོ་དམ་སྲིད་བྱུས་ཟེར་བ་དེ་འཕྲལ་དུ་མཚམས་དགོས་སྐོར་སོགས་བརྗོད་འདུག
ཚེ་རིང་མཚོ་ནི་མཚོ་སྔོན་ཁྲི་ཀ་རྫོང་ནས་ཡིན་པ་དང་། ཉེ་ལམ་ཁོང་མོ་ཨ་རིའི་ཕྱི་སྲིད་ལྷན་ཁང་གི་གོ་སྒྲིག་བྱས་པའི་རྒྱལ་སྤྱིའི་མགོ་འཁྲིད་ཀྱི་ལས་གཞི་ཞིག་གི་ཐོག་མཉམ་ཞུགས་དང་རྒྱལ་སྤྱིའི་ཡུལ་སྐོར་དང་འབྲེལ་བའི་ལས་གཞི་ཞིག་གི་ནང་མཉམ་ཞུགས་བྱས་པར་བརྟེན། མཚོ་སྔོན་ཞིང་ཆེན་ཀྱི་སྤྱི་དམངས་བདེ་སྲུང་ཁང་དང་ཉེན་རྟོག་ལས་ཁུངས་ཀྱི་དམིགས་བསལ་དོ་སྣང་བྱ་ཡུལ་ཞིག་ཏུ་གྱུར་ཏེ་རྫོང་ཉེན་རྟོག་ལས་ཁུངས་ཀྱིས་ཡང་ཡང་འདྲི་རྩད་བྱེད་པ་དང་། ཁ་པར་བརྒྱུད་ཉེན་བརྡ་གཏོང་བ་དང་སྒེར་གྱི་བདེ་འཇགས་ལ་འཇིགས་སྐུལ་སོགས་བྱེད་ཀྱི་ཡོད་འདུག
གསར་འགོད་པ། ཀླུ་མགོན་ཐར།
